رواية لقاء اخر الفصل الثاني 2 - بقلم هاجر عفيفي

يونس بقلق: إيه اللي جابك هنا يا رقيه؟ والدة رقيه بحزن: كانت حامل والطفل نزل يا ابني. يونس بحزن: لا حول ولا قوة إلا بالله، معلش ربنا يعوضك خير. رقيه كانت ساكته تمامًا ومش عارفه تقول إيه. كريمه: الواطي طلقها وهي لسه خارجه من العملية، حسبي الله ونعم الوكيل فيه هو وأمهر. رقيه: ماما بعد إذنك كفايه. كريمه بغضب: لأ مش كفايه، بطلي تدافعي عنه بقى ده ميستاهلشي. يونس قبض على إيده بغضب

من غير ما تاخد بالها وقال: أهدي بس يا أمي، المهم صحتها الأول. رقيه كانت بتسمعه ودموعها نزلت بندم. يونس بابتسامة: عن إذنكم هجيب إذن الخروج عشان تقدروا تمشوا. قال كلامه وخرج من الأوضة. كريمه: شايفة ابن الأصول ربنا يحفظه ويحميه يا رب. رقيه اتنهدت بوجع وسكتت. *** سعاد: قوم يا حبيبي عشان تاكل. أحمد بضيق: مش جايللي نفس. سعاد: لأ مش عايزة حبستك لنفسك دي، قوم كده فوق عشان تخرج تروح للمأذون وتريح نفسك من الهم ده. أحمد: طيب.

سعاد بخبث: وعندي ليك مفاجأة، إنما إيه هتعجبك أوي. أحمد: مفاجأة إيه؟ سعاد: لما تيجي بس، يلا قوم. قالت كلامها وخرجت وهو افتكر رقيه ومعاملته معاها الفترة الأخيرة. رقيه بفرحه: عارف يا أحمد لما يجي البيبي نفسي أخليه اسمه أحمد زيك عشان يكون شبهك. أحمد بضيق: مش وقته يا رقيه، لما يبقى يجي بس. رقيه بحزن: هو ممكن ميجيش فعلاً. أحمد قام وقف بعصبية وقال: يوووه نكد كل يوم، مانتي عارفه إن هو فعلاً ممكن ميجيش وبرضه متعشم.

رقيه بدموع وصدمة: انت مش عايزة ييجي صح. أحمد بص لها بغضب وخرج من البيت وهي انهارت من العياط. رجع من تفكيره وقال بضيق: لازم أنساها وأعيش حياتي بقى، كفايه لحد كده. *** ملك بصدمة: هو اللي شوفته النهارده ده حقيقي؟ يونس: شوفتي إيه؟ ملك: رقيه اللي كانت خارجه من المستشفى وأنا داخلة. يونس بتوتر: أ... أيوه هي. ملك باستغراب: بس هو فين جوزها؟ وكانت بتعمل إيه في المستشفى؟ يونس: إيه الأسئلة دي كلها يا ملك؟ ما خلاص.

ملك: إنت ناسى إنها كانت صحبتي لولا الزفت جوزها ده اللي خلاها تقاطعني عشانك. يونس بص لها وقال بضيق: رقيه اتطلقت. ملك بصدمة: طلقها!!! يونس: أيوه. ملك بحزن: يا حبيبتي، طب أنا عايزة أروح لها يا يونس. يونس: بكرة إن شاء الله يا ملك، الوقت اتأخر. ملك: إنت زعلان منها لسه. يونس حاول يغير الموضوع وقال: مش هتنامي بقى؟ ملك: يونس أنا أختك وأقرب حد ليك، يعني مش هتعرف تخبي عليا. يونس بتنهيدة: مينفعش دلوقتي، أزعل منها إيه؟

هي محتاجة حد يقف جنبها خصوصًا إنها مالهاش حد هي ووالدتها. ملك: لسه بتحبها. يونس قام وقال: قومي نامي يا ملك، قومي يا حبيبتي عشان تصحي بدري، تصبحي على خير. قال كلامه ودخل أوضته وهي قالت بحزن: تبقا لسه بتحبها. *** رقيه: ماما معلش افتحي الباب من فضلك. كريمه: حاضر. خرجت تفتح الباب وشافت المحضر وهو معاه ورقة الطلاق. كريمه مضت بحزن وقالت: شكرا. وكانت لسه هتقفل الباب بس لقت سعاد دخلت ومعاها بنت.

سعاد بسخرية: يلا يا أختي، مش استلمتي ورقة الطلاق؟ خدي السنيورة بنتك ومع السلامة يلا. كريمه بصدمة: إنتي بتطردينا الشقة؟ حق بنتي، ابنك هو اللي طلقها. سعاد: الكلام ده لما يكون ليكم حد ياخد حقكم، إنما إنتوا تخرجوا بالذوق أحسن ماتخرجوا بالعافية. رقيه خرجت بتعب وقالت: يلا يا ماما نمشي. كريمه بصدمة: إنتي مجنونة؟ هتسيبلها بيتي؟ سعاد بشماتة: يلا بس بسرعة عشان العروسة الجديدة عايزة تلحق توضب الشقة.

رقيه بصت للبنت اللي واقفة بصدمة. سعاد ببرود: أصل ابني حبيبي فرحه النهارده. رقيه مستحملتش كل الكلام ده وفقدت وعيها.