رواية مريض الغرفة الفصل الخامس 5 - بقلم حبيبة ممدوح

دخلت الغرفة بتاعت أحمد وأنا ركبي بتخبط في بعض، خايفة الحلم يتحقق ويخلص عليا فعلًا. حاولت أتماسك أعصابي. مسكت أوكرة الباب بعد ما خبطت بهدوء ودخلت. بس كان نايم. أول مرة أشوفه وهو هادي وأدقق في ملامحه كده. جميل، جميل أوي زي الأطفال. شعره نايم ولونه بني نازل على عينه بحركات عشوائية. كنت واقفة في الصالة لحد ما اتحرك وفتح عينيه. لقاني قدامه فاتعدل بسرعة وهو بيقول: _إيه اللي دخلك هنا؟ أنا مش قولتلك إني بكرهكم. قلت بـ لجلجة:

_بس أنا معملتش حاجة. _عملتي أو لأ، فـ كلكم هتتحاسبوا. كلكم هدفعكم التمن غالي أوي. رميت الورق اللي كان في إيدي، وقع على الأرض وفتحت الباب بسرعة وطلعت جري. سبت المستشفى وسبت كل حاجة. فضلت ماشية لحد ما طلعت برة خالص. ماشية وأنا مش فاهمة رايحة فين ولا ليه. بحاول استوعب هو عاوز ينتقم ليه وإيه اللي حصل يخليه عاوز ينتقم بالشكل ده. ومش لشخص معين، لا ده عاوز ينتقم من الكل حتى اللي ملوش ذنب.

رجعت بسرعة على المستشفى وأنا بدور على رحاب في كل حتة لحد ما لقيتها في غرفة بتدي العلاج لمريض. خبطت الباب ودخلت: _رحاب عاوزاكي. _ثواني يا دكتورة. خلصت اللي في إيديها وجت لي وأنا كنت واقفة برة. _خير يا دكتورة، في إيه؟ _تعالي معايا. أخدتها على غرفة الأطباء. دخلت وأنا قعدت على الكرسي وطلعت من الدرج ملف أستاذ أحمد. حطيت الملف على المكتب وأنا بفتحه وبقول:

_طيب بما إن التقارير بتقول إن أحمد عبدالمنعم مريض غرفة 202 بقاله هنا حوالي سنتين إلا شهر مثلاً، وإنتِ شغالة هنا بقالك أربع سنين. كملت تقليب في الملف وأنا بقول: _التقرير مش كامل. يعني مثلاً مش مكتوب إيه سبب إنه يوصل للحالة دي، أو مين اللي بيزوره، أو حتى مين الدكاترة اللي بتاخد إشراف حالته. على الرغم إن اللي فهمته إن مسك حالته أكتر من دكتور قبل ما أنا أمسك الحالة. _إنتِ عاوزة تعرفي إيه يا دكتورة وأنا هقولك.

ابتسمت بهدوء وأنا بقول: _أيوه كده بهدوء وواحدة واحدة ونتفاهم. أول حاجة عاوزة أعرفها إيه اللي وصل أحمد للحالة دي؟ بصت لي وبدأت تحكي: _أنا جيت هنا وكنت بعرف كل مريض حالته كويس جداً. وبما إننا في مستشفى أمراض نفسية فـ كل حالة كانت ليها حكاية وقصة مختلفة. بس أحمد كان غير كل اللي عدوا عليا. أحمد كان مهندس عنده 29 سنة كان بيجي المستشفى كتير قبل ما هو يدخلها ويبقى مقيم فيها. ملامحي اتغيرت وأنا مش فاهمة هو كان بيجي ليه؟

فكملت رحاب وقالت: _عارفة إنك مستغربة وبتسألي كان بيجي هنا ليه، بس أحمد كان بيجي يزور والدته لحد ما حصل اللي حصل.