رواية ملائكة بالف وجه الفصل الثاني عشر 12 - بقلم اروي طاهر

الساعه 6 العشيه، الشمس خفيفه بس قاعده مودعتش السماء. النسمات البارده عاطيه جمال لي الجو. ريحة الارض بعد مطرة الليل كانت عالم تااني. اختارت نجمه تتمشى مسافه طوووويله قبل ما تاخد تاكسي وتمشي لي بوها. الوقت يلي تتمشى فيه عشان تاخد فرصه تحكي فيها مع روحها وتجهز كلام ومببرات لي بوها وعمامها. تفهمهم وين كانت وامها شن حكتلها وشن يلي صار. والاهم انها تجهز الاسئله يلي بتسألها ليهم. ويلي كان محتوى وبداية كل سؤال: (علاش)

كانت حاسه بي الغباء، كيف الفتره يلي فاتت كلها مفكرتش ترجع لي بوها. مهما كان هوا في النهايه بوها ومستحيل يضرها في شي. لكن التفكير هادا يقاطع فيه ذكريات امها وهيا تبكي وتتوسلها انها مترجعش لي بوها ولا حتى تتواصل معاه. في العاده كانت امها تحبها اكتر، بس هادا مييعنيش ان بوها ميحملهاش اي مشاعر. يعني في النهايه هيا بنته. وزي ما ربونا وعلمونا اهالينا (مفيش اب ميحبش بنته)

بس احيانا الاهل ميكونش عندهم الوعي الكافي لي هلبا حجات. كل ها الكلام والاسئله قاطعتهم سياره كحله عاليه كانت جايه تجري. درست في نص الشارع ونزل المرشيز. "بدون اي ملامح تعبيريه… اركبين" "ضحكت بي استهزاء… نعم؟! "معنديش خلوق نعاود كلام" "ماعندي وين نركب، بعد عليا وخليني في حالي" "متخلينيش ننزل نركبك انا، خليك بكرامتك واركبي، فكيني من القصص الزايده" "مرررريض انت؟ ولا في شي في عقلك؟

الف سنه وانت تقولي ارجعي لي اهلك ارجعي لي اهلك، يوم قررت نمشي جاي لعندي تقولي اركبي، من انت اصلا باش نركب معاك السياره؟ "في شي يخص اهلك وامك تحديدا لازم تعرفيه، تعالي نرفعك تفهميه وبعدين لو تبي تمشي" "بي علامات استغراب وفضول… يخص ماما؟ شن هوا شن في؟ "مش انا يلي بنفهمك للمره المليون، تعالي اركبي نرفعك" خدت نجمه نفس بتردد وهيا تشوف يمين ويسار، واخر شي استسلمت وركبت مع يزن. *** طه نزل على ركابه ويديه ترجف.

عقله مش مستوعب يلي صار وقلبه بيطلع من عبص. صوت متقطع وهستيري: "رباب؟ حبيبتي نوضي خلاص مش معصب عليك" "رباب نوضي، رباااااب" "رباب الله يخليك نوضي متخوفينيش عليك حبيبتي" "ياعمري نوضي عارفك تحبي تخلعيني هيا وراس قلبي" رجع شعره للخلف بتوتر وخوف والدم مالي يديه. خدي ثواني وهوا يحاول يستوعب يلي صار، واخر شي قامها ونزل بيها لي السياره. طول ناس باب الشقه مفتوح وراها.

ركبها لي السياره وطول الطريق يسوق وينادي فيها متأمل انها تصحى، بس كان مغمى عليها بشكل نهائي. كان طه في حاله هستيريه، يخبط ع السياره فتره ويبكي فتره وينادي بي اسمها عشان تفيق. ينادي بكل اسماء الحب ليها. وبعدين يسبها ويحط في اللوم كله عليها وانها هيا يلي وصلت روحها لي هادي المرحله، ويرجع يبكي من جديد. من اغرب واكتر الحلات ندره يلي ممكن تسمع بيه. لما يجتمع الحب والكره في نفس الشخص.

الرغبه انك تبي تكون معاه 24 ساعه، لكن في نفس الوقت متبيش ولا شي يربطه بيك. اخطى من علاقه عابره، لكن! متبيهاش تكون عابره. هادا تفسير علاقة طه بي رباب كلها ضياع وتشتت وعدم فهم اي شي فيها. *** ندى بعيون مدمعه: "نذير انا اسفه" "كل شي بسببي الله يخليك اسفه خربتلك حياتك وسيارتك" "حاسه اني ان منعرفش شن كان صايرلي الصبح وشفتك مع هذيك البنت" "الله يخليك سامحني"

"ابعدي عليا ندى، ابعدي خليني نفتح الباب ونطمن امي واختي عليا يكون احسن من كلامك الفارغ يلي تحكي فيه" "بعيون مصدومه… انت كيف تحولت هكي؟ اول يوم كنت حنون وطيب وكويس معاي، كيف تتغير هكي في يوم وليله؟ "زي ما انتي خنتي وعدك ليا بين يوم وليله، مهدرتيش حساب انك رح تشوفي وجهي التانيه يلي ميعجبكش، وتوا زيدي غادي" ودفها من ع الباب لين قريب طاحت ع الارض، بس تلقاها الحيط وسندها. طلع نذير لي امه وباقي عيلته يطمن فيهم.

وندى قعدت في مكانها مصدومه مش عارفه شنو يلي بديره! مفيش اي امل انها تتقرب من نذير، ولا اي ذرة امل انه يرحمها ويطلقها عشان تقدر تاخد امين. ولا حتى ترجع لي حوش بوها وتتخلص منهم الاثنين. ريحانه فتحت الباب بي استغراب: "انتي كويسه؟ خيرك مطلعتيش" "بي اسلوب هستيري… ريحانه تعبت تعبت انا معش قادره اكتر من هكي وربي رح نتفجر، لا قادره نعيش معاه ولا قادره نتخلص منه، بالله عليك ديريلي حل، حاسه الحوش يخنق فيا بنمووووت"

ريحانه سكرت الباب بسرعه وهيا خايفه صوت ندى يلع برا الغرفه: "اشششش اهدي اهدي، خيرك شن يلي صار شن في؟ "مفيش شي صاير بس خلاص انا معش قادره وربي خلاص معش عندي حيل، الكل بيلوم عليا لو سمعني بس مش بيدي" "انا نحببببببه امين نحبببببه" ريحانه حضنتها: "اسكككككتي اسكتتتي خير من يسمعك حد، مجنونه انتي تحكي هكي في حوشك؟ تخيلي نذير يسمعك؟ "يعامل فيا معاملة الكلام يا ريحانه، خلاص انا نبي نطلق لو مهما صار خلاص"

"اهدي اهدي تو نلقو حل، غير ردي بالك تنهاري بس قدام اي حد" طقتين ع الباب وخشت هديل قبل حتى ما يقولولها تفضل: "ندى خيرك؟ شن في صوت عياطك واصل لي الصاله؟ ريحانه قلبت عيونها: "مفي شي متأثره بي الحادت يلي صاير" "الف سلامه عليك حبيبتي، البسي حاجه وتعالي برا نصر وامي وعكتي جايين يسألو عليكم" "مسحت دموعها… ان شاء الله" "خلاص قتلك بتجي، شن مزال تبي؟

"والله انتي مكلمتكش علاش حاشره روحك بينا، وهادا حوش خوي انتي يلي شن مخششك غرفة نومهم" ريحانه بي قرف: "حوش خوي، ها الفيلا الملكيه يلي تقولي عليها حوش، بالله اقلبي وجهك جو الحماوات المزيتات يلي اديري فيه، حوش خوي قالت، بري قعمزي جنب خوك خلي يبعتلك رابط 2023 لانك قاعده عالقه في سنه 2010" هديل قبل ما تلحق ترد عليها سمعت امها تنادي: "معندي ما نقول الا ينااااري بس على طيحة خوي السوداء، علاش ربي باعته ليك"

"عشان نسود عيشتكم حبيبتي، اشبح شن درتو في الدنيا حاجه عافنه باش ربي رزقكم بيا، كنه" "قليلة ادب مرض، وطلعت" ريحانه شكالات سحيقه: "ونوضي انتي التانيه امسحي دموعك واطلعي سلمي، مفهمتش انا الجوازات يلي صايره كلها، العرسان مش طايقين بعض ولا في بينهم درة حب، شن هادا" ندى وهيا تلبس في ملابس الصلاة: "الله يسامح يلي كان السبب" "ع من تقصدي؟ "اهلي، خطبني منهم كدا مره بس موافقوش" ريحانه تكلمت وواضح من عيونها

ان في فكره لمعت في راسها: "لو يحبك وقاعد متمسك بيك رح نعرفو ولا يهمك" "شن قصدك؟ "بعدين تعرفيه قصدي، اطلعي توا" *** شيخه تلبس في ولدها: "اشششش اسكت ياماما خلاص هي كملنا، نمشو لي عميما ندو وليدي باهي؟ اشششش خلاص هي" قامت عيونها وشافت نجم الدين واقف قدامها. "شنو فيه؟ نجم الدين ساكت. "تبي حاجه؟ "لا لا شي" رقدت ولدها وعطاته الشيشه: "انا خاشه بنوتي روحي، تبي شي؟ "لالا ابدا" "تمام" خشت لي غرفتها اطلع في

حوايجها وهيا داخلها تقول: "بسم الله، هادا خيره! لبست بدلة سروال لونها ازرق كحلي، سروالها واسع والسوريه طويله شوي. لبست بندانه بيضا وولا شي في وجها غير مرطب وفمو. حطت الوشاح ع راسها تساوي فيه قدام المرايا. فجاه شافت انعكاس نجم الدين في المرايا وهوا واقف يشوفلها. "بجديات خيرك؟ شن في مدايره شي غلط انا؟ "عاقد حواجبه، بتمشي وانتي لابسه هكي؟ "اللبسه مستوره ونطلع فيها من قبل" "به" استمرت ترتب ف نفسها وهيا تحكي:

"خلي نمرو على اقرب محل ورد ناخدو باقه وشوية حلويات لي ندى" نجم الدين قرب منها. "تلفتت، خلاص نجم بالله عليك احكي شن في، معصب مني؟ بتضربني؟ شن فيييي؟ طلع من جيبه علبه حمراء صغيره وفتحها: "خديتلك هادا ان شاء الله يعجبك" مسكت العلبه على وجها علامات ذهول وهيا تتفرج على خاتم الذهب: "هادا ليا انا؟ "اي، عجبك! لو معجبكش غيريه او" ابتسمت وهيا تشوف للخاتم بي صدمه: "شن تحكككي انت يجننننن يجنن، محلاه" لبساته وهيا تشوف لي يدها:

"شوف محلاه" "قنين عليك بصحه" ابتسمت: "صحيييييت بجديات، بس شنو المناسبه؟ مش عيد ميلادي ولا شين" "مفيش مناسبه انتي تستاهلي" قلبها تحرك من كلامه وحست ان نجم الدين مداير جهد عشان يتغير والمره هادي محبتش تكسره زي مرتين فاتو، وقررت تجبر بخاطره ها المره وتشوف شنو يصير! "صحيت حبيبي ربي ما يحرمني منك" هالكلمتين هادم خلت نجم الدين في عالم تاني من السعاده. حط يديها على خدودها بحنان وقرب وجها لي وجها.

غمض عيونه وشيخه كانو دقات قلبها صوتهم واصل لاخر الدنيا وكانت اول مره تحس بشعور حلو اتجاه راجلها من سنيييييين. قاطع اللحضه الرومانسيه هادي صوت بكاء ولدهم. "باعدت عليه بفزع، متينان شاء الله ملبزش حوايجه بس، ومشت تجري" اما نجم الدين حط يده ع قلبه وهوا مبتسم، بس اول ما لف وجها للمرايا وشاف نفسه نزل يده وقرن حواجبه. حس ان غلط الراجل يتصرف هكي زي المراهق، حتى لو كان مع مرته. ***

نغم طلعت من الحمام وهيا مستنده على الحيط ومش قادره تمشي. كانت فيه شوية قطرات دم ع الارض والوجع يلي في بطنها كان قوي لدرجة مخليها تبكي. مسكت التالفون واتصلت بي طه اكتر من مره بس للاسف مكانش فيه رد! مره واثنين و 3 و 4، مفيش رد وهيا حاسه بي الموت تقطع فيها. اخر شي استسلمت وكلمت اقرب حد من اهلها يجي يسعفها وهيا مش فاهمه يلي صاير ولا عارفه شن في. كريمه حضنت نجمه وهيا تبكي:

"علااااااش علاش مقلتيش ان امك توفت، علاش حرام عليك طول ها الايام عندي امل تطلع" "كيف عندك علم بيها ومحكيتيليش" "شن يهمك؟؟؟ انتي لو كنتي صاحبت ماما ودايره حساب للعشره راهو ماسكه ولادك الّزوز يلي كل واحد فيهم مأذيني اكتر من التاني" كريمه تمسح في دموعها: "حقك عليا يا بنتي حقك عليا، وعندك حق انا مرضيتش نتكلم كنت نراجي في امك هيا يلي تخبرك ولا تطلع ونعيشو مع بعض" "نعم؟؟؟ كيف مفهمتش، شنو بتخبرني ماما؟

يزن ساكت وباين عليه كان معصب. كريمه مسحت خشكها وهيا تاخد في نفس: "جدك الله يرحمها ربي مرزقاش مع حناك الا بنيه بس ورزقه الله يبارك، كان يبي ولد يحمل اسمه ويورثه رزقه، تزوج مرا تانيه وخبى السر هادا على حناك لان كان يحبها وميقدرش على زعلها وفراقه، تزوج مرا تانيه وجابتله زوز بنات حتى هيا وربي مرزقاش الولد للاسف" "جدي كان متزوج وحده تانيه؟ "اي" لمعت عيونها بحب: "وعندك زوز خالات زياده، انا وخالتك نبيله يا بنتين"

الصدمه طاحت على قلبها بعنف! "الايام يلي فاتو ولدي يزن شاف ولد خاله نذير جايب مرته ندى لي صاحبتك، شوفي الدنيا قداش صغيره" "يابنتي راهو عندك اهل والله والله انا وخالتك نبيله ما نرضو فيك حاجه ونتمنو تقعدي عند وحده منا اليوم قبل غضوا، لكن امك رفضت وخافت عليك من ولادي وولاده" نجمه شافت لي يزن: "كان عندها حق" "حتى من كثر حبنا ليها كانت متفاهمه هيا ونبيله يسمو صغارهم كلهم بنفس الحرف، نصر ونذير وانتي نجمه" سكتت وهيا تبكي.

ويزن متحملش الكلام يلي نقال ولا تحمل دموع امه وطلع بسرعه من جنبها. نجمه سخفت على كريمه رغم الالم يلي كانت حاسه بيه. قعمزت جنبها وحضنتها وهيا تهدي فيها. بعد دقايق من البكي وكلمات الموساة.

"اسمعيني، امك اشرف من الشرف وخليك رافعه راسك بيها لين تموتي، جدك كان عادل بينا وكل واحد كتبله من الرزق ما يسد صغاره وصغار صغاره، لكن بوك وخوته للاسف احقر ما خلق ربي، اما ضغطو على امك يبو ياخدو منها فلوسها وجربو كللل الطرق لكن امك كانت ذكيه وقويه محدش يقدر يفوته عليه، لين دارو خطتهم الحقيره هادي وشوهو سمعتها بين الناس وحبسوها، قعد بوك يساوم في امك هيا في الحبس، يا تتنازلي على كل شي ونطلع ونغير اقوالي ونطلعك من الحبس، يا اما تقعدي عمرك كله محبوسه وماتتمتعيش بي رزقك!

نجمه ساكته وهيا تسمع وقلبها كان حاس من البدايه ان القضيه قضية رزق وفلوس مش شرف! "ولو مشيتي مستحيل يخلوك يابنتي، لان عارفين كويس ان امك كتبتلك كل الاملاك متاعها بي اسمك" "املاك؟! يعني في شي غير ها الشقه" "فيه هلبا يابنتي وكل الاوراق عندي محافضتلك عليها، خافي ع نفسك متمشيش رح يساوموك بحريتك زي ما دارو في امك" حطت راسها بين يديها وهيا تحاول تستوعب يلي صاير وتفهم شوي شوي. *** في السياره.

"خليت البنات من امس في حوش بوي منبيش نرفعهم يقلبو الدنيا قدام الناس" "ارتحتي والله، وين انور؟ "انور تعبان في الخدمه تعرفي مسكين الشغل واخد كل وقته" نجم الدين شافلها في المرايا: "اي شغل؟ "بدي يخدم في محل صاحبك قالي مصاريف البنات زادو وعندي وقت خلي نستغله" "غريبه مقاليش" "مليشي اسبوع ره بالك مصارتش فرصه بس" "درس خود حاجه نخشو بيها عيب فاضيين" نجم الدين درس يمينه خدي نضراته ونزل.

"مسكت تالفون نجم الدين دارت في دوره محصلت شياخر حاجه ضربها الفضول وخشت لي بحث القوقل ولقت كل البحث عباره على تعليم حركات رومنسيه بين الازواج، كيف تقع زوجتي في حبي، ما هوا الشي يلي يعجب الزوجه؟ ماهو الشي الدذي يفعله الزوج يسعد زوجته" ضحكتتتتتتت شيخه ورجعت التالفون في مكانه. نغم خاشه لي قسم الطواري وهيا راقده علي الباريلا ومدخلينها بسرعه لان كانت حالتها مستعجله. رغم تعبها وعيونها يلي كانت شبه مسكره بس لمحت طه!

مكانش جنبها ولا مساندها ولا هوا يلي اسعفها اصلا! بس شن جاب طه ع المشفى! ملحقتش حتى تسأل السؤال هادا لي نفسها لانها خشت في حالة اغماء تاااام. *** الصاله كانت معبيه نبيله وبنتها هديل وكفاح وشيخه وريحانه. والمربوعه كان فيها فتحي ونجم الدين ونصر ونذير وبوهم عصمان ومعاهم شخص من الجيران. "قدمت العصير للكل وقعمزت" "كملت هدرزتها، والله صغاري كلهم هكي درتلهم وبدات هديل بنتي كانت عياطه هلبا وهسا صغيره" "حتى وهيا كبيره الحقه"

سكتت وهيا كاتمه غضبها قدام الناس. "انا بنتي الكبيره محسيتش بيها الحق لكن الصغيره يا لطيف نار حمراء" "انا حمودي ياحليلي زي النسمه متحسيش بوجوده بكل" "من حمودي؟ "ولدي" شيخه وكفاح جاهم ايرور، ومفهموش كيف ولدها؟ "اءءء كي كيف ولدك؟! ندى قاطعت الموضوع باش ميصيرش احراج: "نفكر نروح معاكم يومين نريح فيهم، من يوم تزوجت وانا حاسه نفسي تعبانه بسبب وبدون سبب"

"بسم الله عليك يا بنتي عين وصابتكم والله حتى الحادث هادا عين وما صلت على النبي الله يبارك عليكم الزوز" "اي والله طالعين مع بعض تهبلو، اما الناس التانيين مفيش حد معبرهم لا بي عين لا خش" "نوضي سلم بنتي حطي العشاء ع النار نوضي وياسر من المناشبه انتي ومرت خوكك" كفاح وشيخه ميتين ضحك. *** رباب فتحت عيونها بتعب. طه كان جنبها ماسك يدها وعيونه متورمات، اول ما حس انها فاقت فز من مكانه. "شن صار"

"اشششش ارتاحي يا قلبي ارتاحي، حادث صغير ومشير" "طه تعبت، نبي نروح نبي اهلي خلاص معش قادره" باسها ع راسها: "اهدي شوير" "معش نقدر كلم حد منهم يجين" يمسح على شعرها بهدوء: "مستحيل نخليهم ياخدوك مني، انتي ليا بس انا مستعد نصرف عليك لاخر عمري ناخدلك يلي تبيه ونديربالي عليك" "منبيش شي منك، خليني في حالي بس نوض امشي" "اشششش اهدي اهدي، انتي تعبانه بس" غمضت عيونها بي استسلام ومعش زادت كلمه معاه. ***

نغم فتحت عيونها وحاسه بدوخه رهيبه. قعدت فتره تحاول تتماسك لين اخيرا استقر وضعها. اول شخص شفاته هيا امها. "الله يعوض عليك يا بنتي، الباين انك مكنتيش تعرف" تكلمت بصوت تاعب: "منعرفش بي شنو؟ "كنتي حامل يابنتي في 3 اسابيع وربي خداه، خليفتك عل اله وربي يعوضك خير" نغم مكانتش عارفه شنو تحس؟ هل تحس بي الحزن على اول فرحه مفروض تعيشها! ولا تحس بي الفرح لان زواجها قاعد مش مستقر؟

واحتمال لو جي البيبي ع الدنيا رح يعاني من علاقة امه وبوه المتوتره. ردت فعلها كانت هاديه وقالت بصوت واطي: "الحمد الله" قاطع حديثهم صوت بوها وهوا يقول: "الحمد الله ع السلامه بنتي" جاوباته بتعب: "الله يسلمك بابا" "وين راجلك؟ من بكري نتصلو بيه ميردش؟ اذكرت انها لمحاته وهيا خاشه للمشفى: "مش عارف يابابا، منديش علم وين طالع" "شوي ويكتبولك خروج، روحي معانا وبعدين ساهل" "ان شاء الله" شاف لي مرته:

"نوضي جهزيها خلي نروحو بكري، اهتمي بيها في الحوش، فكينا من المستشفيات وجوهم" " ان شاء الله" كانت حالة نغم مش خطيره هلبا كل يلي داره في المشفى تنضيف رحم لا اكتر وتقدر تروح عادي. ساعدت فضيله نغم ولبستها عبايتها وناضت بتعب قعزت على الكرسي المتحرك. طلعت بيها امها قعدت فتره واقفين قدام الغرفه لين جي بوها. "قرب منهم وهوا ماسك اوراق ووصفة طبيه عطاهم لي امها ومسك الكرسي المتحرك وقعد يدف بي بنته وماشيين.

الجو كان طبيعي، امها وبوها يهدرزو بخصوص الدواء وهيا تتفرج ع الناس. لين مرت جنب رباب!!!!!!! كانت رباب واقفه وراسها ملفوف بي شاش ابيض، والباين كانت تراجي في حد. مرت من قدامها وعيونها معلقات في رباب لي وصلت لي باب المشفى. يعني يلي شافته كان صح! يعني طه كان جنب رباب، وميعلمش بي مرته شن صاير فيها. *** نجمه واقفه في بلاكونتها وهيا سارحه تفكر. كان داخلها الف شعور. قلبها ارتاح لما تأكدت من نضافة امها.

لكن خافت لما سمع بي خبث و وساخت بوها وعمامها! فرحت لما عرفت ان عندها اهل من دمها خلاتها الاثني يلي الباين انهم يحبوها ومهتمين بيها. بس قلبها تقطع لما عرفت ان ادهم يلي ضحك عليها يكون ولد خالتها! مشاعر مختلطه ومش فاهمه منها شي. لبست ملاية الصلاة ومشت لي نفس الشخص يلي تلجأله في كل شي (رباب) سكرت ضي شقتها وفتحت الباب! بس اول ما فتحت بابها قابلها يزن واقف كأنه كان بيطق ومتردد. "نبي نحكي معاك كلمتين" "نسمع فيك"

"تقدري تخلي الباب مفتوح" فهمت من كلامه انه يبي يخش داخل ويحكي. خدت نفس عميق وشافتله: "تمام تفضل" خش لي شقتها ولحقاته هيا وسكرت الباب وراها. قعمز وفي عيونه واضح انه مش قادر يشوفلها من الشي يلي داره فيه. "لوحت المفتاح ع الطاوله، زيارتك هادي بتكون نفس اول زياره قبل؟ اول زياره جيت تحدر فيا متبينيش نقرب امك! وتوا جاي لي نفس السبب؟ "لان" "امالا لي شنو؟

"جاي بنعتذر منك بسبب كل الكلام والمضايقات يلي كنت مسببهولك، كلامي واسلوبي وجرحي المتعمد ليك، مكنتش عرف ان الدنيا رح ادور وتكوني بنت خالتك" "ولو مطلعتش بنت خالتك؟ وقتها عادي تهيني وتجرحني؟ "مكنتش فاهم قصتك بزبط ولا شن صاير معاك" "اي صح، لانك ببساطه هكي انتم تحكمو ع الناس بدون اي دليل وعندكم عادي جدا تضلمو اي حد" يزن سكت. "في شي تاني يزن؟ "اي" "شنو؟

"انتي توا من العيله ورح يجيك الوقت وتعرفي قداش عيلتنا كبيره ومحافضه، وبنسبه لينا غلط انك تقعدي بروحك هنايا" "نعم؟ شنو يعني؟ "يعني اختاري تقعدي مع امي او مع خالتي نبيله، اما بروحك لان" "قعاد مع امك مستحيل خصوصا ان عندها ولد زي ادهم للاسف نست انها تربيه، وخالتك نبيله قاعدها منعرفهاش اصلا، بعدين انت شن تحكي هادا حوووشي"

"مش صعب، مش صعب انه تتعرفي ع خالتي نبيله، لكن الصعب انك تقعدي بروحك هنايا وفي اي لحضه يطب عليك بوك او حد من عمامك، رح يجيهم يوم ويوصلو لي طرف خيط لعند امتى بتقعدي مختفيه وانتي في نفس البلاد مطلعتيش" وقف وقبل ما يمشي قال: "فكري كويس واختاري مصلحتك ومتكونيش عنايديه، العناد مش رح يفيدك في شي" وطلع. نجمه دقايق وطلعت حتى هيا لي شقة رباب بس من اول ما خشت حست ان في حد في الشقه بدون رباب. *** نجم الدين:

"الف سلامه عليكم ياربي وزي ماقتلك الساحبه تو نجيبها لي ورشة معز صاحبي ومدور شين" "منو والله متقصرش لكن متعبش روحك الحديد يتعوض مش مشكله" "الف سلامه عليك ياولدي وربي يحميك ويرعاك معش تجري وانت طالع لي بوك ايام الشبابع" "ضحك، الباين ناسي روحك ايام البل يا فتحي" "هههههه خلي الحال مستور قدام الاولاد يهديك الله" "ضحك، ضضحيت ياعمي جيتكم كبيره"

"كيف عاد حني اهل، توا طالب منك بنتي ندى تروح معانا تقعد عندي يومين تغير جوها مع نساوين خوها وتعالا خودها" كان مش راضي ابداااا على الشي هادا ولا يبي يخليها تمشي، بس تحشم قدام بوها وكل كلام الرفض راح من فمه وقال: "ان شاء الله ياعمي" "هي خش ناديها بالله" طلع من الربوعه وهوا بيتفجر، استأذن من يلي كانو في الصاله وخش لي غرفة نومه وهوا ينادي ع ندى. "انتي قلتي لي بوك بتروحي معاه؟ "انا قلت وانا نبي نمشي"

"تعرففي كووووويس الشي هادا منبيشي انا مش راضي اصلا انك تطلعي من الغرفه هادي تبيني نخليك تباتي برا الحوش؟ "نذير الله يخليك انا تعبانه، خلينا نبعدو على بعض شوي عشان لما نروح تكون انت متريح وانا نفسيتي كويسه ونعرفو نتفاهمو مع بعض" "شنو يضمنلي انك ما تكلميشي من تالفون اي حد او تهربي معاه" "نذيراحترم نفسك شن تقول! رجع شعره للخلف بتوتر وارتباك. قام صبعه بتهديد:

"الصبححححح الصبح بنجي ناخدك، لا تعبي على يومين ولا 3 سامعتيني ولا! "اوك تمام" كان الارتباك المبالغ فيه واضح عليه بشكل مش طبيعي! "ممكن تطلع بنجهز نفسي ونغير حوايجين" "شنو يلي بتلبسيه! مترفعيش بجامات، قفاطين حوش بس ومكياج لا عطور لا" "نذير انت شايف وجهي؟ مكياج شنو تحكي عليه وكدمات الحادث ماليه وجهي" "كان تنفسه سريع يدل على توتره، تمام تمام" وطلع من الغرفه. *** نصر يجهز في رضاعة ولده: "شنو يعني قاعده معاه بي السيف؟

تغير في شمال البيبي: "الباين هك" "شن بتلوح فيه خوي بالله زين ورضي الولدين وعقله كبير ويتصرف مليح" "اي بالله، لو عرفته قبلك راهو توا واخداته هو" "شمي فمك خير ما نجي نكسرلك راس" "ادوي باهي خير ما الرضاعه يلي ادير فيها نحشيهالك في خشمك" "احترمي نفسككككك واعرفي شن تدوي راهو وربي نمد يد" "هادا منااااااقص، يلي مداراش بابا بتجي اديره انت عثاب جربوع" "انا جربوع يلي مش خاطمه عليك الربايه؟ "انا م"

قاطعهم صوت بكاء البيبي والاثنين تغيرو من وحوش لي اطفال. "ياعمري خلاص اششش اهدا اهد" "جاك سوبر بابا بي الرضاعه ياكتكوت" ويحولو من اعداء لي صحاب. *** نجم الدين: "شيخه؟ شيخه؟ نادت عليه من غرفة نومها: "هنايا انا تعال" "شن اديري؟ "بنغير ملابسي، نغم قررو يجيبوها هنايا شويه وتوصل" "متكي ع الباب، مفروض خلوها في حوش بوها ترتاح ع الاقل اليوم" فتحت شعرها تمشط فيه:

"الباين امها خايفه عليها من دوة العيلهمتبيهمش يفهمو انها متعاركه مع راجلها وتبي الناس يزوروها في حوشها" "اممم ندى وين قعدت؟ "لوطه في غرفتها بس بعدين طلعت لي شقت طه ترتب فيها قبل ما يوصلو هيا وكفاح وتوا لازم نلحقهم، دير بالك ع متين لين نجيك" قرب منها ومسك شعرها بهدوء: "ميستنوش شويه؟ ضحكت: "لازم نلحق عليهم بكر" قربها منه: "خليك معاي معاي وبعدين ساهل" ضحكت: "نجم بعد قبل ما ينوض ولدي"

"باهي ولدك الكبير شن وضعه بتمشي وتخليه؟ هههههههههه نجم من وين ليك الحنان وخفة الدم هادي. ماسكهابيده ويسمسح على شعرها: "شن رايك في الوضع الجديد؟ ابتسمت: "لعند امتى بتقعد تجنن هك" "لاخر العمر، ولين تحبيني" تغيرت ملامحها: "من قال اني منحبكش؟ في وحده متحبش راجلها وبو صغارها؟ عقد حواجبه بي استغراب: "لكن الف مره قلتيلي نكرهك! "نكره افعالك وقسوتك، منكرهكش انت" ابتسم وهوا يقول: "ورحمة امي لما نعوضك على كل لحضه يا شيخه"

كان قلبها يرف بي احساس اول مره تعيشه مع راجلها. *** كفاح: "رتبي غرفة النوم مابين كملت الحمامات" "نتحشم نحس في غرفة النوم شي خاصك" "مصحك حبيبتي انتي اختتته واكيد نغم بتجي ترتاح في غرفته" "اوكي" خشت ندى للغرفه وكفاح كملت شغلها في باقي الحوش. بدت ندى تقيم في الملابس يلي تحتاج الغسل وترتب في الحاجات لي على الزيانه وفتحت الروشن الغرفه عشان تتهوى. ولما فتحت باب الدولاب طاحت شنطة سفر وانفتحت من أثر الطيحه.

جت بتقيمها بس لمحت فيها بدلة لونها ازرق كحلي ويلمع منها اللون الذهبي. "شنو كملتي؟ "ككك ك كفاح هادي بدلة منو؟ ابتسمت: "هادي بدلة خوك طه ياحليلي متع العرس شكله قاعد محتفض بيه" جتها لحضة ادراك. وادكرت الكلام يلي سمعاته من الناس يلي خطفوها. ✨✨✨✨✨✨✨✨ طارق يولع في دخانه: "علاش شنو المناسبه؟ "والله علمي علمك مش عارف، لكن تعرف لونها ازرق كحلي وفيها بطم دهبيات اطلع طووول" ضحك: "تسلفها منه"

"هادا مناقص نطلع فيها زي الفلوس مش شايفه انت طول وعرض" ✨✨✨✨✨✨✨ ندى رجعت من ذكرياته واول كلمه نطقته: "معقوله طه!