رواية من نظرة حب الفصل الثلاثون 30 - بقلم الكاتبة الصغيرة

في القصر كانت ثريا ونسمة ومكة قاعدين مع بعض لحد ما دخل عليهم مالك وهو مصدوم من اللي عرفه. أول ما شافته ثريا ومكة راحوا له بسرعة. ثريا: مالك، إيه اللي طلعك دلوقتي؟ مالك: أنا خليت الدكتور يكتب لي إذن بالخروج. ثريا: بقي كدة تطلع وتيجي لوحدك من غير ما تعرفنا حتى؟ كان على الأقل كنت تعرفنا. مالك: معلش يا ماما، أنا قولت متعبش حد. مكة: تعال اقعد يا مالك، أنت مش قادر تقف.

أخذوه وقعد وهو بينهج من المجهود وخصوصًا إنه لسه تعبان. أخذ باله إن نسمة واقفة افتكر كلام والده اللي عرفه. مالك: مش عارف أعمل إيه دلوقتي معاكي وخصوصًا بعد ما عرفت إن والدي هو اللي قتل والدك ودمر عيلتك وخلاكِ تتيتمي من صغرك وهو السبب في حالتك دي دلوقتي. ثريا: مالك، مالك. مالك: آه، في إيه؟ ثريا: بقالي كتير بكلمك، سرحت في إيه؟ مالك: لا مفيش، كنتي بتقولي إيه؟ ثريا: بقولك اطلع ارتاح فوق شوية وأنا هجيب لك الأكل لفوق.

مالك: لا، أنا مليش نفس، أنا عاوز أنام بس شوية. ثريا: براحتك يا حبيبي، خديه يا مكة وطلعيه على أوضته. مكة: حاضر يا ماما. سندت مكة مالك وطلعوا هما الاتنين لفوق. أما ثريا فبصت لنسمة اللي كانت بتبصلهم باستغراب وقلق على مالك، هي مش عارفة سببه. ثريا: تعالي يا بنتي اقعدي. نسمة: هو ماله مالك بيه؟ شكله تعبان. ثريا: اسكتي يا نسمة، دا أنا وقت ما عرفت إنه اتصاب وفي المستشفى روحي راحت مني، بس الدكتور طمني عليه وقال إنه كويس.

نسمة: ربنا يقومه بالسلامة ويخليه لكم. ثريا: يارب يا حبيبتي، اقعدي. نسمة: معلش بقى أنا هروح، بدل ما مش هشتغل. ثريا: وأنا لسة عند وعدي، ارتاحي أنتِ وملك لأن يدوبك الخطوبة بكرة، من بكرة الصبح تكونوا عندنا هنا ومعاكم كل حاجة هتحتاجوها. نسمة: حاضر، همشي، مع السلامة. ثريا: الله يسلمك يا حبيبتي. مشيت نسمة من القصر ونزلت مكة من فوق راحت لثريا اللي كانت قاعدة بتفكر. مكة: ماما، مالك عاوزك فوق. ثريا: ماله؟ هو تعبان؟

مكة: اهدي يا حبيبتي، هو كويس بس قال لي إنه عاوز يكلمك في موضوع مهم. ثريا: تمام يا حبيبتي، أنا هطلع له، وأنتي شوفي بدرية خلصت الغداء. مكة: حاضر. في أوضة مالك كان قاعد على السرير وهو باين عليه الزعل والقلق من اللي عرفه. دخلت ثريا عليه وقعدت على السرير جنبه. ثريا: في إيه يا حبيبي؟ مالك: أنا عاوز أتكلم معاكي. ثريا: خير يا ابني. مالك: أنا قابلت بابا. ثريا: أنت بتقول إيه؟ مش أنا قولت لك متعملش كدة يا مالك؟

مالك: كان لازم أعرف منه حاجة مهمة. ثريا: وعرفتها؟ مالك: وياريتني ما عرفتها. ثريا: في إيه يا مالك؟ أنت بتقلقني ليه؟ ماجد قال لك إيه؟ مالك: أنا حبيت أعرف اسم الشخص اللي هو قتله وأعرف وضع عيلته. ثريا: وهو قال لك هو مين؟ مالك: أيوه، قال إن اسمه محمد وإن مراته ماتت بحسرتها وبنته اتيتمت. أنتِ عارفة بنته دي تبقى مين؟ ثريا: مين؟ مالك: نسمة. ثريا: نسمة مين؟ أوعي تكون اللي في بالي. مالك: أيوه، هي نسمة نفسها.

ثريا: يا مرك يا ثريا، إزاي الكلام دا؟ إزاي؟ أنا مش مصدقة. مالك: أنا مصدقتش في الأول بس اتأكدت من كدة. ثريا: أنا دلوقتي أعمل إيه؟ أبص في وشها إزاي وأنا أبقى مرات الراجل اللي دمر عيلتها وحياتها وخلاها مش قادرة تجيب اللقمة حتى؟ بتلف على ما تلاقي لقمة العيش. مالك: أنا مش حابب أعرف حد في الوقت دا. ثريا: بس لازم يعرفوا، أكيد في يوم هيعرفوا كل حاجة. مالك: هعرفهم بس في الوقت المناسب، بس في الوقت الحالي لا.

كانت نسمة في الشارع ومروحة، بس عدى شخص من جنبها وشد الشنطة منها. نسمة بصراخ: الحقوني! حرامي! حرامي! في شاب كان ماشي في الشارع وأول ما شافها طلع يجري وراه الولد ومسكه وأخذ الشنطة. طلع الولد يجري وهو مقدرش يمسكه. راح لنسمة ورجع لها الشنطة. الشاب: اتفضلي يا آنسة. نسمة: شكرا، شكرا ليك بجد، مش عارفة من غيرك كنت عملت إيه. الشاب: العفو، بس المرة الجاية ياريت تاخدي بالك أكتر.

نسمة: أنا شوفتك قبل كدة، أيوه أنت اللي خبطت فيه في المول. الشاب: أيوه، افتكرت اسمك نسمة صح؟ نسمة: أيوه، نسمة. الشاب: اسمك حلو يا نسمة. نسمة: شكرا، أنت بقى اسمك إيه؟ الشاب: حاتم، اسمي حاتم السخاوي.