رواية ملائكة بالف وجه الفصل الثالث عشر 13 - بقلم اروي طاهر

الهدوء كان يعم الشقة وصوت أنين خفيف جاي من غرفة النوم. الأضواء في الصالة كانت خافتة ودرجة الحرارة في الشقة كانت منخفضة والبرد مالي الدنيا. نجمة: خشت بهدوء لي الشقة وتوسعت عيونها بصدمة. نجمة: انت منو؟ طه: انتي يلي منو؟ شنو اديري في حوشي؟ نجمة: توترت. اها اءءا … انت انت طه؟ طه: عقد حواجبه بي استغراب. من وين تعرفيني؟ نجمة: سامعه بيك من رباب. جتها لحضة ادراك وتفكرت. دقيقة وين رباب؟

طه: رباب تعبانة شوي. ياريت تطلعي وعيب تخشي لوسط الحوش بدون استئذان. نجمة: ضحكت بتوتر. لا انت مش فاهم طبيعة علاقتي برباب. احني نباتو عند بعض و… طه: تمام فاهم عليك بس انا توا هنايا. ياريت تحترمي خصوصيتي. نجمة: تحشمت وانحرجت. اوكي تمام بس لازم نشوفها. طه: ياريت تطلعي من الشقة. تقدري ترجعي بكرا وتزوريه. نجمة: تسمع في صوت أنين رباب وخافت عليها. خشت لي غرفة النوم بدون ما تهتم لي طه وكلامه.

طه: علا صوته عليها. اطلللللعي قتلك. نجمة: رباب… رباب خيرك شن صارلك؟ رباب: كانت شبه غايبة على الوعي كأنها مخدرة. نجمة: شن داير فيها خيرها تكلمممممم. طه: طاحت الصبح وكيف روحت من المشفى تعبانة قاعدة. ياريت تطلعي وتخليها ترتاح. قاعد ندوي معاك بهدوء. نجمة: بعدين انت شن جيبك هنايا اصلا؟ برا لي مرتك رباب شن مزال تبي فيها اصلا؟ قعدتك معاها حرام مفيش بينكم شي.

طه: لا الباين انك بتعبيني انتي. خش بي غل مسكها من يدها وطلع بسرعة وسكر الباب على رباب. نجمة: بعد يددددددك من عليا. طه: جرجرها من الشقة لعند الباب وطلعها. وجهك في حوشي منبيش نشوفه. الأيام هيام. متحاوليش تجيني احسن ما اقسم بالله نتعبك. نجمة: حوشي حوشي حوشي. الدسكة يلي تعاود فيها هادي بعد من عليا. تو نجيبها تعيش معاي وحوشك هادا قعمز فيه مشبط ملبط عليك.

طه: قام صبعه بتحذير. وحق من علا السماء على الارض لو نشوفك مزال هنايا نقصلك رجليك. وعطيتك تحذير اهو تكلمت. رجع لي الشقة وسكر الباب مخلي نجمة واقفة بصدمة. *** تاني يوم الساعة 10 الصبح: داخل المطبخ كانت ريحة البيض بي الخضراء معبية المكان. صوت الشاهي وهوا يغلي والميكرويف يلي عطي اشارة ان مهمته كملت. خش نجم الدين للمطبخ يلبس في ساعته ويرتب في قميصه. شيخة: حاسه نفسي مرقدتش كويس امس. شيخة: نعسة تعرف خلااااص.

نجم الدين: حط يديه على جنابه وهوا يتمايل معاها. خيرها مرتي الحلوة؟ شيخة: ابتسمت وهيا مقربة راسها وسانداته على راسه. مخاطريش نطلع اليوم نبي نرقد بس. نجم الدين: علاش انتي وين بتطلعي اليوم؟ شيخة: مرت خوك طه ضروري نمشولها اليوم ولا نسيت. نجم الدين: صح برسمي راح على بالي بكل الموضوع. تو نكمل مشاوري ونروح لي طه طول. شيخة: شنو هادا المشوار يلي تمشيله كل يوم في نفس الساعة؟

نجم الدين: خدمة جديدة مكلفني بيها بوي وتعرفيني منحبش نعطل. شيخة: ابتسمت بدلع. امممم…. به كويس غير كان خدمة عاد. نجم الدين: علاش شن في بيكون غير الخدمة؟ شيخة: وين نعلم ان. نجم الدين: ابتسم بخبث. تعرفي ان ليلة امس من احلى اليالي يلي فاتت عليا! شيخة: ضحكت. به قعمز يا عنتر زمانك خليني نحطلك الفطور لان ولدك بسلامته شوية وينوض ينفخلي راسين. نجم الدين: زاد قرب. خلي بوه ياخد دوره شويه في نفخ الراس.

شيخة: هههههههه نجم الدييييين وقت عليك راهو انا مش خاسره شي. نجم الدين: بعد عليها وهوا يرتب في ملابسه. تو نروحلك بعدين ساهل. شيخة: ضحكت. قعمز سلم حبيبي باش تلحق تاكل فيمن. نجم الدين: قعمز وبدي يفطر. شيخة: حبيبين. نجم الدين: وهوا ياكل. هممم شن. شيخة: قتلك بما ان ندى قاعدة ها اليوم في حوش اهلك شن رايك نبات اليوم غادي. الباين انها مضغوطة شويه وجوها مش تمام. قالت كفاح ان نقعدو نغيرو جوها شوي وهكا.

نجم الدين: لا طبعا. وخدي رشفه من القهوة. شيخة: بملامح تذمر. علاااااشش🥹. نجم الدين: خدي زيتونه. اليوم رح يجي يروح بيها راجلها. شيخة: مستحيل قاعده مطقتش حتى يومينه. هوا قالك بيجيي يروح بيها؟ نجم الدين: حط الخبزه ع الطاولة وهوا يمسح في يديه. مقالش لكن شفته كيف تفركس لما قاله بوي نبيها تروح معانا. مستحيل يخليها حتى اليوم تبات برا. شيخة: امممم… ع اساس رجاله وتفهمو في بعض وهكي 😒. نجم الدين: بأسلوب عناد. اي طبعاً.

شيخة: وكان مروحش بيها نبات؟ نجم الدين: وقف وهوا يجهز في روحه لي الطلوع. تو نشوفو بعدين. شيخة: ابتسمت. به. نجم الدين: باسها ع راسها وطلع وهوا يسأل فيها من بعيد. تبي حاجه وانا مروح؟ شيخة: جاوباته بصوت عالي. سلامتك دير بالك ع روحك ❤️. نجم الدين: طلع وسكر الباب وراه بهدوء. شيخة: تنهدت وقالت بينها وبين نفسها. سبحان من غير حالنا. ***

ريحانه: كانت حاطة تالفونها على الزيانة ومقعمزة على الكرسي وهيا ماسكة مبرد الاضافر. الباين انها رايقة وصوت ضحكها واصل لأخر الشقة. تهدرز بحماس وجوها كان جدا حلو. قاطع صوت الضحك هادا خشت نصر عليها للغرفة. نصر: شنو اديري؟ ريحانه: افففف نكلم في صاحباتي فيديو زيد غادي متطلع. نصر: ما شاء الله من كثر حجابهم ولا حشمتهم عشان خايفين نشوفهم. قبل ما ترد عليه ريحانه يطلع صوت رجولي من مكالمة الفيديو وهوا يقول.

صوت رجولي: انتي خيرك تكلمتي ع البنات بس. انا ورؤف ولاد ره ولا نعطوك الدليل. وطلع صوت بنات وولاد يضحكو مع بعض. نصر: عصصصصصصب وعيط عليها بطريقة هستيرية. سسسسسسسسسسسسسسسسسسسسسسسسسسسسسسسسسسسسسسسسسسسسسكككككري سكككككري العفن. ريحانه: سكرت الخط. خيررررررك انت خيرك؟ نصر: فاتحة تكلمي في ذكورة فيديو قدامي؟ بهيمة انتي؟ شنو تحسابي روحك متزوجة عيييييل ولا شنو؟

ريحانه: والله هادم صحابي في المدرسة وديمة متعودين نحكو في قروب المدرسة. مش شي جديد عليك ومن قبل تعرف. نصر: هداكا قبل يافالحة ايام كنتي عيلة نتسلى بيك لا اكتر. توا انتي ع ذمتي وقدام الناس اسمك مرت. ريحانه: وانت ان شاء الله عايش الدور يافالح؟ بابا شراك بي فلوسه باش يداري ع العملة السودة يلي درتها. مديرش روحك سي السيد علي. نصر: بدون ما يرد عليها خدي التالفون ولوحه على الحيط. طاح تفترش قدامه.

ريحانه: شافتله بصدمة. شنو درت انت؟ نصر: يعطيني ربي نشوفك مدايره شي ميعجبنيش وربي ماني راحمك. ريحانه: ديرها الفلاحة هادي ع اختك البايرة مش علي. توا بطلعلي روحك تغار وراجل يلي مفيش فيه ذرة… قاطع كلامها صوت خبطة الباب بعد ما طلع. ريحانه: قعدت وهيا معصبه وخلاص بتبكي من القهر. حقير الله ياخدك. طاحت عينها على ولدها يلي كان راقد زي الملاك.

نست كل غضبها وابتسمت. كأن احساس الأمومة وصلها وكل الحاجات يلي كانت تسمع فيها على الأمومة وتعتبرها تخريف طلعت كلها مزبوطة. وعاشت شعورها الحلو بكل تفاصيله وزيادة ادمنت الااحساس الحلو هادا مع ولدها ومعش قادرة تباعد عليه. *** نجمة: فزت من على الصلاية لما سمعت الباب يطق. ناضت وقامت الصلاية من على الارض ومشت بسرعة اتجاه الباب. فتحت الباب بلهفة وهيا متوقعة اي شي من جيهة رباب. فتحت الباب ونصدمت. نجمة: انت شنو ادير هنايا؟

أدهم: لازم نحكي. نجمة: في شنو بتحكي انت خيرك؟ مفيش بينا كلام ومعش تجي في طريقي. جت بتسكر الباب بس ادهم حط رجله ع الباب. ودفعها وخشن. نجمة: فقدت اعصابها. بعد علياااااااااااااا طللللللللععععع. أدهم: اهدي اهدي نجمة اسمعيني شن بنقولك. نجمة: انهارت تبكي وترجف مع بعضها. وتعايط عليه طالبة انه يطلع من قدامها. أدهم: قرب منها سكرلها فمها بيده. اسمعيني هما كلمتين ونوعدك نطلع. نجمة: تبكي ورجفة يديها كانت شي تاني.

يزن: شنو ادير هنايا؟ أدهم: بعد بسرعة من على نجمة ووقف. يزن: ندوي معاك شنو ادير هنايا؟ أدهم: جيت بنحكي معاها بخصوص الموضوع يلي سمعته من امي. يزن: يشوف لي نجمة بي استغراب ولي خوه. كنت مسكرلها فمها موضوع شنو تحكي فيه؟ أدهم: توتر ومعرفش يرد. نجمة: مسكت دموعها وقالت بهدوء. اطلع انت وياه. منبيش نشوف حد فيكم عندي ومعش يجيني حد واعتبرو يلي سمعتوه من امكم كله كدب. يزن: يشوف لي خوه. شنو في؟ أدهم: مفي شي شن بيكون يعني؟

انت فهمت غلط. نجمة: اطلعووو. طلعو الاثنين من الشقة وقعدت نجمة بروحها وشعورها كان مكسور بطريقة رهيبة. اولا بسبب الامل يلي اختفى تماما من بوها وعمامها. وثانيا معندهاش مكان تمشيله حالياً بسبب رباب يلي كان مصيرها مجهول والله اعلم شنو بيصير فيها. وادهم يلي كسرها بأبشع طريقة ممكن تنكسر بيها بنت! حرفياً كان مستقبها معدوم ولا فاهمة شنو بدير وشنو يستنى فيها. ***

دوخة وصداع وألم مش قادرة تحدد مكانه وين. الاستيعاب بطيء والعقل مش قادر يتفكر ولا يحدد الأشخاص يلي كان معاهم ولا الأماكن يلي كان فيهم. شوي شوي بدي العقل يرجع في الذكريات وبدت العيون توضح في الرؤية.

رباب: نزلت من السرير بي تعب وشافت لي نفسها في المرايا. ويلي شافته كان رح يموتها بي الحسرة. شافت نفسها لابسة تيشرت طه وكان طويل عليها شوي رغم ان متذكرش انها لبساته. وشافت علامات في رقبتها توحي انه تم الاعتداء عليها وهيا مخدرة من اثر ضربت الراس. شافت لي نفسها الف مرة ع المرايا على امل ان يلي في بالها غلط. بس العلامات يلي كانت موجودة على رقبتها وفوق صدرها والوجع يلي كانت حاسه بيه تأكد الشي هادا.

لحضة انهيار جتها. كيف قدر طه يدير فيها هكي! كيف قدر يدير شي زي هادا وهيا فاقدة الوعي من اثر ضربه كان هوا السبب فيها. طاحت ع الارض وبكت بحرقة مش طبيعية لما اخر شي غالي كان عندها خلاص للأسف فقداته. في موقف رباب بدات خير مثال على البنت يلي تبعد على اهلها وتقعد عند الغريب شن يصير فيها. *** نغم: ابتسمت بمجامله. الحمد الله كويس بخيرك. كفاح: الحمد الله ربي يزيدك من الشفي يارب. نغم: الله يسلمك.

نادية: شنو قالك راجلك اليوم لما روح؟ نغم: شافت لي امها بنظرة معبية خذلان وتجاهلت السؤال كأنها متبيش تجاوب عمداً. شيخة: مدت سفرة القهوة. تفضلين. نادية: يبارك فيك. كيف حالك ندى اليوم شنو امورك بعد الحادث؟ ندى: الحمد الله مصارلي شي اخطا شويه جروح جت سليمة. نادية: الحمد الله وجوزك حاله باهي؟ ندى: من جوزي؟ شيخة وكفاح شافو لي ندى بصدمة. ندى: ااه اي صح متواخدينيش ننسى اني متزوجة.

صابتهم ضحكة جماعية كلهم مع بعض على ندى. قاطع ضحكهم العالي صوت طه. طه: راجلك برا يبيك. ندى: انا؟!!!! طه: امالا انا؟ نوضي تحركي. ندى: ناضت لبست وشاحها وطلعت. اما شيخة اذكرت كلام راجلها ابتسمت وهيا تقول في داخلها. طلع كلام صح غزالي. *** ندى: اهلين؟ نذير: شافلها من فوق لا لوطة. انا بعتك لي حوش اهلك مش حوش خوك؟ ندى: عقدت حواجبها بي استغراب. حوش اهلي هادا. واشرت على حوش العيلة يلي كان على بعد خطوات بسيطة.

نذير: يهز في رجله بتوتر. خلاص خليتك تباتي برا امس ساد. ووتي روحك بعدين تعشي وتو نمر ناخدك. ندى: اتفقعنا يومين ع الاقل كيف جاي تروح بيا توا؟ نذير: اسمع. سنس فكيني من الكلام الزايد تعشي وبنمر عليك ناخدك. ندى: ردت عليه بتوتر. ولو مروحتش معاك؟ نذير: شافلها بي استغراب. ندى: جاوب ليش سكتت. نذير: تمالك نفسه. معناها بتكوني قبلتي على روحك الفضايح. ندى: قابله. بس منبيش نروح معاك.

نذير: شافلها بصدمة وحس ان لو زادت قعدت دقيقة خلاص معش يحصله. ندى: نحكي معاك. نذير: ندى. ندى: كأنها تراجي في كلمة منه ورح ينطقها. نعم؟ نذير: خشي جيبي بضاعتك واطلعي حتى عشاء مفيش. ندى: شنو؟ نذير: عيط عليها. خشششششي قلت. ندى: بلعت ريقها. خلاص تمام. خليني بس لبعد العشاء الله يخليك. نذير: طيبت انا اليوم وزحمة داخلك. كملت كلامها بتوتر وترجي فجأة. بالله عليك اقعد حتى تعشى راجيني عاد.

نذير: بعد ما شاف نضرات الخوف في عيونها ضمن مرواحتها معاه. ندى: نحكمعاه. ندى: تمام حاولي تستعجلين. ندى: هزت راسها بمعنى تمام ورجعت خشت. وقف نذير لحظات قدام الحوش سارحلين ناداه صوت من وراه. نور: نذييير نذيييير خش ياراجل خيرك واقف برا؟ نذير: سلم عليه وخش للمربوعة مع الباقين وخداته الهدرزة. *** بعد اكتر الالف المرات من طقان الباب اخيرا لقت رد وفتحت. رباب: فتحت الباب وكان وجها ميتفسر.

نجمة: حضنتها بسرعة وهيا تبكي. مرقدتش غممممضة يا رباب. متت خوف عليك شن صار احكيلي. رباب: وهيا متماسكة. انا كويسة. نجمة: بعدت عليها وسكرت باب الشقة وخشو الاثنين. رباب: انتي جيتيني امس؟ نجمة: اي جيت وتعرتكت مع طه ولزني. كنت خايفة عليك منه ومعش قدرت نقرب جيهة الشقة ولا حتى قدرت نبلغ عليه لانك هاربة من اهلك صعب رح يلقو القبض عليك انتي قبله. رباب: وهيا تتلمس في راسها بتعب. عادي. مدوري شي فاتت المشكلة.

نجمة: بي استغراب. مشكلة شنو؟ رباب: جاني الحوش وانتي مهناش. تعاركنا وضربني ع راسي اولام. نجمة: بصدمة. الحييييييير. علاش دار هكي؟ شنو الانسان هادا ياربي مستحيل كيف مريض نفسي ره. لو تشوفي امس كيف مهتم بيك خشيت للغرفة مرتبلك كل الادوية وواضح انه مهتم بيك. علاش يدير فيك هكي لو يحبك يارباب؟ رباب: منعرفش. نجمة اسمعيني. نجمة: بي اهتمام. نعم احكي؟ رباب: انا لازم نهرب. منعرفش وين لكن طه لازم نهرب منه بأي طريقة.

نجمة: انا عندي الحل. رباب: عقدت حواجبها بي استغراب. حل شنو؟ نجمة: نعطي او نشريلك شقة بعيد من هنايا هلبا. ونطلعو نعيشو فيها انا وياك. رباب: بتشري؟ شنو يعني رح تبيعي شقتك هادي؟ نجمة: لا طبعاً. رباب طلع عندي هلبا رزززق خلتهولي ماما الله يرحمها وصايرة هلبا قصص متعلميش بيه. بس انتي وافقي وصدقيني رح نعيشو حياة حلوة بعيد عليهم كلهم. رباب: منو كلهم؟ نجمة: طه وكريمة وولادها الاثنين واهلي وكل شي. رباب: كريمة؟

لا شوفي لازم تحكيلي شنو يلي صار بزبط وتفهمني. نجمة: خدت نفس. اول شي. وبدت تحكي. قررت ندى في لحضات تتقاسم حياتها ورزقها ومشكلها مع رباب. وقررت تخاطر وتخبي رباب عنده. تخبيها من اهلها ومن طه يلي تعرف كويس انه خطير هلبا. وقاطع يديه من ربييعني يدير اي شي يخطر ع البال! ياترى بعد كككلللل هادا رح تندم او لا؟ ***

زوز حوارات صارو من اثنين عايشين في نفس الحوش. لكن كل شخص كان يحكي بروحه. لكن كمية الشبه في حواراتهم يلي كانت في نفس اليوم غريبة. صابر: الحياة اقسم بالله متسكره في وجهي ومعاد فهمت كيف الراي. منقدرش نقدم خطوة. بوها بيذلني بي خدمتك وين وحوشك وين وسيارتك وين. واحتمال نقوله معندي شي ونحبها يلزني قبل ما نكمل كلامي.

نصر: ههههههههههه والله فاضي. حتى انتحتى الحرام يشكرو فيه. شوف يلي درته انا مع بنت الاكابر واهو عايش احلى عيشه. حصلت من بوها مبلغ يعيشني لين نموت. وهيا صغيره وحلوه والامور لوز. صابر: حظك يا صحيبي حظظظظ يفلق الصخر عيني عليك بارده. نصر: ابتسم وهوا سارحلكن وربي احلى شي صارلي الفرخ يلي حصلته منه. حسيته عبالي حياتي وكبدت عليه بطريقه غريبه. نراجي فيه غير امتى يبدا يتكلم بس. ويمشي ونطلع انا وياه.

صابر: ياسر الزح ذليتنا بي حياتك الورديه. نصر: هههههه يا محسديني. في الجيها التانية كانت ريحانه فارده جسمها على السرير وجنبها ولدها راقد على ضهره ويلعبوه. هيا تحكي ع التالفون. دنيا: خلاص نفسيتي تعبت ومعش عارفه نطلق ولا نقعدلو. اطلقت نخاف نندم. لو قعدت نخاف معش تجيني فرصة الطلاق. ريحانه: لو في مكانك نطلق ونعيش حياتي بلا جواز ولا قرف. نكلم الف حد ونطلع نهيج معاهم تحسي يابنتي هكي الحرام فيه بنه زايدة استغفر الله.

جاوبتها دنيا بي نبرة استهزاء وضحك وهيا تقول. دنيا: استغفر الله ياكلبه. ريحانه: انا غير يكبر نور عيوني شويه بس بنطلب الطلاق. دنيا: منو نور عيونك؟ ريحانه: ولدي يابهيييييم. دنيا: اهااااا بالله شنو شعور الامومة معاك؟ ريحانه: يجننن يادنيا يجننننن. حاسه انه اغلى شي في حياتي. دنيا: ربي يدوم ياحنه. ريحانه: ان شاء الله. *** ندى: دمعت عيونها وهيا ماسكة التالفون. كيف يعني؟ نكلم فيك رد عليا.

امين: ندى انا مش حقير ومارخيتش بيك. لكني شهادة بالله الا تعبت معش عندي حل نديره اكتر من هكي. طلبتك من اهلك بدل المرة الف. مشيت كلمت راجلك قبل ما يقرا الفاتحة ومهتمش بيكلامي ولا بي حبنا يلي رح يقتله لو كمل في الجواز هادا. حتى بعد الجواز حاولت لكن مفيش اي مستقبل ليا مع بعض. انا عجزت. ندى: يعني خلاص تم كل شي؟ امين: للأسف اي. حاولي تتقبلي حياتك الجديده. ندى. وانا يشهد عليا الله الا نحبك اكتر من روحي ونتمنالك كل خير.

ندى: امين حبيبي انا م… امين: ندى خافي ربك في راجلك بالله عليك وخلي كل شي ليه وربي يهنيك. سكر الخط وسط دموع ندى وامين. الباين ان النصيب احيانا يخرب في كل شي حلو. ومش كل حبيب اول يدافع على حبه معناها مينفعش او اكيد ولد حرام. احيانا المشاعر تكون صادقة بين شخصين. بس كل واحد ليه حياة بروحه. والانسان يلي يحترم الحياة الزوجية لي الشخص يلي يحبه وينسحب. بيكون فعلاً ولد حلال ويخاف ربي. *** الساعة 2 في الليل:

شيخة: طلعت من المطبخ بعد ما كملت تنضيفه. حطت سفرة القهوة على الطاولة وقعدت ع الصالون جنب نجم الدين. خيرك سارح في شنو تفكر؟ نجم الدين: ولا شي حاس نفسي تعبان. شيخة: تنوض ترقد ولا بتسهر؟ نجم الدين: اليوم خميس مفيش داعي لي النوم خليك نكملو السهرية. شيخة: ابتسمت كيف ما تبين. نجم الدين: كان يتصنع في الابتسامة وهوا يسأل. احكيلي شيخة. شيخة: تصب فيى القهوة. ها شنو.

نجم الدين: زمان لما كنتي تقري في المدرسة مكانتش عندك علاقة حب في المراهقة؟ شيخة: شافتله بي استغراب كبيرررر. شنو تحكي انت؟ نجم الدين: حافض على ابتسامته. نهدرزو عادي خيرك. والله مبكري اصحابي خطرو عليا القصص القديمة ضحكت لين عييت. شيخة: ضحكت. اممم ياعيني على صحابك وخلاص. ماكانش عندي. صح كان اكتر من شخص يبعتلي وهكي ايام رسايل الورق😂😂لكن كنت نخاف موووت واصلاً دابي داب قراية. نجم الدين: اهاا.

شيخة: خدت رشفة من القهوة. وسرحت في المسلسل. اما نجم الدين سرح يذكر في كلام دكتورته. مودة: والله شوف انا فرحانه ان في نتيجة حلوة هكي وبدي بينكم علاقة حب وتفاهم سواء في حياتكم الزوجيه او الحميمة او غيره. بس يلي لفت انتباهي شي واحد. نجم الدين: شنو هوا؟ مودة: طلاقة لسان مرتك في الكلام الحلو. زانت مفهمني ان من اول ما تزوجتها مفيش كلام حلو بينكم. من وين تعلماته او لمنو كانت تقول فيه قبلك؟ نجم الدين: شنو تحكككي انتي؟

شنو تقصد؟ مودة: يلي نقصد اسألها على علاقاتها السابقه. مش ليشي معين بس ممكن تفتحلك قلبها وتحكيلك على علاقاتها السابقه وشن كانت تحب وتتصرف معاه يلي كانت تكلم فيه باش تزيد تستقر معاها ويزيد الحب بينكم. نجم الدين: رجع من ذكرياته وهوا يشوف لي شيخة يلي كانت تضحك مع المسلسل ومش واخده بالها من شي. نصر: رد على تالفونه بعد 5 مكالمات. نعم! ريحانه: بصوت منهااااار. نصر الله يخليك تعاااااالا تعالا نمووووت.

نصر لحق علي. نصر نسي الكره والحقد يلي في قلبه ليها وطلع من وسط صحابه طياااااره لي حوشه. *** نغم: متنكرررررش. مش لو تجاهلت كل فعايلك الوسخه يعني اني غبية لااااا. لكن يوم انا اجهضت وكنت ننزف ويمكن الموت. متنكرش انك كنت معاها في المشفى بدل ما تكون مع مرتك. طه: سكريلي فمك راني مش طايق حد اخطين. نغم: تحكي كأن مفيش شي صااار! كأنك يلي مات من ولدك ومش قطعة منك! لا احساس في قلبك ولا ذرة رجولة اصلا حقيييييرة.

هنايا طه جن جنونه ومسكها من شعرها وطاح فيها ضرب هستيري وهوا مش حاس على نفسه ولا حتى عارف وين يضرب فيها. *** نذير: خش للغرف وملامحه كانت متوتره. بيحكي بس التردد مانعه. وبيسأل بس الجواب مخوفه. ندى: مسحت دموعها وناداته. نذير تعالا شوية. نذير: قرب منها وقعمز على السرير بهدوء. سألها وهوا يشوف لي عيونها. ليش البكي الهستيري هادا؟ لان روحت بيك؟ ندى: لان… نذير: امالا ليش؟

ندى: تبكي والشهقات في صوتها. شوف عارفه يلي درته غلط وغلط كبير ان حكيت مع حد وانا ع ذمتك. لكن معش قادرة نتحمل نذير. لا قادرة نعيش معاك ولا ناكل معاك ولا نتفاهم معاك. انا حتى مش قارة نرقد معاك. كنت تجنن مفيش زيك والله. قنين وراجل وشخصية وكل شي. شنو يلي جابرك؟ شنو يلي خلاك تحرمني نعيش مع شخص نحبه؟ شنو يلي خلاك تتخلى على بنت تحبها مسكينة بي السهولة هادي؟

عارفه انك مفكر اني خاينه ومننفعش ممكن. بس انا مكذبتش عليك. وامين كان راجل ودافع على حبه. نذير: بنبرة تحدي. بس انا كنت ارجل منه وخديته. *** طلع الدكتور من العناية حامل في فمه هلبا كلام. شاف لي نصر وعائلته الكامله يلي كانت تراجي فيه وقال. الدكتور: درنا كل يلي نقدرو عليه. بس الحمى كانت قوية هلبا. اسف. البيبي عطاكم عمره وربي يعوضكم. ماااااااااااه. ربي عاقبهم بأنه ياخد احلى شي رزقهم بيه وحبوه هما الاثنين.