رواية ليلة ساخنه الفصل الرابع 4 - بقلم عمرو راشد

يا يوسف هيموت في ايدك، حد يلحقنا يا ناس! = والله ما هسيبه غير لما يقول قدام الناس دي كلها إنه مش راجل. يا عم ما هو أنا فعلًا مش راجل، أنت قولت إيه جديد يعني؟ = برضه مش هسيبك. بالعافية وطلوع الروح لما عرفت أبعد يوسف عنه، أما زياد قام بسرعة وجري قبل ما يوسف يرجع يكمل عليه. مكنش ليه داعي تعمل ده كله على فكرة. = أنتِ مجنونة ولا إيه؟ ده بيقولي عايز يكنسل عادل ويجيلي أنا، بالمناسبة هو مين عادل؟

نظرت في الأرض وأنا محرجة جدًا. ده أخويا. = وأخوكي إيه علاقته بالواد ده؟ زي ما أنت شايف، زياد مش سايبه في حاله وبيطارده في أي مكان يروحه. = يعني إيه بيطارده دي؟ لازم تعملوا محضر عشان الواد ده ميقربش ليكوا تاني. خلاص بقى يا يوسف إحنا مش عايزين نعمل مشاكل، هو أكيد بعد ما أنت ضربته مش هييجي هنا تاني. = هي دي سلبية ولا أنا مش واخد بالي؟ لا مش سلبية على قد ما هي خوف، أنا مبحبش المشاكل ولا عايزة أدخل فيها، خلينا نعيش بهدوء.

= براحتك يا هند وعمومًا أنا موجود لو احتاجتي حاجة. إيه ده هو أنت هتسكن هنا؟ = آه لقيت شقة فاضية وهأجرها من عم جمال. يعني بقينا جيران خلاص؟ = آه يعني اعملي حسابك ممكن أحتاج منك شوية سكر على حبة فلفل أسود على كام باكت شاي. لا على فكرة هو إحنا شقة بس مش سوبر ماركت. = بداية موفقة. وزي ما قولت مينفعش نحكم من البدايات على حد، قفلت باب الشقة ودخلت أوضتي، كنت لسه هغير هدومي لقيت تليفوني بيرن، دكتور وليد. ازيك يا آنسة هند؟

= أنا بخير يا دكتور، هو في حاجة حصلت؟ لا مفيش، مالك مخضوضة كده ليه؟ = أصل غريبة إن حضرتك بتتصل. هو مش أنتِ المسؤولة عن الحالة ولا إيه؟ = معاك حق، طب هو عادل كويس؟ عادل كويس بس للأسف هو مكملش الجلسة ومشي. = وده هنتصرف معاه إزاي طيب؟ أنا بحاول بكل الطرق معاه. لازم هو يبقى عنده الرغبة إنه يتعالج يا آنسة هند. = هو عنده والله بس معرفش مشي ليه من عندك.

الحالات اللي زي عادل محتاجة تتعاملي معاها بهدوء شديد كأنك بتعاملي طفل صغير. = وده أنا هعمله إزاي؟ لازم تبقي قدامي عشان تفهمي أكتر، هو أنا ينفع أقابلك؟

ترددت من طلبه، طلب غريب بصراحة بس وافقت عشان علاج أخويا مش أكتر، في النهاية أنا كل اللي يهمني إن أخويا يخف، حددنا معاد وهقابله بكرة الساعة 5، قفلت المكالمة، حاولت أهدى بقدر الإمكان، دخلت عملت الأكل اللي عادل بيحبه واستنيته، جايز ده يساعد في تحسين نفسيته، الساعة دقت 9 ولقيته داخل من باب الشقة. كنت فين يا عادل؟ = كنت بتمشى شوية. الدكتور اتصل وقال إنك مشيت من الجلسة، ليه كده يا عادل؟ = مكنتش مرتاح.

بس أنت قولت إنك عايز تتعالج. = الموضوع صعب يا هند، أنا قاعد قدامه مكسوف مش عارف أتكلم وهو بيسأل أسئلة غريبة جدًا وأنا محرج أرد عليه. يا حبيبي ده شغله أصلًا يعني المفروض متتكسفش من الدكتور بتاعك وكمان محدش هيعرف أي حاجة عن اللي أنت بتحكيه غيره هو. = وأنا هثق فيه إزاي بقى؟ يا حبيبي وهو إحنا كنا روحنا ليه طالما مش واثقين فيه؟ = طب يا هند أنا محتاج أفكر في الموضوع ده تاني.

الموضوع مش محتاج تفكير يا عادل، لازم تروح الجلسات يا حبيبي، أنا نفسي أشوفك أحسن واحد في الدنيا وتتجوز وأشوف عروستك، عايزة أفرح بيك يا حبيبي، عشان خاطري يا عادل. = هفكر طيب. بس متتأخرش، ويلا بقى كفاية كلام، أنا جهزتلك الغدا.

الحنية، من أكتر الصفات اللي ممكن تكسب بيها قلب اللي قدامك، مجرد بس إظهار مشاعرك للي قدامك ممكن يحل حاجات كتير، تخيلوا مثلًا لو كان رجع من برا واتخانقت معاه كان هيعند أكتر ويصمم إنه ميروحش الجلسات تاني، لكن الحنية والكلام الحلو هما الحل لأي مشكلة بتواجهك مع حد قريب منك، اتغدينا واتكلمنا شوية بعيدًا عن الموضوع بتاعه، وخلاص كان لازم أنام عشان أعرف أصحى بدري وأنزل، وبالفعل صحيت خدت دش وغيرت هدومي ونزلت عشان أقابل دكتور وليد.

المرة دي تأخير 3 دقايق. = لا أنا جاية في معادي مظبوط على فكرة. وأنا ساعتي مظبوطة بالثانية. = أنا كمان ساعتي مظبوطة. خلاص مفيش مشكلة اعترفي إنك اتأخرتي وأنا هقبل عادي مفيهاش مشكلة. = بس أنا متأخرتش. ولو طلعتي اتأخرتي؟ = الحساب هيبقي عليا. فتحت التليفون وطلبت كود بعرف منه الوقت والتاريخ واليوم والنتيجة كانت إن الساعة كانت 5:03. شوفتي بقى عرفتي إنك اتأخرتي، كده هتشيلي الحساب. وضحك ضحكة انتصار مستفزة.

استنى بس، التلت دقايق دول أنا قضيتهم في الكلام معاك يعني أنا وصلت هنا الساعة 5 بالظبط. = إيه ده؟ يعني إيه؟ ساعتي مش مظبوطة؟ اظبطها بقى. = ماشي، هشيل أنا الحساب. كده كده هتشيله، هو ينفع يعني بنت هي اللي تدفع الحساب؟ = آه وإيه يعني، مش أنتوا بتطالبوا بالمساواة؟ في كل حاجة إلا الحساب. = اشمعنا دي بقى، طالما طالبتوا بالمساواة يبقى هتتعاملي زينا. أنا شكلي لازم أمشي قبل ما تلاعبني على المشاريب. = مشاريب!!

آه مشاريب، مالها الكلمة فيها إيه؟ = هي مش اسمها مشروبات تقريبًا؟ ده عندك أنت يا دكتور لكن إحنا لا. = وهو الدكتور ده مش بشر ولا إيه؟ خلاص يا عم أنت هتتقمص ولا إيه؟ = لا مبتقمصش أنا. طب أنت مش ملاحظ إننا نسينا إحنا جايين ليه؟ = فكرتيني، أنتِ جبتي سيرة لعادل إني كلمتك إمبارح أقولك إنه مشي؟ آه طبعًا بس متقلقش أنا عرفت أصلح الموضوع وجاب نتيجة كويسة.

= لازم تخلي بالك جدًا من كلامك معاه، شخصية عادل حساسة جدًا وممكن تتأثر بالكلام، كمان أنا بسألك إذا كنتِ قولتيله إني كلمتك ولا لا عشان مش عايزه يحس إنه مضغوط، أنا عايز أشيل من عليه الضغوط عشان العلاج يجيب نتيجة. أنا بحاول والله بس مش عارفة أعمل إيه تاني. = متعمليش أنا اللي هعمل الفترة الجاية، عايزك متقلقيش خالص أنا معاكي.

كملنا اليوم وإحنا بنهزر ونضحك، شخصية لطيفة جدًا وعنيدة جدًا، شايف نفسه شوية بس مش مشكلة يعني، كنت فاكرة إنه قافل ومبيعرفش يهزر لكن طلع ده جو العيادة بس، بعد تمشية وكلام كتير معاه روحت البيت، كانت الساعة 8 ونص، دخلت جوا عشان أطمن على عادل، فتحت باب أوضته لقيته اتنفض وقام بسرعة. مش تخبطي الأول قبل ما تدخلي؟ = وأنا من إمتى بخبط يا عادل؟ مش جايز أكون قالع هدومي؟ = مالك يا عادل في إيه؟ مم.. مفيش حاجة.

لمحت التليفون في إيده بيحاول يداريه. هو التليفون ده جواه إيه مش عايزني أشوفه؟ = هيكون جواه إيه يعني؟ طب هاته. = وأنتِ مين عشان تشوفي تليفوني؟ لو مجبتش التليفون يا عادل هعلي صوتي وهجبلك أمك وهي اللي هتتصرف معاك، أنا مخلياها بعيد عنك عشان أنا اللي مسؤولة عنك لكن لو هتتعوج معايا يبقى هخليها هي تتعامل معاك بقى واستحمل اللي هيحصل وكمان..

وفي ثانية خطفت منه الموبايل بسرعة وأنا بتكلم، وزي ما كنت متوقعة كان فاتح شات زياد، ومش بس كده ده أنا لقيت صور مبعوتة من زياد، صور لجسمه أو تحديدًا أعضاء من جسمه، رميت التليفون من إيدي وصرخت فيه. أنت بتعمل كده ليه؟ قول إنك مش عايز تتعالج لكن بتكدب عليا ليه؟ انطق بتعمل فينا كده ليه؟ مش كفاية الفضايح اللي إحنا فيها بسببك؟ أنت عايز مننا إيه؟ رد. = يا هند والله مش أنا، أنا لقيته هو اللي باعت لوحده.

عبيطة أنا بقى هصدق الكلام ده؟ = يا هند والله ما بكدب.. أنا... اسمع يا عادل، أنت لو فضلت بالشكل ده يبقى مكانك مش معانا، روح دور على مكان تاني، أنا مش هفضل أتنقل من مكان لمكان ومن بيت لبيت عشان حضرتك، أنا تعبت يا أخي حس بيا شوية. جرس الباب رن، مشيت وروحت فتحت، الدكتور وليد!! خير يا دكتور في إيه؟ = أنا عايز أكلمك في موضوع مهم جدًا. موضوع إيه؟ = آنسة هند.. تتجوزيني!!