رواية مامورية الحب والانتقام الفصل الحادي عشر 11 - بقلم سلمى ايمن

عمر: هربتيه؟ ندى انتي بتهزري صح؟ ندى: مبتهزرش يا عمر. أنا فعلاً هربته. وحالياً هو برا روسيا. مازن بغضب: يعني بعد ما تعبنا وعرضنا حياتنا للخطر تهربيه؟ ليه؟ أميرة: أكيد في سبب. أكيد حصلت حاجة عشان كده هربته. عمر يحاول أن يمسك أعصابه ثم يقول: ندى، احكيلي إيه اللي حصل. وليه هربتي الزعيم؟ ندى بقلق وضيق: عمر، في الوقت الحالي أنا مش هقدر أقولك على أي حاجة. بس أنا عايزة شوية وقت. يزفر مازن بضيق، فحين

ينظر عمر لها بغضب ويقول: ندى، مليون مرة أقولك إن انتي مش لوحدك في المأمورية دي. أنا عايز تفسير ودلوقتي حالا يا سيادة الرائد. ليه هربتي الزعيم؟ ندى بحزن: للأسف يا سيادة المقدم، حالياً أنا معنديش أي تفسير أقدمه. عمر: في الحالة دي، مضطر أحولك للتحقيق. تنظر له ندى بصدمة ثم تتركه وترحل وتذهب لغرفتها. أميرة: هي مخبية حاجة علينا. وحاجة خطيرة قوي كمان. أنا عارفاها. تتركهم أميرة لتلحق بندى، فحين يجلس عمر ويفكر فيما سيفعله.

*** تبتسم لورين بخبث ثم تتصل بسيادة اللواء وتقول: سيدي، أريد أن أقدم بلاغ ضد الرائد ندى محسن. هي اليوم قد ساعدت الزعيم على الهرب بدلاً من أن تمسكه. نعم سيدي، هذا ما حدث. هي قالت ذلك بنفسها. وتستطيع أن تسأل سيادة المقدم عمر. لا شكر على واجب سيدي. ثم تغلق المكالمة وتقول: والآن الفصل الأخير من قصة حب عمر وندى سيكتب الآن. *** يأتي لعمر اتصال. عمر: أفندم يا سيادة اللواء؟ اللواء: ندى هربت الزعيم يا عمر؟

عمر: سيادتك، في حاجة حصلت معاها. هي مستحيل تعمل كده من نفسها. اللواء بحزم: سؤالي واضح يا عمر؟ عمر بحزن: أيوه فندم، حصل. اللواء: تنزلوا على مصر فوراً. وأبلغ ندى أنها موقوفة عن العمل لحين انتهاء التحقيق معاها. *** بعد رجوع الفرقة لمصر. المحامي: ندى، انتي مفتحتيش بؤك مع المجلس. مقولتيش أي سبب يبرر اللي عملتيه. موقفك بقى أصعب. تسكت ندى ولا ترد.

أميرة بعصبية: ندى، حرام عليكي. انتي كده مش بس هتتفصلي عن شغلك. انتي ممكن تتعرضي للمحاكمة العسكرية. وتتسجني كمان. لا رد من ندى. وكيل النيابة: أمرنا نحن ******* بفصل ندى سيد محسن من عملها كرائد مخابرات. ومنعها من السفر لحين عرضها على المحاكمة. تخرج ندى من التحقيق لتقابل لورين.

لورين بخبث: أعلم أن الأمر صعب جداً بالنسبة ليكي أن تتركي عملك ومنصبك بالمخابرات. لكن ما لا أفهمه هو كيف أن عمر يفعل ذلك. كان يجب عليه أولاً أن يعرف السبب وراء ما حدث. لكنه فوراً قد قدم بلاغ ضدك لسيادة اللواء. حقاً لا أصدق أنه فعل ذلك. تنظر لها ندى بصدمة وتدمع عيناها ثم تتركها وترحل. لورين بابتسامة: أستطيع الآن أن أضمن أنه لم يعد هناك فرصة لعمر وندى أن يكونا معاً. *** تعود ندى مع أميرة لبيتها بمصر وتجد عمر ينتظرها.

عمر: هاه يا ندى، عملتي إيه في التحقيق؟ تقول ندى بجمود: طلقني. عمر بصدمة: ندى... انتي عارفة انتي بتطلبي مني إيه صح؟ ندى: وانت عارف إني بسببك اتفصلت عن شغلي وممكن أتحبس كمان. عمر: محدش قالك تتصرفي من دماغك وتهربي الزعيم. ندى بدموع وغضب: ومحدش قالك تقدم بلاغ ضدي. انت عايز تسجني يا عمر؟ انت حتى مستنتش تعرف إيه اللي حصل. أنا كل اللي طلبته منك شوية وقت. تقوم تبلغ عني. عمر بإستغراب: ندى، أنا مش فاهم حاجة. أنا مبلغتش عنك.

ندى: فكرة إنك مبتحبنيش أقدر أتفهمها كويس. لكن اللي مش قادرة أفهمه مدى كرهك وحقدك على الشبح لدرجة إنك مستعد تحبس البني آدمة اللي المفروض إنها مراتك. عمر بإنفعال: انتي بتقولي إيه؟ ندى: الحقيقة. بقول حقيقتك يا عمر. تنكر إنك طول عمرك كنت غيران من الشبح وإنك موصلتش للي هو وصله. عمر بصوت عالي وصراخ: ندىييي... انتهى الكلام. أنا عارف إن انتي متأثرة بقرار فصلك من المخابرات. لولا كده كان ليا تصرف تاني.

ندى: لا تاني ولا تالت يا عمر. خلاص قصتنا أنا وانت انتهت. طلقني. عمر: هتندمي يا ندى. تمسح ندى دموعها وتقول: أنا بالفعل ندمانة على كل الحب اللي حبيتهولك. ندمانة على كل دقيقة ضيعتها معاك. بس خلاص أنا فوقت ومش هكررها تاني. عمر بوجوم: انتي طالق يا ندى. ويتركها ويرحل. تدخل ندى غرفتها وتهطل دموعها دون صوت وتخرج صورة عمر من تحت الوسادة وتنظر لها بدموع ثم تحضنها وتغمض عيناها بشدة. لتفيق على صوت هاتفها لترد عليه.

الزعيم: هاه... نقول مبروك على الطلاق. بالمناسبة يا ندى، عمر عمره ما كان يستاهلك. صدقيني لو كان بيحبك مكنش اتخلى عنك ببساطة كده. تقاطعه ندى: عملت كل اللي قلتلي عليه. ودلوقتي أنا عايزة اللي ليا عندك. رجعلي إيهاب يا معتز. *** Flashback ندى: مستحيل... إزاي؟ زياد... بس انت مت مع إيهاب في المأمورية. تمسك ندى بيديه بغضب: يعني انت الزعيم؟ وانت اللي قتلت إيهاب؟ لعبت علينا كلنا. بس ووديني ما هسيبك.

يمسك الزعيم بيدها ويدفعها على الأرض ليساعدها البرازيلي على الوقوف. ترفع ندى مسدسها بوجهه. زياد: أنا من رأي تشوفي الفيديو ده. صدقيني هتغيري رأيك. ترى ندى فيديو لإيهاب أخوها مكبل بالكرسي في حالة يرثى لها وبعض الرجال يكيلون الضربات له. تنظر ندى للفيديو بصدمة ودموع: إيهاب لأ... زياد.. قولهم يبطلوا ضرب فيه. ندى بصراخ: قولهم يا زياد يسيبوه. قولهم.

زياد ببرود: تنفذي كل طلباتي. أخوكي يرجعلك. غير كده فأنا مضطر أقتله. بس المرة دي بجد. وهتأكد بنفسي من موته. ندى بدموع وصراخ: حرام عليك. إحنا أذيناك في إيه عشان تعمل معانا كده؟ يمسكها زياد من كتفها ويهزها بغضب وإنفعال: أخوكي عرف حقيقتي. بالتالي كان لازم يبقى ميت قصاد الناس. أما انتي... فمحدش أذاني زيك يا شيخة. رفضتيني أنا ورفضتي حبي ليكي وكل ده عشان مين؟

عشان واحد مبيحبكيش. واحد مش شايفك أصلاً. أنا محدش أذاني غيرك يا ندى. وفنفس الوقت محدش حبك غيري. أنا محدش حبك أكتر مني. انتي من حقي أنا. أبعدت ندى يده عنها وكانت ستضربه بالقلم لولا يد البرازيلي التي كانت أسرع وأمسكت يدها. ندى بغضب: انت اتجننت يا برازيلي؟ البرازيلي: أنا آسف يا شبح. بس دلوقتي هو اللي لاوي دراعنا مش إحنا. لازم تهدي وتشوفي هيقول إيه. ده بيهددنا بأخوكي مش حد غريب. زياد: تعجبني يا برازيلي.

ثم يدور حول ندى ويقول: شوفي يا ندى أنا ههرب من روسيا. أيوا. وانت بذات نفسك اللي هتهربيني. ومش بس كده. هتتخلي عن شغلك في المخابرات. والأهم من ده كله. يقف بمحاذاتها ويقترب منها ويقول: تطلقي من عمر. ندى بسخرية: ده ف أحلامك. الموت أهون عندي من إني أعيش لحظة وأنا مش على ذمة عمر. زياد: أفهم من كده إنك اخترتي حبك على حساب حياة أخوكي. تغمض ندى عيناها بشدة.

زياد: معندكيش وقت كتير يا ندى. تنفذي كل اللي قولتهولك. أخوكي يرجع بالسلامة. غير كده... هفهم إنك ضحيتي بيه. *** Back زياد: هبعتلك شير لوكيشن. خلال ساعة تكوني موجودة في المكان ده. ومش محتاج أقولك إنك متلعبيش معايا. لإن التمن هيبقى حياة أخوكي. تغلق ندى المكالمة وتقول بغضب: هانت يا زياد. خلي الحساب يجمع. عشان لما أشوفك نتحاسب. وساعتها هيبقى أنت اللي جنيت على روحك.