رواية لقيط الفصل السابع 7 - بقلم أمل رجب

زين وصل عند البيت، طلع وفتحه. ظهر البيت ضلمة. زين بخوف وبص لجاسر: "في إيه؟ جاسر: "إيه يا ابني ما تدخل، يمكن الكهربا قاطعة. أنت خايف ولا إيه؟ زين: "ما أنت عارف إني عندي فوبيا من الضلمة." (بتوتر) "تعالى ادخل معايا." جاسر بضحكة: "طب تعالى يا أبو فوبيا." وفجأة سمع صوت صواريخ والنور اتفتح. زين بخضة: "بابا! إسلام بفرحة واخده في حضنه: "كل سنة وأنت طيب يا حبيبي." زين بفرحة: "وأنت طيب يا بابا."

وبص حواليه، ظهرت عيلته كلها وتورتة كبيرة عليها صورته. نرمين قربت منه وحضنته: "كل سنة وأنت طيب يا حبيبي." زين: "وأنتِ طيبة يا ماما." والعيلة كلها عايدوه لعيد ميلاده. زين بفرحة: "كل ده عشاني أنا؟ نرمين بحب: "هو أنت شوية؟ ده أنت أول فرحتي وفرحة العيلة كلها وابني حبيبي. أنا مفرحتش غير لما شفتك في حضني. ربنا يخليك ليا يا حبيبي." زين: "ويخليكي ليا يا ست الكل." وبص لجاسر: "وأنت بقى كنت عارف وساكت؟

وأنا أقول غريبة يعني تخرج بالليل." جاسر بضحكة وبص لإسلام: "أعمل إيه أنا عبد المأمور. ودي الخدمة اللي عرفت أقدمها بعد كل العذاب اللي شافوه بسببى وبسببك." وقدموا هداياهم. إسلام بص لزين بضحكة: "خد يا زين." زين أخدها وفتحها، ظهر موبايل. إسلام بضحكة: "ده السبب في اللي حصل، بس ده مش هديتك. هديتك هتاخدها مني الصبح." وقضوا سهرتهم. في صباح يوم جديد. نرمين بتسأل: "هو أنت جبت إيه لزين يا حبيبي؟ إسلام بضحكة: "هتعرفي دلوقتي."

نرمين: "متقولش." إسلام: "يا حبيبتي دي هدية زين. وأنتِ والله هتعرفي." نرمين بزعل: "يعني لو أنت قولتلي هيحصل حاجة؟ إسلام كان لسه هيتكلم، فجأة الموبايل رن. إسلام: "الو." إسلام: "تمام كدا." وقفل وبص لنرمين ومسك أيدها: "تعالي معايا، وأنتِ تعرفي. يلا." وراحوا أوضة زين. إسلام بهدوء: "زين. زين حبيبي. اصحى بقى." زين فتح عينه بتعب: "نعم يا بابا." إسلام بابتسامة: "كل ده إيه؟ مشبعتش نوم؟ زين: "تعبان أوي يا بابا وجسمي كله مكسر."

إسلام بقلق: "طب قوم تعالى معايا." زين بستغراب: "في إيه؟ إسلام: "تعالى نروح للدكتور يكشف عليك." زين: "لا يا بابا أنا كويس مش عايز أروح." إسلام: "عشان خاطري." زين: "يا بابا ممكن عشان التكيف كان شغال وأنت عارف إني بتعب منه." نرمين دخلت عليهم وقربت من زين: "مالك يا حبيبي؟ إيه اللي تاعبك يا قلب ماما؟ زين بابتسامة: "أنا كويس يا ماما." إسلام: "خلاص بعد كده ممنوع التكيف يشتغل وأنت نايم." ومسك أيده: "تعالى معايا."

زين بستغراب: "في إيه؟ إسلام: "تعالى بس." وأخده ونزل. "ها إيه رأيك؟ زين: "رأيي في إيه؟ إسلام: "في دي." وشاور على عربية. زين بفرحة: "إيه ده يا بابا؟ أنت غيرت عربيتك؟ نرمين بقلق: "هيغيرها إزاي؟ ماهي العربية بتاعته قدامك أهي والتانية متغطية جنبها." وبصت لإسلام: "إيه دي يا إسلام؟ إسلام بص لزين واداله مفتاح: "دي عربيتك يا حبيبي." زين بفرحة وحضن باباه: "بجد يا بابا؟ يعني دي بتاعتي؟

إسلام: "أه يا حبيبي. كل سنة وأنت منور حياتنا ودنيتنا." فجأة يوسف نزل، وشافهم وراح عليهم: "عربية مين دي؟ زين: "دي بتاعتي. بابا جبهالي هدية عيد ميلادي." يوسف بزعل: "اشمعنى يوم عيد ميلادي مجاليش عربية." إسلام بضحكة: "لما تكبر وتتفوق زي زين كدا هجبلك اللي أنت عايزه." يوسف بزعل وعند: "لا ماليش دعوة أنا عايز عربية زيه. ماليش دعوة." إسلام: "يوسف اطلع فوق يلا." وبص لزين وكمل كلامه: "يلا يا حبيبي." وطلعوا. زين دخل يغير هدومه.

إسلام دخل يغير. نرمين دخلت عليه وهو بيغير، وباين عليها الضيق. إسلام بتسغراب: "مالك يا حبيبتي؟ نرمين بزعل: "مفيش حاجة." إسلام: "لا في، قوللي مالك بقى." نرمين: "ممكن أفهم جبت لزين عربية ليه؟ إسلام بتسغراب: "وفيها إيه لما أجيب؟ نرمين بعصبية: "فيها كتير. افرض لو عمل حادثة. اسمع أنت، يا تجبله سواق، يا تاخد منه العربية." إسلام بصدمة: "آخدها منه؟ وبعدين زين سواقته حلوة وعاقل."

نرمين بدموع: "ماليش فيه بقى. اعمل اللي أنا عايزاه." إسلام بضحكة وقرب منها وهو بيلبس القميص: "طب لو عملت كدا زين مش هيزعل ها؟ وبعدين أنا مقدرش على زعل زين ولا زعل أم زين." نرمين بضحكة وساعدته في قفل زراير القميص: "طب أنا خايفة عليه." إسلام: "متخافيش بس. تعرفي أنا فرحت أوي لما شوفته وهو فرحان. بجد أنا من غيرهم بحس إني عايش في ضلمة." نرمين بحب: "ربنا يخليهم لينا يارب."

وبصت لإسلام: "متخليهوش يسوق غير لما يطلع رخصة. وقوله يسوق براحة. ماشي يا حبيبي." إسلام: "حاضر يا حبيبتي." وبضحكة: "إيه؟ في فطار ولا أفطر مع السكرتيرة؟ نرمين بعصبية: "طب ابقى اعملها كدا." إسلام مسك أيدها وباسها: "لا طبعًا. أنا مقدرش على زعلِك. بس يلا عشان اتأخرت جدًا وفيه ملفات كتير لازم أراجعها قبل ما أسلمها." نرمين: "كل حاجة جاهزة. يلا نفطر." واتجهوا إلى غرفة الطعام. نرمين بقلق: "زين، بلاش تسوق النهارده."

زين بهدوء: "متخافيش يا ماما. أنا مش هسوق غير لما أطلع رخصة." إسلام بابتسامة: "اطمنتي يا ستي." وقام وقف: "يلا أنا خارج." وبص ليوسف: "مالك يا حبيبي؟ يوسف بزعل: "مفيش." زين بضحكة: "أصله عايز عربية يا بابا." نرمين: "ده اللي كان ناقص. مبقاش إلا عيل مفعوص زيك عايز عربية." إسلام بضحكة: "حاضر يا حبيبي هجبلك اللي أنت عايزه. يلا سلام بقى." وخرج. يوسف: "أنا مش هروح النهارده المدرسة." نرمين: "ليه؟ يوسف: "كدا. ماليش مزاج."

نرمين بعصبية: "مش بمزاجك. يلا اتفضل." يوسف بص لها بزعل وسابها وقام. نرمين بصت لزين: "وأنت مفيش عندك كلية؟ زين بضحكة: "إيه يا ماما؟ مالك؟ مانتي عارفة إني مش بروح النهارده." نرمين بصتله وقامت. تاني يوم عند جاسر وزين في الكلية. جاسر بضحكة: "أيوا بقى موبايل جديد وعربية جديدة. محدش قدك يا عم." زين: "إيه يا عم أنت هتقرا؟ جاسر: "من حقي." زين: "طب يلا عشان لسه عن المحاضرة 10 دقايق." وجه يقوم قعد تاني.

جاسر: "إيه يا ابني مالك؟ زين: "مش عارف. فيه وجع في معدتي من الصبح." جاسر بقلق: "طب فطرت؟ زين: "آه. يلا قوم." جاسر: "طب روح طالما أنت تعبان." زين: "لا أنا كويس. قوم." وقاموا راحوا مع بعض. بعد مرور عدة أيام. عند كاميليا، ظهرت نرمين باين عليها القلق، وإسلام وأخواته. نرمين: "أنا قولتلك يا إسلام بلاش موضوع العربية دا." إسلام بقلق: "بس بقى يا نرمين. يعني هيكون ماله؟

كارمن: "اهدوا شوية. هو اتأخر نص ساعة بس. وبعدين ممكن كمان عنده محاضرات لسه." نرمين: "طب ليه موبايله مقفول؟ إسلام بعصبية: "اتفاءلي شوية. يعني هيكون حصله إيه؟ بعد مرور ساعة، فجأة الباب اتفتح. نرمين بصت ناحيته ودموعها نزلت.