رواية ميراث نور الفصل الرابع والأربعون 44 - بقلم لينا بسيوني

هموت وأعرف إيه اللي حصلنا! الواد مارو البغل مش راضي يقولنا على حاجة. حاولنا بشتى الطرق الممكنة إننا نخليه يتكلم. مرات بالترغيب وكتير بالترهيب وبرضه مفيش فايدة. وعدنا إنه يعالجنا وحاول كتير بالسحر وفشل وقالنا ببرود: –شكل الموضوع ليه علاقة بيكم انتوا، واستعدادكم النفسي وإيمانكم بقدراتكم و... ورغي في شوية كلام مالوش لازمة من بتاع التنمية البشرية والجنية، مفاده إن العلاج في إيدينا أحنا.

فاتجمعت كلنا أنا ونصير وحنوش ونورا قدام الكهف في الوقت اللي البيه مارو مشغول فيه في الخيمة مع زيجا. قولتلهم وأنا ببص على الخيمة: –واضح إن مارو البغل هيسبنا كده مش فاهمين حاجة، فلازم على الأقل نحاول نرجع لطبيعتنا، يمكن لما نرجع نفتكر لوحدنا كل حاجة. نصير قالي بإحباط: –هنرجع إزاي يانينو؟!! شكلنا بوظنا خالص!! قولتله:

–أولاً هنتفائل، وهنبعد عن الطاقات السلبية اللي طالعة منك.. فيه إيه يانصير أحنا لسه بنقول يا هادي، هتقفلنا من أولها!! حنوش قال: –نينو عنده حق المفروض نتفائل، أنا قريت في كتاب السر عن طاقة الجذب اللي هو لما تفكر في حاجة بطريقة إيجابية بتحصل وبتتحقق، على عكس لو ركزت تفكيرك على حاجة سلبية الدنيا بتبوظ منك أكتر. قولتله: –الله ينور عليك ياحنوش. نورا قالت:

–طيب إيه رأيكم تبدأوا بإختبار قدراتكم وأنتم بني آدمين، أنا أسمع إن الجن لما بيتشكلوا بني آدمين بيبقوا في أقوى صورهم ومفيش راجل يقدر يهزم جني متشكل. حنوش قالها وهو بيقرب ناحية صخرة: –برافو عليكي يانوشة. حنوش شمر دراعاته وضرب الصخرة بإيده بقوة، الصخرة محصلهاش حاجة وإيد حنوش وجعته جامد وفضل يتنطط وهو بيسب ويلعن، وقال: –المفروض الصخرة تتفتت، إيه اللي حصلي؟!!

نصير قرب ناحية نفس الصخرة وضربها بإيده وهو متردد، فاتفاجئنا بالصخرة أتشققت. نصير بص لنا وهو فرحان وأتحمس أكتر وضرب الصخرة بقوة فاتفتت، اتنطط وهو بيضحك وبيغيظ حنوش. حنوش أتجنن وقال: –إزاي أنا عفريت من الجن، المفروض وأنا متشكل أكون أقوى منك!! نورا قالت: –أكيد الحاجة اللي حصلتلنا أثرت علينا كل واحد بشكل مختلف! حنوش مكنش مركز مع كلامي وسابنا ودخل الكهف. شوية وطلع بشنطة سفر وعدى من قدامنا. قولتله وهو ماشي:

–رايح فين ياحنوش؟ قالي: –هروح أتعالج وأجي!! نصير كان بيغيظ حنوش وبيستعرض عضلاته قدامه فحنوش تجاهله وقالي: –هبعد عن الطاقات السلبية زي ماقولت يانينو… وبص لنصير وقاله: –ماشي يانصير أنا هرجع.. بس هرجع حنوش العفريت بتاع زمان. وخد نفسه ومشي. نصير بصلي وقال: –متقلقش على حنوش أنا قصدت أغيظه عشان عارف إنه مبيتحركش إلا كده، أنا واثق إنه هيلاقي حل.. يلا دورك بقى يا نينو لف وحاول تتحول لأي حيوان. قلتلهم: –هحاول أتحول لحصان.

لفيت لفة كاملة وأنا بفكر في الحصان، إيديا طلعت لقدام ووشي بدأ يبقى مطاول وظهرتلي حوافر واكتمل تحولي. نصير قال: –هو كويس… قريبة مش بعيدة.. حمار.. ارجع تاني بني آدم بقى. لفيت لفة كاملة عشان أرجع بني آدم لقيتني بقيت سلحفاة وبعد كده كلب، حصان، أسد، رجعت بني آدم، بعد كده بقيت عرسة، قرد،.. نصير قرب عليا وقالي: –بقولك إيه أهدى اثبت على حاجة أبوس إيدك. ومسكني فرجعت بني آدم. قالي بإندهاش: –إنت حسيت باللي حسيت بيه؟!! قلتله:

–حسيت بإيه؟ قالي: –هات إيدك كده تاني؟ أديتله إيدي فغمض عينه، فجأة لقيتني بتحول لأرنب، قلتله: –فيه إيه؟ قالي: –ثواني كده!! غمض عينه تاني فلقيتني بتحول كنغر، فتح عينه وغمضها تاني فرجعت بني آدم… قلتله: –فيه إيه يا نصير.. ما تفهمني؟ قالي: –الله حلوة اللعبة دي أوي.. تقريبًا القميص بيستجيب لخياالي أنا لما ألمسك. قلتله: –مش فاهم يعني إنت دلوقتي اللي بقيت بتتحكم في تحولي؟ قالي:

–تقريبًا أه.. ممكن زي ما قالت نوشة الحاجة أثرت على كل واحد بشكل مختلف. وعلى ما أعتقد إن القميص بينصاع ليا عشان أنا اللي صنعته وكمان عشان أنا ورثك ففي كونكشن بيني وبينك فتقريبًا كده في ميكس حصل بينا احنا الاتنين يا نينو!! بس أنا عايز أجرب حاجة كده عشان أطمن. قلتله: –إيه؟ مسك إيدي تاني وغمض عينه وبعدها فتحها وقال: –أيوا أمان كده.. شايفة أبوكي يا نورا؟ قالت: –لا.. هو راح فين؟!! نصير قال لنورا وهو مبتسم:

–أظهرهولك تاني؟!! تقريبًا أنا بقيت الريموت كنترول بتاع أبوكي!! لمسني تاني فظهرت، قال: –حلو الميكس ده يا نينو.. بس محتاجين نلاقي تفسير برضو.. وسكت شوية وكمل وقال: –بصوا بقى زي ما مارو مخبي علينا الحقيقة إحنا هنخبي عليه اللي وصلنا له ده. وبص لنورا وقالها: –ماشي يا.. بصينا لنورا ملقنهاش وأتفاجئنا بيها بتجري بسرعة لآخر البلد وبترجع تاني. قالت: –طب إيه… مفيش حل للموضوع ده؟! نصير قالها: –اقعدي كده على الأرض واقلعي الحذاء.

قعدت على الأرض فنصير قلعلها فردة من الحذاء وبص على النباتات اللي في الحذاء وقال: –كل دي سلوك! السحر اللي في الحذاء ده معقد جدًا وخطير بس على حسب الطريقة اللي شغال بيها النباتات تعتبر هي المسئولة عن السحر اللي فيه وأنا شايف إن فيه نباتات ميتة فتقريبًا لو شيلناها ممكن يتصلح. نورا قالتله بقلق: –عمو نصير!! أوعى تبوظ الحذاء!! قالها: –عيب عليكي يا نوشة هو أنا تلميذ!! مد إيده في الحذاء فالنباتات قفشت في إيده ومرضتش تسيبها،

لقيته بيبصلي برعب وبيقولي: –الحقني يا نينو الحذاء قفش في إيدي مش راضي يطلع!! جيت أشد الحذاء، لقيت الحذاء نزل من إيدي على الأرض وشد معاه نصير وقعه على الأرض. فرده الحذاء جريت وسحبت معاها نصير وفضلت تجري وتنطط وهي مجرجراه وراها. جريت ورا فرده الحذاء ونصير، بس محصلتهوش، اتفاجئت بنورا بتجري جنبي على رجل واحدة، سبقتني ونطت على الجزمة ومسكتها. أول ما مسكتها، الجزمة سابت دراع نصير والنباتات دخلت جوا الحذاء تاني.

نصير طلع دراعه واللي كان متشرح من النباتات، بص على إيده والحذاء وهو بيقول: –عنيف أوي الحذاء ده!! نورا لبست الحذاء وهي بتقول: –خلاص أنا عرفت هحل المشكلة إزاي… بس أرجوكم محدش ييجي ناحية الحذاء بتاعي تاني. قلتلها: –شكلي هقلعهولك أصلًا يا نورا. قالتلي: –لا أرجوك يا بابا.. أنا مش هرجع عاجزة تاني.. اديني أسبوع وإن شاء الله هقدر أصلحه. قعدنا على كده كام يوم بنختبر في قدرتنا وبنحاول نتغلب على المشكلة.

حنوش كان بيروح ويجي علينا. مرة يقولنا إنه راح شرم الشيخ للجزيرة المسحورة. ومرة نلاقيه قاعد قدام الكهف فاتح التليفون وبيعمل يوجا. كان بيستفز وهو شايفنا بنحاول نتكيف على الوضع الجديد ونستعيد جزء من قدرتنا. نصير قرر إنه يطور قدراته كبني بني آدم ويبقى ساحر قوي. فتحنا كتب السحر مع بعض وبدأنا ندرس بتعمق الحاجات اللي فايتنا واللي ضعاف فيها. من ناحية بنحاول نلاقي علاج ومن ناحية تانية بنوسع مداركنا عشان قدرتنا اللي ضعفت.

لحد ما اتفاجئنا في يوم بحنوش داخل علينا وبيقولنا وهو فرحان: –مش هتصدقوا اللي حصل!! قلناله أنا ونصير: –إيه؟ قال بفخر: –انتوا عارفين طبعًا إني حاولت وجربت الشكاكة والحكاكة واليوجا والشاكرات وكل العك ده!! اكتشفت إن الحل في حاجة واحدة بس.. الحاجة الوحيدة اللي هتستفز روح الجن اللي جوايا… السمك… مش هتصدقوا لما حاولت آكله حصلي إيه!! قلناله بفضول: –حصلي إيه؟ قال: –روح الجن اللي جوايا استفزت و…. ما تيجوا نشوف أحسن!!

رحنا وراه، فراح ناحية صخرة وقال: –يا أستاذ نصه شوف دي كده. ونزل بقبضة إيده على الصخرة فأتحولت لرمل، نصير سقفله وقال: –الله عليك يا حنش. حنوش قال: –مش كده بس.. هاتوا إيديكم كده. مسكت إيده أنا ونصير وشبكنا إيدينا في بعض وعملنا دايرة. قالنا: –غمضوا عينيكم. غمضنا عنينا فلقيناه نقلنا بس نقلنا مسافة صغيرة حوالي حوالي كيلو متر عن الكهف وقالنا:

–ده أخرة في النقل.. بس هي كخطوة خطوة كويسة.. ممكن أتمرن بعد كده وأنقلكم 3 كيلو، 4 كيلو، 10 كيلو لحد ما ربنا يسهل وأقدر أنقل من بلد لبلد. نصير قاله: –طب عرفت تتشكل أو ترجع جني؟ حنوش رد: –لا لسه مش عارف أتشكل.. ثابت على شكلي ده.. تقريبًا كده بستعيد قدراتي واحدة واحدة. نصير قاله: –بس متقولش للواد مارو على حاجة. حنوش قاله: –آه طبعًا هو أنا عبيط.. ماشي يا مارو البغل. فضلنا على كده طول الشهر اللي مارو مشغول فيه في الخيمة.

مارو كان بيرجع كل يوم هو وزيجا على نص الليل وكان بيسألنا ديما لو فيه جديدة، بس إحنا كنا مخبيين عليه. لحد ما جه آخر يوم في الشهر المعاد اللي اتفق عليه مع زيجا. كنا قاعدين نتعشى وفتح معانا الحوار وقال: –إيه الأخبار مفيش حاجة جديدة؟ قولتله: –الجديد كله عندك… مش ناوي برضه تقول إيه اللي حصل؟ قال بتقل دم: –حصل وطحينة. حنوش قال بهمس: –أبو تقل دم أمك الجنية. وقاله بصوت عالي:

–يا مارو يا بني حاول تنقذنا، أنا النهاردة جيت أختبر قدراتي وأخبط إيدي في الصخرة، إيدي وجعتني، أرجوك يا مارو يبني أنا مش حمل بهدلة على آخر أيامي. مارو تجاهل كلام حنوش وبص لسندس وقالها: –خالتي سندس.. عملالنا إيه النهاردة على العشا؟ سندس ردت عليه وقالت: –محشي. زيجا دخل في الكلام وقال: –الله محشي.. ده أنا بحبه أوي. حنوش قاله: –أنا ملاحظ إن انت بقى ليك رأي وليك وجبة وعايش وسطنا عادي كده!!

هي مش المدة بتاعتك كان آخرها النهاردة! مارو رد عليه وقاله: –هانت فاضل ساعتين.. لو موفاش بوعده هو عارف هعمل فيه إيه. زيجا رد عليه وقال: –عيب عليك… زيجا طول عمره بيوفي بوعده وهتشوفوا بنفسكم. حنوش قاله: –أنا مش مطمنلك يالا!! وبالفعل حنوش طلع عنده حق وصدقت ظنونه، الساعة جات 12 واتفاجئنا براجل أربعيني فتح الكهف ورما علينا حاجة مشفناهاش وأغمى علينا. صحينا لقينا نفسنا متكتفين بالجنازير ومرميين على الأرض.

فوقنا كلنا في وقت واحد. نصير كان جنبي وحنوش قدامي وسندس ونورا ورايا. مارو كان بعيد عننا، قدام شوية عند الساحر اللي فتح شنطته وحضر سكاكينه وطلع ورقة فيها تعويذة، وقال لزيجا: –إنت واقف تتفرج عليا!!! خش ياض انقل الكتب والصناديق اللي قلتلي عليها وحملها في العربية. ورماله مفاتيح العربية وقاله: –عربية نص نقل بيضة هتلاقيها مركونة جنب الكهف.

زيجا خد منه المفاتيح وراح ناحية الأوضة وهو بيحاول يتحاشى نظرات عينينا اللي كانت بتبص له بإحتقار. وقف عند أوضة الكتب وفك التعويذة اللي عليها والقفل وبدأ يشيل الكتب والصناديق ويطلع بيها بره الكهف. في الوقت ده كان الساحر بيحضر تعويذات وبخور وأدوات شبه أدوات الجراحة. لفت نظره عصاية مارو اللي مرمية جنبه، مسكها بإيده فأتكهرب فرماها على الأرض تاني وقال: –يابن الكلب.!!! .. معزومة عليها.. دي لقيتها فين دي؟!!

وقرب من مارو وقاله: –جبت العصاية دي منين؟ في الوقت اللي كان مشغول فيه بسؤال مارو وضربه وتعذيبه نصير بصلي وهز راسه وبص لحنوش وهز راسه وحاول يسلت إيده من الجنازير. قدر بقوته يسلت إيده وقرب إيده مني ولمسني، فأتحولت لفار صغير والجنازير وقعت من عليا. الساحر شافني أول ما جريت في الكهف، فشاور لزيجا اللي كان خارج بالكتب عشان يمسكني وقاله: –إمسك ابن الكلب ده!! زيجا حاول يمسكني بس معرفش.

في نفس الوقت حنوش كسر السلاسل اللي على جسمه واتحرر. الساحر قال لزيجا: –بسرعة سيب ده وتعالى إمسك.. مكملش كلمته لما لقى حنوش بيهجم عليه، فرمى عليه سكينة كانت هتيجي في حنوش، بس زيجا نط على حنوش وثبته وقدروا يسيطروا عليه لما الساحر رمى عليه تعويذة نيمته. الساحر اتفاجئ بنصير اللي كسر السلاسل هو كمان بيهجم عليه، فرمى عليه هو كمان حاجة نيمته. مكنش فاضل إلا أنا وأنا متحول فأر ومش عارف أرجع أو أتحول لأي حيوان تاني.

الساحر لمس جدران الكهف وتقريبًا أبطل السحر في الكهف فرجعت بني آدم تاني وظهرت قدامه. زيجا قرب مني ومسكني وكتفني بالجنازير تاني. الساحر رجع السحر للكهف ورمى عليا تعويذة شلتني، بقيت شايف اللي بيحصل وعقلي حاضر بس جسمي مشلول. بصيت على مارو لقيته مغيب خالص تقريبًا اداله حاجة مخدرة. نورا كانت في حضن سندس اللي كانت بتدعي وبتقول: –يارب اضرب الظالمين بالظالمين وطلعنا منهم سالمين. الساحر بص لزيجا وقاله: –نقلت كل حاجة للعربية؟

هزله راسه بالموافقة. فقاله: –عينك بقى على ولاد الكلب دول على ما أخلص.. مش عايز فوضى تاني. الساحر قرب بالسكينة من مارو وهو بيتمتم بتعويذات ولسه هيشق صدره، وقف فجأة وقال: –أنا حاسس بطاقة قوية بتقرب على الكهف!!! وبص لزيجا وشاورله وقال: –إخرج شوف إيه اللي بيحصل بره بسرعة!! زيجا خرج وشوية ورجع وهو ملهوف وقال: –جيوش.. جيوش من الشياطين بتقرب على الكهف!! الساحر قاله: –شياطين!!! ودول جايين ليه؟! زيجا قاله وهو بيشاور علينا:

–أكيد جايين ليهم…