رواية ملجأي الفصل الثامن 8 - بقلم ايه سلامه الجابري

الصبح الساعة 7 منال: انتي صحيتي ولا إيه؟ قمر: آه بس ما أكدبش عليكي، ما عرفتش أنام. منال: طب فرفشي كدا وأنا هقوم أجهزلك أحسن فطار وأعملك شاي. قمر وهي بتضحك: ماشي. في القصر.. أحمد: صباح الخير يا عمي عمر. عمر وهو حزين: صباح النور. أحمد: إيه مالك يا عمي؟ عمر: ما عرفتش أنام، بافكر في نور. أحمد: إن شاء الله تكون هي البنت. عمر: هي البنت اللي شوفتها دي كانت فين؟ أحمد: شوفتها في الشارع وأنا سايق العربية وخبطتها.

عمر: بتقول إيه؟ طب هي بخير؟ طمني يا ابني. أحمد: أيوه بخير، هي بس عندها كسر بسيط في رجلها وأنا جبتها في بيتنا هي وصاحبتها. عمر: طب يلا نروح لها والنبي أشوفها. أحمد: بلاش دلوقتي خلينا نستنى شوية. عمر: هي اسمها إيه؟ أحمد: اسمها قمر وكانت في الملجأ وبتحكي إنها كانت مخطوفة وعرفت مين باباها. عمر: ما سألتش على اسم باباها إيه وسنها كام؟ أحمد: لا ما سألتش بس ما تقلقش أما تخف وتروق هأسألها.

عمر: ما تحكيش حاجة لرقية مراتي، ما تخليهاش تعرف حاجة عشان ما تقلقش. أحمد: حاضر يا عمي. عمر: تعرف يا ابني إنك أصيل، أنت الوحيد اللي واقف جنبي وعايش معايا وما حسستنيش إن ما عنديش ولاد بعد ما بنتي اختفت. أحمد: بعد ما والدي ووالدتي ماتوا ما لقيتش حد حنين غيرك، أنا باعتبرك أبويا وطنط رقية أمي. عمر: ربنا يخليك لينا يا ابني وأقدر أعوضك وأعرف مين قتل أخويا ووالدتك. أحمد: خلاص كفاية جو الأحزان دا ويلا نفطر أنا جعان.

عمر وهو بيضحك: أنت على طول همك بطنك. أحمد: أيوه ما أنت عارفني. أحمد: أمال فين طنط رقية؟ عمر: خرجت من بدري بتجيب طلبات وجاية. أحمد: ماشي أنا هأخلص أكل وأروح لقمر. عمر: أنا هآجي معاك. أحمد: بس يا عمي. عمر: ما تقلقش هأشوفها وأطمن. ودخل مدحت.. مدحت: إزيك يا أخويا عامل إيه؟ واحشني. عمر: الله يسلمك تعالَ افطر معانا. مدحت بضحكة سخيفة: ماشي. مدحت: كنتوا بتقولوا رايحين فين؟ عمر: كنا رايحين.. (وقطع أحمد كلامه)

أحمد: رايحين الشركة. مدحت بخبث: وأخويا الدكتور بيفهم حاجة في الشركة؟ أحمد: أنا واخده معايا أتباهى بيه كفاية وقفته جنبي. مدحت بيكلم نفسه: لو طايل أخلص منكم وأرتاح. عمر: بتقول حاجة يا مدحت؟ مدحت: بقول ربنا يخليكم لبعض. عمر: يا رب يا مدحت ويخليك لينا. تليفون مدحت بيرن وبيتوتر. عمر: مالك في إيه؟ مدحت: ما فيش ما فيش، أنا هامشي دلوقتي عشان عندي شغل. عمر: ماشي. مدحت: ألو، دورتي عليها ولا لسه؟

المديرة: بادور عليها بس عرفت إنها عملت حادثة وشخص أخذها. مدحت: يا ريت نخلص من الموضوع دا.