رواية معذبي الفصل السابع 7 - بقلم مروان فرج

قعدوا الطلبه يضحكوا عليا. وجهي احمر، بكل. رفعت راسي، وفي لحظة ضربت محمد كف قدام الطلبه. محمد… كان مصدوم ومش متوقع يصير هيك بكل. الطلبه… كلهم انصدموا. أنا… قعدت واقفة في مكاني وخايفة ومش عارفة ليش درت هيك، بس هو استفزني لدرجة مش متوقعة. محمد… رفع راسه وكان في عيونه حقد وكره ليا بكل. كان يلقى يضرني ويمسح بيا الأرض، بس تحشم لأني كنت بنت وهو شاب. طلع من القاعة وهو راقيله لين خلاص. وأنا طلعت

وقعدت تحت الشجرة وقولت: "ياريتني ما رديت هيك بكل. حسيت لقطة بايخة قدام الطلبه كلهم. بس قولت يستاهل عشان تاني مرة معاش يعودها بكل. شن يجاسبني أنا؟ سهل." قعدت مقعمزة وكنت خايفة نشوفه بكل. لعند ما جو صاحباتي. وكانوا من صدمتهم من عملتي السودة اللي درتها اليوم. أماني…. تقوى حي عليك شن درتي؟ أنتي كيف تضربي حد وبالطريقة هادي قدام الناس كلها. أنا… خليه يستاهل عشان معاش يعاودها مرة تانية.

مرام… بس مش هيك راهو. لو مش أنتي بنت كان قتلك في مكانك. أقل شي مفروض دفيتيه، درتي أي لقطة مش تضربيه وقدام الطلبه بكل. أنا خايفة راهو يديرلك شي. أنا… شن بديري يعني؟ وقعدت خايفة. أماني…. مش عارفة الحق. بس شكله مش ساهل. مهم معاش تعاوديها. أنا… باهي. بس وين ريما؟ مرام… مش عارفة. قالت بنتصل بوي وتوا تجي. ما عليك منها. أنا… باهي. وقعدت مقعمزة مع البنات وكل شوي نشوف يمين ويسار نخاف يجي محمد ويديرلي شي. عند ريما.

ريماس على طول اتصلت بمحمد عشان تطمن عليه، بس محمد ما رد عليها بكل. وكان طايرله من اللقطة اللي صارت توا. ومشى ركب في سيارته وقعد يخبط على الدركسيون. "الزززح! تضربني بنت وقدام الناس؟ من تحساب روحها هادي؟ تي أنا محمد! ما عمريش حد ضرني بكل. وخليتها… آخخخخخ لو مش بنت تي كان هدا مسحت بيها الأرض. بس أحسن شي هيك. خليتني إني نزيد عشان نجيبها تحت. ورب العزة لو ما تزوجتك يتقوى وما يكون اسمي محمد لو ما تزوجتك. وتوا نشوفي."

#عند عماد. مر أسبوعين وهو يدور على عامر وأخته، بس ما وصلوا لأي نتيجة. أي حد يسألوه يقولوا لهم "مانعرفش". بكل. لعند ما حس عماد إنه فقد الأمل. قعد على الطريق وكان تعبان، لأني كل يوم ينوض يدور عليهم هو ورياض، بس بدون أي فايدة. رياض…. خيرك ياعماد؟ سن صايرلك؟ قصدي مش شرط هما في طرابلس، مرات قعدوا فترة هنا وبعدين مشوا لمدينة تانية. إنشاء الله ما في شي صايرلهم.

عماد…. والله معاد فهمت شي. قصدي مش معقولة قريب دورنا في طرابلس كلها ولينا أسبوعين ندور، بس بدون أي فايدة. أنا فقدت الأمل خلاص. رياض…. تي اصبر ماتستعجلش. أنا أمس في صديق ليا يعرف هلبا ناس اللي يجوا من بنغازي، وعطيته الاسم كامل وقالي توا ندورلك هي. وتوا نتصل بيه ونشوفلك. عماد…. ترا كلمة. وإنشاء الله يصير خير. رياض… اتصل بيه ورد عليه. "ها يامراد؟ بالله طمني شن صار معاك؟ عرفت حد باسم عامر؟ "اللي قوتلك عليه."

"مراد… أي عرفته وجاني للمحل متاعي." عماد كان يسمع ومش مصدق. "بس حظك مش حلو. كان يدور في عمل، بس الموضوع ليه كم سنة. بس خليكم توا نسألك عليه وأكثر." رياض… تمام بكل. بالله للموضوع عندك توا. والراجل جاي من بنغازي، دير جهدك تمام. مراد… تم. شوري الموضوع كون هاني. رياض… بارك الله فيك. ولما يصير معاك شي كلمني. مراد… تمام. وسكر الخط. رياض… اهو قال جاني لطرابلس معاها. وكاين هنا، وأكيد رح نوصلوا لحل.

عماد…. بس إنشاء الله لآني تعبت والله. رياض…. خطرت في بالي فكرة. عندي حد يخدم تبع المستشفى، ورح نعطيهم اسم عامر واسم أختك ونشوف امتى آخر مرة مثلا مشوا للمستشفى عشان نقربوا للموضوع أكثر وأكثر. عماد…. أي والله راحت عن بالي الفكرة هادي. رياض.. تمام. واتصل بصاحبه وقال: "شوفهم الأسماء هادم ولو في شي كلمني." رياض… خلاص ياعماد هيا نوض معايا نتغدو، واليومين هادم نطلعو ندهورو في طرابلس شوي نغيرو جو ونرجعو للبحث.

عماد…. بارك الله فيك. بس حسيت روحي تقلت عليك يارجال. رياض…. نزعل منك راهو معاش تقول هكي. التريس لبعضها. هات يدك. عماد…. تسلم ياطيري. وناض صبه ومشو مع بعض. _#عند عامر. عامر وجماعته غيروا جو في تونس. قعدوا قريب أسبوعين وكان مقرر بعد يومين يروح. طبعاً معاش اتصل بعبير ولا لانا. كان واخد راحته هنا وجوه حلو، حفلات وسهريه مش ناقصه شي بكل. واللي يبيه يلقاه قدامه. كل يوم سهرة في بار وبنات جو يعني مليح.

وعبير نفس الشي، تمشي للشركة تكمل في خدمتها وتروح تسهر هي وصاحبتها في الشقة بتاعة عامر، لآخر الليل. كانو قالبينها أغاني وجوهم سمح. وهيا معاش اتصلت بعامر. كل واحد في حاله. _#عند تقوى. قعدت أنا مقعمزة مع البنات ومن داخلي خايفة. بس خليت روحي قوية قدام البنات. جت ريماس وقعدت جنبي وحسيتها زي اللي مش عاجبها اللي درته بكل. ما تبغى تحكي معايا ولا حرف. قعدنا مقعمزين باهي. نضنا وخذينا محاضرة وروحت. ومشيت الأمور ع خير.

جي بابا ورحت معاه. وحسيته زي اللي تعبان وعنده دهشة. بس خلاه روحي عادي قدامي. ما بغى يخليني نحس بشي بكل. قعد يسأل فيا على قرايتي وكل شي وكيف الأيام الأولية. وقالي: "لما نوصلوا عندي ليك مفاجأة حلوة أنا وأمك." أنا… بجد تحكي يابابا؟ شن هيا؟ قولي عليها. تعرفيني ما عندي صبر بكل. عبدالجليل…. هههههه خيرك مستعجلة؟ اصبري قريب نوصلوا. وعالمهم هادي فكرة أمك مش فكرتي راهو. أنا… وراسك يابابا قولي ما عاد عندي صبر. قولي بس.

عبدالجليل….. هههههه والله ما نقدر نقول. أمك هي اللي قالت لي ما تقوليهاش عليها لين نوصل. أنا…. باهي. هي تشوفت لاكن. عبدالجليل…. هي قريب نوصلوا للحوش. كملنا الطريق. وكنت نبي نعرف شن هيا المفاجأة، لأني كان مش من عوايدي نصبر. وصلنا للحوش ونزلت نجري عشان أسأل أمي ونقولها شن هيا. أنا…. ماما ماما وينك؟ سعاد…. نعم يابنتي. أنا هنا في المطبخ. شن في بس؟

أنا…. مشيت للمطبخ ولقيت أمي تغسل في المواعين. جيت وقوتلها شن هيا المفاجأة اللي داستيها عليا. سعاد…. هههههه قصدك قالك عليها عبدالجليل؟ معا إني قلت له ما تقوليش عليها لين يروح بيك. أنا…. قالي في مفاجأة بس ما بغى يقولي شن هيا. سعاد…. خلاص امشي قعدي في الصالة مع بوك توا شوي ونجي ونقولك. أنا…. باهي. هي. ومشيت قعدت جنب بابا لعند ما جت أمي وقعدت جنبي.

سعاد…. قررت أنا وبوك نديرلك عيد ميلاد حلو. لأني أحنا ما عمريش درنالك عيد ميلاد بكل. بس قولنا المرة هادي رح نديرولك. بالرغم من إن أحنا ما نعرفوش اليوم بالتحديد، بس نختارو يوم ونديرولك. شن رايك؟ أنا…. بجد تحكي ياماما. ونزلت دمعة من عيني. لأني كان حلو هلبا. سعاد…. أي بجد. ومعاش تبكي بكل. نحبش بتني تبكي خلاص عاد. أنا…. حاضر ياماما. بس عندي شرط لو ممكن. عبدالجليل…. قولي ياتقوى. عادي لو عزمت صاحبتي وجو معاي.

سعاد….. هههههه أي عادي. اعزميهم. وبكرة رح يجي أكرم ويرفعنا للسوق بعد الظهر عشان ناخدو حاجات للعيد ميلاد، واعزمي صاحبتك بالمرة. أنا…. ربي يخليك ليا ياماما. وحضنتها وكنت فرحانة هلبا. عبدالجليل… سلم بنتي الحلوة. وقعد يكح. أنا…. نضت بسرعة وجيت قعدت جنب بابا قوتله سلامتك يابابا. عبدالجليل…. ماتخافيش يابنتي. هيا كحة بس. جيب لي ميه وأنا كويس.

أنا…. حاضر. نضت وجبت له طاسة ميه. شربها. وغيرت دبشي وحطيت الغدي. تغدينا وقعدت في داري وأنا نفكر كيف بيمشي الموضوع مع محمد هدا. كنت مش ضايقته بكل. لعند ما جت العشية. جت سناء وبناتها ودرنا جو في العشية قهوة وجو حلو. وجي أكرم حتى هو ومرته. وأمي حطت لهم على موضوع عيد الميلاد. وكنت مقعمزة بحذاهم ومتحمصة. بالرغم من إني كنت وحدة منهم، بس هيك نوعيتي. حشومية.

سناء… فرحت عشان بتمشي معانا غدوة للسوق. وأكرم وافق إني يرفعني. وأمي قالت لي بكرة تريحي من الكلية عشان نمشو من الصبح للسوق ونآخذوا حاجات بكري. وعشان يجوا صاحبتك ويروحوا بكري. أنا…. حتى هدا راي حلو. مالا خليني أتصل بيهم ونكلمهم بكري بكري. سعاد…. أي كلميهم. أنا…. تمام. وخذيت تلفوني اتصلت بيهم بالوحدة: أماني ومرام وريماس. وفرحت عشان وافقوا إنهم يجو. رجعت جنب ماما وسناء وقعدنا نهدرزوا.

ريماس… سكرت الخط مني ورنت على محمد. لأني من لما صارت اللقطة هاديكا محمد ما عاد رد عليها. بعتت رساله وقالت له: "ضروري ترد عليا. نبيك في موضوع هام." محمد… اتصل بيها وقال لها: "نعم؟ شن هو الموضوع المهم؟ ريماس… اها باهي. بنقول لك أنا غدوة بنمشي لعيد ميلاد تقوى. لو تبي يعني. محمد…. اها ميلاد ميلاد شن نبي فيه؟ بس استنى رح نقول لك على شي. لو درتيه لي مستحيل ننسالك المعروف هدا بكل. ريماس… قول نسمع.

محمد…. نبيك لما تمشي وتحضروا عيد الميلاد تصوري لي تقوى صور يكون هيك مغريات شوية. ريماس… بس ليش؟ محمد…. أنتي ما عليك. ديري زي ما قلت لك. بس وعندي ليك حاجة كويسة بعدين. ريماس… من عيوني. وسكرت الخط. تاني يوم نضت بكري الصبح. درت الفطور وفطرنا. وأمي كلمت أكرم جي ورفعنا. ومشت معانا سناء. وخذت لي فستان حلو. يعني قصير شوية بس. وخذينا تورته وكتبوا لي عليها اسمي. ودرنا لفة في السوق. وروحنا.

قعدت نوتي لعيد ميلادي ولبست الفستان. طلع عليا حلو. ووتينا كل شي. جت العشية وجو صاحباتي. ودرنا عيد الميلاد. وكلينا وكل شي. بعدها خشو صاحباتي لداري وقعدنا نهدرزوا مع بعض. لعند ما صبت ريماس وقالت: "خلينا ناخدو صور." مرام: أي فكرة حلوة. خدينا صور مع بعض وكانو حلوات. وريماس قالت لي: "صبي خليني ناخد لك كم صورة تخليهم ذكرى." في الأول رفضت. بس أماني قالت لي: "خودي لأني يوم حلو ولبستك حلوة. تقعد ذكرى." نضت صبيت وصورتني ريماس

صور في تلفونها وقالت لي: "توا نبعتها لك." وقعدنا نهدرزوا مع بعض لعند ما البنات روحوا. لميت الحوسة وخشيت لداري. وفتحت نت. لقيت طلب مراسلة من شخص. فتحته. وكان صدمة. مُـعذبي……. وفي نفس اللحظة كان رياض وعماد مقعمزين. واتصل صاحب عماد بتاع المستشفى وقال: "لقيت اسم المرأة بس للأسف المرأة توفت." رياض… انصدم ومعاش عرف كيف يقولها لعماد. عماد……