رواية متعة الحياة الفصل العاشر 10 - بقلم عادل عبدالله

كانت خايفة تقعد معاهم لوحدها، لكن أنا طمنتها وقولتلها مفيش حد هيقدر يضايقك لحد ما أرجع. نزلت اشتريت ساعة حريمي من النوع الغالي جداً، وأسورة دهب قيمة جداً. ولما رجعت البيت قعدت مع يارا لبعد العشاء، وبعدين قولتلها: "أظن النهاردة المفروض أنام عندها؟ قالتلي: "نعم؟؟ بتقول إيه؟؟ مش سامعة كويس!! "المفروض أنام عندهااا." "لا يا حبيبي، إحنا مش اتفقنا على كده!!! "وهي دي محتاجة اتفاق يا قلبي!!

ده واجب عليا، متنسيش إنها برضه مراتي ولها حقوق عليا." "وانت كنت ناسي حقوقها دي لما جيت تتجوزني؟ "يا حبيبتي هي مراتي أم ولادي واجب ومفروض عليا، إنما انتي حاجة تانية، انتي مراتي وحبيبتي، انتي اللي في القلب." "خلي بالك، هتروح تنام عندها هتصحى الصبح مش هتلاقيني." روحت مطلع الساعة اللي اشتريتها وقولتلها: "امسكي الساعة دي، وقبل ما تبقى الساعة ٨ الصبح هتلاقيني صاحي وجاي أفطر معاكي." "الله دي حلوة أوي!!

"مش أحلى منك يا قلبي." "انت عاوز تضحك عليا بالساعة دي؟ "لا طبعاً، معقول أضحك على قلبي وروحي، أنا لما شوفتها قولت دي مش تتلبس إلا في أجمل إيد في الدنيا، إيد يارا حبيبتي." "برضه مش هتضحك عليا، بصراحة أنا بغير عليك، مش هينفع اللي انت بتقوله ده." "طيب ولو قولتلك علشان خاطري؟ "خاطرك غالي، لكن... "من غير لكن، علشان خاطري هنعتبرها ضريبة سعادتنا مع بعض." سكتت وأنا بوستها وقولتلها: "الساعة ١٠ الصبح هتلاقيني جاي أفطر معاكي."

"مش كنت بتقول الساعة ٨ الصبح؟! "خليها الساعة ١٠ علشان مش عاوز أصحيكي بدري." "أنا مش عارفة هنام إزاي وأنا عارفة إنك في حضن واحدة تانية." "هكون هناك، لكن قلبي وعقلي هيكونوا معاكي." خرجت من الأوضة وفتحت أوضة سهام ودخلت. اتعدلت سهام وقعدت بعد ما كانت نايمة وقالتلي: "انت إيه اللي جابك هنا؟ "انتي لسه زعلانة مني؟ "مش زعلانة، اتفضل روح عند عروستك." "انتي عروستي وحبيبتي وحب عمري." "انت فاكرني هبلة هتضحك عليا بكلمتين!!

اتفضل اخرج بدل ما أصرخ وأصحي العيال وأعملك فضيحة." "أنا مش خارج من الأوضة دي الليلة دي." "يبقى أنا اللي هخرج أنام بره." "يا بنت الحلال بلاش فضايح، اسمعيني الأول." "من غير ما أسمعك هتخرج بره الأوضة ولا أخرج أنا؟ "عليا الطلاق لنبات احنا الاتنين هنا في الأوضة الليلة دي." "انت بتمسكني من إيدي اللي بتوجعني باليمين بتاعك؟ "لا يا قلبي اسمعيني بس."

"من غير ما أسمعك، مادام حلفت بالطلاق هتنام في الأرض ومش هتنام جنبي على السرير علشان بس اليمين بتاعك." "يعني أبقى متجوز اتنين وعايش في شقة زي دي وأنام على الأرض!!!! أهون عليكي؟ "مادام هونت عليك وهانت عليك العشرة بينا يبقى عادي هتهون عليا." "يا حبيبتي انتي عمرك ما هونتي عليا، انتي بس اللي حبيتك طول عمري." "انت جاي تضحك عليا؟

"وحياتك عندي بكلمك من قلبي، انتي حبيبتي وعمري ما حبيت غيرك. شوفي حتى جبتلك الهدية دي علشان تعرفي غلاوتك عندي." ورحت مطلع الأسورة واديتهالها. بصت للأسورة بأنبهار وقالتلي: "هي حلوة أوي بس برضه مش هتضحك عليا، كفاية إنك كسرت قلبي خلاص، كل اللي بينا انتهى." "يا حبيبتي ما عاش اللي يكسر قلبك، ده انتي قلبي وروحي وعمري." "انت هتجنني!!! اومال اتجوزت عليا ليه؟؟ علشان تفرحني مثلا؟ "أيوه بالظبط كده."

"انت رايق وجاي تتريق عليا شوية وتهزر شوية وأنا مش فايقة." "أنا بتكلم جد، أنا اتجوزتها علشان أسعدك انتي والولاد." "تسعدني!!! انت عبيط بقي!!! "من غير لسانك الطويل ده هفهمك كل حاجة، البنت دي عمها رجل عنده معارف كتير وهيساعدني في شغلي، وفلوسي لوحدها متنفعش. يعني فلوسي دي محتاجة حد زي عم يارا علشان أقدر أكمل وأزودها، ولما أبقى جوز بنت أخوه هيساعدني والخير اللي هيعم هيكون لينا كلنا أنا وانتي والولاد، فهمتي؟

"انت جاي تضحك عليا؟ دي عشرة سنين يا طارق، أنا فاهماك أكتر من نفسك، مش هتعرف تضحك عليا." "صدقيني وحياة حبي ليكي ما بكدب عليكي." "طيب خلاص أنا مصدقاك، اتفضل بقي روح لها وأنا مش زعلانة." "أروح لمين؟؟ انتي بتهزري؟ حد يسيب القمر ويروح للنجوم!!!! "آه خلي النجوم تنفعك." "ورحمة أبويا ما هسيبك الليلة."