رواية نقاء الفصل الثالث 3 - بقلم ندى حسين

سندت على المخدة، دماغها. والباب فتح و.. -سليم! أي اللي جابك؟ -أمك بعتتلي رسالة بتقولي إنك ولدتي. فرح بصت لوالدتها. -والله يا بنتي، قلت يجي يطمن عليكي ويقف جنبك. -يعني لولا هي بعتت الرسالة ما كنتش جيت؟ -وأنا أعرف منين؟ -آه صح، أدي جيت. أي اللي هيتغير؟ ما عندكش رد، صح؟ وجودك ملوش لازمة. شكراً على الواجب. اطلع برا يا سليم. -سيبيه يا بنتي يشوف ابنه. -ابنه!!!

ضحكت بتعب. هو أصلاً ما سألش عليه، ولا اهتم الفترة اللي فاتت حتى يسأل عليا، ولا كأن بينا عيش وملح ولا حاجة خالص. ما صدقت. انت عايز تشوفه فعلاً..... ودت وشها الناحية التانية. -بردوا مش هيرد. روح ما كان ما جيت يا سليم. امشي. مش عايزة أشوفك. خرج من الأوضة. -ليه يا ماما عملتي كده ليه؟ -عشانك. -بس أنا مش عايزة. حتى وجوده مبقتش حابة. عشان خاطري متعمليش حاجة من غير ما تقوليلي. -خلاص يا بنتي، حقك عليا. ارتاحي.

دخلت عليهم الدكتورة تطمن على فرح. -عاملة إيه دلوقتي يا فرح؟ -الحمد لله يا دكتور. -شفتي عبد الرحمن؟ -خلاص استقريتي على الاسم؟ -أيوه. -أيوه يا ستي، شفت عبد الرحمن وزي القمر. دلوقتي هجبهولك تحاولي ترضعيه وهنشوف هيستجيب ولا لأ. -هو ممكن ما يرضعش مني؟ -ممكن. منسبقش الأحداث ونسيبها على الله. كل خطوة لازم تسيبها على الله. -ونعم بالله. -هروح أجبهولك بقى. خرجت الدكتورة تجيب الطفل. فرح خدته منها. عينيها دمعت وابتسمت.

فضلت تردد: مشاء الله، مشاء الله. -شايفه يا ماما حلو إزاي؟ مناخيره صغيرة وعينه مسحوبة وشعره ناعم. فتحة بؤقه صغيرة خالص وصوابعه جميلة إزاي. كل حاجة فيه حلوة مشاء الله. -أيوه يا بنتي. ربنا يباركلك فيه ويحفظه يا رب. بدأت تحاول ترضعه، مش بيستقبل منها. قعدت تحاول كذا مرة والطفل مش بيستجيب منها. -فرح بخضة: مش راضي يا دكتورة. -اهدي. عادي جداً. عضمهم بيبقى ضعيف، ده طبيعي.

-إحنا هنحاول تاني. هجبلك ببرونة تحاولي على قد ما تقدري تمليها ونحاول نرضعه منها. -تمام. والدتها خرجت تجيب ببرونة ورجعت. فرح حاولت على قد ما تقدر تملها وتحاول معاه. الدكتورة خدته منها وحاولت معاه وبدأ يستجيب ببطء شديد. -خدي دي خليها جنبك. -هو لحق؟ -كدا كويس أهو الحمد لله. رضع شوية وده ممتاز جداً. في أطفال تانية بتاخد صناعي، فالحمد لله. -الحمد لله.

-أنا هاخده دلوقتي وأعمله شيك أب كامل عليه وهخلي الدكتورة تكتبلك كل التقارير. ونشوف بقى رحلة العلاج هتبدأ إزاي. اللي عايزاه منك دلوقتي إنك ترتاحي وتطمني، لأنك لسه هتتعبي معانا شوية. -إن شاء الله خير. -شكراً يا دكتورة. مش عارفة أقولك إيه بجد. -متقوليش حاجة. وارتاحي. ده واجبي. خرجت وفرح اطمنت شوية وهديت وراحت في النوم. ****

الدكتورة بتعمل فحوصات كاملة للطفل وبتكشف على جسمه كامل وتكتب في التقرير. عملوا تحليل كروموسومات تاني يتأكدوا نوع المتلازمة إيه. عدى أسبوع على الفحوصات والكشف وفرح في المستشفى. بتحاول ترضع عبد الرحمن وتشيله لحد ما الدكتورة تيجي تاخده. -حمد الله على سلامتك. ده إحنا بقينا زي الفل خالص أهو. -الحمد لله. البركة فيكي. -لا ده إنتي اللي روحك حلوة عشان كدا بترجعي أقوى وبسرعة. -ربنا يكرمك يا رب. -يلا اجهزي ومستنياكي في المكتب.

-حاضر جاية وراكي. سابت عبد الرحمن لوالدتها ودخلت للدكتورة. -تعالي اقعدي. -خير، طمنيني إيه الأخبار؟ -طبعاً بناءً على التحاليل والفحوصات الكاملة الأسبوع ده كله، ابن حضرتك عنده متلازمة داون ثلاثية. وده الحمد لله النوع الأكثر ظهور. -طب الحمد لله.

-إحنا عندنا مشاكل في الغدة وده اللي هنبدأ فيه العلاج. عملنا سونار على مناخيره. عضم الأذن والأنف صغيرين، وده طبيعي لحالته. الحمد لله بعيد عن أمراض القلب. في أطفال بتتولد بأمراض القلب، بس ابن حضرتك بعيد عن الحتة دي الحمد لله. طيب، اللي أنا قلته ده كله هيتابع وهيتعالج مع تيم كامل من الدكاترة، تأهيل وعلاج، وجلسات تخاطب وكل حاجة. وده هيساعدنا جداً بعد كده لو بدأنا بدري ومن دلوقتي. -وأنا مطلوب مني إيه؟

-حضرتك، نمو ابنك هيكون مختلف شوية عن الأطفال دون المتلازمة. يعني هيتأخر شوية في إنه يقعد ويمشي والكلام. بس مش معنى كدا إنه مش هيتحرك. بالعكس، زيه زي الطفل العادي بالظبط. لأنه بيبقى عنده ارتخاء شوية في العضلات، عشان كدا لقينا صعب إنه يعرف يسحب من صدرك اللبن. -مطلوب منك تعمليله تحليل الغدة كل ست شهور عشان نشوف الحالة مستقرة ولا لأ. ويكبر شوية هيبقى كل سنة. بعد كده لما يكمل ٣ سنين هنعمله أشعة X

-ray على الرقبة، تحليل سكر، ونعمله تحليل حساسية القمح. عشان دي برضه أمراض مناعية لازم ناخد بالنا منها. أنا كتبتلك كل حاجة في الورقة دي، سن كذا هنعمل إيه.

-طبعاً إنتي ممكن تتخضي من كم الحاجات، بس فعلاً حالة عبد الرحمن كويسة جداً، بس لازم المتابعة أول بأول وده بيحسن من حالته جداً. اللعب مهم جداً معاه. بيعمله مرونة عضلات، ينتبه أسرع، يخليه اجتماعي. أول ما نعدي المرحلة دي، هبدأ أقولك ندخل على اللي بعدها إزاي. هي أول مرحلة صعبة، بس متقلقيش، كلنا معاكي وهنساعدك. إحنا موجودين عشان نساعدكم، ده واجبنا. -يارب بجد. بس....