رواية لم يكن عالمي الفصل الثلاثون 30 - بقلم شيماء شاكر

مالك وصل قدام المخزن اللي فيه همس. نزل من العربية وقرب من بوابة المخزن وقلبه بيدق جامد. أخيرًا هيشوف همسته. بقاله 10 أيام مشافهاش ولا سمع صوتها. أد إيه مشتاق لها. مالك فتح بوابة المخزن بهدوء وراحة. لقي شومة كانت هتنزل فوق راسه. بسرعة مسك الشومة وبصلها. همس بصت لمالك بصدمة. كانت بتحسبه اللي خطفها. مالك ابتسم بحب: "كده يا همس... عايزة تموتيني؟ همس بصاله بصدمة. هي مش مصدقة إن مالك قدامها. همس بدموع: "مش مصدقة...

مش مصدقة إنك قدامي... متبعدش عني تاني يا مالك... أرجوك متسبنيش تاني... صدقني أنا خلاص فهمت إني مش هقدر أعيش من غيركم." مالك عيونه لمعت بدموع وحضن همس جامد. لدرجة إن رجليها مش لامسة الأرض. شوية كمان وهيدخلها جوه ضلوعه وجنب قلبه. "خلاص يا همس... أنا معاكي... مش هسيبك تاني مهما حصل... أنا كمان مقدرش أعيش من غيرك... صدقيني انت أغلى من روحي عندي." همس مبتسمة وسط دموعها اللي بتنزّل.

مالك بعد همس براحة عن حضنه وبصلها بعشق وحط إيديه الاتنين على خدودها ومسح دموعها. "وحشتيني." همس حضنت مالك تاني: "وانت كمان... وحشتني أوووي." مالك بص حواليه وبعد همس عنه بهدوء. "يلا نمشي من المكان ده." همس هزت راسها. مالك مسك إيد همس وخرجوا من المخزن وركبوا العربية. مالك دور العربية وساق. مسك إيد همس وطلعها على شفايفه وبسها بعشق. همس لغاية دلوقتي مش مصدقة إن مالك قدامها: "انت... انت خرجت إزاي؟

مالك بص لها وابتسم: "حكاية يطول شرحها... هفهمك بعدين." همس بتفكير: "يعني هربتوا؟ مالك بص لها وابتسم: "لأ." همس باستغراب: "يعني هما اللي خرجوكم؟ مالك باصص على الطريق: "مش بالظبط." همس بصتله بعدم فهم: "مالك أنا مش فاهمة." مالك باس أديها برقة: "ما أنا قولتلك حكاية يطول شرحها... نستقر بس في مكان وأحكيلك." مالك باصص على الطريق. كل تفكيره في كلام ياسين وقلق على همس جامد من كلامه. لازم همس تختفي الأيام اللي جاية.

مالك بص لهمس: "إحنا لازم نروح عند بابا ونستقر هناك كام يوم." همس باستغراب: "ليه؟! مالك أتنهد ومسك إيد همس وطلعها على شفايفه واتكلم: "واثقة فيا؟ همس قلبها بيدق بسرعة والعشق باين في عيونها: "أكتر من نفسي." مالك ابتسم وباس أديها بحنان: "يبقى متقلقيش وأنا معاكي." همس هزت راسها بابتسامة: "أكيد مش قلقانة." مالك فضل أكتر من ساعة سايق. بص على همس لقاها نايمة. ملس على خدها بعشق وبص على الطريق وهو خلاص قرب من الغابة.

مالك أختصر الطريق ونازل على طريق دائري. متجه للغابة. مالك بص في المراية لقي عربية ماشية وراهم. مالك استغرب العربية وسرّع عربيته شوية وهو نازل بشكل دائري. زي أكنه أسفلت على جبل ونزل منه بعربيته والعربية وراه. والطريق ده مقطوع محدش بيستخدم الطريق غير القليل جدًا. حسام باصص على العربية اللي مالك سايقها وقال في نفسه: "آسف يا مالك... عارف إنك ساعدتني في القبض على الظابط الخاين... وكمان ساعدتني إني أقبض عليهم متلبسين."

حسام سكت شوية وهو باصص على عربية مالك وبعدها كمل: "بس المفروض منساش إنك وحش... وخطر على البشرية... وزي ما أنقذت البشرية من شر المافيا... هنقذ البشرية من شر الوحش اللي جواك." حسام طلع من الشباك وضرب كام طلقة ورا بعض. مالك باصص على العربية اللي ماشية وراه. لقي حسام خارج من الشباك وبيضرب عليه نار. مالك بقى يتفادى الطلق بصدمة من أفعال حسام. همس فاقت من صوت الطلق وبصت لمالك بفزع: "في إيه؟!

حسام داس على سنانه بغيظ وضرب طلقة جت في كوتش عربية مالك. مالك شاف الطلقة خارجة من مسدس حسام. خد همس في حضنه وفي ظرف ثانية عربية مالك اتقلبت كذا مرة ورا بعض وبقى نصها على الأرض والنص التاني على الحافة. دقايق عدوا وعربية مالك متعلقة نصها على الأرض والنص التاني على الحافة في الهوا. مالك حط إيده على راسه بألم والدم بينزل من راسه. بص على همس بقلق لقي دم نازل من مناخيرها ومن راسها. مالك بخضة وقلق مسك همس: "همس... همس...

بالله عليكي ردي عليا." همس فتحت عيونها وحطت إيديها على راسها بألم: "حصل إيه... مالك... دماغي مش قادرة." مالك بص حواليه واكتشف المصيبة اللي هو فيها. مالك بلع ريقه بقلق وتوتر: "همس متتحركيش... أقل حركة هنقع من على الحافة... أهدي." همس بصت حواليها برعب وبعدها بصت لمالك. مالك بص لهمس بقلق: "همس متخافيش ركزي معايا... بصي... حطي رجليكي ورا... حاولي تعدي الكرسي وتروحي لكنبة العربية." همس هزت راسها لأ برعب: "لأ مش...

مش هسيبك." مالك حتى النفس خايف يتنفسه. أقل حركة هيوقعوا هما الاتنين. "متخافيش أنا معاكي... بس حاولي عشان منقعش... مش هسيبك متخافيش." همس بعياط: "مالك." مالك داس على سنانه بغضب: "أخلصي يا همس." همس مسحت دموعها وكل حركة منها العربية بتتهز. همس بعياط: "مش هعرف يا مااالك... مش هعرف." مالك قبض إيده وبيحاول يظبط أعصابه: "متقلقيش هي أكيد هتتهز من حركتك بس مش هتقع... يلا يا همس ارجعي على الكنبة." همس بتحاول تتحرك...

وكل حركة بتهز العربية... وأخيرًا حطت رجليها على الكنبة اللي ورا. مالك: "برافو... يلا بقا بقيت جسمك." همس بعياط: "مالك أنا خايفة." مالك بيحاول يطمنها: "أنا معاكي... بس اسمعي كلامي." همس حطت رجليها التانية على الكنبة وبقت قاعدة على الكنبة اللي ورا. مالك خايف ياخد نفسه ليقعوا. أهم حاجة همس تكون بخير. وتخرج من المصيبة دي بسلام. ده كان تفكير مالك. مالك: "حلو يا همس... يلا افتحي باب العربية براحة."

همس مدت إيديها وبتحاول تفتح الباب. همس بصت لمالك بدموع: "مش راضي." مالك: "حاولي بس براحة... حاولي يا همس بالله عليكي." همس حاولت تاني. مرة مع التانية. الباب اتفتح. مالك شاف الباب اتفتح. بسرعة فتح الباب اللي جنبه. مالك بزعيق: "نطي يا همس." همس بعياط وصوت عالي: "مش هقدر... مش هقدر يا مالك." مالك داس على سنانه بغضب: "بقولك نطي ياااااا همسسسس." همس بصريخ: "مش هقدرررررر." همس نطت وهي بتصرخ.

مالك أول ما شاف همس نطت. نط بسرعة. والعربية وقعت وانفجرت تحت في القاع. همس بصت بصدمة على العربية وهي مش شايفة مالك. همس قامت بسرعة وهي بتصرخ باسم مالك: "مااااالك... ماااااالكم." مالك ماسك الحافة بإيديه الاتنين: "أنا هنا يا همس." همس بسرعة قعدت وبتحاول تمسك إيد مالك. مالك بزعيق: "اوعي يا همس هتقعي." همس بعياط: "هات إيدك وأنا هشدك... هات إيدك يا مالك." مالك عيونه اتحولت للأسود وضوافره طالت وبقت حادة.

همس بعدت لما شافت هيئة مالك. مالك غرز ضوافره في الأرض وشد نفسه وطلع على الحافة ووقف على الأرض. حسام ورجالته نزلوا من العربية وبصوا لمالك. حسام: "كنت المفروض تموت يا مالك." حسام رفع المسدس و...