رواية ليلة بكى فيها الحاضرون الفصل الثامن والعشرون 28 - بقلم محمد طه

سهام بغضب وصوت عالي: ضحي، هاتيلي 3 بدل رقص للبشوات عشان يلبسوهم. ضحي: أوامرك يا ريسه. سهام بغضب: اقلعوا، بقول اقلعوووو. عادل جاتله إشارة الدخول البطئ، وإنو يدخل بهدوء لأن الأمور جوه تحت السيطرة. بسرعة بعت رسالة لسامر يطمنوا فيها إن المهمة تمت بنجاح. أخدوا الـ 3 أصدقاء لسامر في المخبأ السري، وهما متهانين ولابسين بدل رقص حريمي.

نعمان بغضب: صبركم عليا، إن ما ولعت فيكم كلكم ما أبقاش أنا نعمان. أنا مش هرجع للفقر والذل من تاني. هدي بغل: لازم نلاقي البت دي ونقطع من لحمها الحي لحد ما تقول مين اللي معاها. نعمان بغضب: هجيبها، ولو في سابع أرض هوصلها. هاكل من لحمها بأسناني، وهكسر عضمها عضمة عضمة. مش معقول زمن نعمان ينتهي على إيد عيلة زي دي. ومهما كان مين اللي وراها، هفعصه تحت رجلي.

هدي: اسمع يا نعمان، إحنا بعد ما نخلص من البت دي واللي معاها، نسيب البلد دي خالص ونروح بلد تانية نعيش فيها. نعمان: إحنا كده كده ما بقاش لينا مكان في البلد دي. سامر: حمدالله على السلامة يا باشا، نورت مصر. العزيزي: منورة بأهلها، وبعدين هوا أنا غريب؟ دا أنا ابنها. سامر: طمني يا باشا، لين كويسة؟ العزيزي: أنا جاي هنا مخصوص عشان لين. سامر بلهفة وقلق: لين حصلها حاجة؟

العزيزي: اطمن، لين كويسة وبخير وزي الفل. بس أنا وعدتها إني مش هسمح لأي شيء في الدنيا ياخد منها أمها وأبوها. سهام تدخل تتفاجئ بوجود أبوها، تجري عليه تحضنه وترحب بيه. عادل وضحي يرحبوا بالباشا ومستغربين من وجوده المفاجئ. عادل: طيب، أنا وضحي هنستنى مع الضيوف في المخزن. الباشا يقعد ويطلع تليفونه ويتصل بنسرين. نسرين: ها يا بابا، حمدالله على السلامة. العزيزي: الله يسلمك، فين لين؟

لين بزعل: جدو، أنا زعلانة منك عشان سافرت من غير ما تقولي. العزيزي: لما آجي هبقى أصالحك. لين بفرحة: بابا وماما وحشتوووووووووني. سامر وسهام بابتسامة: وإنتي كمان وحشتينا أوي. لين: لو وحشتكم، تعالوا مع جدو. واللي مش هييجي هزعل منه ومش هكلمه تاني أبداً. سهام: دا على أساس إن وإحنا موجودين بتتكلمي معانا. إنتي مافيش عندك غير جدك، جدك وبس. لين: على فكرة بقى، أنا قررت أتجوزه وهبقى مرات أبوكي إنتي وأختك.

سهام بصدمة: بت يا لين، عيب. لين: يا ماما، بدل ما يبص بره ويجيب لكم مرات أب شريرة، أنا طيبة وهستحملكم وأمري لله. العزيزي: أنا تعبان من السفر، هقوم أريح شوية لحد ما تحاسب ضيوفك. سهام: وأنا عندي مشوار مهم أنا وضحي. التلاتة الأصدقاء لابسين بدل رقص وعنيهم متغمية. يدخل سامر ويقعد قدامهم بس عاطيهم ضهره. يشاور لعادل يشيل اللي على عينهم. أول ما سامر يبصلهم، التلاتة يتصدموا. التلاتة في صوت واحد: سامر، إنت عايش.

سامر بقرف: والله سهام لبستكم التوب اللي يناسبكم فعلاً. إنتو رقاصين، بترقصوا حوالين اللي معاه فلوس وبس. كمال لسه هيتكلم، عادل يضربه بالقلم على وشه. عادل بغضب: لما الرياسة يطلب منكم تتكلموا، يبقى تتكلموا. ما طلبش، يبقى تخرسوا. نعمان بصوت واطي: هدي، إنتي فاكرة إحنا دفنا الجثة فين؟ هدي بخوف وصوت واطي: في الفيلا. نعمان بعصبية بس بصوت واطي: ما أنا عارف إن في الفيلا، وفي ضهر الفيلا، بس فين بالظبط؟

هدي بصوت واطي: وهوا أنا هفتكرلك من 27 سنة فين بالظبط؟ نعمان بصوت واطي: إحنا لازم نروح نتأكد إن الجثة موجودة في مكانها.