رواية ما قبل العاصفه الفصل الرابع 4 - بقلم سمر احمد

انتي ايه اللي جابك هنا يا ولية؟ حسنية بتوتر: هكون بعمل إيه يعني. قمر: مالك اتوترتي كده ليه؟ سما، بنت حسنية، جت من وراها: وتتوتر ليه يا بنت أبويا؟ كنت حاسة بشوية سخونة جاية أكشف عليا. وإنتي عايزاني أموت عشان تلهفي كل حاجة لوحدك؟ قمر: الله لا يموتكم انتوا الاتنين ونخلص منكم. حسنية: بتقولي حاجة؟ قمر: بقول ربنا يشفيها. حسنية: وإنتي بقى بسلامتك بتعملي إيه؟

قمر: إنتي عارفة إني بهتم بصحتي، فكنت بتابع هنا وبعمل تحاليل كل فترة بطمن على نفسي. أيوه، أمال مين يهتم بشركة بابا؟ حسينة بعصبية: جتكوا البو انتوا أبوكم. يلا يا بت يا سما. *** حسنية: الحمد لله إنك جيتي في الوقت المناسب يا بت. سما: عيب عليكي يا ماما. حسنية: أول ما تروحي جهزي كدا فرختين حلوين لأبوكي وسيبلي أنا الباقي.

سما: كنت نفسي أقولك بلاش، بس هو اللي دايماً كان بيعمل فرق وفضل ست قمر علينا ولا كأننا عياله من لحمه ودمه. حسنية: ولا تزعلي نفسك يا بت. من النهاردة كل حاجة هتبقى باسمكم وتتدلعوا آخر دلع. *** في المستشفى، عدي بقلق: هي مرات أبوكي عرفت حاجة؟ قمر: لا، اطمني. مش لازم حد يعرف عشان ابني يفضل في حضني. عدي: بس الولية دي مش سهلة. أنا خايف تعرف وتبوظ كل حاجة.

قمر: اطمني. أول ما ابني يطلع من هنا هيفضل في الأوضة ومحدش هيشوفه لحد ما تعدي فترة على جوازنا ونقول إني خلفت، ونمنع حد يشوفه برضوا. وأهو أما يكبر محدش هيميز إنه أكبر سنة. عدي: أيوه يعني، وأبوه مش هيعرف؟ قمر: أبوه ده هو اللي لعب بيا، ولسة اللي هعمله فيه أكتر. عدي: من غير أذية، متنسيش إن ده أخويا. قمر: أنا مش قاتلة، قاتلة. اطمني. *** في بيت حسنية. حسنية دخلت المطبخ على سما: جهزتي الفراخ يا سما؟

سما: وحمرتها وظبطتها يا ماما. حسنية: طب اطلعي انتي، وأول ما أبوكي ييجي بلغيني. سما: حاضر يا ماما. شوية وأبو قمر جه من الشركة ونادى على حسنية: يا حسنية انتي فين؟ سما: ماما في المطبخ من الصبح يا بابا، يا عيني واقفة على رجليها بتجهزلك الأكل. أبو قمر: يااه، أمك دي حاسة بيت. أنا جاي ميت من الجوع. سما: في ثانية يا بابا هقولها تجيبلك الأكل. أبو قمر: يا ريت. سما: طيارة. سما دخلت على أمها المطبخ: ماما، بابا جه وعايز ياكل.

حسنية: جهزي السفرة وأنا جاية وراكي. سما: حاضر يا ماما. جهزوا السفرة وقعدوا ياكلوا. أبو قمر: إنتي ليه حطالي الأكل دا كله يا حسنية؟ هو إنتي عرفاني إني بقدر آكل الكمية دي؟ حسنية بخبث: كل، ورم عضمك. دانت طول النهار في الشغل. أبو قمر: سبحان مغير الأحوال. سما: يعني ده غلط ماما إنها عايزة تغذيك؟ أبو قمر: يا بت، دايماً واقفة مع أمك كده. مفيش مرة تنصفيني. طب الله يسمحلها قمر. عليها كلام إنما إيه، يرد الروح.

سما قامت بعصبية: قمر، قمر، قمر! هو إنت مخالفتش غير قمر؟ مفيش حاجة بتعجبك غير الست قمر؟ هو إحنا مش عيالك؟! أي سدة نفس دي. أنا طالعة أوضتي. أبو قمر: شوفي قلة الأدب. حسنية: إنت دايماً اللي كاسر نفسهم. أبو قمر: ماهو بسبب تربيتك. حسنية: طب ياخويا كل. أبو قمر: مش عارف ليه أما أكلت حسيت بوجع في بطني وجسمي. حسنية أما اتأكدت إن مفعول السم بدأ يشتغل: تلقاك بس عشان مأكلتش من الصبح. كل ياخويا كل.

شوية وبعدها صرخ أبو قمر: في حرقان في كل جسمي وبطني بتتقطع. حسنية قامت مسحت بوقها بفوطة ووقفت وراه وهو ساند على السفرة: خليها تتقطع كمان شوية. أبو قمر: اطلبي الدكتور يا حسنية. حسنية: ونطلبه ليه؟ والعلاج معايا. أبو قمر: علاج إيه بس؟ ابعتي للدكتور، مش قادر. حسنية: ليه؟ دانا حتى مهونتش عليا العشرة والعيش والملح، ومرضتش أحطلك السم كله. أبو قمر مسك نفسه ولف ناحيتها وحط إيده على رقبتها: إنتي بتقولي إيه يا ولية انتي؟

حسنية بعدت إيده وجابت ورق كانت حطاه على الكرسي اللي جنبها من غير ما أبو قمر ياخد باله وقالت: نزل إيدك ياراجل ياشايب. أيوه، أنا سميتك. ولو ممضتش على الورق ده مش هديك الإزازة دي. أبو قمر: أخف بس وشوفي هعمل فيكي إيه. هااااتي الإزازة. حسنية: مش هتاخدها غير أما تمضي على تنازل بكل حاجة لأولادي. أبو قمر بتعب: مش همضي. قمر ليها حق زيهم. حرام عليكي. حسنية: يبقى هتموت وبرضو عيالي اللي هياخدوا كل حاجة.

أبو قمر حط راسه على السفرة وبدأ يتوجع أوي. حسنية جابت القلم والورق قدامه ومسكته القلم: إمضي. أبو قمر بص لها بغضب وتعب وبعدها بص للورق ورفع القلم وحطه على الورق وبصلها. حسنية: أيوه كدا، يلا إمضي شاطر. أبو قمر حط القلم على مكان إمضته ولسة هيمضي و..........