رواية معلمة من الصعيد الفصل السادس والعشرون 26 - بقلم مريم شعبان

صباح يوم جديد في المدرسة. في فصل جاد، كانوا قاعدين مستنيين مودة تيجي. ويدخل تامر. تامر: صباح الخير. الكل: صباح النور. يوسف: يا هلا، حضرتك فين ده كله؟ تامر: معلش، كنت مسافر. جاد: الحمدلله. جيت ليه؟ قصدي حمدالله على سلامتك. تامر: الله يسلمك. نبدأ بقى حصتنا، مش عايز تأخير. كفاية كده، صح ولا إيه؟ رويدا: صح طبعًا يا مستر. تامر: طيب، نبدأ بقى. *** في كلية زهراء. زهراء: لا، أنا زعلانة منك. هاجر: طيب أعمل إيه؟ كنت مسافرة.

زهراء: إيه ده كله سفر ليه؟ هاجر: ما أنتِ عارفة، ماما بتحب تقعد هناك كتير، وشكلنا الترم التاني هنسافر هناك. زهراء: ده بجد؟ هاجر: آه يا زهراء، للأسف هتجوز وأقعد هناك. زهراء: ربنا يكملك على خير. ابن خالتك صح؟ هاجر: آه يا حبيبتي. اتفرجي بقى صوركم بتاعة امبارح كده. زهراء: يلا تعالي. *** في القسم، عند حاتم ومصطفى. حاتم: بجد يا مصطفى رايح الصعيد؟ مصطفى: لازم أروح الصعيد. أنت هنا وأنا هناك.

حاتم: على خير يا صاحبي. ربنا يستر طريقك. طيب ووالدك؟ مصطفى: جاي معايا. حاتم: على خير يارب. مصطفى: يارب. أشوف وشك بخير. حاتم: في رعاية الله يا صاحبي. *** في المدرسة، في أوضة للمدرسين. تدخل رويدا. تامر: رويدا، تعالي. رويدا: حضرتك عامل إيه؟ تامر: تمام. إنتي عاملة إيه؟ رويدا: بخير الحمدلله. حضرتك كنت فين؟ تامر: كان عندي سفر مهم أوي. آسف جدًا على التأخير في الدرس. بإذن الله من النهارده، أنا فاضي نشرح الدرس. ينفع النهاردة؟

رويدا: آه عادي، تنور يا مستر في أي وقت. تامر: اقعدي، واقفة ليه؟ رويدا قعدت. تامر: إيه، عاملة إيه في المذاكرة؟ رويدا: ماشية الحمدلله، أهو بحاول. تامر: ربنا معاكي. ويروح قاعد قدامها ويمسك إيديها. تامر: لو عايزة أي حاجة، أنا موجودة. رويدا بتوتر: أكيد يا مستر. حاضر. والباب يخبط ويدخل غيث. وتامر يسيب إيدها على طول. غيث بشك: مستر تامر، نورت. تامر: بنورك. غيث: رويدا، يلا على فصلك. رويدا: حاضر. وتجري.

غيث: حضرتك كنت مختفي فين؟ تامر: كنت مسافر. غيث: آه. أهلاً. بعد إذنك عشان عندي حصة. ويمشي. تامر: أوف، رخم. *** في المطعم. غرام قاعدة لوحدها. وييجي يوسف. يوسف: يا صباح الجمال. غرام: نعم على الصبح؟ يوسف: هقعد معاكي. غرام: أكيد لا. يوسف: هقعد معاكي غصب عنك. غرام: أوف. وتسيبه وتقوم. يوسف: ماشي يا غرام، ماشي. إيه ياربي الناس المحترمة دي؟ ماهر: ناس محترمة؟ سيبها في حالها. يوسف: ماهر. ماهر: آه. مالك بيها؟

يوسف: برخم عليها بس. ماهر: اقعد عايز أتكلم معاك. يوسف: نعم. ماهر: روحتوا امبارح المطعم ليه تاني؟ يوسف: مودة قالتلك؟ ماهر: هي مودة كانت معاكم؟ يوسف: آه. ما مين قالك؟ ماهر: واحد صاحبي شاف جاد وهو داخل هناك وقالي أخوك وأصحابك هناك. وأه عشان كده بيقولي معاهم بنت. كنتوا رايحين ليه؟ يوسف: عايز أجيب حق أخويا. ماهر: المطعم كله إسرائيلي. يوسف: عارف. ما مين السبب في موت أخويا؟

ماهر: ربنا يرحمه ويغفر له. ممكن تفوق بقى وتركز في مستقبلك. والدتك محتاجاك دلوقتي يا يوسف. مش محتاجة حاجة غير تفرح بيا. يوسف: أمي مش مهم عندها غير اسمها. حتى حق ابنها نسيته غالبًا. ونسيت ابنها اللي في فلسطين كمان. ماهر: مفيش أم بتنسى عيالها يا يوسف. والدتك ربنا يكون في عونها حقيقي. وربنا يصبرها. ابنها مات قدام عيونها. والتاني مش عايز ينزل. يوسف: وأنا عايز أجيب حقه.

ماهر: حقه هيجي هيجي بإذن الله. ذاكر بالله عليك ذاكر عشان خاطر والدتك. يوسف: حاضر. ماهر: يلا على فصلك. وباذن الله حق أخوك هيرجع. يوسف: بإذن الله. *** في فصل جاد. تدخل مودة. مودة: السلام عليكم. الكل: وعليكم السلام. مروان: أخيرًا افتكرتي إن عندي حصص. مودة: آسفة بجد، بس أنا فرحي كمان أسبوعين وكنت بجهز ومش فاضية. بس أوعدك بعد الجواز بأسبوع هيكون معاكم على طول. تيا: بإذن الله. مودة: فين يا يوسف؟ جاد: راح يجيب حاجة وجاي.

مودة: تمام. عاملين إيه؟ رويدا: الحمدلله. مودة: الحمدلله. يلا نبدأ لحد ما يوسف يجي. *** ويمر أسبوع في تجهيز كتب كتاب رحاب وماهر. وتجهيزات فرح مودة وعز. وبيري وغيث. وفرح مودة وعز تم تأجيل الفرح أسبوع عشان يقدروا يفرحوا بكتب كتاب رحاب وماهر. وفي الفترة دي رحاب مشفتش ماهر كتير غير في المدرسة والتجهيزات. وتم برضو تأجيل فرح غيث وبيري أسبوعين كمان.

مفيش أحداث جديدة. الكل مشغول في الفرح. محدش عارف يفكر في أي حاجة. ولا مين تجار مخدرات ولا متهمين الفترة دي. بالشباب والبنات المهم عندهم دلوقتي يخلصوا كتب الكتاب على خير. *** قبل كتب الكتاب بيوم. فيلا سليم. ماهر: عايز حاجة بسيطة كده ومكان للستات ومكان للشباب. المساعد: تمام يا فندم. وييجي عز. عز: أي خدمة يا عريس؟ ماهر: لا يا حبيبي تسلم، كله تمام. عز: طيب الحمدلله. فرحي بسببك تم تأجيله أسبوعين. ماهر: ما أعمل إيه؟

لازم نتجوز في أقرب وقت. عز: ليه إن شاء الله؟ ماهر: عشان أهل لين. إحنا مش عايزين مشاكل. عز: على خير يا أخويا. متخافيش خير. ماهر: الحمدلله. وبعدين ده أسبوع بس، يعني عادي يعني مش شهر يعني. غيث: لا يا حبيبي. ما بسببك فرحي أنا بقي بعد 3 أسابيع. ماهر: كبرتوا الموضوع والله يا شباب. عز: اسكت يا بني. حاتم: طيب أنتوا كلكم فرحكم بعد شهر. طيب أنا والغلبانة اللي جوا دي؟

ماهر: اصبر. اتجوز أنا الأول ونخلص من العيال دي. وتكتب عليها بعد فرح غيث. حاتم: أحلف. ماهر: آه والله. أكلم بابا. مش عايزين دوشة بقى. حاتم: أقسم بالله حبيبي. بس أختك هتوافق؟ ماهر: أكيد براحتها. بس ده كتب كتاب مش جواز. هتقعدوا فترة كده. تمام يعني كام شهر كده عشان تتجوزوا. حاتم: اكتب الأول وبعد كده نشوف الجواز بعدين. غيث: مستعجل أوي. حاتم: لا يا واد. طيب شوف نفسك. غيث بضحك: كلنا مستعجلين. عز: قد وقعنا في عشق الحوريات.

حاتم: بالله سيبني عشان مينفعش أتكلم عشان حرام. وعشان أنتوا أخواتها واقفين. عز بضحك: آه. بس أختك حبيبتي يا حاتم. أي مراتي. حاتم: ماشي يا عز، ماشي. غيث: بس بنت عمك حبيبتي يا عز. شوفت جبتلك حقك. حاتم: حبيبي. سليم: أنتوا واقفين كده ليه؟ غيث: الحاج عقبالك كده. مفيش غيرك قاعد. سليم: أنا كل ما أقول خلاص استحمله يطلع بحاجة تخليني أكرهك أكتر. احترم نفسك. خلصت يا ماهر كل حاجة؟ ماهر: آه يا جدو. كله تمام.

سليم: على خير يا بني بإذن الله. وييجوا الشباب. يوسف: الشماريخ جاهزة يا جدعان. سليم: شماريخ تاني؟ موسى: مفيش فرح من غير شماريخ. سليم: والله. جاد: والله يا جدو. سليم: أنا تعبت منكم. غيث: بس يا حاج إحنا عندنا فرح. سيبنا نفرح براحتنا. متخافيش الشماريخ مش هتعمل حاجة. سليم: مش واثق فيك. بس تمام. *** في بيت صابر. البنات كلهم هناك. رحاب: كفاية وشي حرام عليكم. مودة: بس لسه طقوس الأفراح. عندي فاضل كام ماسك يا بيري؟

بيري: اتنين. رحاب: لا كفاية. مش قادرة. بيري: بت اصبري شوية. رحاب: وشي. أشوف فيكم يوم. زهراء: بطلي دعاء علينا. حطي يا مودة، حطي. يارا: قال مش هحط حاجة في وشي ولا أعمل مكياج. مع إن الحفلة بنات. لسه. رحاب: عشان أنا مش صغيرة على الكلام ده. بيري: مش صغيرة. بالله اسكتي. ولا كأننا سامعين حاجة. كملي. مودة: صح، بردو افرحي يا حبيبتي مع جوزك وانسى اللي فات. ماهر شخص كويس.

رحاب: أنا حاسة إني استعجلت أوي. كان لازم آخد فرصة أفكر. وأي بعد شهر من الكلام نتجوز على طول. مودة: من ناحية الاستعجال، فهو استعجال على فكرة. بيري: بس يا بت انتي كمان. مودة: بقول الحقيقة. رحاب: كان المفروض أرفض صح؟ مش هينفع. زهراء كلمي أخوكي وقولي إني مش موافقة. زهراء: يلهوي عليا يا بنتي. اهدي شوية. مش موافقة إيه؟ الفرح بكرة. رحاب: خايفة أوي. متوترة وعايزة أعيط. وتعيط. بيري: ياربي بقي. مالك بس؟

زهراء: يا رحاب، ماهر مفيش أطيب منه. متخافيش كده. رحاب: أنا مش خايفة. مودة: طيب خايفة ليه؟ رحاب: عشان حاسة إني مستعجلة ووافقت بسرعة. يارا: عشان هو الخير ليكي. وماهر شخص كويس. رحاب بدموع: عارفة. زهراء: خلاص اهدي. أنا أكلم ماهر أقوله يوقف كل حاجة. رحاب: لا طبعًا. يارا: ما انتي عايزة. رحاب بدموع: مش عارفة. حسناء: في إيه يا حبيبتي؟ رحاب: ماما، خليهم يوقفوا كل حاجة. حسناء: ليه يا حبيبتي؟ رحاب: مش عايزة أتجوز تاني.

مودة: زهراء كلمي ماهر خليه يجي يشوف الكائن ده. رحاب: لا طبعًا. زهراء: بس يا رحاب. وتخرج تكلم ماهر. حسناء: ممكن تهدّي. رحاب: لا، خليه يوقف كل حاجة. حسناء: طيب في إيه حد يفهمني؟ رحاب: أنا استعجلت أوي. حسناء: يعني عايزة تسيبي ماهر؟ رحاب بدموع: لا بردو. *** فيلا سليم. الشباب واقفين. وموبايل ماهر يرن. ماهر: السلام عليكم. أي يا حبيبتي؟ زهراء: وعليكم السلام. ماهر، تعال هنا ثواني. ماهر: ليه؟ في إيه؟

زهراء: رحاب بتعيط وعايزة تلغي كل حاجة. ماهر: طيب أنا جاي. سلام. ويقفل. عز: في إيه؟ ماهر: رحاب بتعيط وعايزة تلغي كل حاجة. حاتم: نعم؟ ليه؟ ماهر: مش عارف. تعال نروح نشوف في إيه. حاتم: تمام. يلا. ويمشوا. غيث: خير بإذن الله. عز: في إيه بس؟ غيث: توتر عادي يا بني. إحنا هنشوف كتير من كده. عز بضحك: وأنا المدام اسمها مودة. توتر أساسًا. غيث: كلهم يا بني. والله دي هرمونات عندهم كده. عز: ربنا يسترها. غيث: يارب. *** بيت صابر.

الكل في أوضة رحاب اللي بتعيط. وييجوا الشباب. حاتم: أمي. هيام: خليك عندك ثواني. حاتم: حاضرة. هيام: الحجاب يا بنات. البنات: حاضر. حسناء: تعالي يا حاتم. حاتم يدخل وماهر يفضل برة. حاتم: إيه؟ في إيه؟ حسناء: شوفي الهبلة دي. حاتم: مالك يا رحاب؟ رحاب: الغي كل حاجة. حاتم: ليه بس؟ رحاب: كده. حاتم: طيب ماهر برة وعايز يكلمك. تعالي نخرج وأنا هقف جنبكم. رحاب: تمام. وتخرج. رحاب: السلام عليكم. ماهر: وعليكم السلام.

حاتم: أنا واقف هنا أهو. ماهر: تمام. تعالي نقعد يا رحاب. ويقعدوا. ماهر: مالك بس؟ رحاب: مفيش. ماهر: طيب بتعيطي ليه؟ ونلغي كتب الكتاب ليه؟ رحاب بدموع: عشان كل حاجة جات بسرعة. ماهر: طيب ممكن تهدي من غير عياط. واللي انتي عايزاه هيحصل. رحاب: نلغي الفرح فترة.

ماهر: حاضر يا ستي. بس عايز أقولك حاجة. أنا لما عملت كل حاجة بسرعة عشان قولت مفيش داعي للخطوبة ونكتب ونعمل حفلة بسيطة وبس كده. وكمان عشان أهل لين مش عايزين مشاكل. فقولت تكوني مراتي على طول. وغير ده كله أنا محتاجك جنبي. فقولت على خير ونعمل فرح على طول. بس طالما إنتي مش مرتاحة نلغي كل حاجة. وشوفي الوقت اللي إنتي عايزاه. رحاب: يبقي إنت مش عايزني. ماهر: ليه بس بتقولي كده؟ رحاب: عشان هتلغي كتب الكتاب. ماهر بص لحاتم.

حاتم: مجنونة، أقسم بالله. ماهر: يا رحاب مش إنتي اللي عايزة كده؟ رحاب: آه. ماهر: طيب. رحاب: مش عايزة حاجة. محدش له دعوة بيا. ماهر: طيب بس اهدي وبطلي عياط ونتكلم براحة. إنتي خايفة ليه؟ رحاب: خايفة من 3 أطفال مش هقدر عليهم لوحدي. ماهر: مين قالك إنك لوحدك؟ أنا معاكي. وهيكون جنبك في أي حاجة. رحاب: أنا خايفة من فكرة مرات الأب دي.

ماهر: رحاب، أنا لو مش واثقة إنك هتكوني أم لولادي ما كنتيش اخترتك. بالعكس، أنا واثقة إنك هتكوني أحن أم. ونورسين وسند بيحبوكي أوي. وأظن إنتي شوفتي بنفسك الكلام ده. صح ولا لأ؟ رحاب: صح. ماهر: طيب خايفة من إيه تاني؟ أوعي تكوني خايفة من... رحاب: لا مش خايفة. ماهر: طيب اهدي كده وصلي على النبي. أولاد؟

إحنا مع بعض. إحنا هنشارك بعض كل حاجة. المسؤولية هتكون كبيرة عليكي. إنتي قدها وإحنا مع بعض. وصدقيني مش هسيبك أبدًا. هنحافظ عليهم مع بعض. ويا ستي لو عايزة نلغي كتب الكتاب، يتلغي. رحاب: بجد؟ ماهر: آه والله. رحاب: طيب ممكن نلغي فترة؟ ماهر: حاضر يا ستي. حسناء: إنتي بتقولي إيه؟ ماهر: طنط، لو سمحت. أنا آسف. هو قرارها هي. وهي مش مرتاحة دلوقتي. ف نلغي عادي كل حاجة. حسناء: يا بني الفرح بكرة. إنتي مجنونة يا رحاب؟

ماهر: مش مهم. عادي. أهم حاجة هي تكون مبسوطة ومرتاحة. يلا يا حاتم. حاتم: يلا. رحاب: اصبري. ماهر: نعم؟ رحاب: الفرح هيكون في نفس المعاد. حاتم: لا، أنا تعبت. ماهر: رحاب، مفيش أي إجبار عليكي. عايزة تلغي بجد؟ عادي، أقسم بالله. رحاب: لا خلاص. ماهر: آخر كلام؟ رحاب: بإذن الله. ماهر: تمام. يلا يا حاتم. حاتم: يلا قبل ما تغير رأيها. ويمشوا. مودة: ممكن بقي نكمل؟ رحاب: يلا. *** في المساء. البنات وجاد وموسى قاعدين فوق السطح.

سهام: أعمل أكل إيه بكرة يا بنات؟ مودة: أنا الصراحة مش عايزة أكل من البيت. هيام: ما عايزة أكل. بيري: تعالوا نجيب ماك. سهام: طيب، طالما من برة. فاكروا براحتكم. يلا يا هيام ننزل نشوف حسناء وأسماء. هيام: يلا. وينزلوا. رحاب: مش داخل في دماغي حوار ماك ده. زهراء: عايزة كبدة. رحاب: كبدة؟ جاد: أوبا! بس هتدخل البيت إزاي؟ يارا: البركة فيك. جاد: أجيبها أنا يعني؟ رحاب: آه. إيه رأيكم الصبح بدري تروح يا جاد وتيجي بسرعة؟

جاد: خلاص تمام. موسى: الشماريخ جاهزة. جاد: كله تمام يا باشا. زهراء: كبدة وشماريخ. ماشاء الله. مودة: أنا ضمنت كده إننا هنتطرد كلنا. جاد: أنا مليش دعوة. أجيب الأكل وأمشي. رحاب: مش هتاكل معانا؟ جاد: لا، هاكل وأنزل جري. عشان أقسم بالله لو حد من الشباب عرف يولع فينا كلنا. مودة: طيب اسكت بس. جاد بضحك: تمام. *** ويمر باقي اليوم. وييجي اليوم المنتظر. البنات كلهم بيجهزوا الفيلا. سليم في أوضة مودة. مودة: فهمت يا جاد؟

جاد: آه. هروح أنا وموسى ونيجي بسرعة. زهراء: بالظبط كده. يلا قبل ما الماكييرة تيجي. موسى: تمام. يلا. ويمشوا. رحاب: ربنا يستر. بيري: كان لازم كبدة يعني؟ رحاب: أنا بحبها. بس ربنا يستر. وجاد يجيب من حد كويس. يارا: يارب. وتيجي هيام. هيام: بنات، البنت بتاعت الماكيير جات. رحاب: خليها تدخل يا طنط. هيام: اتفضلي يا بنتي. الماكييرة: السلام عليكم. الكل: وعليكم السلام. مودة: تعالي اتفضلي. منورة. الماكييرة: بنورك. فين العروسة؟

رحاب: أنا. الماكييرة: مبارك يا جميلة. رحاب: الله يبارك فيكي. الماكييرة: لو تحبي تأكلي قبل ما نبدأ؟ رحاب: آه هاكل. بس ممكن شوية كده. الماكييرة: طيب أبدأ أحط ميكب ولا؟ رحاب: لأ. زهراء: ممكن معلش تاكل الأول. الماكييرة: أكيد. بيري: الأكل لسه جاي في الطريق. الماكييرة: خلاص نحط ماسك لحد ما يجي. رحاب: تمام. *** عند جاد وموسى بيلفوا بالعربية عشان يشوفوا محل كبدة. موسى: بقالنا نص ساعة بنلف.

جاد: طيب ما أنا معرفش مكان هنا. وعمري ما أكلتها من برة. موسى: جاد، في واحد هناك أهو. جاد: يلا بينا. *** عند البنات. رحاب: اتأخروا أوي. زهراء: يكون جدو عارف؟ بيري: يالهوي! مش كنتي عايزة تلغي الفرح؟ أهو هيبوظ يا زفتة. رحاب: بيري، امشي من هنا. مودة: معلش يا آنسة. أصل إحنا هنجيب سندوتشات كبدة. وجدو مانع الحاجة دي هنا. الماكييرة: آه براحتكم. عادي. أنا قاعدة. رحاب: تسلمي. ما تردي يا زفت يا موسى. موسى: السلام عليكم.

يارا: وعليكم السلام. أنتوا فين؟ موسى: جاين أهو. خمس دقايق ونكون عندكم. يارا: تمام. يلا بسرعة. وتقفل. يارا: جاين. رحاب: يارب يطلعوا هنا من غير أي دوشة. *** عند موسى وجاد. واصلوا الفيلا. موسى: هندخل إزاي؟ جاد: تعال ندخل من الباب الخلفي. وربنا ييسر. موسى: تمام. يلا. ويروحوا يدخلوا من الباب الخلفي. جاد: ندخل من المطبخ. موسى: طيب. طنط وعمتو هناك. جاد: دول ستر وغطا علينا. موسى: تمام. يلا. ويدخلوا. جاد: السلام عليكم.

وكان طالع هو وموسى. حسناء: تعالوا، تعالوا. جاد: نعم يا حماتي. حسناء: حماتك في عينك. رايحين فين؟ موسى: عند بنات. سهام: ليه؟ وإيه الريحة دي؟ جاد: من الآخر. دي كبدة. هيام: كبدة من برة؟ طيب كنتوا قلتوا وكنا عملنا كبدة هنا. موسى: طيب يا عمتو، ممكن نطلع عشان اللي فوق ده؟ سهام: اطلعوا. واطلعوا بسرعة قبل ما حد يشوفكم. جاد: تمام. ويجروا على فوق. هيام: ربنا يستر. الكل: يارب. *** عند البنات. يجوا موسى وجاد.

رحاب: ده كله خمس دقايق؟ موسى: لحد ما عرفنا نجي. يارا: يلا ناكل بس بسرعة. مودة: اتفضلي يا آنسة. الماكييرة: لا تسلمي. مودة: لا والله مينفعش. الماكييرة: لا يا حبيبتي. أنا مش بحبها. تسلمي. أنا جايبة سندوتشات معايا. هدخل البلكونة آكلها لحد ما تخلصوا. رحاب: تمام. اتفضلي. وتمشي. وهو يقعدوا على الأرض ياكلوا. زهراء: الله. طعمها حلو أوي. جاد: جد! بيري: أول مرة أجربها من برة. بس تحفة.

موسى: إحنا على طول كبدة لما كنا في البلد. بس دي فيها حاجة. يارا: آه. بس بتاعت البلد أحلى مليون مرة من دي. رحاب: حتى أنا لاحظت كده. دي فيها طعم غريب كده. مودة: آه. زهراء: طيب نخلص بسرعة. ونعطر بقي عشان محدش يعرف. بيري: تمام. *** في أوضة ماهر. الشباب كلهم عنده. وعز بيعمل شعر ماهر. غيث: جاد وموسى اختفوا فجأة. حاتم: آه. يمكن راحوا يجيبوا الشماريخ. عز: يمكن. حلو كده يا باشا. ماهر: تسلم إيديك.

عز: سلمك الله. مبارك يا أخويا. ماهر: الله يبارك فيك. *** عند البنات. خلصوا أكل. ورحاب بدأت تجهز. ولبست فستان أبيض بسيط. مودة: بسم الله ما شاء الله. قمر يا رحاب. رحاب: شكلي حلو. يارا: جدا. اللهم بارك. زهراء: طيب مين يزغرط دلوقتي؟ رحاب: أنا عادي. لولولولوي لولولولو. مودة: عادي عادي. زغرطي. رحاب: لولولولوي لولولولو. نورسين: طنط رحاب، بصي. رحاب: يا ختي على العسل. نورسين: بحبك أوي. رحاب: وأنا كمان. حسناء: إيه يا بنات؟

خلصتوا؟ بيري: آه يا طنط. حسناء: طيب يلا. الناس كلها تحت. وربع ساعة ويبدأ كتب الكتاب. مودة: حاضر. نازلين. وتمشي حسناء. مودة: يلا بينا. رحاب: لازم نخرج يعنى. مودة: يلا يا رحاب. ويقوموا كلهم. ويخرجوا. *** تحت عند الستات. سهام: منورين يا جماعة. بسملة: بنورك. بيري: العروسة جاية ورانا أهي. وتشتغل الأناشيد. وتنزل رحاب تقف جنب البنات. سهام: بسم الله ما شاء الله. مرات ابني القمر. رحاب: تسلمي يا طنط.

هيام: اللهم بارك. اللهم بارك. رحاب: عمتو. هيام: قلبي عمتو. رحاب: شكلي حلو. هيام: جدا يا رحاب. اللهم بارك. مودة: كتب الكتاب بدأ. رحاب: أنا عايزة أروح. الكل يضحك عليها. هيام: تروحي إيه؟ أمسكوا البت دي. بيري: متخافيش يا طنط. ماسكها كويس. هيام: جدعة. وتمر إجراءات كتب الكتاب. صابر: هيام. هيام: نعم يا أخويا. صابر: عايز أدخل عشان إمضاء العروسة. هيام: آه طبعًا. بنات اتغطوا. تعالي يا صابر. صابر: السلام عليكم.

الكل: وعليكم السلام. صابر: بسم الله ما شاء الله. إيه الجمال ده. رحاب حضنته: حبيبي يا عمو. صابر: يلا أمضي يا عروسة. رحاب: حاضر. وتمضي. صابر: مبارك عليكي يا ابنتي الغالية. رحاب: الله يبارك فيكي. ويمشي صابر. ويسمعوا كلهم: "بارك الله لكم وبارك عليكم وجمع بينكم في خير". وانطلقت الزغاريط. يارا عيطت وحضنت رحاب. رحاب: طيب بتعيطي ليه؟ يارا: عشان هتسيبني وتمشي. سهام: يا حبيبتي هي جنبك أي وقت. تعالي.

رحاب: بس عشان هعيط أنا كمان. يارا: لا خلاص. حسناء: مبارك يا حبيبتي. رحاب: الله يبارك فيكي يا ماما. وتعيط حسناء. رحاب: يا جماعة. مودة: خلاص خلاص. كفاية عياط. حاتم: يا جدعان العريس عايز يدخل. رحاب: يدخل فين؟ ده بيهزر. خليه برة. بيري بضحك: خلي يجي يا حاتم. رحاب: إنتي بتقولي إيه؟ مودة: مش ناقصة جنان. هيروح. حاتم: يارب يا ساتر. مودة: اقفي عندك عشان أصوّر. سهام: يا هبلة.

مودة: اصبري يا سهام إنتي بس. يلا يا بنات على طول عشان نصوّر. رحاب: يلا. ويجروا كلهم. حسناء: مجانين. أقسم بالله. ماهر: السلام عليكم. الكل: وعليكم السلام. سهام: تعالي يا حبيبي. ماهر: فين العروسة؟ سهام: تعالي جوا عشان التصوير. ماهر: تمام. ويروح معاها. وكانت رحاب واقفة بضهرها. زهراء: تعالي يا عريس. بيري: لفي يا عروسة. وتلف رحاب. وانطلقت الزغاريط. ماهر بابتسامة: بسم الله ما شاء الله. ويسلم عليها. ماهر: قمر.

رحاب بتوتر: شكرًا. زهراء: إيه الكلام ده؟ ماهر: كلام. بيري: بيكون في حضن كده ولفة. ماهر: تصدقي صح. ويقرب من رحاب. رحاب: لا لا. ويشيلها ويلف بيها. مودة: لولولولوي لولولولوي. وينزل رحاب. ويحضنها. ماهر: مبارك علينا. رحاب: الله يبارك فيك. سهام: يلا يا عرسان تعالوا ارقصوا مع بعض شوية برة. ماهر: تمام. زهراء: امسك إيديها. ماهر: حاضر. ويخرجوا. ويشغلوا "ليلة عمر". وينصيب. ويرقص ماهر ورحاب عليها. والبنات حولهم.

ويمر الوقت في سعادة وفرح وبهجة. بعد الفرحة. هيام: مبارك يا ولاد. ماهر: الله يبارك في حضرتك. صابر: خلي بالك منه. ماهر: في عيوني يا حاج. صابر: يلا بينا إحنا بقي يا بنات. حاتم: يلا يا لين. لين: وماما. مودة: إنتي هتجي معانا انهاردة. وبكرة تيجي لماما. لين: ماشية. رحاب حضنتها: اسمعي الكلام. لين: حاضر. حسناء: يلا يا بنتي اطلعي مع عريسك. رحاب: حاضر. ماهر: بعد إذنكم يا جماعة. ويطلع هو ورحاب. نبيل: ربنا يحفظهم لبعض.

الكل: يارب. صابر: يلا بينا إحنا. *** في جناح رحاب وماهر. ماهر: اتفضلي. ويدخلوا. ماهر: نورتي جناحك يا حبيبتي. رحاب: شكرًا. ماهر: تحبي تأكلي؟ رحاب: هروح أغير الفستان. ماهر: تمام. اتفضلي. بس اتوضي عشان نصلي. رحاب: حاضر. وتمشي. ماهر: الحمدلله يارب. الحمدلله. *** عند بيري. واقف هو وغيث. بيري: أنا شايفة كده إني كل واحد يروح لحاله. ماهر اتجوز. غيث: والله تفتكري جدك هيسيبك حتى لو اتجوز؟ بيري: مش فاهمة.

غيث: جدك مستعد يجوزك ماهر حتى لو هتكوني زوجة تانية. بيري: طيب هنخلص إمتى؟ غيث: جدك يشيل الكلام ده من دماغه. بيري: ياربي إمتى؟ غيث: الله أعلم. أنا ماشية. بيري: ليه؟ غيث: عادي. سلام. بيري: ثواني بس. غيث: عايزة إيه؟ بيري: أنا آسفة. إنت زعلت ليه؟ غيث: مش شايف كلامك. فرحك بعد 3 أسابيع يا هانم. بيري: إيه ده؟ أنا فرحي بعد 3 أسابيع؟ يالهوي نسيت. غيث: شوفي بقى. خلينا نكمل الموضوع ده. وفترة ويتم الطلاق لما الوضع يكون تمام.

بيري: آه. غيث: للدرجة دي عايزة تخلصي مني؟ بيري: آه. غيث: خلاص عرفت يا ستي. بيري: آه. الحقيني يا غيث. غيث بقلق: مالك؟ بيري: بطني مش قادرة. *** في جناح رحاب وماهر. رحاب: هما نورسين وسند هييجوا إمتى؟ ماهر: بكرة بإذن الله. رحاب: تمام. ماهر: ما تأكلي يا رحاب. رحاب: مش قادرة. بطني واجعاني. ماهر: طيب تحبي أعملك حاجة تشربيها؟ رحاب: لو ينفع ممكن ينسون. ماهر: ينفع طبعًا. ويقوم. رحاب: أه. ماهر مش قادرة. ماهر: مالك بس؟

رحاب: بطني يا ماهر. بطني. ماهر: إنتي أكلتي إيه الصبح؟ رحاب: كبدة من الشارع. ماهر: كبدة؟ رحاب: مش قادرة. ماهر: طيب. ثواني. ويروح يجيب الإسدال ويجي. ويساعدها إنها تلبسه. ويشيلها وينزل. *** في أوضة نبيل وسهام. نبيل: الحمدلله. ربنا طمن قلبي على ماهر. سهام: الحمدلله. وربنا رزقه بالزوجة الصالحة تحفظ على بيته وعياله. عقبال الباقي يارب. وعقبال زهراء.

نبيل: اللهم آمين. أحلى حاجة إنهم كلهم من العيلة. حتى بيري ربنا كرمها واتجوزت واحد نعرفه. سهام: آه الحمدلله. ويسمعوا صوت صراخ. نبيل: في إيه؟ ويجري. سهام: يا ساتر يارب. وتجري وراه. وتلاقي ماهر نازل بيجري برحاب. سهام: في إيه؟ وتشوف زهراء خارجة بتعيط. وجاد بيصرخ. نبيل: في إيه؟ مالكم؟ والكل يخرج. عز: مالك يا جاد؟ مالك يا زهراء؟ ماهر: هاتهم بسرعة وتعال ورايا. وينزلوا كلهم. سليم: في إيه؟

كاظم: مش عارفين يا بابا. بيري إنتي كمان؟ غيث: عمي، أنا مش عارف ماله. ماهر: أكلوا كبدة. سليم: نعم؟ نبيل: مش وقت يا بابا. يلا بينا. ويجروا كلهم. ويكون حاتم نازل وماسك مودة. ويارا وصابر خارج ب موسى. صابر: رحاب بنتي مالها؟ ماهر: الكبدة يا عمي. يلا بس بسرعة. ويركبوا كلهم ويمشوا. بسملة من البلكونة ليوسف. بسملة: هو في إيه؟ مالهم دول؟ يوسف: مش عارف. بس جاد وموسى مالهم. أنا لازم أروح. بسملة: طيب يا حبيبي. عارف المستشفى؟

يوسف: أكيد. المستشفى اللي هنا. ويروح يلبس.