رواية ليست جميلة الفصل الأول 1 - بقلم سوليية نصار

هي دي مرات ابنك؟ دي وحشة أوي يا منال. قالتها واحدة من المعازيم، وهي صاحبة حماتي المقربة، في كتب الكتاب وهي مش واخدة بالها إني سامعاها. اتنهدت حماتي، واستنيت إنها تدافع عني، بس قالت بحزن: اعمل إيه يا مروة؟ ده اختيار فارس، هو اللي صمم عليها، ومفيش على لسانه إلا "بحبها، بحبها". وده ابني، مقدرش أخسره، بس بدعي إنه يفوق قبل ما يربطه بعيل ولا اتنين. طبطبت عليها الست وقالت: الواد ده بخته مايل كده ليه؟

معقول الدكتور فارس، اللي البنات كلها تتمنى نظرة منه، يقع في دي؟ كان فين عقله وهو بيختارها؟ ابنك اتجنن يا منال. غمضت منال عينيها بحزن. فجأة قالت الست: أنا شاكة إن البنت دي عاملاله سحر، أصل مستحيل يبصلها. مقدرتش أسمع أكتر من كده وجريت بعيد.

طلعت برا بيتنا ووقفت في الحديقة الصغيرة اللي أنا اهتميت بيها من صغري. دايماً لو مخنوقة باجي هنا عشان أحس بالراحة. بس المرة دي لأ، مكنتش حاسة بأي راحة. بالعكس، دموعي كانت بتنزل وأنا حاسة الدنيا ضيقة أوي عليا.

فارس هو حب حياتي. قابلته في أول سنة كلية طب الأسنان وحبينا بعض. أنا حقيقي معرفش إزاي حبني أنا من وسط كل البنات اللي كانت هتتتهبل عليه، بس هو حبني أنا. عمره ما حسسني إني قليلة، بالعكس كان دايماً شايفني الأجمل. كنت بشوف نفسي جميلة في عينيه. بس رغم إن مفيش حد من أصحابي ولا قرايبي حسسني إني حلوة، بالعكس كانوا دايماً بيشفقوا عليا وبيقولوا: "مين هيرضى بيا؟

". أنا مش جميلة زي البنات، وجسمي مش مثالي. فاقدة الثقة بنفسي، ووشي باهت دايماً. طول عمري بحس نفسي مش حلوة، والناس اللي حواليا حسسوني بكده أكتر. مفيش إلا بابا وماما بس اللي حسسوني بكده، وفارس كمان. بس الكلام النهاردة رجعني للواقع تاني، واكتشفت إني لسه مش حلوة، وإنه هيجي يوم وفارس يفوق ويسيبني. أو ممكن يتجوز عليا. صرخت بفزع لما حسيت بحد بيحضني. غمضت عيني وفارس بيحط راسه على كتفي وقال بصوته الهادي:

اهدي يا حبيبي، ده أنا. قاعدة ليه لوحدك هنا؟ غمضت عيوني ودموعي بتنزل. فارس خلاني أبصله واتصدم لما شافني ببكي. مسك وشي وقال بخوف: أنوار مالك يا حبيبتي؟ قوللي مالك.

مقدرتش أستحمل أكتر من كده وفضلت أبكي جامد. حضني فارس من غير أي كلام وفضل يطبطب عليا. فضلت أبكي لوقت طويل. محسيتش بنفسي وأنا ببكي وقلبي محروق من جوه. كلام حماتي وصاحبتها لسه في ودني. سمعت كتير كلام محرج إني مش حلوة، لكن أول مرة الكلام يأذيني بالطريقة دي. لأول مرة الكلام يخليني ما أثقش بحب فارس ليا. بعدني فارس عنه وهو بيمسح دموعي وبيقول: قوليلي بقى مين اللي زعلك؟ بعدت عنه وقولت بتهور وبصوت مخنوق: أنا عايزة أطلق.

نعم يا حيلتها؟