رواية مصائر مجهولة الفصل الثامن عشر 18 - بقلم سما محمد

ماما هو معقول تكون كل الحكايات زي حكايتك مع بابا؟ أكون أنا الأميرة وهو الأمير. فريدة ابتسمت وقالت: مش شرط تكوني أميرة زي أميرات ديزني وليكي تاج. الشرط إنك تكوني أميرة في نفسك وفي شخصيتك وفي طباعك. وهو برضه مش هيبقى أمير ويجي بحصان يخطف أميرته. لكن هو هيخطفها بلطفه وحنيته. ومهما كان اللطف دايماً بيخطف القلوب، وبالذات لو قلب أميرة زيك. "أميرتي وحبيبة بابا، بيعملوا إيه؟ بصوا لقوا زين وصل. راح واخد فريدة

وحور في حضنه وقال لهم: وحشتوني أوي. فريدة بصتله وابتسمت: وانت كمان وحشتنا. قعدوا على الكراسي اللي في الجنينة. حور قالت: تعرف يا بابا... زين: إيه يا قلب بابا؟ حور: ماما كانت بتحكيلي عنكم وإن انت الأمير وهي كانت الأميرة. زين بص لفريدة وقال: وماما مش قالتلك قد إيه بابا بيحبها؟ فريدة ابتسمتله وقالت: وماما كمان قالتلها عن قد إيه هي بتحب بابا. راح حاضنها. حور قالت: وأنا كمان خدوني معاكم.

"اثبت مكانك عشان مش أفضي المسدس ده في دماغك." عمر دخل لقي ملك حاطة مسدس مياه على رأس ابنه. دخل وهو بيضحك وقال: أدخل ألاقي حبيبتي بتهدد ابني وبمسدس مياه؟ مالك: بص يا بابا، ماما جابت كتب وعاوزة تقرأهالي وأنا مش عاوز. عمر ابتسم: الأهه ما تسيبه يا روحي. ملك بصت لعمر بعتاب وقالت: أنا مكنتش عاوزة أضايقه، أنا كنت جايباله كتب حلوة نقرأهم سوا. عمر قرب منها وحضنها: خلاص يا روحي مش تزعلي. وريني الكتب دي. ملك طلعتهم من وراها.

عمر مسكهم لقي كتب دينية ومصحف صغير. فـ ابتسم وحس قد إيه هو فخور بيها. بص لمالك وقال: مش انت بتحب ربنا ودايماً تقول لماما عاوز أقرب من ربنا عشان يحبني؟ مالك ابتسم بحماس وقال: أيوه يا بابا. عمر: ماما جابتلك كتب بتتكلم عن ربنا وهتخليك تقرب منه. ومعاهم مصحف صغير ليك يا بطل. مالك بفرح وقال: يعني ماما عاوزاني أقرب من ربنا ويحبني؟ عمر: أيوه يا حبيبي.

مالك راح حضن ملك وقالها: أنا آسف يا ماما، مكنش قصدي أزعلك. ينفع متزعليش مني؟ ملك حضنته وقالت: مش زعلانة منك يا روحي. عمر: الله الله، انتوا عمالين تحضنوا في بعض قدامي؟ ملك راحت حضنت مالك وقالت: طب أهو. عمر بهزار: لا تعالولي بقى. وطلع يجري وراهم هما الاتنين لحد ما مسكهم وخديهم في حضنه وقال لهم: طالما مسكتكوا يبقى تعالوا نقرأ الكتب دي. ها جاهزين؟ ملك ومالك: جاهزين. "فـريد: ياروحى مين اللي حامل وبطنها كبرت وبقت زي القمر؟

علا بفرحة طفولية: بجد يا فريد شكلي حلو؟ فريد: ياروحى عليكي يا قلب فريد، ده انتي بقيتي قمر وبطنك دي محلياكي أوي. علا: يعنى أنا مش تخينة وشكلي وحش؟ فريد حضنها: لا ياروحى انتي مش تخينة خالص وأنا بحبك وانتي عاجباني أوي كدة. علا حضنته هي كمان وقالت: أنا بحبك أوي يا فريد. فريد: وفريد بيموت فيكي يا قلبه ومراتُه وأم عياله وأجمل حاجة في حياته. علا حست بوجع في بطنها: آآآه فريد الحقني آآآآآآآه.

أسر طلع على صوت أمه وقال: بابا ماما هتولد كدة. فريد بفزع: عندك حق. فريد شالها بسرعة وخدها في العربية وأسر معاهم وراح بسرعة للمستشفى. فريد: دكتورة دكتورة مراتي بتولد. جاتله دكتورة بسرعة قالت: خدوه أوضة العمليات بسرعة. فريد فضل برا وأيده على قلبه وعمال يدعي ربنا ييسر ولادتها، وجمبه أسر اللي بيرفع إيده وبيقول: يارب ماما تجيب بنوتة وماما تكون كويسة. مسك فريد تليفونه ورن على العيلة كلها. الجد وصل والعيلة كلها معاه. فـ

قال بخضة: إيه يا ابني طمنني. فريد بقلق: عدى ربع ساعة وهي جوه و... وكان لسه هيكمل سمع صوت عياط بنته. فـ يدوب سمع الصوت دموعه نزلت وابتسم وقال: الحمد لله يارب. طلعت الممرضة شايلة بنت وقال: ألف مبروك جالكم بنت. فريد: طيب مراتي عاملة إيه دلوقتي؟ الممرضة: متقلقش هي كويسة. شوية وتقدر تتدخلها. فريد شال بنته على إيديه براحة وحضنها وشم ريحتها وقال: متعرفيش أنا استنيتك بحب قد إيه يا حبيبة بابا. زين ابتسم وقال: ألف مبروك.

فريد ابتسم: الله يبارك فيك يا زين. عمر ابتسم وقاله: ألف مبروك ربنا يجعلها ذرية صالحة. وعايزين نحجز البنوتة لمالك بقى. فريد بص له وقال: بس يا بابا أنا بنتي مش بتتحجز، بنتي اللي تختار. عمر: الأهه ده ابني زي العسل ما شاء الله عليه. مالك قال بلطافة: عمو ينفع أشيل النونو؟ فريد بص لعمر وقال: في دي عندك حق صراحة. زين قال: حيث كدة انتوا سبتوا بنتي من غير حد. عمر: ليه يا عم خير؟ ما أسر موجود أهو.

زين ضحك وقال: عندك حق. أسر قمر ومناسب. فريد: جماعة ماهي مش جمعية. ابعدوا كدة عاوز أشوف مراتي. دخل لقاها على السرير وتعبانة. أول ما شافته قالت بتعب: فريد دي بنتنا صح؟ فريد قرب منها وقال: صح يا قلب فريد. وحط البنت في حضنها. دموعها نزلت وفضلت تحضنها بحب. علا: أنا مبسوطة ومش مصدقة نفسي. فريد: ولا أنا مصدق. وكمل بهدوء: لازم نحمد ربنا على عطاياه لينا ونشكره دايماً. علا بفرح: الحمد والشكر لله. فريد: هتسميها إيه ياروحى؟

علا: ليان. فريد: حلو أوي. علا بصتله وقالت بابتسامة: تفتكر ممكن تلاقي الحب في حياتها زينا؟ فريد: وليه لأ؟