رواية ملائكة بالف وجه الفصل الحادي عشر 11 - بقلم اروي طاهر

قدمت كاس العصير بهدوء. تفضلين. بتوتر. شكرا. تعبتكن. لا تعب ولا شي. حدت رشفه من العصير وحطت الكاسه على الطاوله. انتِ خوات؟ شافت لي نجمه. هادي جارتي وصاحبتي هلبان. ابتسمت وهيا تخبي في ملامح خوفها وتوترها. ربي يحفضكم لي بعض. متعرفناش؟ خدت نفس. انا مرت طه. تبادلت نضرات الصدمه مع رباب. اسفه لو جيت بدون موعد وكذبت عليك بخصوص طلبيه عشان نقدر نوصل لي عنوان شقتك. متكلمتش بي ولا حرف.

شوفي رباب انا مش جايه نتعارك معاك ولا نحاسبك على شي. قريت شويه من الشات بينك وبين طه. فهمت ان يهدد فيك بي طلوعك من الشقه وانتي متقدريش ترجعي لي اهلك. مدامك تعرفي كل شي وانتي مش جايه تتعاركي ع قولتك انتي هنايا علاش؟ رباب اهدير. اسكتي انتي خليني مع اه. ابتسمت بهدوء. وانا جايه نفهم شي واحد بس. وشنو بيصير في حياتي الزوجيه؟ تهز في رجلها بتوتر. تفضلي شنو يلي تبي تعرفيه؟ اممم ءءاءء. انتي انتي تحبيه طه؟

تبي تكوني معاه او تبي اي طريقه تتخلصي بيها منه؟ زي ما كتبتيله؟ ابتسمت على جنب. ليش يهمك تعرفي؟ ببساطه لانه زوجي يا رباب. ولاني قاعده عروسه ولازم نفهم لو بنستمر في زواجي هادا او لا. طه يحبني. وانا نبادله نفس الشعور للاسف. كل يلي صاير بينا ان مش قادره نتقبله بعد يلي صار في حياتي. بس هادا ميعنيش ان معش عندي ليه مشاعر. سكتت بي استغراب وغصه داخلها. لان ببساطة متوقعتش الرد هاذا. بي ملامح تحدي. تبي شي تاني؟

حاولت انها تبتسم بس الكسره كانت في عيونها. مسكت شنطتها ووقفت. لا تمام صحيتي واسفه لو خديت من وقتك. وطلعت بدون ما تسمع رد رباب على الاقل. سكرت عيونها لما سمعت صوت الباب لما تسكر. غباء. فتحت عيونها. ليش هكي تصرفتي مع البنت حرام عليك. متكونيش غبيه حتي انتي. سكريلي الموضوع. نجمه فوتي يلي صار. وسيبتها وهشت للغرفهن. تنهدت. ياربي شن يلي قاعد يصير. *** وسط ممر المشفى كانت شيخه واقفه مع كفاح. متوترين والذعر باين على وجهم.

خليت البنات عند ماما وطلعت من الخلعه تعرفي مركزت في شي. احمدي ربك عندك وين تخليه. متين خليته راقد في السياره. نغم وطه زعمى يلحقو؟ اكيد عيب ميجوشك. راجلك جاي الباين انه بيحكي معاك واضح من بكري انه يبيك في حاجه. خليك متتحركيش. لا حبيبتي منقدرش بالك الراجل عنده شي مهم بيقوله. خلي نمشي نشوف راجلي حتى انا شن صاير فيه. قلبيه حساس مش زيك تقول متزوجه رشاده. بعدت شويه من جيهة شيخه. ندى حالها كويس وفاقت.

الحمد الله ربي يشفيها ويعافيه. امتى تبي تروحي؟ شافتله بي استغراب. ليش تسأل؟ لو كتبولها خروج مفيش داعي نقعدو بنروح انا وياك. بعبط. انا وياك؟ علاش! لانك ميعرفش يحكي ويعبر عن مشاعره. بعدين ساهل. سكتت بس في داخلها تقول. شني هادا خيره هبل؟ اشرت لي شيخه من بعيد بمعنى تعالين. شنو شنو وين ماشيه؟ ماشيه لي مرت خوك خيرك بسم الله. سكت وعرف ان ردت فعله كانت مبالغ فيها شوين. الحمد الله. شنو صار بتطلع اليوم ولا كاتبيلها خروج؟

خليك من هاذا كله توا شن صار معاك. خيرك ع البنت خير خليها توصل قبل. ابتسمت بوجع. لا عادي خليها. شنو احكي. تغيرت ملامحها. طلعت تحبه وتبيه. واخدلها شقه ويصرف عليها زياده لانها هاربه من اهلها. 😧😧😧😧😧 ضحكت بهزوه. اي ايلو تشوفو كيف ردت عليا بثقه وكيف تتعامل فيه زي الكلب. مع هادا يجري وراها غير ارضي عليا بس. قويه لقطة الشقه ويصرف عليها بجد. وانتي شنو ناويه اديري؟

كنت ناويه بنخليهم الاثنين يتهنو ببعض وبنرجع بيت اهلي. لكان بعد الاستفزاز يلي دارتهولي اليوم مش نخليهولها بي الساهل ابدااا. شاطره🔥🔥🔥🔥 *** ندى:كانت مقعمزه علي الكرسي واغلب وجها جروح وكدمات. نزلت كمها بعد ما سحبو منها الدم. الحمد الله ع السلامه الحمد الله ع السلامه. ابتسمت. ابتسمت. الله يسلمك ياربي. شكله خدوكم بعين ولا عرسان جدد والاوضاع مستغه عطوهالكم من بعيد. نذير وين؟

نجم الدين طلع يكمل في اجرائات المشفى شوي وبتطلع. والحمد الله جت بسيطه. الحمد الله. بابا جي؟ بوك محكينالاش تعرفيه قداش يخاف عليك. توصلي لي حوشك بي السلامه وبعدين ساهل. احسن شي درتوه ❤️. طق ع الباب مرتين. وخش للغرفها. اشر بعيونه لي نجم الدين وطلع. هي نراجو فيكم برا اهو تو نروح بيكم في سيارتي والباقي يروحو مع نجم الدين. ابتسم. منور يا صقر ما قصرتش والله. طلعو خوت ندى الاثنين وقعد نذير وندى بس. الحمد الله ع السلامه.

الله يسلمك. صارلك شي؟ زي ما تشوف. قامت عيونها وكانت الجروح معبيه جسمه ووجها وفمه. هيا نوضي نروحو. وقاعد مقلتش شي لي اهلي مفيش حد يعلم. ناضت تمشي جنبه وسألته. السياره شن صار فيها؟ الحمد الله يلي طلعنا مفينا شي. السياره معش يصير منها خلاص.

وقفت ونذير كمل طريقه وطلع مع خوت ندى. اما ندى كانت مع نساوين خوتها سرحانه وملامح الحزن واضحه على وجها لان تأنيب الضمير كان عندها الفففففت. سببت بي الحادث وخراب سيارته بسبب كلام تافه وعراك فاضي منها! *** كانت نجمه واقفه قدام باب شقتها لابسه بدلة سروال كحله ووشاح ابيض وطاقيه شمس بيضه وماسكه في يدها شنطة كتف واضح انها كانت في سوبر ماركت. وقفت تفتح فيه بس ناداها صوت راجل كبير في الست شويتين.

تلفتت وهيا تقول. اهلا عم عبدو تفضل؟ يا بنتي بكرا جايبين عمال نضافه يغسلو دروج العماره كل شخص بيدفع 30. ياريت تشتركي معانا. طالعت من جيبها فلوس عدت 30 دينار بزبط ومدتهوله. كان نازل صدفه من الدروج وسلم على عبدو غفير العماره. بلاش نضراتك هاذي لان من اليوم مش رح نسكتلك لا انت ولا خوك. تلفتلها. انتي من كلمك؟ ربعت يديها. ولا حد عطيتك علم بس باش ادير بالك في الجديد. تلفت. معندكش كبير نحكي معاه كنهاذا راهو وريتك الادب كيف.

بالله توكل من قدامي وفي الجديد تشوفني قدامك اخطم من جنبي كأنك ما شفت حد. لان وربي معاد متحمله منك ولا كلمه وخبر امك معش تتصل بيا واقطعو علاقتي بيكم نهااائي. ابتسم بي استفزاز. شن رايك ترجعي لي اهلك؟ راجعي نفسك انتي منو؟ مني يكون بوك الحقيقي وليش صاير بي امك هكي! الصدمه كانت واضحه عليها. شن تقصد؟ امك حكتلك شي! ضحك. الاحسن انك تعرفي بروحك. اختفت الضحكه من عيونه. روحي. ياسرك عطلت.

سكرت باب شقتها من جديد. صح الباين لازم نعرف بروحي. واهو ماشيه لكن رح نرجع يا يزن ورح نسكتك بي الف حاجة انت وخوك الحقير. اي وريني علاش. لبست شنطتها ع كتفها وطلعت. طلعت وهيا بتتفجررر من الغضب وخلاص في ثواني بس قررت تحسم الموضوع بدون حتي نا تاخد راي حد. يا اما ترجع وهيا فاهمه حكايتها. يا اما تموت. *** ندى:سكرت باب غرفة النوم ووقفت قدامه. قبل ما تطلع محتاجه نقولك شي 🥺. مش وقته امي اكيد ركبت توا بعدين ساهل.

لا توا لازم تسمعني. نذيييييييير نذيييييير ندى. نحي من قدام الباب عيب هيا في الصاله وحني في غرفة النوم. بعيون مدمعه. نذير انا اسفه😭💔. كل شي بسببي الله يخليك اسفه خربتلك حياتك وسيارتك. حاسه اني ان منعرفش شن كان صايرلي الصبح وشفتك مع هذيك البنت. الله يخليك سامحني🥹💔. حط يده علي خدها وقال. *** رباب:فتحت الباب. اياااه علينا شنو النهار هاذا يلي ما يبيش يفوت على خير. خش لي الشقه وسكر الباب بقوه. انتي وينك مترديش؟

تلفتت بكيفي مش راده. مسكها من يدها. متهبلينييييييييششششش. خليني بعقلي رباب احسن ما اقسم بالله نقتلك راهو ومفيش جنس مغلوق يعرف مكانك. فتحت يديها. ديريهاااا. ديرها خليك قدها وريحني من يلي انا فيه لاني قرفت منك. يديه ترجف ودااهش والاعصاب باينات عليه. مسك راسها بين يديه. تحبيني؟ علاش تتصرفي هكي رباب ادويلي بشويه فهميني شنو نقصت عليك انا. بعداته بقوه. تي انت دمرتلي حياااااااتي. حرمتني من اهلي شن قاعد تقووووول.

طه اطلع منبيش نشوف وجهك اطلللللع. اصلا كلها اسبوعين نحصل خدمه ورح نخليلك الشقه بيلي فيها. اطللللع. هه؟ ششش شنو !!! تكذبي صح مستحيل معندكش مكان رباب غير هنايا مفيش حد يحبك الا انا. بعد طه بعدددد. يحاول يحضنها بس كانت تصد فيه بقوه 🔥. بدون وعي مسكها من رقبتها وخبطها على باب المرش. ثواني وكانت رباب طايحه على الارض والدم مشرتع على كل قطع المرش. ***

كريمه:طلع خوك من بكري ماشي لي ست الحسن خطيبته. اتصلت بيه اشبح شن قتله طلعلها يجري. ضحك. وانتي شن واجعك؟ صبت القهوه وحطتهوله قدامه. انت انت يلي واجعني قاعد هكي علاش مديرش عقلك في راسك وتمشي تخطب زي خوك؟ معنديش خلوق ولا استعداد قاعد. ومع النماذج يلي شفتهم لوطه زادو سكروها. نماذج شن. الفاسدات الزوز يلي عايشين بروحهم. عييييييب يزن عييييب مهما كان ولايا عمرك ما تقول فيهم كلمه غلط. ع اساس دارت قلب ونزلت بتروح. شش شنو؟!!

شن تقول !! وين بتروح؟؟ بعناد. بتروح لي اهلها يا امي خليها تقلب وجها تفكنا من مسؤليتها وكل شويه راكبه فوق. خبطت على وجها. نهاري الاسوووووود. انت متعرفش البنت هادي منوووو💔💔💔. نوض الحقها نووووووض. بي استغراب. منو تكون خيرك يا امي! تبكي. نجمه تكون.