رواية ميراث نور الفصل الحادي والسبعون 71 - بقلم لينا بسيوني

"نور" يا ابن الكلب يا أيسر! عمرو أديب عارض فيديو لواحد شبهي بالظبط وهو بيقتحم الشركة اللي أنا شغال فيها وفي إيده رشاش آلي، قتل كل المهندسين اللي شغالين في وردية بليل وبعدها اختفى! عمرو أديب كان بيعلق على الفيديو وعمال يعيد الحتة اللي اختفيت فيها. شوية ولمس (الاير بيس) السماعة اللي على ودنه وقال: "ومعانا مداخلة تليفونية من البشمهندس الدكتور... رئيس قسم الكهربا بكلية الهندسة. أهلاً وسهلاً بحضرتك يا دكتور...

قولنا إيه الحكاية؟ الدكتور قال وهو بيعيط ومنهار: "اللي حصل يا أستاذ عمرو جريمة بشعة... ارتكبها نور ناير اللي في الفيديو ده. من 13 سنة نور ناير كان طالب عندي وبأكد لحضرتك إنه ساحر مخضرم و... الدكتور قطع كلامه وقعد يعيط. عمرو أديب كان مندهش وقاله: "ساحر مخضرم!! لا أنا عايز حضرتك تهدى خالص وتحكيلنا الحكاية بالتفصيل عشان السادة المشاهدين اللي في المنازل." الدكتور قاله: "الحكاية إن.... سمعنا صوت تخبيط ورزع تحت البيت.

حنوش اختفى ورجع تاني وقال: "بوليس! لازم تهربوا من هنا حالا... هاتوا أيديكم." أدينا لحنوش أيدينا واختفينا في الوقت اللي البوليس كسر فيه الباب وهجم على البيت. اتنقلنا بيت حنوش في ليبيا. حنوش قال: "أيسر ابن الكلب بعت حد يتشكل على شكلك ولبسك في حيطة، قولتلكم من الأول خالص نخلص عليه! نصير قاله: "مش وقته يا حنوش... المهم دلوقتي إنه بقى بيلعب على المكشوف... لازم نروحله. وادي عبقر محدش يعرف هيعمل إيه تاني!

قولتلهم: "هيعمل إيه تاني؟ خلاص أنا اتدمرت واتفضح. التحريات هتثبت إني كنت شغال في الدجل والشعوذة في قرية النيارين... العيلة كلها اتدمرت! أنا مش رايح في حتة أنا هفضل في مكاني ومش هسمح لأيسر يتلاعب بيا." مارو ونورا كانوا مشغولين في التليفون بيتابعوا الأحداث. فجأة مارو اتنفض من مكانه وقال: "الحقوا! بصينا كلنا في شاشة الموبايل، واتصدمنا!

فيديو تاني ليا وأنا باقتحم محل مجوهرات وبقتل كل اللي فيه، بعدها بروح عند الكاميرا اللي بتصور المحل وبحط ورقة في وش الشاشة... الورقة كانت مكتوبة بلغة الجن! حنوش ترجم وقال: "أيسر عايزنا نروح سوق لومي فودو! بصينا على التعليقات اللي على الفيديو، كلها كانت هاشتاج "القبض على نور السفاح! " الدنيا اتقلبت والفيس كله بقى بيتكلم عن الساحر السفاح اللي عامل حالة زعر في البلد! مارو قال: "لازم نروح...

أيسر هيفضل يلعب اللعبة دي لحد ما نروح." أصرت على رأيي وقولتلهم: "مش هنمشي على مزاجه... كده كده خلاص أحنا اتدمرنا." اتصدمنا كلنا لما ظهر فيديو تالت وأنا باقتحم مول تجاري وبقتل كل اللي فيه! نصير قال: "لازم نروح يا نور... ذنب الناس اللي بتموت دي في رقبتنا! كلهم انضموا لنصير ضدي! مكنش قدامي غير إني أنصاع لرأيهم ونروح سوق لومي فودو. انتقلنا أنا وحنوش ونصير ومارو، وسبنا نورا وسندس في الكهف.

حنوش كان بيشرحلنا السوق وقالنا إنه سوق مختص ببيع أي حاجة ليها علاقة بالسحر الأسود. السوق كان كله حاجات غريبة بتستخدم غالبًا في سحر الفودو. سحالي مجففة، رؤوس ثعابين، أقدام فيلة، قلوب خيول، أيادي شمبانزي، رؤوس فهود، أحجار لتحضير الجن وأحجار للوقاية من الجن، حتى دمى الفودو بتتباع جاهزة بالسحر بتاعها، يدوب بس هتحط عليها صورة اللي عايز تأذيه! نصير قال: "إحنا هنفضل ماشيين كده كتير...

قطع كلامه طفل أفريقي كان بيشد في هدومه وشاور لنا نمشي وراه. مشينا ورا الطفل اللي فضل يدخل في شوارع وحواري لحد ما وقف عند بيت أو بمعنى أصح كوخ. الطفل شاور لنا على الكوخ ولسه هيجري، نصير مسكه من قفاه وقاله: "تعالى هنا يا واد... بيت مين ده؟! الطفل مردش عليه لأنه مكنش فاهم اللغة، بس فهم من انفعالات نصير إنه بيسأل عن صاحب البيت. الطفل قال: "ماستر فودو." فحنوش قال: "قصده يقولك إنه بيت كبير السحرة في المنطقة."

الطفل فلت من إيد نصير وجرى. قربنا من الكوخ وخبطنا على الباب. فتح لنا راجل أفريقي عجوز، بص فينا وقال كلام غريب في آخره اسم أيسر. هزيناله راسنا بالتأكيد، فابتسم وفتح الكوخ وهو بيرحب بينا! مدخلناش، كلنا نصير ومارو فضلوا على الباب ودخلت أنا وحنوش. العجوز قال بإنجليزية ركيكة: "فين الفلوس؟ قلناله باستغراب في صوت واحد: "فلوس إيه؟ قالنا: "حق الحجر! قلتله: "حجر إيه؟ إحنا مش عايزين أحجار! مش أنت قلت إنك تبع أيسر؟!

"ترجمه يا حنوش." حنوش ترجم كلامي، فالساحر اتعصب وعينه كانت بتطق شرار وبدأ يتكلم بعصبية. قلت لحنوش: "هو ماله؟ قالي: "معرفش بيهددنا وبيقول إنه مش عيل صغير عشان نلعب معاه وإنه ماستر الفودو في المنطقة وكل السحرة اللي هنا تحت أمره ولو مدفعناش حق الحجر واتمينا الصفقة الموضوع مش هيبقى لطيف." قلت لحنوش: "قوله إن شكله فاهم غلط... إحنا الاتنين بيتلعب بينا!

حنوش لسه هيشرحله، لقيناه اتعصب ومسك ميكروفون صغير جنبه وقال كلام. عرفت بعد كده إنه كان بينادي على حد! قلت لحنوش: "قوله بكام الزفت ده... مش عايزين مشاكل! حنوش سأل الساحر وبصلي وقالي: "بيقولك عايز 10 آلاف دولار!!! قلتله وأنا مصدوم: "10 آلاف عفريت لما يركبوك انت وأيسر... بينا يا حنوش." فتحنا باب الكهف عشان نخرج، لقينا مارو رافع عصايته ونصير رافع سيفه. واندشنا من كمية سحرة الفودو اللي واقفين قدام الكوخ.

حنوش قال: "بينا من هنا يا جماعة... هاتوا إيديكم بهدوء عشان نتنقل." مسكنا إيده وجه ينقلنا، فشل! نصير قاله: "إنت عايز تنقلنا في مستعمرة الفودو دي... إنت مجنون يبني! وبص لمارو وقاله: "هتبطل السحر اللي حوالينا بالعصاية ولا أستخدم السيف؟ مارو قال: "لا خلي السيف هستخدم العصاية." رفع عصايته في السما وقالنا: "أنا هوقف السحر وأرهبهم بس.."

السحرة كلهم انتبهوا لمارو اللي رافع عصايته. مارو تمتم بالتعويذات واستنى يحصل حاجة بس للأسف محصلش أي حاجة! نصير قاله: "فيه إيه يا مارو؟! مارو قال: "المفروض السما... مفيش وقت استخدم إنت السيف! نصير مسك السيف ووقفه عمودي وقال: "ننح! ننح مستجبش ولا ظهر.. نادى عليه أكتر من مرة مستجبش برضه! السحرة كانوا بيتمتموا بتعويذات وهما بيقربوا علينا. نصير قال: "ننح مش راضي يخرج، شكله مش هيخرج غير بالتعويذة وللأسف ملحقتش أحفظها!

كلهم بصولي وقالولي: "القميص... لف يا نور يمكن يشتغل! حنوش قال: "بسرعة يا نور أنا شايف إنهم بدأوا يحشدوا جن... جرب القميص عشان لو كده هنضطر نحارب بأيدينا." غمضت عيني ولفيت لفة كاملة واتحولت لتنين. كل السحرة رجعوا لورا في اندهاش وانبهار. حنوش قال: "يبقى مش باطلين السحر!!! اركبوا بسرعة على ظهر نور! ركبوا فوق ضهري وهربت بيهم من المكان. طرت فوق الصحرا. نصير قال: "هو إيه اللي حصل في الكوخ.. الساحر كان عايز إيه؟

حنوش قاله: "كان عايزنا نتم صفقة ونشتري حجر جوهرة العقرب! نصير قال: "وتممتوها ولا حصل إيه؟ حنوش قال: "متمنتهاش طبعًا! نصير قال: "ليه متمنتهاش!! إحنا كده معملناش اللي جينا عشانه هو عايزنا نتم صفقة الحجر! حنوش قال: "ونجيب منين إحنا 10 آلاف دولار! مارو قال: "يا جماعة إنتوا مش واخدين بالكم من حاجة مهمة العصاية بتاعتي مش شغالة! حنوش قاله: "ما أنا معرفتش اتنقل.. عادي يعني إحنا كنا وسط سحرة فودو."

مارو قال: "ما إحنا بعدنا أهو ومش شغالة برضه! هبطت بيهم في مكان هادي ورجعت لهيئتي. مارو فضل يجرب في العصاية بتاعته، مشتغلتش! حنوش جرب قدراته اختفى ورجع تاني عادي! نصير حط السيف عمودي وقال: "يا ننح.. ننح ظهر." نصير قاله: "يا سلام إنت جاي تظهر دلوقتي!! مظهرتش ليه من شوية لما استدعيتك؟

رد وقال: "عشان إنت غبي.. أنا مظهرتش عشان كنت بحميك. السحر اللي كان حواليكم سحر معقد ولو كنت فكيته بالسيف كان اللي عامل السحر هيقدر يتحكم في السيف عن بعد مؤقتًا.. أنا شكلي وقعت مع هواة ولا إيه!!! دا ناير كان يفهمها قبل ما تطير.. برضه الشغل مع المحترفين بيفرق! حنوش قال: "اخخ... أنا عرفت كده العصاية ليه مش شغالة! بصيناله باستغراب فقال لمارو: "فاكر لما العصاية اختفت واتشعلقت في الهوا بعد ما فكيت السحر في جزيرة الدمى!!

مارو خبط راسه وقال وهو متوتر زيادة عن اللزوم: "يعني أيسر كده بدل العصاية لما اختفت... العصاية دي لازم ترجع." نصير جرب قول لننح يجيب أيسر هنا. نصير لسه هيقول لننح، ننح قطع كلامه وقال: "مش هينفع! نصير قاله: "ليه؟ بصيناله باستغراب فقال: "الراجل حامى نفسه.. محترف.. مش زيكم! نصير قاله: "بقولك إيه خش في السيف... إنت طالع تبكتنا.. خش يا عم في السيف مش ناقصاك." ننح اختفى.

فقلتلهم: "زي ما قلتلكم قبل كده المفروض مكنش نمشي وراه ونلعب لعبته، اللعبة خلاص وضحت، أيسر بينهكنا وبيحاول يجردنا من الأسلحة اللي معانا. ركزوا معايا عشان المرة دي.. إحنا اللي هنلاعب أيسر مش هو اللي هيلاعبنا." *** "زيجا" جريت من بيت عيلة ناير في المقطم ناحية المكان اللي قالي عليه أيسر في الجيزة، كنت ببص في الساعة وبحسب الوقت. فاضل 6 دقايق أجيز يحضر، جريت بأسرع ما عندي. اتفاجأت بيا بقف مرة واحدة

وصوت أجيز بيقول على لساني: "رايح فين يا زيجا؟ كدا يا راجل تنيمني؟! قلتله: "إزاي المفروض فاضل 5 دقايق!! أجيز طلع لساني وبص عليه بعيني قال وهو مذعور: "أعععع وديت لساني فين؟ كنت لابس كاب ومغطي نص وشي بنظارة كبيرة سودة، الناس كانت واقفة بتتفرج عليا وأنا بتخانق مع نفسي (أجيز) قالى: "بتتحد مع أيسر ضدي.. وخنقني بإيدي!! روحي كانت هتطلع فشديت إيدي من حوالين رقبتي وقلتله: "افهم يا أجيز!!

قلتله: "مش هفهم.. إحنا لازم نموت دلوقتي." شلت إيده وأنا بقوله: "وسع يا أجيز خلينا نتفق على حاجة تانية غير الانتحار لازم ننتقم من أيسر." كعبلت نفسي ووقعت على الأرض فأجيز حط رأسي في التراب وهو بيقول: "ننتحر الأول وبعد كده نشوف موضوع أيسر! الناس اتجمعت حواليا وبدأوا يفتوا وهما بيفسروا حالتي! اللي بيقول دا ستروكس يا معلم، منهم لله ولاد الكلب بيدمروا شبابنا. ومنهم اللي قال دا مسعور، واللي قال دا ملبوس.

سمعت واحد بيقول: "أنا هكلم الإسعاف محدش يقربله." شوفت رجلين بتقرب عليا وسمعت صوت أيسر وهو بيقول: "كنت فين يا زيجا يخربيتك.. يا جماعة بعد إذنكم ادونا مساحة دا مجنون وهربان من العباسية." وطلع كرنيه مزور وقال: "أنا الدكتور المعالج بتاعه." وقرب مني وشكني بإبرة... اغمى عليا. صحيت لقيت نفسي متكتف تاني في سرير المستشفى! قلتله بعصبية: "إنت بتستعبط يا أيسر!!! مكتفني ليه؟ مش أنا عملت اللي إنت عايزه؟!

ضحك وقالي: "إنت عبيط يا زيجا؟ مفكرني هأمنلك تاني؟ إنت هتفضل محبوس هحررك بس لما أحتاج أبعتك مشاوير... وحضر نفسك عشان عندنا مشوار." قلتله: "مشوار فين؟ قالي: "ليبيا.. كهف حنوش.. مرات نور وبنته لوحدهم هناك." وسكت شوية وقال: "تفتكر نور هيختار بنته ولا مراته؟!