رواية معذبي الفصل الخامس 5 - بقلم مروان فرج

عامر كان مضايق هلبا من مرته عبير اللي كانت تطلع وترجع للحوش امتى ما تبي وهو مش قادر يتكلم بكل. قعد في الحوش بروحه وفتح النت وقعد مكسد لعند ما في حد اتصل بيه على الماسنجر. عامر فتح عيونه على الآخر ولقاه عماد، أخو مرته. مهي ما كانتش متوقعة بكل. مباشرة رد عليه وسكر النت على طول وحس بروحه إنه خايف ومرتبك. معاش كيف عماد حصل إيميله على الفيس، وما كانش عارف لو حد اتصل بيه شن بيقوله: "وين مرتك؟ وين بنتك؟

مهم، عامر سكر النت بكل وقعد يستنى في عبير امتى تروح عشان بيحل منه موضوع القصة كلها متاع الشركة. جت الساعة 1 في الليل وروحت عبير للحوش وكان جوها حلو هلبا. ولقت عامر يستنى فيها ومقعمز على الصالون. حست إن راجلها مش على بعضه وراقي هلبا. عامر كان راقي بكل. على طول سألها: "وين كنتي يا عبير؟ عبير: "كنت عند صاحبتي مش بعيد هلبا. كم ليا معاش شفتها عاد. قلت خليني نمشي ونطمن عليها عشان ديما تقولي تعالي."

عامر: "باهي، خيرك ما خديتيش الإذن مني؟ على الأقل مش راجلك أنا؟ عبير: "أي، وأحلى راجلي. بس لقيتك مشغول مبكري قلت نطلع وخلاص. اممم، زعلت مني حبيبي؟ " وقربت عليه هلبا عشان تحضنه وتخليه يسكت. عامر: "دفها وكان مش ضايقها بكل. شن صار في المحامي متاعك؟ راهو أنا معاش نقدر نتحمل. هيا، ديري رايك وكملوا إجراءات." عبير: "خلاص ياحبي، من بكره راح تستلم مكتب خاص وكل شي زي ما وعدتك. مهم، ما تزعلش بكل."

عامر: "باهي." وقعدوا ساهرين مع بعض وجوهم حلو، بس عامر كان يفكر في أخو مرته عماد وكيف بيتصرف معاه. *** جي ثاني يوم الصبح وناض عامر ومشي للشركة. لقي عبير موتيه المكتب بتاعه. خش وقعدوا كل اللي في الشركة يقولوا له: "يومدير." عامر حس بروحه إنه فعلاً مدير وكان مكتبه حلو هلبا على عكس ما كان عليه زمان. أول ما جي للشركة كان عبارة عن عامل عادي بكل وما فيش حد يحكي معاه أو يدور فيه بكل، بس توا صار العكس.

وكلهم قعدوا يقولوا له: "مدير" ويدوه فيه وهيك. وكل لأن عبير طلعت من الكل إنه يعاملوه هكي ويقولوا له: "يومدير." بس عامر ما كانش يعلم إن عبير دارت هكي عشان تسكته وخلاص. يعني دارت شوي حاجات عشان عامر يصدق روحه وما يديرش معاها مشاكل، بس كان تفكر إنه مستحيل رح تكتبه الشركة باسمه. كان تعطي فيه مرتب كويس والناس يقولوا له: "مدير" عشان يصدق وبس. عبير كان تفكيره قوي بكل. 😂

المهم، عامر عجبه الجو في الشركة عشان كان يطلع امتى ما يبي ويجي امتى ما يبي وعنده مرتب حلو وهيكي. بس كان عنده مشكلة، واللي هو خايف إنه أهل مرته يجو ويسألوا على بنته ومرته. شن رح يقولهم بعدين؟ وأصلاً لو عرفوا رح يا إما يقتلوا، ويا إما رح يقعد في الحبس لآخر عمره. قعد عامر يفكر كيف رح يدير عشان يسرق مبلغ كويس من مرته عبير ويسافر بيه برا بكل. قعد يتربب في الخطة لأنا عبير كان عندها فلوس بس تحط فيهم في مكان مش عارفه هوا.

قعد عامر يدلع في عبير هلبا ويساس فيها عشان يعرف وين تحط في الفلوس. وحتى لما تطلع تسهر مع صاحبتها وتسكر، معاش قعد يدور فيها. وكل يوم دلع وجو حلو. فلة. وقعد معبي وكان كل مرة يحطوا مبلغ عشان يخلي مبلغ كبير ويسافر فيه. *** #عند تقوى

قعدت نقرا وكل يوم نمشي ونروح من للمدرسة وكنت فرحانة هلبا عشان قعدت مع عيلته حلوة زي سعاد وعبدالجليل. كانوا يخافوا عليا زي إني بنتهم الصغيرة وما عمرهمش ضربوني أو دارولي أي شي. بالعكس، سعاد غير شن تبي؟ "يتقوى يابنتي." كنت ديما لما نشوف فيها تخاف عليا. نحبها هلبا ونسمع كلامها وكنت أحاول ما نديرش شي يزعلها منها.

كانوا أيام حلوة وجي ولدهم أكرم ومعاه مرته. واستغربوا لما شافوني في الحوش. 😂 يحاسب بوه عنده مراته ثانية وعنده منه بنته. وقعد يبصر على أمه هلبا وعبدالجليل يضحك لين خلاص. وسعاد قريب تضرب ولدها. هههه. وحتى بنتهم سناء لما جت قريب طارت من علقها وبدت في النكد لبوها تحاسبه متزوج من قبل. لعند ما قالت لها أمها وفهمت كل شي. كانت سناء حلوة وما فيش منها اتنين. كل مرة لما تجي تجيب لي في حاجات وتجيب ف صغارها. نلعب معاهم.

كانت عندها زوز بنات: رزان وليان. ❤️😂 أصغر مني في العمر بس كنت نحب نلعب معاهم. ويجوا مرات يباتوا عندنا في حوش بابا عبدالجليل. مشوا أيام ونحجت وصلت لعند ثالثة إعدادي ونحجت منها بتقدير ممتاز. وكنت فرحانة هلبا وكنت خاطري إني نكون دكتورة أسنان. ❤️ وأول ما قلت لبابا الفكرة، على طول قبل وفرح بيها وقعد يدعم فيا. وحتي أمي نفس الشي. #تسريع الأحداث

بعد مرور 3 سنوات، كملت الثانوي وطلعت منه بنسبة ممتاز. وكبرت هلبا. ❤️🔥 وشكلي تغير. اللي قبل كنت بيبي، توا وليت بنت حلوة وكاملة. وكانت أمي سعاد كل يوم تشوف فيا نكبر قدامها وكانت فرحانة هلبا، وزي بابا عبدالجليل. حتى هو كان يشوف لي وهوا فرحان. كنت نذكره ببنتته سناء. ❤️🔥 وطبعاً نسيت قصة أمي وبوي لأني بجد حصلت ناس عوضوني على أهلي بمية مرة. وما كانش عندي نية نرجع ونشوف بوي اللي كان معذبني هلبا.

كملت الثانوي وكانوا عندي صديقات هلبا ودرت هلبا معارف من الثانوي. وقعدت حايرة شن بنقرأ. اللي يقولي اقري طب بشري، وفي اللي يقولي أسنان أحسن. ونا كنت حايرة 😅. نسأل في أمي تقولي: "اقري اللي تبيه واحنا معاك." ولما نمشي نسأل بابا يقولي: "اقري طب أسنان كويس وأنا نبيك دكتورة عشان نحصل حد يخدملي سنوني اللي كلهم طاحوا." 🔥

وبعد تفكير طويل قررت إني نقرا في كلية طب الأسنان. ولما خبرت بابا، فرح هليّ لأني هو كان يبيني نقرا طب أسنان. وفعلاً خذيت شهادة الثانوي من الثانوية اللي كنت فيها. ومشيت أنا وبابا وسجلني في الكلية. وروحنا وكنت فرحانة. ولما روحنا لقينا أكرم وصغاره وسناء جايين وأمي دايرة الغدي.

خشيت معاها وغيرت دبشي وبدينا في الغدي. كنت ديما نحب لما نلقى ماما أدير في شي نخش ونساعدها عشان كنت نبي نردها جزء بسيط من اللي دارتها وساعدتني فيه. درنا الغدي وحطيناه وقعدنا ناكلوا وكان جو العيلة حلو بكل. سناء وبناتها اللي كبروا زي ما كبرت أنا. 😅🔥 وأكرم وصغاره. وطبعاً عادل كان مسافر برا. يعني ديما يتكلموا بالتلفون. قعدنا نتغدى والكل كان يضحك وجو حلو. لعند ما بابا وهوا يتغدى اتكى عليا لأني

كنت مقعمزة جنبه وقالي: "أنحس في روحي دخت." أنا: "خفت هلبا وع طول كلمت أكرم وقلت له بابا مريض، خليني نعرفه بسرعة للمستشفى." ناض أكرم بسرعة وناضت سعاد وحطينا بابا في السيارة ومشينا بيه طول ودخلناه للمصحة. وبعد شوي طلع الدكتور وقال: "عبدالجليل صايرة هبوط وعنده سكر. وأهم شي تحافظوا عليه. يعني راهو ما يتحمل أي شي، لا صدمات ولا شي." 🔥🥺 أنا: "كنت خايفة هلبا وكانوا حاطين بابا في الغرفة عشان ركبوا له تغذية. لأني تعب شوي.

وقعمزت جنبه وقلت له: "مش رح نخليك بكل." وقعدت نسلم على يديه لعند ما كملت التغذية وزروحنا بيه للحوش." 🔥 وصلنا وحطينا بابا في الدار. وكنت نبي نقعد معاه وهيك بس ماما قاتلي: "خليه يرتاح ويرقد وغدوة راح يكون كويس." طلعت وخشيت لداري مضايقة هلبا لأني بابا تعبان. *** #في بنغازي في حوش أهل مهي عماد وزوز إخوته كانوا مانشغلين على عامر ومهي وبنتهم لانا. من لما مشوا غادي كلموهم مرة واحدة بس وبعدين انقطعت الاتصالات بينهم بكل.

خالد: "مش معقولة هكي يا عماد، راهو كم لينا سنة معاش كلمنا مهي وعامر. مرات يكون صاير لهم شي واحنا مش عارفين." عماد: "حتى أنا معاش عرفت شن ندير. حصلت إيميل عامر واتصلت بيه على الماسنجر مرة ورن بس، مباشر يرد. والمشكلة اختك رقمها مقفل. قديش لينا وعامر حتى هو مقفل. ولما مشيت لخوته وسألتهم عليه قالوا: "من أول ما طلع من هنا معاش نعلموا بيه شي بكل." خالد: "والحل توا هكي؟ راهو مش حل. أقل شي واحد مفروض يطمنهم عليهم وخلاص."

رياض: "اسمع يا عماد، ما فيش حل إلا إنه واحد منا يمشي لطرابلس ويسأل عليهم غادي. هدا أفضل حل. ما أنا الموضوع طويل ويبي وقت، بس ما فيش إلا الحل هدا. واختاري، يا إما تمشي إنت يا إما توا نمشي أنا خلاص." خالد: "تمام بكل وخلينا على اتصال. وإن شاء الله يكون ما صاير إلا الخير." عماد: "إن شاء الله." 🔥 ***

تاني يوم نضت ولقيت بابا حالته أحسن على قبل. وكان عندي أول يوم في الكلية. كنت نبي نمشي بس حالة بابا كانت مش كويسة هلبا. قلت خليني نقعد معاه لأني كان غالي عليا هلبا. نضت ودرت فطور وحطيت على الطاولة وخاشيت نوضت بابا عشان يفطر. نوضته وقعدنا نفطروا مع بعض وكان حالته أحسن شوي. عبدالجليل: "شنو يا تقوى، اليوم أول يوم ليك في الكلية صح؟ أنا: "أي، بس مش رح نمشي." عبدالجليل: "وعلاش ما تبيش تمشي؟ شنو في؟

أنا: "خليني اليوم نقعد وأنت حالته قاعدة مش كويسة، نخاف يصير لك شي." عبدالجليل: "هههه، حنونة يا بنتي. أنا ما فيا شي. وأول ما قعدت ونفطر معاك. هيا خشي وتي روحك عشان نوصلك وما نبيش أي كلام." أنا: "مباه، هي." خشيت ووتيت روحي وطلعنا وحطي بابا قدام الكلية. خشيت وكان فيه زحمة شوي وقعد ندور على القوائم لعند ما لقيتهم. قعد ندور على اسمي وين. ومن جهة، ناض عماد وركب ومشي لطرابلس عشان يطمن على أخته. 🔥

قعدت ندور على اسمي لين في الأخير لقيته ولقيت رقم القاعة. وجيت بنلتفت وراي، خطفت في شخص. رفعت راسي لقيته……. 🔥😳