رواية لصه سرقت لي قلبي الفصل العاشر 10 - بقلم بدور عاطف

في صباح يوم جديد، استيقظت كارما وخرجت فوجدت والدتها مستيقظة. كارما: صبح صبح يا كرملة. كريمة: صباح النور يا حبيبتي. كارما: إيه يا كرملة صاحية بدري ليه؟ كريمة: ما أنا طول الوقت نايمة، الدور والباقي عليكي انتي اللي جاية آخر الليل وصاحية بدري. كارما: اتعودت على كدا بقى يا كرملة، يلا هقوم أجهز الفطار. ذهبت كارما، فنظرت كريمة لآثارها وقالت: سامحيني يا ضنايا، أنا اللي عملت فيكي كدا بس غصب عني.

كانت كارما تجهز الطعام وفجأة رن هاتفها. كارما: ياااه، دا أنا نسيتها خالص. كارما: صباح الخير. نور: صباح النور. كارما: كأن صوتك كل دا عشان ما كلمتكيش، ما كنتش أعرف إن بعدي عنك هيزعلك يا قمر أنت. نور: هههههه، لا مش بعدك انتي يا أختي. كارما: ليه بس يا قمر، النبي عسل يا ولاد. نور: ويا ريت القمر مرتاح، دا حزين وتعبان. كارما: إحنا قولنا إيه؟ نور: طب أعمل إيه؟

أديني قافلة الفون من وقتها، ودلوقت فتحت لقيته متصل كتير، بس كان على الأقل جه شافني لما ما ردتش ولا اتصل ببابا اطمن عليا حتى. كارما: قولتلك سيبيه، هو هيجي لوحده، بس لو جه ولا حتى اتصل، انتي عارفة هتعملي إيه كويس. نور: بس هو يجي بس هيييييح. كارما: ها، أسوح، هييييح إيه بس ونيلة إيه، ابت، انتي اظبطي أحسنلك وإلا هتتعبي وذنبك على جنبك. نور: حااااضر حاااضر. كارما: أيو كدا، يلا اتكلي بقى عشان ورايا شغل.

نور: ماشي، بس أنا زهقانة، لما تخلصي كلميني أو إيه رأيك نتقابل؟ كارما: ماشي، هشوف ظروفي وأبقى أقولك. نور: ماشي. كارما: يلا سلام يا عسل. أنهت المكالمة وتحركت للخارج ووضعت الفطار. كريمة: يلا اقعدي افطري. كارما: لا أنا لازم ألبس وأنزل عشان ورايا حاجة مهمة أخلصها وأبقى أجي آكل. كريمة: يا بنتي انتي هتقعي من طولك كدا. كارما: يا كرملة بتسمي المتر ونص دا طول! كلي يا كريمة، كلي واتغذي يا أختي. كريمة: هههههه، ماشي يا آخرة صبري.

كارما: وربنا انتي اللي آخرة صبري يا أختي، ما انتي لو تقولي يوعدك بابن الحلال مش هنضطر نصبر كتير. كريمة: هههههه هههههه. كارما: أيو اضحكي يا أختي اضحكي. كريمة: طب أعمل إيه إذا كان كل رجالة الحارة بيخافوا منك وعاملالي فيها معلمة وماشية هتكليهم. كارما: ليه يعني هو أنا بعبع؟ كريمة: ربنا يهديكي ويعوضك خير يا حبيبتي. كارما وهي تفتح الباب: وابن الحلال يا كريمة، ابن الحلال. كريمة: هههه هههه.

كارما: بردوا، الله يسامحك يا كريمة، سلام يا أختي. كريمة: هههه الله يحفظك يا كارما. خرجت كارما واتجهت إلى منزل المعلم دومة. كارما: صبح صبح يا معلم. دومة: صباح النور. كارما: إيه يا باشا مالك يكونش الواد دا مزعلك. دومة: وهو حد يقدر يزعلني يا بت؟ كارما: بس في اللي مزعلني أنا. حمص: وهو حد يعرف يزعلك يا برنسيسة؟ كارما: لا ما حدش يستجرأ أصلاً. دومة: أمال إيه بقى؟

كارما: لا ما تشغلش بالك يا معلم واتفضل ادي المعلوم بتاع امبارح. حمص: انتي بتجيبي الفلوس دي كلها منين؟ أي بتنطي ع البنك الدولي ولا مغارة علي بابا! دا حَيّالة كام أتوبيس على كذا محل. كارما: مش كارما اللي تتزنق في الأتوبيسات ولا تروح محلات أي كلام، وبعدين كل واحد وشطارته. دومة: سيبك منه، المهم انتي عارفة إني ما بحاسبكيش على حاجة لأنك عارفة غلاوتك عندي كويس أوي. كارما: عارفة يا معلم. دومة بحزن: دا انتي من ريحة الغالية.

كارما: ربنا يرحمها. دومة: يا رب. كارما: أتكّل أنا بقى، سلام. ذهبت كارما وتوجهت إلى المقابر. سيد: مالك يا بت ما تنشفي شوية، بقيتي خرعة ودمعتك قريبة كدا ليه؟ كارما: يعني مش عارف من إيه يا سيد؟ سيد: ربنا بيحبك وهيعوضك خير إن شاء الله. كارما وهي تنظر للقبر: الاتنين كسروني أوي، راحوا ورا بعض، إحنا التلاتة ما كناش بنفارق بعض، ليه ما خدونيش معاهم؟ سيد: وحدي الله، وبعدين أمك كانت هتعمل إيه من بعدك؟

كارما: قال يعني أنا قادرة أعملها حاجة دلوقت، شوية المسكنات اللي بتخدهم وحالتها كل مادا بتسوء، لو جرالها حاجة أنا هروح فيها. سيد: بعد الشر عليكي وعليها، بتقولي كدا ليه بس؟ كارما: أنا تعبانة أوي، مش قادرة أنسى اليوم دا ولا قادرة حتى أتكلم ولا أصرخ ولا أطلع اللي جوايا. سيد: هتقولي إيه، دا قدر ربنا. شردت كارما في الماضي وتذكرت ما حدث. (فلاش باك) كارما: إيه يا عاشق اللي موقفك كدا؟

كايا: نعمة مش بترد على التليفون ومش عارف أوصلها. كارما: ما أنت عارف اللي فيها والمعلم مش بيخرجها، دا أنا بعمل مليون حوار عشان أعرف أخرجها. كايا: أنا مش عارف إيه دا، المهم أنا خلاص قررت إني أروح أتقدملها. كارما: وإنت بقى يا حلو شوفتها فين؟ كايا: بت، انتي هتهبليني. كارما: دا أول سؤال هيسألهولك المعلم. كايا: انتي بتقفليها في وشي.

كارما: ولا انت، اسمع بقى، هو آه حرامي ومشغل كل اللي هنا، يعني مش وزير ولا صاحب شركات، لكن دا الكبير ويوم ما يناسب هيناسب اللي زيه. كايا: وإنتي بقى بتقولي كدا ليه؟ كنتي قريتي أفكاره؟ كارما: لا بص بقى من الآخر كدا، أنا سمعت المعلم وهو بيتفق مع سالم الحامولي إن هيجوز نعمة واتفقوا على كدا. كايا: يجوز نعمة! دا دا من دور أبوها. كارما: يعني متوقع إيه؟ يجيب صابي من صبيانه ويجوزها له؟ كايا: مستحيل.

كارما: أنا قولتلك اللي فيها أهه، وشوف أنت هتعمل إيه بقى. كايا: عشان كدا هي مش بترد عليا؟ كارما: عاوزاها تقول إيه يا كايا؟ دي لو نطقت مش بعيد يقتلها، وأنت عارف المعلم كويس أوي، ودا سالم الحامولي تاجر خردة والفلوس في جيبه زي الرز. كايا: ولا لو دا مستحيل يحصل. كارما: ولاه ما تتغباش عشان ما توديش روحك في داهية. كاد كايا أن يتحدث ولكن قطعه ذلك الصوت. حمص: إيه الجمال دا، طب ما تداروا في حتة.

نظرت كارما خلفها وقالت: وإنت مال أهلك؟ رفع حمص يده وكاد أن يصفعها ولكن منعه يد كايا التي أمسكت بيده وقال: لو كان حصل ولمستها كنت قطعتها لك. كارما: خلاص يا كايا، يلا بينا يلا. حمص: يلا على فين يا حلوة، المعلم عاوزكوا. كارما: طب اتكل أنت وإحنا هنيجي وراك. نظر لهم حمص وقال: ماشي يا نحنوحة. كارما: يلا بينا وما تفتحش بوقك بحرف. تحركوا وذهبوا إلى المعلم. دومة: إيه يا حلوين، مش كنتوا تقولوا كنا عملنا الواجب؟

كارما: هو لحق البقف دا يبلغك؟ كاد حمص أن يتحدث ولكن منعه المعلم قائلاً: وهو أنا أطول، دا انتوا زي ولادي بردوا. كايا: ولما إحنا زي ولادك ترضى إن الواد دا يمد إيده على كارما؟ دومة: ما عاش ولا كان، وأنا هعرفه غلطه، المهم الشغل واقف بقاله كام يوم ليه وإنت غطسان فين؟ كايا: والله براحتي، وإنت ليك المعلوم بتاع كل يوم وادي حساب النهاردة. دومة بحدة: ما تظبط يلا، أنت لأظبطك، أنت نسيت نفسك ولا إيه؟

كايا: لا ما نستش نفسي بس الظاهر إن ناس تانية هي اللي نست نفسها وأصلها. كارما بهمس: إيه اللي بتقوله دا الله يخربيتك. كايا: بص بقى يا معلم من الآخر كدا، شغل مش شغال، وما فيش حاجة هتوصلك مني تاني، خلاص خلصت. دومة: لا وحياة أمك أنت ما تعرفش أنا مين ولا إيه، وبعدين إيه دا أنا اللي معلمك أصول الكار، إيه علمناهم الشحاتة سبقونا ع الأبواب ولا إيه؟ كايا: والله دا اللي عندي.

حمص: إيه اللي قلبك القلبه دي يلا أنت، أنت نسيت نفسك ولا إيه؟ كايا: بالعكس دا أنا عرفت قيمة نفسي كويس أوي. ثم نظر للمعلم وقال: سلام يا يا معلم. دومة: والله ما هسيبك تتهنى بحاجة يا كايا، ويا أنا يا أنت. كارما في نفسها: الله يخربيتك، جيت تكحلها عمتها. حمص: إيه يا برنسيسة مش هتحصليه انتي كمان؟ كارما: وأنا مالي وماله؟ دومة: إيه اللي قلبه كدا يا كارما؟ كارما: معرفش. دومة: يعني إيه ما تعرفيش؟ انطقي يا بت.

كارما: والله ما أعرف. دومة: ماشي، بس والله ما هخليه يتهنى وهرجعه كلب تحت رجلي من تاني. في الأعلى كانت تستمع لكل شيء وتبكي بشدة. نعمة ببكاء: غصب عني والله بس أتمنى إنك تسامحني على اللي هعمله دا. خرجت كارما وذهبت إلى مكانهم المعتاد. كارما: أنت غبي، إيه اللي عملته دا؟ كايا: أنا مش هشتغل تاني تحت رحمته، وخلاص انتهت. كارما: دا مش هيرحمك. كايا: وأنا مش هرحمه لو حصل ونعمة اتجوزت حد غيري. كارما: أنت اتجننت!

وبعدين ما هي هتتجوز غيري فعلاً، ولا نسيت اللي قولتهولك؟ كايا: لا ما نستش، بس مش هحط إيدي تحت ضرسه، بالعكس دا أنا اللي هخليه يجي لحد عندي. كارما: ولاه إيه اللي في دماغك؟ نظر كايا لنقطة ما وابتسم وقال: اللي في دماغي هيتنفذ ودلوقت حالاً.