رواية من نظرة حب الفصل الأربعون 40 - بقلم الكاتبة الصغيرة

ثريا: طيب قولي رأيك. نسمة: موافقة. ابتسم مالك ابتسامة استفزت نسمة، وخلتها تزعل إنها قالت كلمة موافقة وإن حياتها هتتغير. ثريا: على بركة الله. نقرأ الفاتحة دلوقتي، وبكرة نجيب الشبكة، وتكون خطوبة وكتب كتاب. نسمة: موافقة. قعدوا مع بعض بعد ما اتفقوا لحد ما استأذنوا ومشوا. نزلوا وركبوا العربية. ثريا: واد يا مالك! مالك: نعم يا ماما. ثريا: أنت قلت إيه لنسمة؟ مالك: ما أنا اتكلمت معاها قدامكم.

ثريا: لا مش دلوقتي. مش أنت قلت إنك اتكلمت معاها وعرفتها؟ قولتلها إيه لدرجة خليتها تكون لابسة أسود في أسود؟ مالك: طيب وأنا مالي يا ماما؟ هو أنا اللي قلتلها تلبس كده؟ هي حرة. ثريا: هو في حد قالك إني مبفهمش؟ مالك: لا سمح الله. أنتِ بتقوليني كلام مقولتهوش ليه؟ ثريا: يبقى تنطق. دي مش شكل وحدة مبسوطة إن خطوبتها هتكون بعد أيام وإن في عريس متقدم لها. أنت غصبتها يامالك. مالك: أنا مش قادر يا ماما، كان غصب عني والله.

ثريا: يعني أنت فعلاً غصبتها؟ ليه كده يامالك؟ دا أنت عارف إنها اتظلمت كتير في حياتها. تقوم أنت تيجي تظلمها وتغصبها على الجوازة دي؟ مالك: مكنش عندي حل غير كده. ثريا: إيه اللي حصل يا حبيبي؟ احكيلي يامالك. مالك: هقولك. أنا عملت دا كله عشان أحميها، لأن حياتها في خطر. ثريا: تحميها من إيه بس؟

مالك: من أبويا. أيوه بابا، هو اللي بيشكل خطر على حياتها، لأنه بيراقبها ومركز معاها. فمكنش عندي حل غير إني أتجوزها عشان تفضل قدام عيني على طول. ثريا: تاني رجعت لنقطة الصفر تاني. بعد ما بعدته عنكم كل السنين دي وحمتكم، ظهر في حياتكم عشان يدمرها. هو مش هيستريح غير لما ينتقم مني على اللي حصل من سنين. مالك: اهدي يا ماما. أنا هتصرف. هحاول بكل الطرق إني أحميكم وهمنعه إنه يدمر حياتنا. أنا كبرت ومبقتش صغير وأقدر أحميكم كلكم.

ثريا: أنا خايفة عليك يامالك. أنا أكتر واحدة أعرف ماجد وإنه مش هيتردد في إنه يأذيك. مالك: اهدي أنتِ بس وأنا هتصرف. ادخلي أنتِ دلوقتي وارتاحي، وأنا هروح الشركة ورايا شغل كتير. ثريا: خلي بالك من نفسك يامالك. مالك: متقلقيش يا ست الكل. دخلت ثريا القصر، أما مالك فراح للشركة عشان ينفذ الخطة اللي اتفق عليها هو ورضا. وصل ودخل، وكان رضا لسه موصلش. دخل مكتبه وبدأ شغل لحد ما سمع صوت عالي برة. عرف إن رضا وصل. مالك: هو في إيه هنا؟

إيه اللي بيحصل؟ الحارس: الأستاذ رضا دخل وأنا حاولت أمنعه بس مقدرتش. مالك: تمام. أنت إيه اللي جابك هنا؟ رضا: جاي عشان أحذرك تقرب من شغلي بعد كده. مالك: وهو أنا عملت حاجة؟ رضا: مالك متستهبلش. أنت عارف أنا بتكلم عن إيه. قسماً عظماً لو عرفت إنك اتدخلت في شغلي بعد كده، لكون مموتك. وأنت عارف إني مبهددش. مالك: خلصت كلامك؟ اتفضل امشي حالا من هنا. رضا: ماشي يامالك. هتترد ليك، بس هتبقى أقوى مليون مرة.

مالك قرب منه وعمل نفسه إنه مسكه من هدومه وحطله ورقة في جيبه. مالك: أنا مبخافش يارضا. واتفضل اطلع برة يلا. خرج رضا من الشركة وهو بيمثل إنه زعلان ومتعصب من اللي حصل، وركب عربيته. طلع الورقة من جيبه. محتواها: بص بعد الشركة هنتقابل في العنوان *** عشان نشوف الخطة هتكمل إزاي، وأتأكد إن مفيش حد مراقبك. قطع رضا الورقة ورماها في الشارع وراح على الڤيلا بتاعته. دخل وكانت منة هناك مستنياه. أول ما شافه حضنته وهي بتمثل إنها بتحبه.

منة: وحشتني أوي يا حبيبي. رضا: وأنتي كمان. منة: في إيه يارضا؟ مالك؟ إيه؟ رضا: مفيش، بس تعبان من الشغل. منة: لا ياحبيبي في حاجة تانية. هتخبي عن منة حبيبتك؟ رضا: مالك. منة: عمل إيه تاني؟ رضا: بسببه خسرت صفقة بالملايين ومش عارف هعوضها إزاي. منة: وهتسكتله؟ رضا: وأنا هعمل إيه يعني؟ منة: لازم تنتقم منه على كده. رضا: إزاي؟ منة: أنا هقولك. في الشقة عند نسمة، كانت قاعدة مع ملك وهي زعلانة، وملك قاعدة ومش فاهمة حاجة.

ملك: يابنتي طب عرفيني إيه اللي مزعلك. نسمة: مفيش. ملك: يعني بردوا مش عاوزة تقولي حاجة؟ نسمة: ياحبيبتي مفيش حاجة عشان أقولها. ملك: نسمة أنا مش هبلة، وواضح عليكي إنك زعلانة ومش مبسوطة باللي حصل ده. ممكن بقي تقوليلي إيه السبب؟ نسمة: أنتِ اللي شكاكة زيادة، بس مفيش حاجة. ملك: تمام. أنا قايمة، بس متتكلميش معايا تاني، بدال انتي مش متطمنة ليا ولا بتحكيلي على حاجة. نسمة: استني بس ياملك، هقولك. ملك: يعني هتقولي زعلانة ليه؟

نسمة: وامري لله. كانت جودي قاعدة في الشقة بتاعت حمزة وبتتفرج على التليفزيون. لحد ما سمعت صوت في الشقة. خافت وقامت من مكانها وهي مرعوبة. جودي: مين هنا؟ حمزة، دا أنت حمزة؟ اطلع بقي وبطل هزار. سمعت جودي صوت من وراها. اتلفتت وأول ما شافته صرخت بأعلى صوتها.