رواية مكالمة منتصف الليل الفصل الرابع عشر 14 - بقلم عادل عبد الله

: كلامك صح يا نور. : تعرفي محامي يعملك الخلع؟ : لأ. : هشوفلك محامي أنا من طرفي. : وأنا هروح فين دلوقتي؟ معقول هرفع على جوزي خلع وأفضل معاه في نفس البيت!! : شوفي مين من قرايبك تقدري تروحي تقعدي عندهم لحد ما ترتبي أمورك. : كل قرايبي مليش علاقة بيهم من زمان. ينفع تشوف لي أنت مكان أعيش فيه مؤقتًا. : لأ مش هينفع. أنتِ لازم تقعدي عند حد يكون مصدر ثقة ليكي. حد من دمك يخاف عليكي. : معنديش ثقة في حد أكتر منك.

: لأ. شوفي خالك أو خالتك، عمك أو عمتك. أي حد من دمك يا لولا. أنا مش هينفع. : حاضر يا نور هشوف وأبقى أقولك. وكمان هصرف منين يا نور؟؟ أنا مش عارفة أعمل إيه؟ : لما نحدد الأول المكان اللي هتعيشي فيه وبعدين نشوف شغل يناسبك. أنتِ طبعًا مش معاكي أي شهادة. : لا يا نور أنا خرجت من المدرسة من تانية ثانوي عام. أنا كنت شاطرة أوي لكن بابا بقى الله يسامحه كان عاوز يجوزني وخلاص.

: طيب كويس أوي تبقي تشوفي أي شغل وتكملي تعليمك في نفس الوقت. صدقيني يا جميلة أنا شايف حياتك ممكن تبقى حلوة أوي. بعد يومين لولا كلمت نور وقالت له إن لها خالتها في إسكندرية اتصلت بها وقالت لها إنها عاوزة تقعد عندها لفترة مؤقتة لحد ما تاخد حكم الخلع من جوزها وتلاقي شغل وترتب باقي أمورها، وإن خالتها وافقت ورحبت أوي بيها خصوصًا إنها عايشة وحيدة بعد جواز ولادها وموت جوزها.

نور فرح أوي بالخبر ده وقالها إنه كمان كلم محامي صديق له ووعده إنه هيساعدها في الخلع بأقل مصاريف علشان ظروفها. نور اشترى خط موبايل جديد وطلب منها إنها توقف الخط القديم وتستخدم الخط الجديد علشان خيري وناصر مش يعرفوا يوصلولها. لولا اتصلت بنور وقالت له إنها لقيت شغل وإنها جهزت الأوراق الخاصة بالخلع. وطلبت منه إنها تقابله علشان يروحوا للمحامي وياخد منهم الأوراق الخاصة بالخلع.

ناصر حاول يكلم لولا كتير لكن تليفونها على طول مقفول، ناصر كان هيتجنن وراح يراقب بيتها علشان يعرف هي اختفت فين، ناصر اتصدم لما عرف إن لولا اختفت بدون ما يعرف وحس إن نور وراء اختفائها. ناصر عرف إن لولا خدعته وأتأكدت شكوكه فيها وعرف إنه لازم يراقب نور علشان يوصل للولا. ناصر بقى يراقب نور زي ظله بالظبط لحد اليوم اللي المفروض نور هيقابل فيه لولا علشان يروحوا للمحامي.