رواية ليست جميلة الفصل الثاني 2 - بقلم سوليية نصار

انتي بتهزري صح؟ طلاق إيه؟ أنا عملت إيه غلط عشان تطلبي كده؟ مردتش عليه، وبدل ما أرد عيطت تاني. بصلي هو بحزن ومسك إيدي وقال: قوليلي يا أنوار مين زعلك؟ ليه بتبكي؟ أنا عملت حاجة غلط؟ هزيت راسي وصوتي كان مخنوق من العياط: اومال إيه؟ فهمني إيه اللي حصل طيب. بصتله وأنا بمسح دموعي وقولت: انت اتجوزتني ليه؟ ممكن تجاوبني؟ رد ببساطة: عشان بحبك. بس أنا رفضت أصدق وقولت:

مستحيل تكون بتحبني…. فارس بص على شكلي قولي إزاي تحب واحدة بالشكل ده؟ انت مش ناقص حاجة عشان تتجوزني. إيه الهبل ده يا أنوار؟ مالك يعني ما انتي زي القمر اهو… إيه المشكلة؟ انت كداب. أنا مش حلوة… أنا وأنت وأهلي عارفين كده كويس بس بتحاولوا تكدبوا على نفسكم قبل ما تكدبوا عليا. ربع إيديه وقال: وأنا هكدب عليكي ليه إن شاء الله وهتجوزك ليه لو مش عجباني؟ رديت من غير تفكير: عشان شفقان عليا. ضحك وهو بيحط إيده على وشه وقال:

انتي مصدقة اللي بتقوليه يا أنوار؟ هعمل اللي عملته ده كله عشان بس شفقان عليكي؟ مسك وشي وقال: قولتها وهقولها دايماً… هقولها دلوقتي وبكرة وفي كل وقت يا أنوار… أنا بحبك… بحبك جدا كمان… وبحب شكلك وملامحك وصوتك حتى غباءك بحبه… ارتاحتي دلوقتي؟ هزيت راسي وأنا بحضنه. طبطب عليا وقال: قوليلي بقا مين اللي زعلك بالشكل ده؟ مين اللي قالك الكلام الفارغ ده؟ بلعت ريقي بس طبعاً رفضت أطلع والدته قدامه وحشة وقولت:

مفيش بس لما شوفت البنات الحلوين النهاردة صعبت عليا. ابتسم وقال: بس أنا مشوفتش غيرك انتي♥️ غمضت عيني براحة. عارفة إني هواجه كتير معاهم… بس حب فارس أكيد هيخليني أصمد… عشان خاطره أنا مستعدة أعمل المستحيل…… خلصت حفلة كتب الكتاب وكان الفرح بعد أسبوع. مر الأسبوع بسرعة بسبب التجهيزات. فارس رغم مشاغله كان بيجيلي كل يوم ويكلمني. كان مهتم بيا جدا. رغم حبه الكبير بس الخوف اللي في قلبي مخلصش. كنت حاسة إن في يوم هيزهق مني ويمشي.

جه قبل يوم الفرح وجات حماتي تتكلم معايا. قعدت معاها في الجنينة بتاعتنا وأنا متوترة. اتفضلي اشربي النسكافيه يا طنط. فارس حكالي أن حضرتك بتحبيه بالطريقة دي. بصتلي هي من فوق لتحت وقالت: مليش نفس يا حبيبتي. أنا جاية أديكي حاجة وامشي. أتوترت وفركت كفي وقولت: اتفضلي يا طنط. رفعت رأسها وقالت: اللي يحصل ده يبقي بيننا، بلاش تصغري عقلك، ماشي؟ أتوترت أكتر، فكملت هي:

لما سألت فارس هتروحي أنهي بيوتي سنتر قال أنك حابة تعملي ميكب بسيط يوم الفرح وقال إن واحدة قريبتك هي اللي هتعمله. ابتسمت وقولت: أيوه يا طنط أنا طلبت كده. أنا مش بحب الميكب التقيل وشايفة إن كل دي تكاليف ملهاش لازمة. وليه يا حبيبتي شايفانا بنشحت؟ أنا هوديكي أكبر بيوتي سنتر في مصر. متزعليش مني، انتي جمالك متواضع جدا وابني ما شاء الله جماله مغطي عليكي، ولا انتي عايزة الناس تعيب عليكي؟

مينفعش لازم نحافظ على وضعنا قدام الناس؟