رواية ملكت الحمزة الفصل السادس والثلاثون 36 - بقلم سندس احمد

حمزه دخل الجناح لاقى ملك قاعدة على السرير وبتذاكر. طنشها ودخل الحمام. ملك وقفت وقالت بدموع: ده حتى مسلمش عليا ولا بصلي، هو أنا للدرجة دي وحشة أوي كده؟ قعدت مكانها على السرير وبصت لباب الحمام بدموع. بعد خمس دقايق حمزه طلع وهو بيلبس التيشيرت. ملك بصتله وقالت بطفولة: أنت نمت فين إمبارح؟ حمزه ببرود: أوضة الضيوف. ملك بصتله باشتياق وقالت: طيب أنت لسه زعلان مني؟ حمزه قعد على الكنبة وقال ببرود: أبدًا، وأنا هزعل ليه؟

ملك بزعل: طيب. حمزه فتح فونه وبقى يلعب فيه ومطنشها ومش راضي يبصلها. قعدت تذاكر بزعل شديد. الباب خبط وحمزه راح فتح لاقى الشغالة. الشغالة بهدوء: حمزه بيه في واحدة تحت مستنية حضرتك اسمها آنسة ماريا. ملك أول ما سمعت اسمها قامت بسرعة وراحت وقفت على الباب وقالت بردح وعصبية: هي ليها عين كمان تيجي هنا؟ هي إيه البجاحة دي! والله لو شفتها لأجيبها تحتيا وأمسح بكرامتها الأرض وأجيبها من شعرها، انزلي قوليلها حمزه مش هيقابل حد.

حمزه كتم بوق ملك بإيد وبالإيد الثانية مسكها من وسطها لإنها كانت بتتكلم بانفعال وبتهز في نفسها جامد. حمزه بحدة: اخرسي خالص مش عايز أسمع صوتك. وأنتي انزلي قوليلها تستناني يلا. الشغالة مشيت بسرعة. حمزه دخل ملك الأوضة وقفل الباب. ملك حطت إيدها في وسطها وقالت بعصبية شديدة: إياك يا حمزه تنزل، عارف لو نزلت أنا هعمل فيك إيه؟ حمزه طنشها وراح يطلع هدوم من الدولاب.

ملك بصويت وجنان: حمزه بكلمك رد عليا، متسبنيش كده أنت مش هتنزل صح؟ حمزه ببرود: شيء ميخصكيش، فل. ملك رفعت حاجبها وقالت: آه ميخصنيش، تمام أوي يعني أنا دلوقتي أروح أسلم على واحد بره وأحب فيه وأقابله ولما تيجي تسألني هقولك ميخصكش. حمزه اتعدل وبصلها بخوف جامد وقال بتحذير وحدة شديدة: مش عايز عك في كلامك، أنا مش مسؤول عن اللي هعمله، تلمي حالك كده وتظبطي نفسك بدل ما أظبطك. وسابها وراح يلبس.

ملك بصتله بدموع وقعدت على السرير ومسكت بطنها بوجع وفضلت تتألم وتتوجع بصمت. حمزه بصلها وقال بقلق: إيه اللي وجعك؟ ملك بدموع ووجع: ابعد عني، أنت اللي واجعني، ابعد. حمزه بصلها بخوف وجري عليها ومسكها وقال: طب خلاص اهدي اهدي. ملك زاحته ونامت على ضهرها بوجع وفضلت تتهز وهي نايمة. حمزه قعد جنبها ومسكها من وسطها وقومها وحضنها وقال بحنية: طب خلاص اهدي متعيطيش اهدي. وبقى يبوس في خدها وفي كل حتة في وشها.

ملك بطفولة ودموع: مش هتنزلها صح؟ حمزه بصلها وزاح شعرها وقال بحنية: حبيبي ده شغل، مش هينفع، أنا مش هنزل ألعب معاها ولا أحبها. ملك بصتله بزعل وقالت: طيب روح. وبعدت عن حضنه. حمزه بصلها وقام كمل لبس. خلص وخد مفاتيحه وفونه وقبل ما يخرج راح مسك إيد ملك وقال بهدوء: مش هتأخر، هشوفها عايزة إيه وجايلك تاني. ملك هزت راسها وبصت بعيد. حمزه سابها وخرج. ملك بصت لطيفه وقالت بدموع وزعل وهي حاطة إيدها على بطنها: شايف بابا بيعمل إيه؟

شايف رايح يقابل واحدة عينها منه وواضح أوي ومهتمش لماما خالص. *** كلهم كانوا قاعدين على السفرة بيفطروا. جميلة بهدوء: صباحية مباركة يا حبايبي. حازم بهدوء: أمال كنتي فين بقالك يومين مش باينة؟ جميلة بتوتر: مفيش بس تعبانة شوية. حمزاوي بشك: تعبانة من إيه؟ جميلة بتوتر: مفيش يا حمزاوي، سيب الولاد يفطروا. حمزاوي بصلها بحيرة وكمل أكل. محمد كان بيبص للكل بشك كبير وكان بيلعب في طبقه ومش بياكل وسرحان. يامن بهدوء: علي منزلش ليه؟

حازم بغمزة: ما هو عريس، سيبه يستمتع يا أخي. حياة بصتله بكسوف وكملت أكل. حازم ميل على حياة وقال بهمس: هو إيه أكل القطط ده، ما تأكلي. حياة بكسوف: باكل أهو. *** هاجر خرجت من الحمام لاقت علي قاعد وحاطط إيده على وشه ومغمض عيونه. هاجر ببرود: أنا عايزة أكل، جعانة. علي رفع وشه وبصلها وقال بهدوء: البسي حاجة وتعالي ننزل نفطر. هاجر قعدت على السرير وقالت ببرود: مش عايزة أشوف حد ولا أتكلم مع حد، خلي حد يجيبلي الفطار هنا. علي قام

وراح ناحيتها وقال بندم: جوجو أنا آسف والله ما كان قصدي. هاجر بصت بعيد وقالت بفراغ: عادي ما عدتش فارقة. علي بصلها بحزن وقال: طيب اديني فرصة. هاجر ببرود: اديتك لما سمحتلك تدخل حياتي وتتجوزني، ودي كانت أكبر فرصة ممكن أدهالك. علي بهدوء: طيب يا هاجر أنا نازل أجيبلك تفطري. وسابها وخرج. هاجر عيونها دمعت بوجع. *** حمزه كان قاعد في الجنينة مع ماريا وبيتناقشوا. ماريا بخبث: هو أنت بتحب مراتك؟ حمزه ببرود: آه.

ماريا بصت بغل وقالت: اممم يا بختها بجد. حمزه ما ردش عليها وكان عيونه على الملفات اللي قدامه. ماريا قامت من مكانها ووقفت جنب حمزه وبقت تشاور بإيدها على الملفات وتتمايل عليه. في الوقت ده ملك كانت طالعة البلكونة وشافتها وهي بتتمايل عليه. برقت عيونها بصدمة كبيرة. ماريا شافتها واقفة راحت حطت إيدها على كتفه وقالت بدلع: كده كل حاجة تمام والموقع مظبوط، المستشفى هتبقى حاجة جامدة أوي. وحضنته بإيدها. ملك بصتلها بدموع ووجع.