رواية مغامرات عائلية الجزء الثاني الفصل السادس 6 - بقلم همس كاتبة

فارس: تميم الحق.. جدتك غضبانة عندكم. زياد: انت أهبل يالا! فارس: ما هي جايبة معاها شنطة الست الغضبانة اللي بتروح بيها لبيت أبوها، مش كده يا حلا؟ تميم وهو لا يزال متجمد: دي لو فضلت هنا هنشوف أيام سودة. زمردة: مالكم متنحين كده ليه؟ فارس بمرح: مصدومين من كتلة الجمال اللي احتلت بيتنا من ساعة ما دخلتي يا تيتة. زمردة بحدة: اسمي زيزي.. أوعك تقولي تيتة دي تاني يا واد. فارس بتمثيل: آه يا قلبي!

لا زيزي دي بتحرك مشاعري.. مش كفاية الشعر الأصفر ده اللي هيعمي عنيا من جماله. وكزته حلا في بطنه بقوة بينما ابتسمت زمردة بغرور. سحر: ماما.. إيه اللي جابك؟ زمردة: ده بدل ما تأهلي وتسهلي بيا يا بت! أوس: أهلاً وسهلاً بيكي يا زيزي.. انتي رجعتي من فرنسا امته؟ أمسكت أوس من خدوده وقالت بمداعبة: حبيب قلب زيزي يا ناس.. يخلاثي القمر كل يوم بشوف الإعلانات بتاعتك. أوس: مش كده يا زيزي أبوس إيدك. دينا بضحك: شكلك مسخرة ياض.

زيزي: انتوا هتفضلوا متنحين كده؟ فين مراتك يا أوس؟ أوس وهو يقدم حبيبة: أهي حبيبة مراتي. نظرت زمردة لها من الأعلى للأسفل بتدقيق. زمردة بإعجاب: واو.. هو ده الذوق مش زي أخوك الخايب.. تعالي بحضني يا حبيبتي. ابتسمت حبيبة وحضنتها. تميم: كده برضه يا زيزي ما تحضريش فرحي؟ ده أنا حفيدك الكبير. زمردة: اممم.. وأحضره ليه يا وله؟ عشان أشوف البلونة بتاعتك دي؟ فريدة بشهقة: أنا بلونة؟ تميم جدتك بتشتمني.

تميم بغيظ: أبوس إيدك كبري دماغك.. الست دي تشل بلد بحالها. سحر: ماما انتي جيتي هنا ليه؟ زمردة: استني آخد نفسي الأول يا بت. اتجهت للارا وقالت بشهقة: بسم الله ما شاء الله.. مين القمر دي؟ أوعي تكوني بت ناجي. لارا بسعادة: لا أنا لارا بنت إيهاب. زمردة: حلوة.. شقرا وجمالك فرنسي زيي.. خلاص هاخدك معايا وأجوزك جاد ابن ابني. خديجة بضحكة: ما تفتحيش عين البت دي لسه صغيرة.. اتفضلي يا طنط نورتينا والله. زمردة

وهي تشد كارما من يدها: ودي كمان حلوة.. بنت مين؟ سحر: دي أخت فريدة. زمردة: بس مش جاية شبه زمزم المصدية زي أختها. دينا بمشاكسة: طب ما قولتيش رأيك بينا إحنا التلاتة طالما نازلة تقييم بالبنات. اقتربت منها زمردة بتفحص وأمسكت يدها وأدارتها. زمردة: حلوة.. بس عايزة ظبط الإعدادات. و ضربتها بكفها على مؤخرتها أمام الجميع. دينا بفزع: إيه ده يا لو سمحتي! حلا بضحك: محدش قالك ترغي. زمردة: مين المعصعصة اللي بتتضحك دي؟

حلا: الله يكرم أصلك أنا حلا. زمردة: ومين دي؟ غادة باحترام: أنا غادة. زمردة: اممم حلوة بس لو تقعلي الخيمة دي. غادة: ده حجاب يا تي.. يا زيزي. فارس: زيزي ما تطبيش بالحوارات دي عشان مش هتسلكي معاهم. تنهد عبد الله بضيق شديد وقال: أهلاً وسهلاً يا زمردة هانم.. ضيفوها يا ستات. فارس بضحك: زمردة؟ إيه الاسم العرة ده؟ حلا: مش ده كوكب؟ زياد: بصوا المتخلفة دي كمان. أخرجت زمردة علبة من شنطتها.

زمردة وهي تجلس: امسكي يا معصعصة انتي.. حطيلي معلقتين من ده مع شوية مية مغلية وهاتيه. حلا بتفحص: هو إيه ده أصلاً؟ زمردة: ده المشروب بتاعي.. وصفة طبيعية لتنضيف الجسم. دينا: ديتوكس؟ زمردة: امم.. اتحركي يلا انتي هتقعدي تتأمليها. حلا بحماس: حاضر.. ممكن أعمل كوباية ليا؟ زمردة: أوي أوي.. يلا ما تتأخريش. سحر بنفخ: ماما ما قولتيليش إيه اللي جابك عندنا؟ زمردة ببرود: اتخانقت مع باباكي وسبتله البيت.

فارس باندفاع: أهو قولتلكم غضبانة. أوس بذهول: انتي لسه بتتخانقي مع جدي؟ زمردة: طبعاً.. كل المتجوزين بيتخانقوا.. والمرادي السبب يستحق أسيبله البيت. سحر بصدمة: إيه السبب؟ إيه اللي يخلي ست عدت الـ 70 سنة تطفش من بيت جوزها؟ فارس بذهول: 70؟ الصاروخ ده 70 سنة؟ زمردة بغضب: سحر اخرسي وما تجيبيش سيرة السن.. ده مجرد رقم. فارس: مش مهم السن.. المهم الجمال.. أموت أنا وأعيد السنة. تميم بحدة: فارس اخرس واتأدب.. إيه هتعاكس جدتي كمان؟

فارس: ماهي اللي حلوة أوي.. الله. أتت حلا وقالت: الدرينك ده طعمه تحفة.. اتفضلي يا زيزي. زمردة وهي تأخذ الكوب: ميرسي شيري.. مراتك بالشهر الكام يا أوس؟ أوس: لسه بأول التاسع. سعاد بابتسامة: أنا هقوم أحضر الأكل. عبد الله بنفخ: سعاد.. افصلي الأكل.. طربيزة للستات وطربيزة للرجالة.. أنا هروح أصلي بالجامع. عدنان بتهرب: خدني معاك يابا. إيهاب: وأنا كمان. حسين: آه مفيش أحسن من صلاة الجماعة.. هناخد أجر كبير.. يلا بينا.

ذهبوا مع بعضهم البعض بسرعة هرباً من لسانها.. وكذلك النساء وأولهن سحر اتجهن للمطبخ.. بينما الشباب جميعهم جلسوا في المجلس الكبير مع زمردة. زمردة: أوس عايزك تعملي جزمة مخصوص ليا وتكون من جلد التمساح وبكعب عالي. أوس بابتسامة: من عنيا بس خليها للصيف عشان بالوقت الحالي عندي ضغط شغل. حبيبة بخفوت: هو أنا لما أعجز هيبقى شكلي كده؟ أوس: يمكن.. عموماً احنا التخلف عندنا وراثة من ناحية الأم والأب يعني كده كده لابسين.

حلا بضحكة: زيزي.. هو انتي ليه مش طايقة فريدة ونسل أمها كله؟ زمردة بحقد: عشان خالتها الزبالة ست مسهلوكة وكانت هتضحك على ابني زمان لولا ستر ربنا. فريدة بغضب: تميم أنا مش قادرة أستحمل الكلام ده.. عن إذنكم. ذهبت وهي تتمتم بغضب شديد وتبعها تميم. دينا: طب وإيه ذنب الغلبانة فريدة.. دي مش شبههم خالص ومتخانقة مع خالتها حتى إنها محضرتش الفرح. زمردة: ماهي شبههم بالشكل مش شايفة.. وأهي اتقمصت عشان خاطرها.

حلا: عموماً يا زيزي أنا عملت معاهم الواجب ما تقلقيش. زمردة: عملتي إيه؟ لارا: طحنتهم وعلمت على أولادهم كلهم. زمردة: ده انتي جدعة بقا.. برافو عليكي. أوس: مقولتيش إيه سبب الخناقة بينك وبين جدي؟ زمردة بلامبالاة: سحب مني الكريدت كارد. أوس: وده سبب عشان تسيبي بيت جوزك؟ زمردة: والله هو اللي سمعني كلام زي الزفت.. قال إيه وصلتي للسن ده وبتصرفي بغباء.. أنا بصرف بغباء يا أوس؟

كل اللي بعمله إني بهتم بنفسي عشان يفضل يتفشخر بيا قدام الناس وأملي عينيه بس هو إيه عايزني ألبس عباية سمرا وأقعدله بالمطبخ أخدم وأنضف عشان كده قررت خلاص هرفع قضية طلاق. تبادلوا جميعهم النظرات المصدومة. أوس بذهول: انتي عايزة تطلقي بعد العمر ده؟

زمردة: قولت مليون مرة محدش يجيب سيرة السن ده مجرد رقم.. أنا قدامك أهو ألف مين يتمناني وعندك ابن عمك اغرم بيا من ساعة ما دخلت البيت يعني لو اتطلقت ممكن أخطفه من المعصعصة دي.. أو أتزوج أنهي عيل بسن أحفادي كمان. بدأ فارس يكح ويضحك مرة واحدة. حبيبة بذهول: مش معقووول. زمردة: انتي دخلتي الشهر التاسع يا بت ولسه ما ولدتيش؟ حبيبة: ما ده الطبيعي! زمردة: آه يا خايبة.. عايزة سلفتك تشمت بيكي؟

الست الشاطرة اللي تولد بسرعة.. أوعي تصبري أكتر يا بت.. أنا هعملك وصفة تولدك وقتي. حبيبة بخوف: لا لا أنا متابعة مع دكتورة. زمردة حركت شفتيها بسخرية وقالت: الدكاترة ما بيفهموش حاجة.. اسمعي مني واعملي حسابك تولدي من هنا تحملي من هنا على طول.. ما تخليش حد يعلي عليكي. زياد بضحك: دخلنا بحرب الستات. زمردة: اخرس انت. زياد: حاضر. زمردة: أوس ابقى خود مراتك مشيها شوية.. المشي كويس أوي للولادة.. كل يوم تروحي تمشي ساعتين.

أوس بخبث: حاضر من عنيا. أتت سعاد وقالت: الأكل جاهز.. اتفضلي يا زمر.. يا زيزي هانم. في المساء. ذهب الكبار للنوم بوقت باكر ولأول مرة يتجاهل عبد الله جلسة المساء مع أبناءه وأحفاده. في الحديقة الأمامية. كان الشباب جميعهم يجلسون حول زمردة حتى فريدة كانت معهم بعد إصرار تميم. زمردة: والبلونة دي قاعدة معانا ليه؟ على حد علمي عندها بيبي ما تروح تتلهي بيه.

تميم: زيزي أرجوكي ما تتكلميش كده.. دي مراتي يعني لازم تحبيها زي ما بتحبني. زمردة: ومين قالك إني طايقاك أصلاً؟ ده انت الحفيد الوحيد اللي ما بينزليش من زور. تميم بصدمة: يا انهار أسود.. ده أنا أكبر أحفادك يا تيتة. زمردة بغضب: كام مرة قولت اسمي زيزي.. وبعدين من ساعة ما عملتها بوشي أول ما اتولدت عرفت إنك هتتعبني. تميم بإحراج: إيه الكلام ده يا زيزي.. بلاش نتكلم بالحاجات دي. زمردة: ليه اتكسفت؟

ده انت كنت زنان ومش طايق حد.. من يوم ما سحر زلطتك وأنت مغرور ومش عايز إلا حد يشيلك ويمشي بيك. فارس بضحك: أخيراً جه حد يخلصلي حقي من دكتور الحمير ده. دينا باهتمام: زيزي.. أنا أعتقد إني سمعت طنط سحر بتقول إن حضرتك تعرفي كارون وحضرتي جنازته ده صح؟ زمردة: اممم.. وإنتي سمعتي عنه فين؟ دينا: شفت مقاطع على التيك توك بيتكلموا عليه والكل شمتان بيه. فارس: هو مين ده أصلاً؟

زمردة: ده عالم هندي.. معروف عنه إنه مخاوي وبيقدر يعمل المستحيل. غادة: استغفر الله العظيم.. الكلام ده حرام.. محدش يقدر يعمل حاجة إلا بإذن الله. دينا: ما إحنا عارفين.. هو أصلاً مات موتة وحشة أوي واتفحم في بيته.. الناس كلها شمتانة بيه وبقى تريند. حلا: ده اسمه دجال مش عالم.. مش دول بتوع رد المطلقة وجلب الحبيب بخمس دقايق؟ غادة: دول كلهم هيروحوا النار.. وحرام نصدقهم. كارما بخوف: طب خلاص اقفلو السيرة دي.

دلف يزن وقال: مساء الخير. دينا بسعادة: مساء النور.. تعالا أعرفك على زيزي. زمردة بإعجاب: مين السبع؟ زياد بضحكة: ده يزن خطيب دينا ويعتبر واحد من العيلة. زمردة: اممم يز..ن.. حلو. يزن بخفوت: اسمي يز..ن.. بلاش عوجة البوق دي. دينا: ارجوك ما تشدش معاها بالكلام دي ست غريبة جدا. يزن بغمزة: أوس.. تمام. أوس: امم اتفضل يا يزن. حبيبة بفضول: فيه إيه؟ انتوا متفقين على حاجة؟ أوس: لا يا حبيبتي.. بس يزن بيستظرف.

زمردة: تميم قول للبلونة مراتك تقوم تجيبلي ماسك الوش بتاعي. فريدة بحنق: انا مش فاهمة انتي في حد مسلطك عليا؟ عملتلك ايه عشان تفضلي تدايقيني كدة؟ زمردة: شبه خالتك و ده شيء كافي بالنسبالي.. قومي يلا يا بت هاتي الي قولتلك عليه. فريدة بنفخ: حاضر. قامت فريدة و ذهبت. حبيبة: و الله يا زيزي فريدة طيبة و غلبانة.. حرام تقسي عليها كدة. دينا: و بعدين دي طردت خالتها من البيت و هزقتهم يعني بصفنا. حلا: و المتل بيقول ايه؟

بيقول عدو عدوي صاحبي.. يبقى اكسبيها لصفك احسن. تميم: دي فريدة طيبة طيبة ما تتوصفش يا زيزي.. المسكينة كانت هتكلمك تعمليلها وصفة عشان تخس. زمردة: كفاية زن.. خلاص هطيب خاطرها اما ترجع. اتت فريدة و قالت: العلبة فاضية! زمردة باستغراب: ازاااي؟ ده انا حطيتها مليانة و مقفولة بالتلاجة.. مين استعملها؟ حلا بصدمة: ده كان ماسك؟ زمردة: ايوة! حلا بذهول: ده انا افتكرته زبادي بالفراولة و نزلت سف بيه مع فارس.

زمردة بفزع: يخربيتك.. اكلتي الماسك؟ حلا: معقولة اتسممت؟ اه اه.. انا رجليا بتترعش.. كلمو الاسعاااف. زمردة: ما بلاش كدب دي مكونات طبيعية مش بتأذي المعدة.. قومي اعملي كوبايتين من الديتوكس بتاعي و اشربيها انتي و المدهول ده. حلا و هي تمسك العلبة: من عنيا.. ده انا اصلا كنت هطلبها منك. في اليوم التالي. تميم: انا كلمت جدو و قولتله انها عندنا و طبعا هو اتجنن و اتعصب عليا. اوس: طب و هيعمل ايه؟

تميم: قالي انه هيجي اليومين دول يصالحها و ياخدها من هنا. عبد الله: كويس.. نستحمل يومين. حسين: للدرجادي محدش طايقها؟ عدنان بضحك: ده انا دبحت عجل لما سابتنا و سافرت فرنسا.. دي كانت كاتمة على نفسي و كل يوم كانت بتجيلنا من النجمة تفضل قاعدة عند سحر لنص الليل. حسين: ايوة فاكر الايام دي.. بس برضو ده بيت بنتها يعني. ايهاب: مهيا كانت عاملة فيها ست البيت و الكبيرة و كانت بتكيد امي الله يرحمها و كل يوم خناقة شكل.

عبد الله: الله يرحمك يا فاطمة.. سيبونا من سيرة الستات دي. اوس: طب استأذنكم انا هاخد حبيبة نتمشى شوية. حسين: خود بالك منها يا اوس و لو تعبت كلمنا على طول. اوس: و لا يهمك يعمي.. عن اذنكم. صعد اوس للطابق العلوي و دلف اوضته. اوس: حبيبتي عاملة ايه؟ حبيبة بتعب: كنت لسا هنام.. حاسة نفسي تقيلة اوي.. شكلي قربت. اوس: طب تعالي نمشي شوية.. بيقولو كويس اوي للولادة. حبيبة: طيب يلا بينا. في طريقهم التقو بدينا و غادة.

دينا بغمزة: رايحين فين؟ حبيبة: عايزة امشي شوية عشان الولادة. دينا: اشطا جاية معاكم.. غادة قولي لماما اني مع حبيبة و اوس. غادة: حاضر.. في امان الله. ذهبو سويا باتجاه الخارج و بدأو بالمشي. حبيبة: الدنيا هتضلم.. لازم خرحنا بدري عن كدة. دينا بخبث: لا مفيش احلى من الليل.. الجو رومانسي اوي. حبيبة بضحكة: الله عليكي.. بقيتي مرهفة اوي. وصلو البوابة التي تؤدي لارض والد يزن.

حبيبة باستغراب: مش دي ارض العزايزة الي روحنلها من ناحية الغيط؟ اوس: ايوة هيا. دينا بخبث: الارض هنا حلوة اوي للمشي يا حبيبة.. اهو تمشي بمكان رايق من غيرا ما حد يشوفكم من الشارع. حبيبة بادراك: ايوااااا.. انتي جبتينا لهنا عشان تقابلي يزن مش كدة؟ دينا: هو ده. يزن من وراهم: اتأخرتو اوي.. ده انا وصلت من ساعة و قاعد مستنيكم. اوس: اممم.. طب يلا استلم و سلم. يزن: خود المفتاح اهو.. الارض فاضية و مفيش غفر جوا. حبيبة: ليه يعني؟

هو في حاجة؟ يزن: اوس قالي انكو حابين تتمشو شوية فقولت تمشو براحتكم من غير ازعاج. دينا: خلاص ما تضيعوش وقت بقا.. احنا هنروح نتفسح شوية.. خود بالك منها يا اوس و لو حصل اي حاجة كلمونا. دخل اوس مع حبيبة و بدأو بالمشي تجاه البيت القديم بينما دينا ذهبت مع يزن بسيارته. حبيبة: اوس انت بتخطط لايه؟ دلوقتي لو تأخرنا جدو هيدايق.. و لو عرف ان دينا خرجت مع يزن من غير علمه هيعاقبنا كلنا.

اوس: ما تقلقيش.. ادخلي انتي بس و ما تشيليش هم. دلفت حبيبة البيت و نظرت للمكان بانبهار شديد.. كان البيت مزين بطريقة رومانسية و مجهز كأنه جناح في فندق فاخر. اوس و هو يحضنها من الخلف: كل سنة و انتي حبيبة قلبي و حبي الابدي. حبيبة بابتسامة: بس النهاردة مش عيد ميلادي! اوس: عيد جوازنا. حبيبة بذهول: صحيح.. انا ازاي نسيت؟ ده انا كنت مخططة هعمل حاجات كتير اوي باليوم ده.

اوس بحب: انتي مش مطلوب منك تعملي حاجة غير انك تفضلي بحضني.. الحاجات دي عليا انا. حبيبة: اوس لو تأخرنا هيفهمونا غلط. اوس بخبث: ما تقلقيش انا كلمت جدي و قولتله هنتأخر. حبيبة بخجل: انت كدة فضحتنا. اوس: ليه هو انا جايبك لشقة مفروشة؟ انتي مراتي يا بت. حبيبة بدلع: ده كان احلى يوم بعمري يوما بقيت مراتك. اوس بهيام: بحبك يا حبي الابدي. حبيبة بتوهان: و انا بعشقك.

بدأ بتوزيع قبلاته على وجهها و رقبتها.. احاطت يداها رقبته بتوهان لتستقر قبلته على شفتيها و يغرقان سويا في عالهم الخاص. في صباح اليوم التالي. استيقظت حبيبة من النوم و نظرت حولها لتدرك انهم لم يعودو للبيت ليلة امس. حبيبة: اوس.. اوس.. حبيبي اتأخرنا. اوس: صباح الخير.. ايه ده هو النهار طلع؟ حبيبة: ايوة.. قوم نروح قبل ما حد يلاحظ غيابنا. بعد وقت قصير عادو للبيت و كان الجميع نائمين عدا سحر و سعاد في المطبخ و لم يشعرن بهم.

اوس: ما حدش شافنا اهو ما تتكسفيش بقا. حبيبة بابتسامة و دلع: ليلة امبارح كانت تحفة.. فكرتني بشهر العسل. اوس: انا حياتي كلها عسل من ساعة ما اتولدتي. حبيبة: انت هتنام و لا خلاص ننزل؟ اوس: و الله مش هقول لا لساعتين نوم زيادة.. خصوصا ان النهاردة عندي شغل كتير. حبيبة: اوك.. انا جعانة اوي هاخد شاور و انزل افطر. بعد وقت.

نزلت حبيبة وجدت زمردة و دينا و حلا و لارا يجلسن سويا.. كانت زمردة تروي لهن حكاياتها و مغامراتها و هي شابة. حبيبة: صباح الخير. دينا بخبث: صباحية مباركة يا عروسة. حبيبة بحدة: دينا اتلمي. زمردة: عاملة ايه؟ لسا مش عايزة تولدي؟ حبيبة: ما البيبي محجر اعمل ايه.. و بعدين ماما بتقول ان الطبيعي اكمل الشهر التاسع كله. حلا: ايوة انا اسمع كدة برضو ان الحمل الاول بيطول و ممكن تدخل العاشر برضو زي البقر.

حبيبة: حلا اخرسي انتي البقرة. حلا: و الله ما بشتمك.. بقول زي زي افهمي ده تشبيه عادي. حبيبة: مش ناقصة محضراتك انا دماغي مصدعة و ما سلمتش من الكوابيس. زمردة: كوابيس؟ حبيبة: من ساعة ما جيت البيت ده و انا بحلم بالطفل بطيخة و كل مرة بحس اني هتخنق. حلا بضحكة: الواد ده من ساعة ما شوفتيه و اسمه لازق على لسانك.. مش كنتي تجيبيه و تحتويه و ما تقرفيناش بقا. زمردة: بتقولك كوابيس.. و اهي الولادة مش متسهلة معاها.. يبقى اكيد ده عمل.

حبيبة: هو كل ما حد يقول انا مصدع يبقى عمل؟ زمردة: اكيد حد بيكرهك عملك عمل اسود عشان ما ترتاحيش بحياتك.. قومي معايا يا بت. حبيبة باستغراب: على فين؟ زمردة: عند الحجة سعدية.. هي الي هتفكلك العمل المهبب ده..