رواية مراهقة الفصل الرابع 4 - بقلم أروى طارق

مؤمن: قول يا حبيبي. فارس: أنا قررت أسافر. مؤمن متنح: ........ فارس: ولاااااا بكلمك أنا. مؤمن: أنت عبيط؟ هل أنت عبيط؟ فارس: وه! عبيط ليه؟ مؤمن: إيه "قررت أسافر" دي! رايح تصيف أنت يعني مش فاهم أنا!! فارس: لا مش هصيف.... أنا هسافر وهكمل الكلية برا. مؤمن: أنت بتتكلم جد ولا إيه! فارس: والله أنا من أول ما قعدنا بتكلم جد، بس أنت الحِس الفُكاهي عالي عندك باين. مؤمن: تسافر إيه يا فارس!! ليه؟ فين؟ سيبك من ليه وفين.. أنا....

هتسافر وتسيبني يا صاحبي!! فارس بص للأرض بتعب: مؤمن يعلم ربنا باللي فيا، أنا أكيد مش عايز أسيبك بس لازم أعمل كده... هيكون أحسن. مؤمن: هو إيه اللي هيكون أحسن! وليه مضطر تعمل كده أصلًا؟ فارس: عشان أحافظ عليها. مؤمن: هي إيه دي اللي هتحافظ عليها! فارس: حور. مؤمن باندهاش: نعمممممم!!!!! فارس: فيه إيه؟ وطي صوتك. مؤمن: ما أنا خايف اللي فهمته يطلع صح! فارس: آه.... اللي فهمته صح. مؤمن: !!!!! فارس اتنهد: بحبها. مؤمن: اتكلم...

سامعك. فارس: من واحنا صغيرين! بقالي فترة! من قريب! معرفش إمتى بالظبط..... بس يعني... أنا بخاف عليها، مبحبش حد يكلمها، بغير يعني، عايزها دايما معايا... بتوحشني! ... مبحبش أزعلها.. عايزها دايما تضحك.... لو ده مش حب يبقى إيه طيب!!!! مؤمن بتنهيدة: هو.... أعتقد هو ده الحب. فارس: يبقى بحب يا صاحبي.... ولازم أبعد. مؤمن: إيه الجملة اللي مش راكبة على بعضها دي!

فارس: لازم أسافر.. حور صغيرة وأنا أصلًا مينفعش أتقدم دلوقتي لأني مش جاهز في أي حاجة... وبصراحة مش هينفع أفضل هنا وهي قدامي على طول كده.. ببصلها كتير وأنا لازم أغض بصري.. وطول ما هي معايا هفضل باصصلها... أعتقد أكمل الكلية بره وأجهز هيكون أحسن وهاجي هتكون صغيرة... مش جواز يعني... بقولك إيه أنا قولت لبابا وجهزت ورقي ونفسي. مؤمن: كل ده ومتحكيليش حاجة!! .. ده أنت طلعت سوسة صحيح.

فارس ضحك: طب يلا نروح بقا يا ظريف عشان آخرنا. مؤمن: ناوي إمتى؟ فارس أبتسم: كمان أسبوع. *** حور: بالله حاسة إني هسقط بسببكم. فريدة: بت اسكتي ركزي خلينا نلعب ملعبناش كوتشينه مع بعض من زمان. حور: وأنتِ هتسقطي معايا يا سُكّر. فارس: متخافيش يا حور هتعدي... العبي بقا متقرفينااش. مؤمن: العبوا وأنتم ساكتين.. عايزين نشبع من الواد ده قبل ما يسافر. فريدة: آه والله أنا مضايقة أوي إنك هتسافر مش عارفة هنقعد إزاي من غيرك.

فارس خبط مؤمن على غبائه ومؤمن فهم أن حور متعرفش. مؤمن بصوت واطي لفارس: شييت! نهار أسود هو. حور: يسافر!! .... هو مين ده اللي هيسافر! فريدة: فارس يا حور.. أنت مقولتلهاش ولا إيه؟ حور: أنا زهقت من اللعب... هطلع البلكونة شوية. *** في البلكونة فارس: كنت هقولك. حور لفتله: أو متقولش... مش فارقة. فارس: فارقة. حور بحزن: هتسافر!! فارس: غصب عني لازم. حور: وإيه اللي غاصبك طيب... هتسيبنا.... هتسبني!!!

فارس: لا مش هسيبك.. هتلاقيني دايما معاكي ولو احتجتيني هتلاقيني معاكي. حور: أنا محتاجاك على طول.. ومش أنا بس....... أصلًا مش عارفة إيه اللي غاصبك على كده. فارس بتنهيدة: هييجي يوم وأقولك... بس المهم دلوقتي إني هكمل بره. حور: ...... فارس: مش هتردي؟ حور: معنديش حاجة أقولها وأعتقد مش فارقة معاك. فارس: مين اللي مش فارقة معايا!!! حور: أنا. فارس: عبيطة أنتِ! حور بعصبية: متغلطش فيا.. وبعدين تسافر أو متسافرش مش هتفرق معايا.

فارس: مش هتفرق! ماشي.... ماشي. *** بعد يومين حور في أوضتها حور: مرنش بقاله يومين ولا شوفته.. هو زعل ولا إيه! هو أنا قولت حاجة تزعل!! .... آه عليت صوتي أوي وقولت هبل كده... بس هو اللي عصبني... لا بردو أنا زودتها .... أوف بقا.... هروح أعتذرله وخلاص. *** حور: إزيك يا طنط عاملة إيه؟ أمل: الحمد لله يا حبيبتي. حور: أمال فين فارس؟ أمل باستغراب: فارس! ... فارس سافر يا حور. حور بصدمة: سااافر!!