رواية مفيش رحمه الفصل السادس 6 - بقلم لولو محمد

رحمه / انت عارف لو خنتني هعمل فيك إيه. رحيم / مش هيحصل. رحمه / أنا بقول لو. رحيم / ما تبقيش رخمة بقى، مفيش لو. حياة / وحياة تدخل. حياة / الغدى جاهز، إيه مش جعانين؟ رحيم / واقع من الجوع و شامم ريحة تهبل. حياة / هههههههه، طب يلا يا بكاش. حياة / علي الأكل. عفاف / إيه أخبار أول يوم كلية؟ رحمه / والله هو كان حلو في أوله. حياة / في أوله؟

رحمه / الا قولولي يا ماما هو طبيعي الكلية تبقى مليانة ناس و بنات و شباب و تلاقي واحدة تسيب كل دول و تيجي تسأل رحيم الجدول فين؟ حياة / ههههههههههههههههه، ابتدينارحيم / والله كانت بتكلم رامي مبتكلمنيش أنا. عفاف / صادق يا حبيبي هههههههههههه. رحيم / تيتة. محمود / ما تزعلش يا رحيم، أنا كمان ياما حصل معايا كدا، مش ذنبنا يا ابني إننا حلوين و البنات بتموت فينا. عفاف / على يدي أنا، كانوا بيجوا يخطبوهم لبناتهم. رحمه / بقى كدا.

حياة / أيوه بس شوفي في الآخر ساب كل دول و جرى ورا مين. رحيم / أيوه بقى. محمود / أنا قعدت شهور يا ابني لازق لها قبل ما أتقدم إنها تعبرني بكلمة، ببصة، بأي حاجة أبدا، قولت مبدهاش بقى و روحت لأبوها الله يرحمه و طلبتها. عفاف / كان راجل طيب أوي الله يرحمه. حياة / الله يرحمه. رحيم / شوفتي، يعني المفروض تبقي فرحانة مش زعلانة. رحمه / و مين قالك إني زعلانة؟ حياة / انتوا عارفين أحلى حاجة فيكوا إيه؟ رحمه / إيه يا ماما؟

حياة / إنكوا عارفين إنكوا ملكوش غير بعض، بتعملوا كل حاجة مع بعض و حتى اختلافاتكوا بتكمل بعض، أنا مش عاوزة أي حاجة في الدنيا تفرق بينكوا. رحيم / مفيش حاجة تقدر. رحمه / أنا شبعت. عفاف / طب كملي طبقك على الأقل. رحمه / والله شبعت خالص، أنا هقوم أغسل فاكهة. رحمه تقوم. رحيم / أنا كمان شبعت، هقوم أغسل إيدي. رحيم يقوم. محمود ينادي على رحيم / ابقي اغسل إيدك في حوض اللي في الحمام مش في المطبخ، فاهمني هاه. عفاف / بطل غتاتة.

في المطبخ. رحيم ينط يقعد على الرخامة. رحيم / اغسلي التفاح كويس. رحمه تحدفه بتفاحة، يمسكها و ياكل منها. رحيم / أنا مليش مزاج أروح التمرين النهاردة، متيجي نخرج. رحمه / تمرين إيه اللي أنت مش عاوز تروحه، لا هتروح طبعاً، البطولة فاضل عليها تلت شهور و لازم تكسر. رحيم / مش عاوز أسيبك النهاردة. رحمه / طب بص، أنا هخلص الواجب بتاعي عشان كورس الرسم بكرة و هحصلك على النادي، إيه رأيك؟ رحيم / لا، مدام وراكي واجب خلصيه.

محمود يدخل المطبخ. محمود / إيه يا رحيم، هو المية قطعت في الحمام و لا إيه؟ رحيم / أصل التفاح هنا حلو أوي يا عمو. رحيم ينزل من على الرخامة. محمود / طب إيه مش هندوق يا ست رحمة، و لا التفاح ده لسي رحيم بس؟ رحمه / بجد يا بابا، أنا كنت بقشرهولك و بقطعه أهو. محمود / ههههههههههههههه، أنا بمسى بس. تاني يوم في الكلية في المدرج. ريهام / مش فاهمة، هو إحنا في مدرسة عشان يعملوا محاضرة الساعة 8 الصبح. رحيم / رامي بيتصل، عن إذنكوا.

رحيم يطلع. ريهام / أنا مش شايفة روقية. رحمه / و بتدوري عليها ليه؟ ريهام / هي مش صاحبتنا. رحمه / لو معاكي رقمها كلميها. رنا / مفيش لزوم، جايه أهي مع رحيم. رحيم يرجع مع روقية و تسلم عليهم. روقية / مش هتصدقوا، بقالي يجي ربع ساعة بدور على المدرج، بس الحمد لله رحيم أنقذني و قالي إننا هنا. رحمه / أمّال إيه أخبار رامي يا رحيم؟ رامي / بيقولي إنه في التاكسي و زمانه جاي. رحمه / طب تعال اقعد، هتفضل واقف؟

روقية / هو مفيش مكان ليا جنبكوا؟ اخص عليكوا، محجزتوليش. رحيم / ممكن تقعدي مكاني و أنا هقعد ورا مش مشكلة. روقية / لا مش عاوزة أبقى تقيلة عليك. رحيم / لا مفيش مشكلة، أنا هقعد ورا هناك و هحجز لرامي كمان. معلش، فاتتنا دي. رحمه تنفخ / حد فيكوا يقعد عشان الناس بتيجي و آخرتكم إنكوا هتقضوا المحاضرة واقفين. روقية تقعد جنب رحمة، و رحمة على آخرها. بعد فترة. ريهام / يعني إيه كويز كل أسبوع و غياب و شيتات؟ إحنا في معتقل.

رامي / على رأيك، الله يرحم زمن الكليات الجميل. رحمه / بطلوا أفورة، هو انتوا داخلين أي كلية، دي كلية عملية و انتوا عارفين ده كويس. روقية / يعني أنا عاوزة أفهم، انتوا بتجيبوا وقت بعد ما بنروح نذاكر و نحل الشيتات منين؟ رحيم / رحمة دايماً تقول: عقلين أسرع من واحد. روقية / و انت دايماً بتسمع كلام رحمة؟ رحمه / مستحيل طبعاً، ده ابن سبعة. رحيم / بجد.

رحمه / فاكر لما قعدت أتحايل عليك أشتري الفستان الأحمر و أنت راسك و ألف سيف أبداً. رحيم / لا، أنا قولتلك اشتريه بس متخرجيش بيه من البيت. روقية / و تبقى اشتريته ليه بقى إن شاء الله؟ رحيم / لـ... ريهام / على فكرة رحمة شيك جداً في البيت. رحمه / الواحدة لازم تكون حلوة في بيتها و بره. روقية / أساسي. رحيم / فاضل ساعتين على السيكشن، هتروحوا فين؟ رحمه / أنا عاوزة أقعد قدام، لما بقعد ورا مبشوفش كويس.

رحيم / قبل ميعاد السكشن بربع ساعة هتروح نقف قدام القاعة، تمام. رحمه / أوك، اللي تشوفه. بعد فترة في البيت. في بيت رحيم. رحيم / ماما... ماما. زينب / إيه يا حبيبي؟ خير. رحيم / انتي بوظتي قميصي كدا. زينب / بنطلونك الأسود بهت عليه، معلش ابقي اشتري غيره. رحيم / اشتري غيره، انتي عارفة كويس إن القميص ده غالي عندي أوي، و بعدين من امتى بتحطي حاجة مع الغسيل الأسود؟ زينب / غلطت و نسيت و حطيت، إيه هتعلقلي المشنقة؟

و لا عشان هو هدية من ست الحسن تبهدل أمك بالشكل ده. رحيم / أنا مش ببهدلك يا ماما، أنا بعاتبك عشان زعلان. زينب / انت تقدر تقف للغندورة كدا و تقولها عملتي و معملتيش؟

مهو الحق مش عليها، الحق عليا أنا إنّي سبتك ليهم يربوك، أنا أصلاً مخالفتش إلا عماد، أنا مبعرفكش و لا بشوفك إلا صدفة، من و أنت صغير زي القرع تمد لبره، طول الوقت لازق للهانم و متعرفنيش غير وقت الحمام، و كنت بفتكرك لما بلاقي هدومك في الغسيل. يا أخويا، مدام الهانم غالية أوي كدا و زعلها بيوقفك لأمك كدا، متخليها تغسلك، خليها تروق أوضتك، خليها تشيل مسئوليتك اللي أنا طافحة الدم بسببها. عماد يدخل. عماد / في إيه يا ماما؟

بتزعقي ليه؟ رحيم / بتهزقني عشان عاتبتها عشان بوظت قميصي الأبيض في الغسيل. عماد / يا خبر أسود، مش ده اللي رحمة جايباهولك؟ زينب ترفع حاجبها لعماد. عماد / بتحصل، بتحصل، ياما غسيل بيبوظ في الغسالة، مانت عارف، عادي عادي، انزل اشتري واحد غيره، أكيد هتلاقي زيه في كل حتة، عادي يعني بتحصل.

رحيم / ماشي، هنزل اشتري غيره، بس على فكرة يا ماما أنا مزعقتش خالص، و لا رحمة ساحرالي، و بحبك و انتي عارفة، و زعلك غالي عندي، و لو أنا تقيلة عليكِ أنا ممكن أودي هدومي المغسلة و أشيل من عليكي همي و مسئولي، و لا تزعلي نفسك. عماد / إيه يا رحيم الكلام ده؟ رحيم / عادي يا عماد، أنا كبرت و أقدر أشيل مسئلتي دلوقتي، و لازم برده نريح ماما شوية. عماد / يا عم، أمك و بتدلع عليك، هو أنت ليك غيرها؟ زينب / ليه طبعاً، الست هانم.

رحيم / انتي ليه كارهها كدا؟ عملتلك إيه هي؟ زينب / و أنا أكرهها ليه؟ و أصلاً احطها في دماغي ليه؟ هو أنا صغيرة للعب العيال ده؟ رحيم / لا طبعاً يا أمي، مانتش صغير، بس على طول بتقللي منها، بتبقى عارفة إنّي بتضايق و برده بتتكلمي عنها وحش، دي هتكون مرات ابنك و أم أحفادك. زينب / و هو أنا اعترضت؟ ربنا يهني سعيد بسعيدة. عماد / يا عم، أمك بتحبك و بتغير عليك. زينب / اخرس يا وله، أنا أغار من المفعوصة دي.

عماد / اه تغيري، إذا كنت أنا بجلالة قدري أغار منها، مش سارقة قلب أخويا و عقله و واخداه منا طول الوقت، لازم نغير منها، و بعدين يا ست الكل، مبكر أنا كمان أشوفلي مفعوصة كدا على قدي تاخدني منك، هتدايقي منها برده لو هتضايقي، بناقص. زينب / انتوا هتضايقوني بالعافية و خلاص، و بناقص يا أخويا اللي بيشيل قِربة مخرومة هو اللي بيغرق فيها، و بعدين هو أنا يعني هفضل شايلة همكوا طول العمر، بكرة أموت و ترتاحوا كلكوا مني.

رحيم / بعد الشر عليكي يا ست الكل، هو إحنا لينا بركة غيرك؟ زينب / كل بعقلي حلاوة يا وله. رحيم / حلاوة إيه يا ست الحلوين؟ طب والله و انتي عارفة أنا قد إيه بحبك. زينب / طب يلا يا أخويا روحوا شوفوا وراكوا إيه، أنا مش فاضيالكوا. زينب تقوم و تمشي. عماد / إنت عبيط يا رحيم؟ مانت عارف إنها هتبوظه، ليه مديتهوش لرحمة تغسله زي كل مرة؟ رحيم / نسيت و قلعته في الغسيل، رجعت من الكلية تعبان، قلعته و نمت.

عماد / يا عم كبر مخك و انزل اشتريلك واحد زيه و متقولش لرحمة. رحيم / هتعرف يا فالح. عماد / خلاص روح قولها إن أمك بوظت القميص التالت اللي رحمة شارياهولك. رحيم / هي بتعمل كدا ليه بس؟ عماد / هما الحموات كلهم كدا، سيبك، مش كل حاجة تحطها في دماغك. رحيم / أنا نازل. رحيم يفتح الباب و القميص في إيده، يقابل رحمة على السلم، يداري القميص ورا ضهره. رحمه / رحيم، بتعمل إيه؟ رايح في حتة؟ رحيم / أنا كنت نازل رايح مشوار و راجع.

رحمه / رايح فين؟ مش هتيجي تحل معايا شيت الميكانيكا؟ أنا المتجهات طلعت عيني. رحيم / مش هتأخر، هاجي على طول، أنا حليت نصه امبارح بالليل. رحمه / إيه اللي في إيدك ده؟ رحيم / ده... ده ولا حاجة، ده قميص كنت هتبرع بيه لواحد غلبان، عارفة كدا. رحمه تمد إيدها و تمسك القميص. رحمه / تاني؟ تاني؟ و انت رايح فين بقى إن شاء الله؟ رحيم / أنا حطيته في الغسيل بالغلط، كنت تعبان و... رحمه / ليه بتكذب يا رحيم؟

انت عارف إني بزعل لما بتكذب عليا أكتر من الموقف نفسه، ليه بتكذب؟ رحيم / يعني أقولك إيه بس؟ مهي غلطتي أنا اللي مسبتهولكيش زي كل مرة. رحمه / عادي، على العموم و أنا بشتريه كنت عاملة حسابي، تعال معايا. رحيم / على فين؟ رحمه / تعال بس فوق. في أوضة رحمة. رحمه تفتح الدولاب و تطلع تلت قمصان نفس الشكل. رحيم / إيه ده؟ رحمه / مهو لما أول قميصين باظوا و مكنتش بلاقي زيهم و بزعل، قولت مبدهاش، أنا أشتري بزيادة، أضمن.

رحيم / ههههههههههههههه، يابنت اللعيبة. رحمه / اتفضل يا سيدي، و لا تزعل نفسك، و مبقاش تكذب تاني عشان المرة الجاية هزعل بجد. رحيم / لا خلاص، حرمت، عمري ما هكدب عليك تاني. في الكلية بعد فترة. روقية / إيه رأيكوا نطلع الرحلة اللي طالعة تبع الكلية؟ ريهام / أيوه، بس دي قبل الميدتيرم بيومين، و يا دوب لازم نذاكر. روقية / ده الفلانتين يا جدعان، هنقضيه في البيت يعني؟

رامي / أنا عن نفسي طالع، و أنا ناقص نكد، مش كفاية الحرقة اللي إحنا فيها. روقية / و بعدين إحنا لازم نفصل عشان نعرف نكمل مذاكرة، و لا إيه يا رحيم؟ و لا صحيح، تلاقي كنت مجهز حاجة معتبرة عشان تحتفل بيه مع رحمة؟ رحيم / إحنا مبنحتفلش بالفلانتين، إحنا أيامنا كلها فلانتين. رامي / أمّال مين اللي كان بيحوش الفترة اللي فاتت عشان يجيب هدية؟ رحيم / تصدق إنك عيل زبالة و لا تسوى.

رحمه / ههههههههههه، ده على أساس إني مكنتش واخدة بالي يعني. رحيم / إنتي مفيش حاجة بتفوتك كدا. رحمه / لا، مفيش. روقية / ربنا يخليكوا لبعض، كنت ناوي على إيه بقى يا رحيم؟ رحيم / والله مفيش، أنا كان فيه خاتم عاجبني و كنت بحوش عشان أجيبهولها، بس كنت ناوي أعمهالها مفاجأة، و البيه حرقهالي. روقية / و تبقى برده مبتحتفلش بالفلانتين.

رحمه / على فكرة أنا و رحيم مش محتاجين مناسبة عشان نهادي بعض، اللي بيلاقي حاجة حلوة للتاني بيهادي بيها، مرة اداني هدية عيد ميلادي قبل عيد الميلاد بشهر، بيقولي: مانا كدا كدا مش هعرف أخبيها، فخديها بقى أحسن، هههههههههههههههه. ريهام / فاكرة لما عملك إسورة عليها اسمك حروف؟ رحمه / زعّلت أوي لما اتقطعت، بس كل الخرز و الحروف اللي لقيتها منها عينتها عندي، على فكرة.

رنا / دي كانت بتعيط بالدموع، و قلبنا الفصل كله على الحروف، ملقناش حرف H، كان ناقص. رحيم / قولتلها هعملها واحدة تانية، بس هي مرضيتش. رحمه / بطلوا نكد بقى، فكرتوني و الله زعلت. روقية / خلاص، يبقى هنطلع الرحلة، أنا بكرة هدفع الاشتراك، اتفقنا و لا إيه؟ ريهام / أنا هقول لبابا، لو وافق تمام. رامي / أنا كمان طالع. رنا / زي ريهام، لازم أسألهم في البيت الأول. روقية / و طبعاً رحمة كمان لازم تاخد الإذن، فهنعدي و نسأل رحيم.

رحيم / لا، الحقيقة أنا اللي لازم آخد الإذن مش رحمة. روقية / بتهزر. رحمه / لا والله أبداً، تيته من زمان مخلية رحيم هو ولي أمري، يقول آه أو لا، من و إحنا صغيرين، ممكن أروح ألعب يا تيته؟ تقوللي: روحي اسألي جوزي، روحي اسألي جوزك، بابا بقى عشان يحل الموضوع ده، فرض هو رقابته على رحيم.

رحيم / يعني لو أنا رايح في أي حتة، فـ رحمة مش محتاجة تاخد الإذن لأنها معايا، لكن أنا بقى اللي لازم أروح لعمو محمود و أقوله أنا رايح الحتة الفلانية، في مشاكل، و أتحايل عليه شوية، بس في الآخر بيوافق، يعني. رحمه / أو بنسلط عليه تيته، هي بتعرف تقنعه، ههههههههههههههههههههه. روقية / ربنا يخليهالكوا. في الرحلة.

رامي و ريهام و رنا و روقية يقعدوا في الكنبة اللي ورا، و رحيم و رحمة يقعدوا جنب بعض في الكرسيين اللي قدامهم، رحمة جنب الشباك، و رحيم على الحرف، و يقعدوا يتكلموا. رامي / إيه يا عم الحبيب، متديرلنا شوية، و لا إحنا مش قد المقام؟ رحيم / بقى بزمتك ينفع أسيب الخلقة دي و أبص للخلقة دي؟ روقية / طب إيه رأيكوا نلعب؟ رحيم يبص لرحمة، توافق. رحيم / و ماله؟ هتلعبوا إيه؟ رحمه / أنا معايا ورقة و قلم، تعالوا نلعب إكس أوه.

روقية / إحنا ستة يا ماما، إكس أوه إيه؟ إحنا نلعب أوتوبيس كومبليت. رحمه / ماشي، فرق و لا فردي؟ روقية / فرق، بس هنصعبها، أنا شريرة، هنخلي رحيم منافس ليكي. رحيم / إنتي بتكرهيني كدا ليه؟ كدا هخسر، دي محترفة. رامي / يبقى هدخل فريقي. ريهام / و أنا كمان. روقية / خلاص، يبقى أنا و رنا و رحيم فريق، يلا نلعب، نبدأ بحرف الـ ر، أكيد ده سهل بما إننا كلنا حرف الـ ر. يلا ولد بنت نبات جماد حيوان. ثواني و الكل يخلص.

روقية / ابدئي يا بطلة. رحمه / رياض، رضوى، رجلة، رمل، رنة. روقية / إيه رجلة دي؟ رحمه / حشيشة بتبقى مع الملوخية، متعرفيهاش. روقية / عمري متعاملت مع الملوخية، على العموم، حد فيكوا اختار أي حاجة زي رحمة؟ الكل يهز رأسه. روقية / رحمة خمسين، يلا يا رحيم قول. رحيم / رحيم، رحمة، رز، رمح، رنجة. روقية / حرام عليك، ده نفس اللي أنا عملاه بالظبط. رحيم / ههههههههههههههه، أنا قولتلك بلاش، يبقى أنا و انتي 25.

رامي / أنا الولد رامي، أنا طبعاً، و البنت روقية، و النبات رمان، و الجماد رمح برضه، و الحيوان رنجة برضه. ريهام / أنا زيك في كل حاجة، ما عدا البنت. رنا / و أنا كمان زيك. رحمه / يبقى أنا اللي كسبت، شكراً شكراً، تحبوا تخسروا دور كمان و لا نشوف لعبة تانية؟ رامي / مدام في فريقك يبقى دايس. رحيم / انسوا، أنا راجع فريقي مع رحمة، أكيد أنا كسبان. رحمه / أفلام إيه ريكو؟ روقية / أنا لاعيبة في اللعبة دي، حد يبقى في فريقي؟

رحيم / لا، كل واحد مسئول عن نفسه. رامي / موافق، مين هيمثل؟ ريهام / أنا هبدأ. ريهام تقوم و تبدأ تمثل، بتفتح حاجة. رامي / مسرحية. ريهام تشاور اتنين. رحيم / كلمتين. ريهام / تشاور تحت و فوق. روقية / بين السما و الأرض. رامي / و دول كلمتين؟ رنا / يعني هو ده مسرحية. رحيم يوشوش رحمة. رحمه / العيال كبرت. ريهام / صح. روقية / انتوا نصابين، رحيم غشّش رحمة. رحمه / حصل فعلاً، هههههههه. رامي / متيجوا نغني. رحيم / وفر صوتك، وصلنا.

الأوتوبيس يوقف و الكل يبدأ ينزل. روقية / انتوا مش هتنزلوا؟ رحيم / و ليه نتزاحم؟ خلى الكل ينزل و براحتنا، هنفضل واقفين لحد ما دول كلهم ينزلوا ليه يعني. روقية / خلاص، براحتكوا. رامي / إحساس زبالة لما تلاقي الباص كله كابلات و أنا قاعد كدا زي خيبته. ريهام / ههههههه، بص لها من ناحية إيجابية. رنا / هههههههههههههه. رامي / لا بجد، مش فاهم. رحيم / كل واحد قاعد جنبه واحدة، و انت جنبك تلت قمرات.

رامي / ههههههههههههههههههه، معاك حق، تصدق. الكل ينزل من الباص. رحمه / و انت بقى، كفاية عليك واحدة و لا نفسك في تلت قمرات؟ رحيم / و يجوا إيه تلت قمرات جنب نجمة عالية منورة في السما. رحمه / ثبتني. رحيم / هههههههههه. روقية ترجع لهم. روقية / مش ناوين تيجوا و لا إيه؟ رحمه / جايين.