رواية مغامرات عائلية الجزء الثاني الفصل الثاني عشر 12 - بقلم همس كاتبة

سحر بسعادة: بابا ازيك.. اهلاً وسهلاً نورتنا.. اتفضل اتفضل. حضنها وتجاهل زمردة، ثم اتجه ليسلم على عبد الله. عبد الله: اهلاً يا توفيق، البيت نور والله. توفيق: منور بأهله.. والله ليك وحشة يا عبد الله. عدنان: ازيك يا عمي وازاي فرنسا؟ زمردة بمقاطعة: توفي، أنا عايزة أرجع البيت. تجاهلها وسلم على عدنان وأوس وتميم. توفيق وهو يحضن مصطفى: والله وكبرتوا يا عيال وبقيتوا رجالة.. فين ابنك يا تميم؟

تميم: فريدة هاتي آسر وتعالي سلمي على جدي. فارس بخفوت: يخربيت حلاوته، أنا راجل و اِغرمت بيه. حلا: ده منظر حد يتقاله توفي؟ فارس بضحك: توفي بنكهة الكراميل. دينا بهمس: الراجل ده أملنا الوحيد للخلاص من زيزي يا عيال. غادة: بجد لازم ياخدها ونرتاح احنا بقى.. دي بهدلت المطبخ والبيت كله. لارا بسرحان: دلوقتي بس فهمت أوس منين جاب شياكته دي. كارما: إيه ياختي؟ هو ده كمان دخل قايمة كراشاتك؟

لارا بضحكة: آه.. ده باين عليه معاه فلوس وزيزي عايزة تطلق، يعني مفيش مانع لو دخل حياته. كارما: انتي متخلفة على فكرة. لارا: انتي مش شايفة حلاوته؟ شبه ياسر جلال في مسلسل رحيم. كارما: بس مش لدرجة إنك تكراشي عليه يا بت.. عيب، ده أكبر من جدو. لارا: تصدقي لو جاد اللي قالت عليه زيزي طلع حلو كده هتجوزه. كارما: انتي أصلاً عايزة أي راجل وخلاص.. لغاية النهاردة مفيش راجل شوفتيه إلا وعجبك، حتى ناصر المعفن دخل دماغك.

لارا بغضب: اخرسي.. ما تفكرينيش بالحكاية دي.. ربنا يحرقُه. توفيق: إيه أخبار الغيط بتاعك يا عبد الله؟ عبد الله: تمام والله.. والعيال اليومين دول بيساعدوا العمال بالشغل. تميم: قصده معاقبين يعني. توفيق بخبث: انت يا عبد الله رجعت للشقاوة بتاعة زمان ولا إيه؟ عبد الله: ليه أنا إمتى بطلتها؟ توفيق: فاكر لما كنا بنهرب لغيط العزايزة ونستخبى من باباك؟

عبد الله: دي كانت أياااام.. كنا بننزل عشان نستخبى من العقوبة ودايمًا عبد الرحمن كان هو اللي بياكلها لوحده. توفيق: ربنا يرحمه.. ده كان بيشتغل كل حاجة لوحده وبعدها يتهزق برضو. زياد: يعني فكرة العقوبة دي أزلية ومتوارثة بقى. عبد الله: طبعًا.. احنا جيل بيسلم جيل.. بس عقوبة أبويا كانت شغل بجد مش زي الهطل اللي بتعملوه ده. تميم: كل التعب ده وبالآخر تقول عليه هطل؟ عبد الله: ده تعب؟

احنا في زماننا كان الواحد يشتغل من الساعة 4 الفجر لغاية 12 بالليل وما كناش بنقول حاجة. توفيق: والله وفكرتوني بأيامنا الحلوة.. الجو ناقصه كوباية قهوة معموله من البن المطحون على الإيد ده.. أيام أمي وأمك الله يرحمهم. عبد الله: زمردة هانم تعملهولك دلوقتي حالا.. سحر طلعي المطحنة القديمة واديها شوية بن تطحنه وتعملنا قهوة. زمردة بغضب: توفي انت جيت ليه؟ توفيق: إيه أخبار شغلك إيه يا أوس؟ أوس: الحمد لله ماشي كويس.

توفيق: وشركة الألماني لسه بتحوم حواليك؟ أوس: امممم وشكلهم كده مش ناويين على خير. توفيق: قابلت نادر من فترة وقالي إنهم لسه بيضغطوا عليه عشان يتوسط لهم عندك ويشتغلوا معاك. زمردة بصراخ: أنا بتكلم معاك ليه بتتجاهل وجودي؟ توفيق: فين القهوة يا عبد الله؟ سحر بهمس: امشي يماما اعمليله القهوة يمكن يحن لك. زمردة بغضب: ماشي.. أنا هوريكم. ذهبت مع سحر وهي تتمتم. توفيق بخبث: عبد الله لازم تزودلها العقوبة.. لسه عايزة تتظبط أكتر.

عبد الله: إحنا عايزين نخلص منها يا توفيق، دي ما بترحم، وممكن تموت الكل عادي. توفيق: لازم الأول تتربي على اللي عملته ده.. دي فاكرة نفسها عيلة صغيرة وبتتنطط. فارس: بس صاروخ بنت الـ.. أنا لو منك أجري لها راكع مش أتعمد عليها يا توفي. توفيق: اتلم يالا.. أنت هتعاكس مراتي؟ فارس: دي هتخلعك يا توفي.. وأتجوزها أنا بقى. خبطته حلا في بطنه وتألم أثرها. توفيق: جدعة.. خطيبته مش كده؟ حلا بابتسامة: أيوه يا.. توفي ولا جدو توفيق؟

توفيق بضحكة: لا جدو توفيق أحسن.. دي بنتك يا حسين؟ حسين: أيوه.. دي الكبيرة. توفيق: طب يا بنتي اتلحلحي شوية واظبطيلنا زيزي.. باين عليكي قوية وهتعرفي. حلا: حاولت.. بس والله أنا مليش غير بالضرب ودي ست كبيرة ما ينفعش أجيبها من شعرها بصراحة. توفيق: عبد الله سيبك من عقوبة العيال وركز على زيزي أكتر.. سيبهم يساعدوك. تميم باندفاع: يا سلام عليك يا جدو.. هو ده الكلام.. ما تسمع منه يا بيدو. عبد الله: اتلم أنت.

أوس بقلق: حبيبة مالك؟ انتي كويسة؟ هزت رأسها بتعب. سعاد: ليه وشك أصفر؟ انتي حاسة بحاجة؟ حبيبة بتعب: دايخة ومعدتي بتوجعني أوي. أوس: تعالي أوديكي الأوضة ترتاحي. خديجة بقلق: ليه دايخة؟ مفيش دوخة بتيجي بنهاية الحمل يا سعاد. خولة: الدوخة من أعراض السحر. فريدة: إيه الكلام ده بس؟ عادي في ستات بتفضل الدوخة معاهم لحد ما يولدوا.. أنا كنت كده. حبيبة بوجع: ماما بطني بتوجعني أوي.. مش قادرة. عبد الله: انتوا بترغوا وسيبين البنت كده؟

ما تتصرفوا. سعاد: تعالي يا حبيبتي لازم ترتاحي ولو الوجع زاد هنديكي المستشفى. أخذها أوس لأوضتها وتبعته سعاد وخولة وحلا. غادة: معقولة حبيبة تولد النهاردة؟ فريدة: يمكن.. بس الطبيعي يعني إنها تخلص الشهر التاسع.. تميم خد آسر هطلع أشوفها. دينا: استني أنا جاية معاكي. أتت سحر وقالت: عمي.. ماما غشت وطحنت البن في الكبة بتاعة الملوخية.. دي بهدلتها. فارس بضحك: ده انت يا توفي هتدوق قهوة بطعم الملوخية إنما إيه.

عبد الله: قولي لها تجيب المطحنة وتطحنهم هنا قدامنا يلا. سحر نظرت حولها باستغراب: حاضر.. في إيه مالكم يا بنات؟ غادة: حبيبة تعبت وراحت لأوضتها. سحر بشهقة: تعبت إزاي؟ .. خديجة خليكي مع ماما هطلع أشوف حبيبة مالها. خديجة: حاضر يا حبيبتي. ******************** في أوضة حبيبة. سعاد: منين الوجع بالظبط؟ حبيبة ببكاء: بطني من تحت بتخبط جامد.. ومعدتي بتوجع أوي. أوس: مش لازم نوديها المستشفى؟ دي من الصبح تعبانة.

فريدة: أنا بقول نصبر شوية لغاية ما الطلق يزيد.. بالمستشفى هتفضل قاعدة وممكن تتعب أكتر. سعاد: في وجع بضهرك يا حبيبة؟ حبيبة بألم: لا.. بس بطني ومعدتي.. مش قادرة يماما. فريدة باستغراب: إيه دخل المعدة بالطلق؟ سعاد: مش عارفة يمكن البيبي بيضغط عليها. خولة: هاتي المصحف يا بت يا دينا.. هقرالها شوية قرآن يمكن تهدأ شوية. دينا: حاضر. حلا بارتباك: أنا هروح أعملها ليموناضة يمكن تخفف الوجع.

خولة: لا.. معدتها بتوجعها.. اعمليلها كوباية نعناع. حلا: حاضر. خرجت تزامناً مع دخول سحر. سحر: مالها حبيبة يا سعاد؟ سعاد: من الصبح وهي تعبانة.. شكلها هتولد يا سحر. سحر: حبيبة الوجع بيجي ويروح ولا ثابت؟ حبيبة: مش عارفة. سحر: طب عمال يزيد ولا يخف؟ حبيبة: لا دلوقتي خف من ناحية بطني.. بس معدتي بتوجعني أوي. سحر باستغراب: وإيه علاقة المعدة بالطلق يا سعاد؟ دي أكيد أكلت حاجة عملتلها حموضة.

حبيبة بتصوت مرهق: حاسة.. إني دايخة.. عايزة.. أنام. أوس بتفكير: أكلت حاجة؟ .. أكيد أكلت حاجة.. وديني لو كنتي عاملاها يا زيزي لأوريكي. قام بسرعة واتجه للأسفل. سحر بشهقة: معقولة ماما عملتها؟ فريدة: عملت إيه؟ سحر: يمكن حطتلها حاجة بالأكل.. هنزل الحق أوس خليكي جنبها يا سعاد. دلفت حلا وقالت: أنا عملتلها النعناع أهو. سعاد: خلاص البنت راحت بالنوم. دينا بخوف: مش ممكن يكون أغمى عليها؟ سعاد بغضب: كله من الست اللي اسمها زمردة.

فريدة: طنط لازم ناخد حبيبة للدكتور ونطمن على البيبي.. ممكن الساحرة دي تكون أذتها بجد. ******************* وصل أوس للحديقة وقال بحدة: تيتة انتي حطيتي لها إيه بالمربى؟ زمردة ببرود: ما حطيتش حاجة. أوس: طب ليه حبيبة تعبانة دلوقتي؟ وليه تعبت بعد ما أكلت من المربى على طول؟ سحر: ماما قولي حطيتي إيه بالأكل؟ زمردة: هحط إيه يعني؟ دي كلها معلقة من الخلطة بتاعة الولادة وأهي هتولد الليلة وتفرحكم بالبيبي.

سحر بشهقة: يعني انتي السبب بكل اللي حصلها ده؟ زمردة: ده بدل ما تقوليلي كتر خيرك؟ أوس بغضب: على إيه؟ إيه الجهل ده؟ دي واحدة حامل حياتها مش لعبة بإيدك عشان تجربى عليها خلطاتك. توفيق: انتي عايزة تولديها بالعافية يا زمردة؟ افرضي حصلها حاجة هي والبيبي. زمردة: أخيراً اتكلمت معايا يا توفي. توفيق: شوفوا الست.. أنا بكلمك ع البنت وانتِ دماغك بهبل الستات ده؟

سحر: والله يماما لو حصلها حاجة عمري ما هكلمك.. دي مرات ابني واللي ببطنها حفيدي ليه تعملي بيها كده؟ زمردة: مش أحسن ما تقعد لك سنة على ما تولد.. ده أنا عايزة أساعدها. سحر: مهو مش بالعافية يماما. تميم: على فكرة انتي كده بتأذيها مش بتساعديها.. البيبي مش زرار تضغطي عليه وينزل لوحده.. هو لسه محتاج يكمل نموه جوه بطنها ولما يبقى جاهز ساعتها الجسم بيبتدي الطلق لوحده من غير وصفاتك العجيبة.

زمردة: والنبي تنقطنا بسكاتك مش ناقصين كلام دكاترة مش فاهمين حاجة. سحر بقلق: تميم يعني دي مش ولادة؟ ما نوديهاش المستشفى؟ تميم: لا لا الحكاية مش مستاهلة.. كمان شوية هتخف وترجع زي الفل. عبد الله بحزم: أوس اطلع خليك جنبها.. وانتِ يا زمردة عقوبتك هتتضاعف عشان تحرمي تتصرفي من دماغك كده. زمردة بصدمة: ده أنا كنت عايزة مصلحتها.. توفي قولك كلمة أنا مراتي.

توفيق: والله أنا مش جاي عشانك.. إحنا اللي بينا انتهى.. أنا جيت أشوف بنتي وأحفادي. زمردة: يعني إيه اللي بينا انتهى؟ توفيق: يعني ورقة طلاقك هتكون عندك بعد كام يوم. زمردة بدهشة: انت بتقول إيه؟ عايز تطلقني بعد العمر ده يا توفي؟ توفيق: ما تقوليش توفي دي تاني.. انتي اللي طلبتي الطلاق بالأول.. يبقى خلصت كده. زمردة: توفي.. عشان خاطري ما تعملش كدة. عبد الله: انتي ما بتشتغليش ليه؟ يلا خلصي الي بايدك بسرعة. ***

دلف أوس أوضته هو وحبيبة. أوس: هيا نامت؟! سعاد: أيوة.. بس برضه بتتوجع كل شوية. أوس: لازم آخدها للدكتورة.. مينفعش نفضل نستنى كدة. دينا: هي زيزي فعلاً طلعت حاطة لها حاجة بالأكل؟! أوس: آه قالت حطتلها وصفة تحفز الطلق. سعاد: على كدة ممكن تكون بتتطلق بجد. أوس: تميم قالي إنه شوية وجع وهيروح لما ترتاح. خولة: وممكن ما يروحش والبت تبقى بتولد بجد.. ده حصل مع سحر لما كانت حامل بمصطفى وقتها شربت من الوصفة دي وولدت بنفس الليلة.

سعاد: لا سحر ما كانتش بكرية يا خولة.. يعني ده طلق كداب زي اللي حصل معايا وأنا حامل بحلا يومها قعدت يومين بتوجع من غير ما أولد وبعدها بأسبوع ولدتها. حلا: انتوا هتقعدوا تتكلموا على ذكرياتكم دي فوق دماغ البت؟! لازم نسيبها ترتاح شوية. فريدة: صح.. ولو كانت هتولد عادي بتاخد وقت مش بثواني يعني. سعاد: طب امشوا ننزل وخلي شخص واحد بس عندها. أوس: انزلوا انتوا.. أنا هفضل جنبها.

خرج جميعهم من الأوضة وبقي أوس يملس على شعر حبيبة برفق. بعد وقت قصير.. فتحت عيناها بتعب شديد. أوس: حبيبتي.. انتي كويسة؟! حبيبة بألم: معدتي بتوجعني أوي. قامت بسرعة وتوجهت للمرحاض.. خرجت بعد دقائق. أوس بقلق: انتي لسا تعبانة؟! حبيبة ببكاء: عندي مغص مش قادرة. أوس: امشي معايا.. هاخدك للدكتورة. حبيبة بانهيار: آآآه.. عايزة ماما.. روح اندهلها يا أوس.. هموت. فتحت دينا الباب بعنف وقالت بفزع: في إيه مالك؟!

حبيبة: بطني بتوجع أوييي. دينا تناولت كوب النعناع وقالت: طب خودي اشربي دي.. يمكن ترتاحي. أوس: مش وقته.. امشي معايا.. هنروح للدكتور. *** في الأسفل. فارس بخبث: مزتي.. ما تيجي بوسة. حلا بحدة: فارس اتلم.. مش وقتك خالص.. مش شايف البيت مقلوب إزاي. فارس بضحكة: وإيه الجديد؟! ما طول عمره مقلوب. حلا بقلق: بس المرادي حبيبة اللي تعبانة.. خايفة عليها أوي. فارس: كل ده من زيزي. حلا بغضب: والله لأخزوقها وأعلمها الأدب.. هتشوف.

فارس: أيوه كده.. هيا دي مزتي.. وحشتني بطولاتك يا عروسة. حلا: انت مبسوط؟! مش على أساس بتحبها؟! فارس: ما بحبش غيرك يا جميل. حلا بحدة: والله لأوريك يا كلب.. كل ما تشوف مزة تريل عليها.. وقدامي كمان يا واطي؟! فارس: على الأقل مش بضحك عليكي زي غيري.. وبعدين دي.. ده مجرد إبداء رأي.. ما خونتكيش يعني. حلا: اممم.. ما دي أول طريق الخيانة يا معفن.

فارس: دي نظرة عابرة يا مزتي.. مش زي بعض ناس بيسيبوا حبيباتهم كده ويروحوا لحضن غيرهم. حلا باستغراب: انت بتلقح على مين بكلامك ده؟! فارس بخبث: لا والله مش بلقح على حد.. بس الدنيا مليانة يعني. حلا: فارس اتكلم من غير لف ودوران.. مين اللي بيخون حبيبته ده؟! فارس: هقولك.. أصلي سمعت جدو... حلا بمقاطعة: إيه ده.. حبيبة.. انتي فوقتي؟! رايحين على فين؟! دينا: هنوديها للدكتور.. البنت تعبانة أوي. حلا بخوف: استنوا.. جاية معاكم.

خرجوا جميعهم للخارج.. وكانت زمردة تطحن حبوب القهوة بينما الباقي يجلسون سوياً. سعاد بشهقة: إيه اللي قومك من سريرك يا بنتي.. انتي تعبانة. حبيبة بوجع: مش قادرة يماما. سعاد بغضب: انتي حطيتلها إيه بالظبط؟! زمردة ببرود: ما تقلقيش.. مش هتموت.. يا دوبك شوية مغص ودوخة.. وبعدها تولد على طول. حلا بوعيد: اصبري بس.. هرجعلك.. أما نشوف مالها.. وهرجع أوريكي جناني على أصوله. سعاد: انتوا رايحين للدكتور؟!

أوس: أيوه.. مش هسيبها كده يعني. سعاد: طب استني.. جاية معاكم.. دينا خليكي هنا.. مش هنروح كلنا. حسين: أما تكشف.. كلميني وقوليلي حصل إيه. سعاد: ماشي. *** بعد وقت... كانت قد ذهبت حبيبة إلى الطبيب مع أوس وسعاد وحلا. سحر بقلق: اتأخروا أوي.. مش كده؟! عبد الله: معلش.. خير إن شاء الله. زمردة: عملت القهوة أهو. عبد الله: اممم.. اتفضل يا توفيق. توفيق بخبث: عبد الله.. عايز بصارة.

عبد الله: انت تأمر يا صاحبي.. يلا يا زمردة هانم.. عايزين بصارة. زمردة بقرف: امبوسبيل.. أكيد مش هعمل القرف ده. عبد الله: هتعمليها.. بسرعة بس. زمردة بصراخ: أنا مش هستحمل أفضل في البيت الغريب ده.. أنا مش شغالة عندكم. عبد الله: طب اتفضلي.. الباب يفوت جمل. زمردة وهي تحرك يداها: والله لأمشي وما تعرفولي طريق جرة.. أنا هوريكم. مصطفى: لغاية دلوقتي ما شوفناش حاجة يا تيتة. زمردة بغضب: ماشي يا كلاب.. كلكم بقيتوا تستقووا عليا؟!

أنا هوريكم.. بقالي من الصبح بشتغل زي البهايم ومحدش قال دي تيتة وكبيرة وعيب تشتغل.. اتفووووو. زياد: اعترفت إنها كبيرة يا شباب. سحر: هتروحي فين يماما؟! الدنيا ضلمة ومش هتلاقي مواصلات. زمردة: العيشة بالشارع أهون من البيت المعفن ده. خرجت من الباب وهي لا تزال ترتدي جلابيتها وتلف شعرها بنفس الوشاح. توفيق: ابعت حد وراها يا عبد الله.. يمكن تتوه ويحصلها حاجة لا سمح الله.

عبد الله: ما تقلقش.. دلوقتي الغفر هيفضلوا وراها لغاية ما تزهق وترجع. تميم: ما كنت تاخدها يا جدو وترجعوا لفرنسا ونرتاح إحنا بقى. توفيق: مش قبل ما تتعدل يا تميم وتبطل هبلها ده. بعد وقت دلف أوس وحبيبة وسعاد وحلا. عبد الله: حبيبة.. طمنينا عليكي.. اتحسنتي؟! حبيبة: أيوه يا جدو.. الحمد لله.. بقيت كويسة. سعاد: الدكتورة قالت إن ده طلق كداب.. شوية انقباضات حصلت بسبب الوصفة اللي خدتها.. وأدتها دوا يهديها.

عبد الله: والبيبي كويس؟! حبيبة: أيوه يا جدو.. ما تقلقش. دينا: طب قالتلك إيه سبب وجع المعدة ده؟! سعاد: ده من الوصفة برضو.. ربنا يسامح اللي كانت السبب. عبد الله: الحمد لله.. جات سليمة المرادي. دينا: أهي زيزي سابت البيت وطفشت مننا. أوس باستغراب: راحت فين؟! تميم: معرفش.. خرجت. أوس بذهول: وسبتوها تخرج لوحدها والدنيا نص ليل؟! يزن: ما تقلقش.. كلمت الرجالة وقولتلهم يفضلوا وراها.

عبد الله: لازم تحس إن مفيش حد جنبها عشان تعقل وترجع لبيت جوزها وتتلم بقى. فارس: اسمعوا منه.. جدو ده دمااااغ.. بس يعني افرض يا توفي حد تحرش بيها بالليل.. هتعمل إيه. توفيق: بيقولك حط حراسة وراها.. واتلم بقى.. ما تقولش الكلمة دي. إيهاب بحدة: بطل رخامة يا فارس وما تتدخلش بغيرك. فارس بعبوس: حاضر يا هيبو. عبد الله: أوس.. خد مراتك ترتاح بعد اللي حصلها ده. حبيبة: معلش يا جدو.. أنا مش تعبانة.. هقعد معاكم شوية.

بعد وقت ذهب جميع الكبار إلى أوضهم.. وبقي الشباب في الحديقة عدا فارس الذي ذهب مع حلا للحديقة الخلفية. تميم بقلق: تيتة لغاية دلوقتي ما رجعتش يا شباب. يزن: ما تقلقش.. هيا دلوقتي بأمان. أوس: فين يعني؟! يزن بضحكة: عندنا.. راحت لبيت أبويا. أوس: وإزاي عرفت البيت من بين كل البيوت دي؟! يزن: كلمت أخويا إسلام وقولتله يعمل نفسه هيساعدها.. وهي ما صدقت وراحت معاه. تميم: يزن احترم نفسك.. إيه راحت معاه دي.. ما تزبط كده.

يزن: انت فهمت إيه يا غبي.. قصدي استضافها عندنا. أوس: طب كويس.. كده اطمنت عليها. حبيبة: يعني هيا دلوقتي قاعدة مع مراتات باباك؟! يزن بخبث: أيوه. دينا: وإيه مالك بتتكلم كده؟! هو انت بتخطط لحاجة؟! يزن: أنا مليش دعوة.. جدك اللي طلب كده. دينا: طلب إيه؟! يزن: قال لابويا يسلط مراتاته عليها.. ودول مفتريين.. يعني هترجع لنا مؤدبة. زياد: يوووه.. ده إحنا ما صدقنا خلصنا. غادة: خلصتوا من إيه؟! ماهيا لو راحت.. جدو هيفضلكم.

زياد بتفكير: تصدقي.. عندك حق.. جدو موجه اهتمامه كله دلوقتي على زيزي. أتت كارما وقالت: أنا عملت كريب.. حد عايز يدوق؟! زياد: الله.. ده انتي بقيتي شاطرة أوي يا كرملة. كارما بسعادة: واتعلمت أعمل مكرونة بشاميل كمان.. مش كده يا فريدة؟! فريدة: صحيح.. بقت ست بيت شاطرة أوي. دينا: لا.. على كده لازم نجيب لها عريس.. ما تيجي عندي و نبقى سلايف. كارما: لا.. أنا عايزة أخلص منك أصلاً.

زياد: دينا اتلمي.. لسا بدري على الحكاية دي.. كرملة هتركز بدروسها وبس. لارا: على فكرة.. إحنا كبرنا وما بقيناش أطفال عشان تعاملها كده. غادة: لارا.. ما تتدخليش بين الأخوات. لارا: انتي مش شايفة بعاملها إزاااي؟! ده فاكرها بيبي. زياد: وانت مالك يا أم لسان ونص؟! أختي الصغيرة وأعاملها زي ما أنا عايز. كانت لارا سترد.. ولكن قاطعتها كارما. كارما: بس بقا.. انتو ما بتصدقوا تتخانقوا.. كفاية.

أتت حلا وجلست على الأرض بعنف.. وكان وراءها فارس. حبيبة: مالك يا حلا؟! متنرفزة كده ليه؟! حلا بغضب: فريدة.. عايزين نلعب لعبة حلوة. فريدة: ما آخر مرة عملتوا مشاكل وقولتوا مملة. حلا: عايزين نلعب لعبة تانية. فريدة: لعبة إيه؟! اشرحيهالنا الأول. حلا بخبث: هاتي جهاز كشف الكدب.. وهقولك...