رواية ليتني لم اكن الفصل السادس 6 - بقلم مروة علي

-أميرة.. "قل يا عبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعًا إنه هو الغفور الرحيم" عايزة تموتي نفسك يا خديجة، طب وبعدين هتستفيدي إيه؟ ها، ماتردي يا خديجة، ولا أي حاجة غير إنك هتخسري دنيتك وآخرتك، طب وأهلك يا خديجة، والناس اللي بيحبوكي؟ وبعدين للدرجة دي ضامنة آخرتك؟

آه اللي حصلك صعب، بس اعتبريه بلاء ومفروض تتعلمي من غلطتك وتعرفي أكتر عن دينك يا خديجة، ماتزعليش مني يا خديجة، بس لو حكيتي لأي حد هيقول إنك أنت الغلطانة، ليه قلعتي الخمار من الأول؟ وليه بعدتي عن ربنا؟ ليه يا خديجة؟ ليه وصل بيكي الحال إنك مش عارفة إن اللي كان أحمد بيقوله دا مش جواز؟ وليه قلعتي الحجاب؟ ليه يا خديجة؟ -خديجة بصريخ وعياط.. بس بقي! بس! وبتقعد

على الأرض وبتفضل تعيط: أنا عارفة إني غلطانة ومتسرعة، بس دا غصب عني، حبي ليهم عمّاني عن كل حاجة، ولقيت كل اللي حواليا كدا، والله غصب عني، وحتى لما روحتلهم كان عندي أمل إن كل دا يطلع كذب، بس طلع كابوس أسود وغدروا بيا، أنا عايزة أتغير والله يا أميرة، بس دايماً بلاقي في بيتنا رأيين، أمي وأبويا عكس بعض، أمي عايزاني أبقى زي بنات اليومين دول، وأبويا عايزني أقتدي بالسيدة خديجة، بس صعب يا أميرة، صعب، وأنا كل اللي حواليا واخدين الدين حتة قماشة على شعرهم، آه يا رب!

وبتعيط. أميرة بحزن.. بحضنها: بس دا مش مبرر يا خديجة، مش مبرر أبداً، وبعدين كل واحد فينا يوم القيامة هيتحاسب لوحده، وقتها هتقوليله إيه؟ أصل كان الباقي كدا وأنا صغيرة وعايزة أعيش شبابي، ربنا ميزنا بالعقل يا خديجة، يبقى لازم نفكر شوية، دلوقتي مثلاً لو عايزة تطلعي الأولى، هتعدي محاضرات وتطنشي المذاكرة؟

لا طبعاً، دا أنتِ هتجيبي آخرك وهتحاولي بكل جهدك إنك تبيني للدكاترة إنك مجتهدة وبتعملي كل اللي عليكي، طبعاً لله المثل الأعلى، زيها بالظبط زي وصولك للجنة، لازم تجيبي آخرك يا خديجة. خديجة بحزن.. حاضر يا أميرة. أميرة بحنان.. طب يلا، مستنية إيه؟ الفجر لسه عليه 10 دقايق، روحي خدي شاور واتوضي. خديجة.. ماشي، بس أنا مش معايا هدوم.

أميرة.. بصي، أنا ليا هنا طقمين بسيبهم عشان لو حصل حاجة واضطريت أقعد هنا، هجبلك واحد منهم بالخمار. خديجة.. حاضر. وبتبدأ تقوم، وأميرة بتسندها وتوديها لحد الحمام. "بعد ربع ساعة" أميرة بفرح.. شكلك جميل أوي يا ديجا، بجد الدريس والخمار جمال عليكي، ماشاء الله، يلا نصلي. خديجة.. يلا، بس أنا عايزة أصلي لوحدي، ممكن؟ -أميرة.. من عنيا يا ديجا، ثانية أظبطلك مكان للصلاة.

وبعد خمس دقايق بيبدأوا يصلوا كل واحدة لوحدها، وأميرة بتخلص وبتسيب خديجة على راحتها. -خديجة بعياط.. يارب، أنا عارفة إني غلطانة وأستاهل كل اللي يحصلي، بس يارب والله مش هعمل كدا تاني، وأوعدك إنها آخر مرة، وهبدأ بداية جديدة.. يارب اقف جنبي يا رب، وصلني للحقيقة.. يارب أنت أقرب ليا من حبل الوريد، يارب ماليش غيرك. وبتلم حاجتها وبتروح عشان تنام. -خديجة.. إن شاء الله هنزل بكرة بالخمار ومش هقلعه تاني.

-أميرة بفرح.. بجد يا ديجا؟ وبتحضنها جامد: أنا مبسوطالك أوي بجد. خديجة بفرح.. تسلمي يا ميرو، يلا بقي ننام عشان الكلية. وبيناموا. "في عربية أحمد" مريم بعصبية.. يعني إيه يا أحمد؟ أحمد.. يعني مجتش جنبها يا مريم، إيه صعب تتفهم؟ مريم بعصبية.. أنت حيوان، هو أنا كنت جايباك عشان تقولي معملتش حاجة؟ أحمد بعصبية وهو بيشد شعرها.. حاكم بقولك إيه، أنا ما صدقت أهرب، واحمدي ربنا إنّي أخدتك معايا، ف لمي نفسك كدا، ماشي يا حلوة.

-مريم بغل.. ماشي يا أحمد، أنا هوريك. "فلاش باك" -أحمد بعد ما بيطلع مريم.. بيبدأ يطلع هدوم تانية من الدولاب وبيلبسها. أحمد... أووف بقي، وبعدين أنا لو قربت من الزفتة خديجة هودي نفسي في داهية، وطبعاً مريم مش هيحصلها حاجة، ف أحسن حل إني أفضل قاعد. بس ثانية، وبعدين بيفتكر إن فيه باب سري معمول في الأوضة زي لون الحيطة، أبوه كان عامله عشان لو حصل ظرف طارئ يعرف يتصرف (أبوه ضابط)

، وبيقعد يدور على المفتاح، بس بيسمع دوشة برا، وبيلاقي دوشة في الأوضة اللي جنبه، بيعرف إن فيه حد بيدور على خديجة، وبيفتح الباب وبيخرج للشقة، أول ما بيسمع حد بيحاول يفتح باب الأوضة، وبيــقفل الباب وراه، وبيــنزل الستارة بالريموت، وبيــجي يطلع من الشقة، بيلاقي مريم بتصرخ، ف بياخدها معاه. "في بيت حذيفة" أميرة.. ياربي مين الغتت اللي بيرن دلوقتي؟ وبترد على الفون. حذيفة.. كل دا نوم يا أميرة؟ بقينا العصر.

أميرة بفزع.. العصر!! يالهموي! المحاضرات والكلية وخديجة. وبتبص تلاقيها نايمة، بس بتبدأ تصحى. حذيفة.. اهدي، الدنيا ما طارتش، أهم حاجة عايزك تقنعي صاحبتك إن لازم نروح لدكتور نسا، لأن بنسبة كبيرة البنت محصلهاش حاجة. أميرة.. ماشي يا حذيفة، بس... خديجة.. قوليله إني موافقة يا أميرة.