رواية من نظرة حب الفصل العشرون 20 - بقلم ندوشة

زين: في إيه يا دكتور اللي حصل؟ الدكتور: الحمد لله العملية نجحت وقدرنا ننقذه. مكة بفرحة: يعني هو دلوقتي بقى كويس؟ الدكتور: بقى كويس. حمزة: نقدر نشوفه؟ الدكتور: حاليًا لا لأنه هيفضل تحت الملاحظة ومش مسموح بالزيارة دلوقتي. مشى الدكتور سابهم وهم فرحانين شوية، افتكر حمزة ثريا وإنهم كذبوا عليها. حمزة: أنا لازم أتصل بخالتي ثريا. مكة: صح احنا لازم نتصل بيها لأن احنا لو معملناهاش هتقلق علينا.

حمزة: تمام أنا هروح أتصل بيها وانتم استنوا هنا لحد ما أجي. في الجانب الثاني في القصر كانوا ثريا قاعدة وخايفة من ظهور ماجد فجأة، لحد ما قاطعها صوت رنة التليفون، ردت وكان حمزة. ثريا: في إيه يا حمزة أنت مش متعود إنك تتصل بيا دلوقتي. حمزة: احنا في المستشفى. ثريا: ليه إيه اللي حصل؟ حمزة: مالك اتصاب وجيبناه المستشفى واحنا دلوقتي هناك. ثريا: وهو عامل إيه دلوقتي طمني يا حمزة. حمزة: هو كويس دلوقتي الدكتور طمني عليه.

ثريا: مسافة السكة وجاية. طلعت ثريا بسرعة وخلت السواق يركب العربية وياخدها المستشفى بسرعة. في الحارة الشعبية كانت نسمة في السوق وسمعت كلام نسوان بيتكلموا وراها. المرأة الأولى: شوفي يا أختي ماشية أكإنها ملاك ولا كإنها عاملة حاجة. ردت عليها الثانية: صحيح ياما تحت السواحي دواهي. نسمة بصت لهم وقالت: جرايا إيه يا وليه منك ليها أنتم بتتكلموا عن إيه؟

واحدة منهم: متعرفيش بنتكلم عن إيه، ما الحارة كلها عارفة عن الرجالة اللي بتيجي توصلك كل ليلة متأخر. نسمة: قطع لسانك ولسان اللي يقول عليا كلمة وسخة. واحدة ردت عليها: مش احنا اللي بنقول كده الناس هم اللي بيقولوا احنا سامعين.

نسمة: لا يا حلوه منك ليها أنا بعلي صوتي عشان الكل يسمع، أنا أشرف من أي واحدة فيكم كلكم واللي يقول عليا كلمة وحشة أقطعله لسانه، أنتم عارفيني إني مبسيبش حقي واللي قال الكلام ده هيتحاسب وأنا عارفة هو مين، ولو على الرجالة اللي بتيجي توصلني كل ليلة فأنا بشتغل وشغل شريف واللي بيته من قزاز ميحدفش الناس بالطوب، ولو سمعت حد بيقول عليا كلمة تانية أنا مش هقدر أمسك نفسي وهزعله. جالها الرد: هو احنا اللي بنقول مش احنا اللي بنقول.

نسمة: أنا عارفة مين اللي قايل ومطلع الكلام ده وهيندم ومش هسكتله، جاتكم القرف حارة عمرها ما هتنضف أبدًا. سابتهم نسمة ودخلت العمارة، دخلت بيتها وأول ما دخلت دموعها نزلت على الظلم اللي هي بتتعرضله، جات ملك لها بسرعة وأول ما شافتها بتعيط راحت لها بسرعة وحضنتها. ملك: مالك يا حبيبتي بتعيطي ليه فيكي إيه؟ نسمة: أنا زهقت يا ملك مبقتش قادرة. ملك: إيه اللي حصل؟

نسمة: أنا استحملت كتير أوي من صغري، وقت ما كانوا العيال اللي في سني بيلعبوا أنا كنت بشتغل عشان أقدر أصرف علينا، استحملت الكلام اللي كان دايمًا بيتقالي وكنت بسكت واستحملت نظرة الناس ليا وقولت أنا ميهمنيش لأني مبعملش حاجة غلط بس لحد هنا ومش هتحمل إنهم يتهموني في شرفي أنا مش هسكت. ملك: اهدي يا نسمة أنا مش متعودة عليكي كده.

نسمة: أنا بوضح للكل إني قوية ومحدش يقدرلي بس جوايا طفلة نفسها إن حد يحضنها ويطمنها إنه جمبها ومش هيسيبها وإن كل حاجة هتبقى كويسة. ملك: في إيه يا نسمة أنتي عاوزة تزعليني يعني أنا مش جمبك دايمًا أنا مش مكفياكي أنتي مش بتحبيني؟ نسمة: أوعي تقولي كده أنتي بنتي وأختي وبنت عمي وكل حاجة بالنسبة لي مقدرش أخسرك ولا أزعلك أبدًا.

ملك: لو مش عاوزة تزعليني فعلًا قومي واضحكي، أنتي نسيتي إن أنا خلاص هتخطب أنتي مش فرحانة ليا والا إيه؟ نسمة: متعرفيش أنا فرحانة قد إيه. ملك: طيب قومي بقى واعمليلنا شوية شربات من إيدك الحلوة دي. نسمة: تعالي نعمله احنا الاتنين. دخلوا هما الاتنين المطبخ وملك قدرت تخرج نسمة من حزنها ولو حتى لوقت صغير. في المستشفى وصلت ثريا ودخلت بسرعة وهي مرعوبة على ابنها، شافت زين ومكة وحمزة واقفين راحت لهم بسرعة. ثريا: فين ابني؟

مكة: اهدي يا ماما الدكتور قال إنه كويس. ثريا: أنا عاوزة أشوفه. زين: مش هينفع ممنوع الزيارة. ثريا: ولو هو كويس ممنوع الزيارة ليه؟ حمزة: اهدي يا خالتي الدكتور قال إنه كويس بس هيفضل تحت الملاحظة ومش هينفع حد يدخله في الوقت ده. ثريا: وهو أنا كنت ناقصة مش مكفيني المصيبة اللي ظهرت. مكة: مصيبة إيه يا ماما؟ ثريا: ..........