رواية مغامرات عائلية الجزء الثاني الفصل السابع 7 - بقلم همس كاتبة

حبيبة باستغراب: على فين؟ زمردة: عند الحجة سعدية.. هي اللي هتفك لك العمل المهبب ده. حبيبة بذهول: مستحيل.. أنا مش بروح الأماكن دي. دينا بحماس: هتاخدينا عند دجالة؟ زمردة: اسمها شيخة.. شييييخة.. يلا امشوا معايا. حلا: استني هنده لفارس.. ده بيحب الحاجات دي قوي. زمردة: طيب يلا ما تتأخريش. لارا: طب ولو جدو سأل عليكوا هقوله إيه؟ زمردة: مش هتقولي حاجة.. انتي كمان هتيجي معانا عشان تفكي عقدتك دي. لارا: عقدتي! أنا معقدة!

زمردة: كلنا مليانين عقد يا حبيبتي. دينا: هو ده الكلام. أتى فارس وهو يفرك عيناه بنعاس. فارس: صباح الخير. حلا: فارس زيزي هتاخدنا لشيخة اسمها سعدية بتاعة سحر وشعوذة.. إيه رأيك تيجي معانا. فارس بذهول: بجد! هتروحوا لساحرة! زمردة: انتوا متخلفين! كام مرة قولت اسمها شيخة.. شيخة.. ما بتعملش سحر بس هي كده ست مبروكة وبتفك الأعمال لوجه الله. حبيبة: أنا مش هروح.. إيه الجنان ده!

دينا: طب خلاص اقعدي انتي واحنا هنروح.. أنا عايزة أسألها على حاجات كتير. فارس: تفتكري هيكون عندها علم لو كتاب شمس المعارف حقيقي ولا كله هري وكلام فارغ؟ دينا: أهو إحنا نجرب.. من زمان نفسي أروح عند دجالة وأشوف العفاريت بتوعها. حبيبة: انتوا اتجننتوا! حرام اللي بتقولوه ده شرك.. أنا مش بروح للأماكن المريبة دي. دينا: انتي هتكفرينا يا متخلفة! ده علم.. وبعدين هيا هتعملك عمل يعني؟ دي هتفكهولك.

حبيبة بعناد: مستحيل ولو حد فيكم فكر يروح أنا اللي هقول لجدو. حلا: اتلمي يا بت.. ده انتي جبانة جبن أنا مش شفته قبل كده.. غامري شوية هيجرالك إيه؟ الست مش هتاكلك يعني. زمردة: أموت وأعرف مين اللي قالكم إني هاخدكم عند ساحرة! انتوا المسلسلات لحست دماغكم ولا إيه؟ دي شيخة يا متخلفين.. يعني بتعالجها بالقرآن والدعاء. حبيبة: أوك لو أنا عيانة أعالج نفسي وأقرأ أنا مش محتاجة لشيخة.. عن إذنكم.

زمردة بحدة: تعالي هنا يا بت.. لو ما مشيتيش بالذوق هناخدك بالعافية ولا إيه يا عيال؟ دينا بحماس: هو ده.. يلا بينا. حبيبة بخوف: لازم أقول لأوس.. هيقلق عليا قوي. حلا: أنا مش بطيق الستات اللي من غير شخصية.. ما جوزك متخمد دلوقتي امشي معايا. حبيبة: لا مش هخرج من غير ما أقوله.. على الأقل أقول لجدو أو بابا. حلا: ماشي هنديكي جائزة أفضل بنت مطيعة.. امشي قدامي يلا.

حبيبة بعناد أكثر: مستحيل.. انتي مش شايفة بطني افرضي حصل معايا حاجة.. إزاي هخرج من غير ما يكون معايا راجل؟ فارس: ليه هو أنا أراجوز هنا؟ هنروح بالعربية نص ساعة ونروح على طول مفيش داعي للدراما بتاعتك دي. زمردة بحزم: هاتوها غصب عنها يا بنات.. أنا بعمل كده عشان مصلحتها.. امشوا ورايا يلا. أمسكتها حلا من طرفها اليمين ودينا من طرفها الشمال وسحببنها باتجاه الخارج. ركبوا السيارة وانطلقوا باتجاه بيت الحجة سعدية.

وبعد دقائق.. نزلوا جميعهم ينظرون أمامهم بسرحان.. كان بيت صغير وعتيق وبعيد عن البيوت الأخرى وأمامه مساحات خضراء واسعة. فارس بانبهار: الله.. البيت ده جميل جدا.. فكرني بالزمن الجميل. حلا: طب إيه هنفضل نتأمل البيت كده؟ خبطت زمردة على الباب.. خرج لهم رجل مسن يتكئ على عكاز خشبي قديم وبيده سيجارة يدخنها بشراهة. فارس: سوسو موجودة؟ زمردة: اتهد يولا.. الحجة سعدية فاضية؟ الرجل: أيوه.. أقولها مين؟ زمردة: قولها زيزي الشقرا.

الرجل: مودام زيزي.. أهلاً وسهلاً.. اتفضلي ثواني وهجيب لك الإذن. دلف الجميع للبيت. فارس: انتي متأكدة إنها حجة؟ زمردة: آه. فارس: إيه اللي آه؟ خادمها بيحشش. زمردة: ده جوزها يا أهبل. فارس: يعني هي حجة وجوزها منحرف؟ زمردة: اتلم ياض واقعد ساكت. حبيبة بخوف: يا جماعة امشوا نروح أنا هموت من الخضة. خرج الرجل وقال: اتفضلوا الحجة بانتظاركم.. امشوا ورايا. دخلوا الأوضة.. فتح الرجل باباً على الأرض وقال: انزلوا يلا.

حبيبة بذهول: ننزل فين؟ أنا مش هقدر أنزل. زمردة: كفاية دلع يا بت في سلم هننزله ونشوف الحجة سعدية. دينا بحماس: ده سرداب زيكولا مش كده؟ حلا: اتلمي يا دينا. نزلوا جميعهم ونظروا حولهم.. ليظهر أمامهم عجوز نحيلة وقصيرة جداً تجلس على الأرض مغمضة عيناها وأمامها نار خضراء اللون وفي حجرها قطة سوداء. فارس: سلام قولا من رب رحيم.. هيا دي بني آدمة ولا أميرة الأقزام؟ حبيبة بخوف: أنا إيه اللي وصلني لكده يا ربي.

دينا بسعادة: شكله الحوار بجد يا عيال.. شايفين النار لونها أخضر إزاي. لارا بهمس: دي بتضحك عليكم وده كله كذب.. عاملة الجو ده عشان نصدقها. حلا: يا سلام وانتِ عرفتي منين.. بتقولك النار خضرا يعني الست دي عندها قدرات خارقة بجد. لارا: ما انتِ لو فلحتي بالكيميا كنتِ هتعرفي إن ده ناتج عن تفاعل ذرات النحاس.. يعني مش حاجة واو. فارس بسخرية: ده انتِ طلعتي مسئفة وأنا مش عارفة. لارا بحدة: اسمها مثقفة يا غبي.

سعدية بسكون: هششششش.. زيزي الشقرا.. عايزة إيه؟ زمردة: أنا جايلك عشان تساعدي العيال دول وتعرفي وجعهم. سعدية: قولي للبت الحامل تقعد قصادي تماماً والباقي حواليّها. زمردة: اقعدي يا حبيبة يلا. جلسوا جميعاً على الأرض وبدأت سعدية بالتمتمة بكلام غير مفهوم ليسمعوا صوت أجراس قوي جداً. فارس: إيه الجو ده هو إحنا في كنيسة ولا إيه؟ سعدية: هشششش انتوا في حضرة عمي الإمام. حلا: عادل الإمام؟ سعدية: هشششش.. امسكي يا بنتي ده.

حبيبة باستغراب: إيه ده؟ سعدية: ده عسل أسود نادر جداً.. مش زي العسل اللي هنا.. تاكلي منه كل يوم معلقة لغاية ما تخلصي العلبة. حبيبة: لا أنا مش بحب النوع ده. زمردة: اتكتمي يا بت ده هيفيدك. سعدية: اسمعيني كويس.. أول ما تروحي هتجيبي مصاصة.. فارس بمقاطعة: أمك رقاصة. حلا: اتكتم يالا دي هتسلخك قرد دلوقتي. سعدية: هتجيبي مصاصة وتحطيها تحت سريرك.. لو جيه عليها النمل اعرفي إن اللي عملك العمل من أهل بيتك. حبيبة: يا سلام!

وأجيبها نكهة إيه إن شاء الله؟ سعدية: فراولة.. خودي ده. حبيبة باستغراب: إيه ده كمان؟ سعدية: ده حجاب تحطيه تحت مخدة جوزك.. عشان اللي عملك العمل راح لشيخ وهيعمل لجوزك عمل جلب.. يعني هيطلقك ويتجوز غيرك. حبيبة بسرعة: بعد الشر. سعدية: خلصت دي.. قومي واقعدي اللي بعدك. قامت حبيبة وجلست مكانها لارا. لارا بخبث: لو انتي ساحرة بجد.. اعرفي مالي من غير ما أقول. سعدية: أعوذ بالله.. مين قال لك إني ساحرة؟

أنا بس بداوي الناس من الناس اللي معندهاش قلب. لارا: حافظينهم.. كل الدجالين بيقولوا كده. سعدية: يبقى انتي مش تعبانة انتي جاية تحققِ معايا. لارا: أبداً.. بس لو انتي شاطرة يعني كنتِ هتقولي إيه مشكلتي من غير ما أنطق. سعدية: دي هناك.. عند ملوك الجن والشياطين.. مش عندي. دينا بحماس: انتي تعرفيهم؟ تعرفي دجن وجسار؟ سعدية باستغراب: لا.. انتي ليكي بالكلام ده يا بت؟ دينا: لا.. بس قريت عنهم في كتب أسامة مسلم.

حلا: انتي حمارة يا بت! ده خيال ملوش صلة بالواقع. فارس: طب أنا عندي سؤال.. شمس المعارف كتاب حقيقي ولا متفبرك؟ سعدية بلخبطة: مين دول يا زيزي؟ بيقولوا كلام غريب جدا. دينا: إيه الهبل ده؟ إزاي ساحرة وما عندكيش معلومات عن العالم الآخر؟ سعدية بغضب: أنا مش ساحرة افهموا بقا.. أنا ست مؤمنة وحاجة لبيت الله.. بقرا على الناس وبديهم طرق يتخلصوا من الأعمال. حبيبة: والله! وإزاي اللي بيفك الأعمال ما يعرفش حاجة عن عالمهم؟

لارا: دي دجالة وبتضحك عليكم ودلوقتي هتقول عايزة خمس فرخات وسن ديناصور وضفر ببغاء أخرس مراته خانته في موسم التزاوج مش كده؟ سعدية بصراخ: بس بقا إيه التخلف ده. في هذه اللحظة استيقظ القط وهجم على دينا. دينا بصراخ: ابعدوا العفريت ده عنييييي. أمسكته سعدية وأعادته لحضنها وبدأت تملس على ظهره. سعدية: انتوا اللي جاينيلي مش أنا اللي طلبتكم.. يبقى تسمعوا الكلام أو تمشوا من سكات. زمردة: بس يا عيال سيبوا الست تعرف مشكلتكم.

فارس: طيب خلاص.. حضرتك قولتي تعرفي تفكي الأعمال.. قوليلي بقا إيه أنواع السحر وعددهم كام؟ سعدية بنفخ: العيال دول هيشلوني.. دول أحفادك يا زيزي؟ زمردة: لا قرايب أحفادي.. المهم انتي طلع معاكي إيه؟ سعدية: مفيش حاجة اطمني.. الأولاد دول سلام.. بس البت الحامل في حد مستقصدها. زمردة: منا جيتلك عشان كده.. البت بطنها محجرة ومش عارفة تولد.. وبتشوف كوابيس ليل ونهار.

سعدية: اممم.. دي هتبقى عيبة لو مولدتش اليومين دول.. لازم أحضر لها الخليط السري. نزل أوس لأسفل وبدأ يبحث عن حبيبة. زياد: انت فينك يا عم.. كل ده نوم؟ أوس باستغراب: فين حبيبة؟ وليه البيت هادي كده؟ زياد: معرفش.. مشوفتش حد من الشباب غير غادة وفريدة وكارما. أوس باستغراب: راحوا فين يعني؟ وتيتة زمردة إزاي هادية كده؟ زياد: والله ما أعرف. تت سعاد تزامناً مع نزول تميم. أوس: طنط فين حبيبة؟ سعاد: هيا مش بالأوضة؟

ده أنا افتكرتها لسه نايمة. أوس باستغراب: مفيش حد من الشباب موجود.. فين حلا ودينا؟ سعاد: دول كانوا هنا الصبح.. يمكن خرجوا للجنينة هروح أشوف. تميم: جدتك فين؟ أكيد عملت مصيبة. أوس بقلق: حبيبة ما راحتش عند فريدة؟ تميم: لا.. مشوفتش غير طنط خولة في شقتي. أتت سعاد وقالت: مفيش حد بالجنينة غير كارما.. هما راحوا فين؟ أوس: هكلم حبيبة. اتصل أوس بحبيبة. في بيت سعدية. حبيبة بفزع: يا انهار أسود.. أوس بيكلمني.. هقوله إييييه؟

فارس بسرعة: قوليله روحتي للسوق مع زيزي.. أوعي تجيبي سيرتي أنا بعرضك يا حبيبة. حبيبة: هششش هرد عليه. ردت عليه حبيبة وقالت: الو. أوس: حبيبة انتي فين؟ حبيبة بتوتر: أنا نزلت السوق مع زيزي والبنات قولت أشتري كام حاجة عشان الولادة.. مش هتأخر. أوس باستغراب: ومن امتى بتخرجي من غير ما تقوليلي؟ حبيبة: والله كنت هقولك بس انت كنت نايم وما هانش عليا اصحيك. أوس: طب انتي فين بالظبط عشان أجلك؟

حبيبة بتوتر: لا لا مفيش داعي.. أنا أصلاً بالطريق هروح.. ما تتعبش نفسك. أوس بشك: حبيبة.. انتي كويسة؟ مال صوتك؟ حبيبة: أبداً بس عشان كنت بمشي فتعبت شوية.. أنا قعدت أهو.. هستنى حلا تخلص اللي بإيدها وهاجي على طول. أوس: طيب ما تتأخريش ولو حصل أي حاجة كلميني. حبيبة: أوك.. سلام. قفلت المكالمة بسرعة ووضعت يدها على قلبها. حبيبة: منكو لله خلتوني أكذب.. امشوا نروح بسرعة. سعدية بسرعة: مفيش مرواح دلوقتي.. لازم تتضافوا عندنا.

دينا: لا ميرسي مش بنشرب حاجة عند... سعدية بحدة: لو قولتي ساحرة هسلط عليكي محروس. دينا بحماس: محروس ده جِن؟ سعدية: لا القط بتاعي. لارا: امشوا نروح وبلاش جنان.. أهو ما استفدناش حاجة من المشوار ده. سعدية بحدة: قلت مفيش مرواح دلوقتي.. اقعدي. في بيت عبد الله. أوس: حبيبة نزلت السوق مع تيتة والبنات. زياد: اممم عشان كده البيت رايق.. جدتك دي رهيبة. تميم: يلا بكرة جدي هيجي وياخدها من هنا.

زياد: بقولكم إيه يا شباب.. هشام عازمكم على قعدة عربي ما تيجو نروح ونغير جو. تميم: الله.. زمان عن الأيام دي. أوس: زياد.. مش فاضيين للعبط ده ورانا شغل. زياد: ساعتين من مش هيطير الشغل لو خرجنا اتبسطنا شوية.. عموما أنا عزمت يزن وكنت هقول لفارس الرخم بس ملهوش نصيب. تميم: على كده أنا رايح وش.. امتى هتروحوا؟ زياد: دلوقتي حالا.. دول بقالهم من الصبح قاعدين. أوس: يا سلام؟ أول مرة أسمع إن في حفلات الظهر.. ما طول عمرها بالليل.

زياد: ده هناك في الكابريهات.. دي قعدة محترمة كلها شباب رجولة وأولاد أصول. تميم: اشطا يلا بينا.. أنا قرفت من جو المستشفى عايز أغير المود ده. زياد: طب امشوا يلا وأهو نعدي على يزن نجيبه معانا. أوس: لا روحوا انتوا أنا ورايا شغل. زياد: شغل إيه يا ابني إحنا في إجازة.. وبعدين مراتك لسه ما جاتش يعني نص ساعة نغير جو مش هيحصل حاجة.

تميم: ابعتلها مسج وقولها إنك خرجت.. مفيش داعي للالتزام ده أهو نجدد روح الشباب بدل ما إحنا عجزنا قبل أوانا كده. أوس بنفخ: ماشي. ************************** لارا بغضب: قلتلك عايزين نمشي بقالنا ساعتين محبوسين هنا.. في إيه؟ زمردة: كفاية يا سعدية والله وجبتي معانا وزيادة.. سيبنا نمشي بقا العيال اتأخروا. سعدية: والله ما انتوا ماشيين قبل ما تدوقوا الرز بلبن بتاعي. حلا بنهم: رز بلبن؟ تمام قاعدين. في هذه الأثناء...

نزل عن السلم رجل أصلع ذو عضلات ضخمة و قامة طويلة. فارس ببلاهة: مين العملاق ده؟ الرجل بخشونة: بقالي كتير ما شفتش ضيوف عندك يما. حلا بذهول: يما؟ دلوقتي الفيل ده ابن النملة دي؟ سعدية: نمر يا ابني جبتلك العيال دول شوف أنهي أنسب حد فيهم. نمر بتدقيق: اممم دول كويسين.. بس ليه جايبالي واحدة حامل والتانية عجوزة ناشفة؟ زمردة بغضب: هي مين دي اللي عجوزة؟ ده انت اللي برميل وأبو زلبطة يا ابن القرعة.

نمر بحدة: اسكتي المرا الخرفانة دي يما. سعدية: بقولك يا نمر يا حبيبي.. إيه رأيك تمشيها؟ دي خالتك زيزي وكانت صاحبتي. زمردة: آه يا زبالة بتضحكي علينا يا سعدية؟ ماشي أنا هوريكي وهوقفلك حالك ده بس اصبري عليا. نمر: إيه الكوتشي الحلو ده؟ مقاس جزمتك كام يا ست انتي؟ زمردة بغرور: 37.. أنا أصلاً رجليا صغيرة ومش بيبان عليا السن. نمر: طب اقلعيه يلا.. هاخده هدية للبت أحلام خطيبتي. زمردة بفزع: انت اتجننت؟

عارف ده براند إيه وتمنه كام؟ نمر: يعني غالي؟ هو ده المطلوب.. اقلعيه وإلا هتتحطي تحت مكنة التعذيب. زمردة بخوف: لا لا.. هقلعه هقلعه. خلعت حذائها ووضعته أمامه. نمر: وانتِ يا عروسة اقلعي الإنسيال ده. حبيبة بخوف: مستحيل.. ده هدية من جوزي ولسه جايبهولي امبارح. نمر: لو عايزة تحافظي على العيل اللي ببطنك اقلعيه. حبيبة بخوف: ماشي. خلعته وأعطته إياه. دينا: ده إحنا جايين نتقلب بقا.. دي مش أخلاق دجالين أبداً.

نمر: اقعدي ساكتة أحسنلك. دينا: مسكين ما يعرفش أنا مين ومرات مين.. ده انت هتتنفخ ياض. فارس: مزتي انتي ساكتة ليه؟ فين بطولاتك؟ حلا بسرحان: ده كان يفرمني ويعمل من عضمي شوربة كولاجين.. انت مش شايف شكله. فارس: عندك حق.. هيعملوا فينا إيه المرادي؟ تفتكري هيطلع صاحب أوس ولا هنتفرم؟ حلا: على الأغلب هنتفرم. نمر: البت الحامل والعجوزة دي مش محتاجينهم سيبيهم يمشوا.. دول الأربعة كويسين. حبيبة بخوف: هتعملوا بيهم إيه؟

نمر: ما تخافيش هنشغلهم بدل ما هما فاضيين كده.. خرج دول يابا. تقدم الرجل المسن وأمسك زمردة ودفعها نحو السلم. حبيبة ببكاء: منكو لله يا أغبياء.. شفتوا عملتوا إيه؟ فارس: ما تقلقيش علينا روحي انتي واطلبي بوليس النجدة. نمر بخبث: مهو لو ده حصل اعرفي إن قرايبك دول بقوا تحت التراب.. لو عايزة مصلحتهم اتكتمي وما تقوليش حاجة. حبيبة ببكاء: أرجوك سيبنا نمشي كلنا وهديك أي مبلغ انت عايزه.

نمر: مش عايز فلوس.. ما تخافيش عليهم أنا محتاج لهم بحاجة كده ساعتين زمن وهيكونوا بالبيت عندك. حبيبة بخوف: محتاج لهم بإيه؟ نمر: هاخدهم يساعدوني بتقطيف البامية.. اتكلي على الله انتي.. خدي ده الكارت بتاعي لو قلقتي عليهم كلميني. تناولت منه الكارت بسذاجة وقالت: أوك.. ما تتأخروش عشان جدو ممكن يقلق. نمر: طيب اتكلي على الله يلا. دينا بهمس: حمارة وغبية. لارا: ده هبلة وصدقته المتخلفة.

خرجت حبيبة وزمردة من البيت وبدأت حبيبة تبكي. زمردة بضيق: آه يا كسوفي وسواد وشي آه.. ماشية بالشارع حافية زي ولاد الشوارع. حبيبة بغضب: ده اللي فرق معاكي؟ مش خايفة غير على شكلك؟ العيال مخطوفين وانتِ بتفكري برجليكي؟ زمردة: كان يوم أسود يوما قررت أساعدك.. أنا مالي ومالك أصلاً.. ده انتي هبلة رسمي وبيضحك عليكي بكلمتين. بدأت حبيبة تمشي بسرعة وتتكلم: قال عمل قال.. ست رجعية.. إزاي تفكري بالطريقة دي؟

والعيال دول متخلفين وفرحانين بالمصيبة دي.. أنا مالي ومالكم ما كنت اتخمد جنب جوزي وأقعد مبسوطة ومرتاحة.. لازم أوقع نفسي بمشكلة وأستنى حد يحلها لي.. امتى هبقى قوية وأدافع عن نفسي زي حلا.. امتى هتعلم ما أسمعش كلام حد وأمشي وراه زي الهبلة.. كان لازم يعني أورط نفسي؟ .. قال إيه رايحة لدجالة عشان يتعملي عمل وهي هتفكه.. هو أنا حد يعرفني أصلاً؟! .. ده أنا عمري ما آذيت حد وماشية جنب الحيطة على طول.. ليه كده.. ليييه؟

نظرت حولها ولم تجد زمردة. حبيبة بتوتر: راحت فين دي كمان؟ ... يتبع.