رواية من نظرة حب الفصل الحادي والثلاثون 31 - بقلم الكاتبة الصغيرة

تاني يوم كان كل شغال في القصر والكل مشغول عشان الخطوبة وخصوصا إنهم ولاد رافعي، فلازم تكون خطوبة محدش شافها قبل كده. كانت نسمة وملك ومكة فوق في أوضة مكة وبيجهزوا نفسهم ومشغولين. مكة: أنا اخترت الفستان ده، شكله حلو. نسمة: حلو قوي يا حبيبتي وهيطلع عليك أحلى. مكة: بجد؟ نسمة: أيوه طبعاً، أهم حاجة إنه واسع وطويل فمش هيبين جسمك، فداه شيء كويس.

مكة: أمير هو اللي اختاره ليا، وأساساً مكنش عاوزني أجيبه، قالي كان عاوز يلبسني عباية سوداء، قال إيه عشان محدش يشوفني، بيغير عليا. ضحكت نسمة هي وملك عليها. ملك: أنا الفستان مخلتش زين يشوفه، أنا اشتريته من غير ما يشوفه، لأني عارفة إنه أكيد مكنش هيرضى بيه. نسمة: بس يعني ده مقفول وواسع عادي.

ملك: لأ، هو مكنش عاوزني أجيب الفستان ده، كان عاوز يجيبلي فستان واسع قوي وأنا اخترت ده، واتخانقنا بس أخدته من وراه، ما يعرفش إني هلبسه. نسمة: بس كده هيزعل وممكن تحصل مشكلة. ملك: متقلقيش، أنا عاملة حسابي، هقدر إني أراضيه. مكة: طب أنا هنزل تحت عشان أشوف الترتيبات مع ماما، وهاجي لكم دلوقتي على الميك أب آرتست تيجي. نزلت مكة تحت لقت ثريا مشغولة قوي، كانت في المطبخ ومشغولة قوي. مكة: ها يا ماما بتعملي إيه؟

ثريا: بساعد بدرية والباقي في الطبخ، لازم الأكل يكون مظبوط. مكة: طب مشوفتيش مالك، أصل كنت عاوزة أشوفه. ثريا: مالك بردوا اللي عاوزة تشوفيه؟ مكة: الله يا ماما، أيوه مالك طبعاً، اومال هيكون مين يعني. ثريا: والله ما أنا قايلالك، اعقلي كده واطلعي فوق، لأن زمان حمزة هيجيب جودي دلوقتي. وفعلاً بعدها بلحظات دخل حمزة ومعاه جودي اللي كانت مكسوفة ومتوترة. أول ما حمزة شافهم راحلهم بسرعة. حمزة: السلام عليكم.

ثريا ومكة: وعليكم السلام. ثريا: يلا يا جودي اطلعي مع مكة، البنات فوق، وانت يا حمزة روح لمالك والباقي. مكة وهي بتاخد جودي من إيدها: تعالي نطلع بسرعة، تلاقيهم مستنيينك. طلعوا البنات فوق للأوضة وقعدوا يتكلموا مع بعض على ما الميكاب آرتست تيجي. *** على الناحية التانية كان مالك وأمير وزين قاعدين بره في الجنينة لحد ما راحلهم حمزة. أول ما شافوه راحوا له بسرعة. زين: انت شوفت البنات؟

حمزة: لأ، معرفتش أدخل لأن خالتي ثريا طردتني أطلع بره لكم. زين: طب دلوقتي هعمل إيه؟ أمير: استهدي كده، أكيد هنشوف حل، هنحاول بكل الطرق إننا نشوفهم. حمزة: هو في إيه؟ زين: ملك اختارت الفستان من غير ما أشوفه، ولما جيت أقولها هتوريه لي قالتلي قال إيه ده نحس، نحس إيه؟ أنا عاوز أشوفه لأني عارف أكيد إنها اختارت فستان أنا مش هوافق عليه، وده خلها تخبيه. حمزة: ما تسكت ياعم، كلها كذا ساعة وتشوفوا بعض، اهدي كده.

أمير: وأنا كمان عاوز أشوف مكة، وحشتني. مالك: ما تحترم نفسك يا عم، ده أنا حتى قاعد جنبك يعني. أمير: وأنا أعمل إيه يا عم. زين: ما انت لا النهاردة شبكتك ولا أي حاجة، قاعد بقى. مالك: ما تنقش فيها واسكت. زين: أنا بنق. مالك: أيوه، وكلمة كمان هحلف في الموضوع ده ما هيتم. أمير: خلاص يا عم، اهدى كده، اهدى. حمزة: أنا مش عارف انتوا مستعجلين ليه. أمير: دا خالتي ثريا مانعاني إني أقابل مكة.

زين: مش انت لوحدك، أنا كمان كده، بتقولي هشوفها في الخطوبة بس أنا عاوز أشوفها الأول. مالك: انتوا بتوتروني ليه معاكم، اسكتوا. زين: وحضرتك متوتر من إيه؟ تكونش حبيبتك موجودة وعاوز تشوفها انت كمان؟ أمير: أكيد لأ، مالك وحب في جملة واحدة. حمزة: ومين قالكم بقى إن حبيبته مش موجودة؟ زين وأمير اتعدلوا وقالوا في صوت واحد: بجد؟ هي مين؟ ها هي مين؟ حمزة: أقولهم؟ مالك: أوعى ياحمزة، هموتك.

زين: متسمعش كلامه وقولنا، واحنا والله ما هنقول لحد. حمزة: نسمة بنت عم ملك. مالك: طلبتها ونولتها ياحمزة، الكلب لو مبوظتش وشك دا مبقاش مالك. طلع يجري ورا حمزة اللي أول ما سمع كلامه طلع يجري لأنه عارف إن مالك مبيزرش. *** عند رضا كانت منة في عنده في الفيلا وهي متعصبة ومتغاظة. منة: أهو فرحانين ولا همهم حاجة، ده حتى مفيش حد فيهم فكر يعزمني. رضا: وانت عاوزة تروحي ليه، من كتر ما بتحبيهم؟

منة: لا حب إيه بس، أنا بنت خالتهم يعني لازم يعرفوني، حتى أنا عاوزة أعرف إيه اللي هيحصل هناك. رضا: أنا هحكيلك على اللي هيحصل. منة: إيه ده؟ انت هتروح إزاي؟ مالك عزمك؟ ده انت وهو أعداء. رضا: ومين قالك إني اتعزمت؟ بس بردوا مينفعش يكون في عندهم فرح وأنا مروحش، أنا بردوا ميفوتنيش الواجب. منة: انت أكيد في حاجة في دماغك. رضا: جاتلي فرصة على طبق من دهب إني أدمر مالك، أقول لأ؟ منة: اللي نفسي أعرفه انتوا إزاي بقيتوا أعداء كده؟

ده انتوا زمان كان الكل بيحلف بصحوبتكم. رضا: هو اللي غدر، وأنا مش هسامح غير لما انتقم منه. منة: أنا عاوزاك تحكيلي. رضا: ولما تعرفي هيفيد بإيه؟ منة: على الأقل أكون فاهمة. رضا: تمام، أنا هحكيلك.