رواية لم يحبني الفصل الرابع 4 - بقلم الكاتبة عشق

دخلت وقابلت أصحابها في الكافتيريا كالعادة. ملك: أهلاً بعروستنا. عائشة: عاملين إيه؟ سلمى: عاملين سنجل. عائشة: والله... طب يبختكوا. مريم: هو الجواز طلع وحش ولا إيه؟ عائشة: لأ حلو جدًا... المهم اتجدعني انتي ومحمد بتاعك ده. مريم: قولي يا رب. عائشة: ياختي يا رب... يلا ندخل المحاضرة عشان منتأخرش زي كل مرة. ملك: آه يا ريت والله. عائشة: مين اللي علينا؟ ملك: دكتور ساجد. عائشة: أكتر دكتور بكرهه. ملك: آه ليكي حق...

ما انتي أول محاضرة خليتيه ميشرحش أصلًا وساب المحاضرة. عائشة: يا يشرح للكل يا أما ميشرحش... يلا اخلصوا وادخلوا قبل الدكتور. دخلوا وقعدوا ورا وهو دخل رحب بيهم وبدأ يشرح. ساجد: اللي قاعدة ورا دي. بصت الأربعة لبعض وهو قال: اللي لابسة أسود. وقفت عائشة. ساجد: انتي محضرتيش ولا محاضرة ليا... تقدري تقوليلي ليه؟ عائشة: ظروف. ساجد: والظروف دي تمنعك من عدم حضورك؟ عائشة: آه الظروف دي منعتني.

ساجد: تقدري تقوليلي إيه اللي اتشرح خلال الأسبوع اللي فات؟ عائشة: لأ مقدرش عشان معرفش. ساجد: يبقى تتفضلي ومتحضرليش ولا محاضرة. عائشة: وحضرتك بقا بتطردني بناءً على إيه؟ ساجد: أنا حر. عائشة: لأ مش حر... محدش ليه حق يحرمني من التعليم... ولو على عدم حضوري فده كان ظرف وعدى. ساجد: وأنا قولت اتفضلي مش هتحضريلي... كملي جميلك ومتحضرليش. عائشة: تمام. لمت حاجاتها وخرجت. رن إسلام عليها وهي خارجة. عائشة: نعم. إسلام: انتي فين؟

عائشة: في الجامعة. إسلام: مصطنتيش أوصلك ليه؟ عائشة: عمرو وصلني. إسلام: إيه التطور ده. عائشة: شفت... اقفل بقا عشان أنا مش طايقة نفسي. إسلام: ليه؟ عائشة: الدكتور المتخلف طردني... وأنا محبتش أعمل مشاكل. ساجد: متخلف؟؟ لفت بسرعة وقفل الخط. عائشة: مقصدش. ساجد: أومال كنتي تقصدي إيه؟ عائشة: أصل أنا معملتش حاجة عشان أطرد... وجاية بدري عن معادي... وقولت إني مش هعمل مشاكل بعد كده مع دكاترة الجامعة. ساجد: المتخلفين صح؟

عائشة: مش كلهم بصراحة. ساجد: وأنا من ضمن المتخلفين صح؟ عائشة: لأ مكنتش أقصد... بعتذر جدًا. ساجد: تقدري تدخلي تكملي المحاضرة. وسابها ودخل. "يا عائشة." بصت وراها لقت واحد من الأمن اللي على البوابة. عائشة: اتفضل. "اتفضلي دول ليكي." مد إيده بفلوس. عائشة: بتوع إيه دول؟ "جوز حضرتك سابهم معايا وقالي أوصلهم لك." عائشة: تمام شكرًا. قعدت في الكافتيريا تستنى صحابها لحد ما خرجوا وراحولها. ملك: هو لما الدكتور خرج... شوفتيه؟

عائشة: آه. ملك: عمل إيه؟ عائشة: قالي لو عايزة تحضري اتفضلي. مريم: عشان كده كان كل شوية يبص على الباب. سلمى: مدخلتيش ليه؟ عائشة: كده كده كانت قربت تخلص وأنا كنت زهقت. ملك: إحنا استغربنا لما خرجتي أساسًا. عائشة: معنديش خلق أنا. نهاد: طب مش أنا بعتلك المحاضرات اللي فاتتك؟ عائشة: مفتحتهاش. سلمى: دكتور ساجد هناك بيبصلنا. لفت مريم تشوفه. عائشة: طب ما تسيبه يبص. سلمى: جاي علينا. ملك: إيه الرعب ده. ساجد: ازيكم يا بنات. هزوا

راسهم وهو بص لعائشة قال: ممكن ثانية. عائشة: اتفضل. ساجد: في مكتبي. عائشة: تمام. مشي وهيا قالت: شوية وراجعة. دخلت وراه. ساجد: تقدري تقوليلي سبب غيابك. عائشة: أنا قولت إنها ظروف. ساجد: بصي... أنا النهارده هحط الدرجات... بس أنا مش عارف مستواكي... وبصراحة مفيش دكتور قال إنك مش شاطرة... أي نعم اعترضوا على ماضتك بس ده ميمنعش إنك شاطرة. عائشة: طب ما تشيلني المادة وتريح دماغك... مش ده كان كلامك برضه؟ ساجد: بناءً على إيه...

أنا معرفكيش أساسًا... ولما تكوني دايماً بتحضري وتيجي تغيبي حوالي أسبوعين... يبقى من حقي أسأل. عائشة: وحضرتك سألتني وأنا مجاوبتش... وعدم حضوري ده شيء خاص بيا... وانت هددتني إنك هتشيلني المادة... ودي مش أول مرة دكتور يشيلني المادة عشان مش حاببني... فدي حاجة عادية بالنسبالي. ساجد: وأنا مش زي الدكاترة دي... أنا هعرض بكرة كويز يحدد مستوى كل الطلاب... وبناءً عليه هحدد مستوى كل طالب. عائشة: تمام إيه المطلوب مني بقا؟

ساجد: الحضور بيأثر بنسبة كبيرة في الدرجات... عشان كده كنت حابب أسألك عن سبب غيابك وبما إنك بتقولي ظروف فأنا مقدر إيه هي الظروف دي. عائشة: تمام... عن إذنك. ساجد: اتفضلي. خلصت يومها وروحت. طلعت أوضتها وحاولت تلم كل المحاضرات اللي فاتتها. بالليل عمرو رجع ودخل لاقاها بتذاكر. عمرو: عاملة إيه؟ بصتله وقالت: شايف إيه؟ عمرو: انتي بتذاكري في كل الكتب إزاي بالله؟ عائشة: مضطرة ألم اللي فاتني أعمل إيه بقا. عمرو: خلصتي ولا إيه؟

عائشة: لسه شوية. عمرو: عندي مقابلة شغل مهمة... هدخل أجهز نفسي وأمشي. عائشة: تمام ربنا معاك. دخل أخد شاور وخرج لبس بدلته. عمرو: بتعرفي تربطي الجرافته؟ عائشة: لو ملبستيش جرافته هيكون أحلى. عمرو: انتي شايفة كده؟ عائشة: آه... سيب أول زرارين واقلع الجرافته. سمع كلامه وكان شكله أحلى فعلًا. عائشة: استني أعدلك الياقة من ورا. عدلتله البدلة وقالت: بس كده مفيهاش غلطة. عمرو: تسلمي... بقولك إيه. عائشة: قول. عمرو: ما تيجي معايا.

عائشة: أجي معاك مقابلة الشغل؟ عمرو: آه ده عشا برا الشركة عادي ومراته هتحضر هي كمان. عائشة: بس أنا عندي مذاكرة لسه عايزة أخلصها. عمرو: كملي وقت تاني عادي... بس تعالي معايا. عائشة: مش عارفة. عمرو: يلا. عائشة: مستعد تستنى ساعة؟ عمرو: انتي هتجهزي نفسك في ساعة؟ عائشة: دي أقل حاجة... لو هتتأخر خلاص. عمرو: طيب... هستناكي... بس حاولي تخلصي بسرعة. عائشة: تمام.

دخلت لبست فستان شيك بعد الركبة لونه أسود ولمت شعرها كحكة تحفة وحطت ميكب سمبل... كل ده خد منها حوالي ساعة ونص. خرجت من الحمام بعد ما جهزت وكان هو واقف في البلكونة. عائشة: يلا! عمرو: اتأخرت... اللهم صلي على النبي. عائشة: في إيه؟ عمرو: شكلك واو. عائشة: ميرسي. عمرو: ده انتي تستاهلي بقا التأخير ده كله. عائشة: على فكرة أنا كده خلصت بسرعة. عمرو: حضرتك أنا جهزت في ربع ساعة. عائشة: آه منا أخدت بالي... يلا عشان متتأخرش.

عمرو: يلا. نزلوا وقالوا للعيلة إن هما هيتعشوا برا. راحوا مطعم فخم وكان فيه كذا واحد ومراته... اتعرفوا كلهم على بعض... خلصوا كلام في الشغل وجت فقرة مهمة وهي الرقص... كل واحد بيرقص بس مش مع مراته... بيبدلوا مع بعض وده نوع من أنواع الموافقة على الصفقات. جه واحد من اللي قاعدين اسمه نزار ومد إيده لعائشة وقال: ممكن تشاركيني؟ بصت لعمرو وجاية تتكلم فسابقها وقال: بس هي هترقص معايا. نزار: بس انت عارف إن محدش بيرقص مع مراته.

عمرو: بس أنا هر قص معاها. نزار: ياريت متتكلمش نيابة عنها... هي اللي تقرر مش انت. عائشة: وأنا قراري زي قراره. جت مرات نزار وقالت: خلاص مفيش مشكلة... أنا هر قص مع عامر ونايلة ترقص معاك وعمرو يرقص مع عائشة. عامر: أنا معنديش مشكلة. نزار: تمام... زي ما تحبوا. كلهم بدأوا يرقصوا على اللحن اللي كان واحد في المطعم بيلحن بيه.