رواية نقطة ضعف الفصل السابع 7 - بقلم أمل رجب

بردو يا عمر، ماشي. أنا هخليك تسمع كلامي. فجأة موبايله رن. مازن بصدمة: إيه ده؟ إزاي وإمتى؟ ... طيب طيب أنا جاي. قفل مازن وركب عربيته وساقها بسرعة جنونية. بعد ما يقرب العشر دقائق. مازن بخضة وخوف: مهاب! عمر ماله؟ ليظهر شاب آخر. مهاب: عمر عمل حادثة وجواه في العمليات بقاله أربع ساعات. مازن بصدمة: أربع ساعات؟ هو حصل له إيه؟ والحادثة دي عملها إزاي؟

مهاب: مش عارف. أنا كنت بكلمه، فجأة الصوت راح. حاولت أكلمه مردش عليا. بعدها لقيته بيرن، رديت. واحد كلمني وقالي إن صاحب الموبايل عمل حادثة. مازن بدموع: وإنت مش عارف تكلمني؟ مهاب: رنيت عليك كتير بس موبايلك كان مقفول. قطع كلامهم خروج الدكتور من غرفة العمليات، ليقترب منه مازن بسرعة. مازن: عمر ماله يا دكتور؟

الدكتور: نزف دم كتير ومحتاج دم بسرعة. زائد إنه حصل له ضرر في الكلى اليمين. بس الحمد لله لحقنا الضرر، بس هيستمر على علاج مكثف لمدة طويلة. بس حالياً محتاجين لنقل دم. مازن: أنا مستعد لأي حاجة. خد مني الدم كله، المهم يبقى كويس. الدكتور: اتفضل معايا يابشمهندس. بعد مرور ساعة، تم نقل الدم وخرج مازن من الأوضة. بص لمهاب. مازن: الوقت اتأخر وانت هنا من بدري. روح وتعالى بكرة. مهاب بقلق: لا، هفضل هنا معاك.

مازن: لا، انت هنا من زمان وأنا معاه اهو. روح انت. وأنا هطمنك عليه. مهاب بحزن: طيب لو حصل أي حاجة كلمني. مازن بحزن: حاضر. ومشي مهاب. بعد شوية خرج الدكتور من غرفة عمر. الدكتور: للأسف الضرر اللي حصل له مؤثر على الكلى التانية. محتاج عملية زرع كلى. لازم متبرع. مازن بدموع: أنا مستعد حتى لو هموت أنا. المهم هو. الدكتور: طب اتفضل معايا أعملك التحاليل والفحوصات اللازمة. وعمر كمان هيعمل نفس التحاليل.

اتجه مازن مع الدكتور في غرفة التحاليل. بعد ساعة كان مازن عمل التحاليل والفحوصات وخرج من الغرفة. بعد ما يقارب الساعتين. الدكتور بابتسامة: الحمد لله، فيه تطابق ونقدر نعمل العملية. مازن بفرحة: الحمد لله. طب والعملية دي هتتعمل إمتى؟ الدكتور: بكرة الساعة 9 الصبح. وتكون صايم يعني من بعد الساعة 12 لا تأكل ولا تشرب. مازن بدموع: أنا هفضل معاه.

الدكتور بابتسامة: براحتك زي ما تحب. بس ريح نفسك عشان لو لقيت فيك حاجة العملية هتتأجل. والتأجيل حالياً مش في صالح المريض. مازن: إن شاء الله مش هيحصل تأجيل. الدكتور: إن شاء الله. عن إذنك. ومشي. مازن طلع موبايله واتصل بعادل. مازن بخوف ودموع: الحقني يا عادل. ليظهر عادل بقلق: إيه يا ابني مالك؟ في إيه؟ عمر حصل له حاجة؟ مازن: عمر عمل حادثة. عادل بصدمة: إيه؟ طب وإنتوا فين دلوقتي؟ مازن: في مستشفى.... أنا عايزك بكرة الساعة 9.

عادل: بكرة إيه؟ أنا جايلك دلوقتي. وقفل. بعد شوية ظهر عادل في المستشفى مع مازن. عادل باستغراب: مازن؟ إنت بتعيط؟ مازن بانهيار: عمر ده مش أخويا يا عادل. ده ابني. من يوم ما اتولد لحد النهارده وهو معايا. فجأة كده في ثانية يبقى بين الحياة والموت. عادل بقلق: إن شاء الله هيبقى كويس. هو الدكتور قال إيه؟ مازن: الكلى عنده اتدمرت خالص. محتاج عملية زرع كلى. عادل: لقيت متبرع؟ مازن: أنا اللي هعمل العملية.

عادل: إن شاء الله هيقوم بالسلامة وهيبقى كويس. مازن بدموع: يارب يا عادل. يارب اشفيه ومتوجعش قلبي عليه. يارب. عادل: طب اهدى. هيقوم بالسلامة والله وهيبقى كويس. مازن بدموع: يارب. مر الليل بأكمله وسط دموع مازن وقلق عادل على عمر. في صباح يوم جديد. الدكتور: جاهز يا بشمهندس؟ مازن: أيوا جاهز. إن شاء الله. بس العملية دي هيبقى فيها خطورة على عمر؟

الدكتور: مفيش عملية مفيش فيها خطر. بس إن شاء الله هتقوموا بالسلامة. بس بعد ما تتعمل حضرتك هتفضل في أوضة عادية. وعمر هيفضل في العناية لحد ما يفوق. مازن بقلق: ليه؟ هو ممكن يحصل له حاجة؟ الدكتور: لا خالص. بس عشان لو حصل أي أعراض من نقل الكلى. وده طبيعي لأن الكلى يعتبر جسم غريب داخل جسمه. فهتحصل أعراض. بس بإذن الله هيبقى كويس. يلا اتفضل معايا. عادل بقلق: هي العملية مدتها قد إيه يا دكتور؟

الدكتور: من 3 إلى 4 ساعات. وبص لمازن. يلا اتفضل معايا. بعد مرور ما يزيد عن ثلاث ساعات ونصف. الدكتور خرج من غرفة العمليات. عادل بقلق: طمني يا دكتور. الدكتور بابتسامة: اطمن. الحمد لله العملية مفيش فيها أي خطر. ومازن خارج دلوقتي من غرفة العمليات ورايح غرفة عادية. وزي ما قولت في الأول عمر هيفضل في العناية شوية لحد ما الجسم يبدأ ياخد على الكلى ويبقى كويس. بعد شوية ظهر مازن في الأوضة. عادل قرب منه: مازن.

مازن فتح عينه بتعب ووجع: عمر فين؟ عادل بابتسامة: عمر كويس. أنا لسه مطمن عليه وهيبقى كويس جداً. متخافش عليه. مازن بتعب: يارب. عدى على كده يومين. فجأة الدكتور راح لمازن بابتسامة. الدكتور: عمر حالياً جسمه بدأ يتقبل الكلية. بس هياخد علاج لتنشيط الكلى. لأن ممكن في أي وقت كل حاجة تقلب والعملية تفشل. مازن بخوف: لا إن شاء الله هيبقى كويس. وأنا هاخد بالي من علاجه وكل حاجة تخصه. الدكتور: كده كويس. عن إذنك.

مازن لما عرف أن عمر فاق، راح له. مازن دخل لعمر. أول ما شافه حضنه بدموع: حمد الله على السلامة يا حبيبي. وحشتني أوي. عمر بتعب ووجع: الله يسلمك. وانت كمان وحشتني. مازن بحزن: مش أنا يا عمر بقولك على طول خد بالك من نفسك وسوق براحة؟ ليه توجع قلبي عليك كده؟ عمر بحزن: والله كنت سايق براحة. بس العربية مكنش فيها فرامل. مازن بص له بحزن وسكت. قطع كلامهم دخول الدكتور. بص لمازن باستغراب وصدمة: أنت إزاي تيجي هنا؟

أنت مش عارف إن الحركة ممنوعة عليك؟ وبردو كده غلط. مازن بص للدكتور وبص لعمر ورجع بص للدكتور بغمزة: حاضر يا دكتور هرتاح. الدكتور فهم إنه مش عايز عمر يعرف حاجة: تمام. ماشي. وبص لعمر: ها يا عمر عامل إيه دلوقتي؟ عمر: كويس. وعايز أخرج بقى. الدكتور: هخرجك حاضر. بس تخلص المحلول ده الأول. عمر بضيق: أنا مبحبش البتاع ده وزهقت بقى. مازن بحنية: عشان خاطري يلا خده عشان ترجع معايا. عمر بص لمازن وسكت. الدكتور ركب له المحلول وسابه.

وبص لمازن: عايزك. وخرج. عمر بقلق: هو إنت مالك؟ حركة إيه اللي ممنوعة فيك؟ إيه؟ مازن بضحكة: مفيش. بس ضغطي كان عالي شوية واغمى عليا. بس الوقت بقيت كويس عشانك معايا. يلا نام بقى وارتاح عشان ترجع معايا النهارده. وباس راسه وخرج. راح أوضته هو وعادل. مازن بص لعادل بتفكير. عادل: إيه يا مازن؟ مالك؟ مازن: عمر بيقول إن العربية مكنش فيها فرامل. حاسس إنها مقصودة.

عادل: لا. أكيد مش مقصودة. وبعدين مانت عارف إن عربية عمر عايزة تتغير من مدة. مازن: قلبي بيقولي إن الحادث ده كان مقصود. وبعدين تتغير إيه دي مكملتش سنة. عادل: بطل شك واهدى. أنت كمان قايم من عملية. ارتاح شوية عشان هنخرج بالليل. مازن نام على السرير بتعب وبيفكر في عمر وخايف عليه. بالليل عند مازن كان مع الدكتور.

الدكتور: بص يابشمهندس. طبعاً عارف إن الحركة الكتير غلط عليك حالياً. وفيه شوية تعليمات ليك ولعمر. مبدئياً كده عمر هيحس بأعراض كتير، أغلبها الضعف العام، الدوخة، فقدان الشهية، وألم في العظام، وألم في منطقة الوسط اللي هي مكان العملية. وطبعاً علاجه هيكون على مراحل. والوقت يا مازن. هيكون انتوا الاتنين فحص أسبوعي. الفحص ده هيفضل معاك لمدة 3 شهور. لكن عمر هيطول شوية عشان نطمن إن الكلى بتقوم بكل وظائفها صح. وهيكون ليكوا انتوا الاتنين علاج وهيطول بردو مع عمر. وهيقف لما يتحسن ويبقى كويس إن شاء الله. ولازم تهتم بجرحه وبأكله. هو هيتعبك شوية بس استحمله. لأنه هيبقى موجوع. وممنوع الحركة الكتير. والمضاد الحيوي لازم ياخده. هو هيبقى قوي بس لازم ياخده عشان جرحه.

مازن بقلق: ليه يا دكتور؟ هو هيبقى حقن؟ الدكتور: أه حقن. وهيكمل بـ برشام. وانت كمان هتبقى زيه. مازن بقلق: ربنا يستر ويرضى ياخدها ومعندش. الدكتور: حتى لو غصب لازم ياخدها. لأن مشوار الحقن بالذات هيطول. وانت كمان علاجك هيبقى شبه علاجه. بس هو هيطول شوية. مازن بقلق: ربنا يستر بقى. الدكتور: متنساش أيام المتابعة. مازن: تمام يا دكتور. إن شاء الله هنكون موجودين أيام المتابعة والفحوصات.

الدكتور: إن شاء الله. حمد الله على سلامتكم. واداله الروشتة واذن الخروج. ومازن أخد عمر وراح البيت ونيمه في أوضته. مازن: إيه يا حبيبي؟ مرتاح كده؟ عمر بتعب: أه كويس. مازن: قول لي بقى هي فرامل العربية اتفكت قبل كده؟ عمر: لا دي أول مرة. والحمد لله إنها جت على قد كده. مازن: الحمد لله يا حبيبي. يلا نام بقى وارتاح. بعد مرور دقائق نام عمر. عادل بضيق: إنت مش ناوي ترتاح بقى؟ عجبك كده وانت تعبان؟

مازن بص لعمر: تعالى نطلع بره كده. وطلعوا. عادل: مش ناوي ترتاح؟ مازن: منا كويس أهو. (وبـ تذكير) عملت إيه في موضوع الممرضة؟ عادل: من بكرة الصبح هتكون موجودة. مازن بص له وسابه وراح نام. وعادل راح يطمن على عمر ونام معاهم في البيت. في صباح يوم جديد. في غرفة مازن ظهر عادل وهو بيصحى مازن. مازن: عمر صحي؟ عادل: لا. يلا قوم خد علاجك. مازن فطر وأخد علاجه وصحى عمر. عمر بتعب ووجع: أنا جنبي بيوجعني أوي.

مازن بحزن: الممرضة زمانها جايه يا حبيبي وهتاخد علاجك وهتغير على الجرح. بس تسمع الكلام وتاخد العلاج وانت ساكت. عمر بقلق: ليه؟ هو العلاج إيه؟ مازن بقلق: حقنة صغيرة لحد ما تخف. عمر بخوف: لا أنا مش عايز. أنا كويس كده. مازن: عشان تبقى كويس يا حبيبي. عمر بزعل: بس أنا مش بحبها. مازن بحنية: عشان خاطري. أنا كمان هاخد علاج زيك. عمر: إنت ليك حقن؟ إيه مالك؟

مازن بتوتر وبص لعادل: عشان الضغط. وانت يا حبيبي عشان تخف وتنزل كليتك تاني. عمر بص له بخوف وحزن وسكت. عادل بقلق عليهم هما الاتنين: طب يلا يا عمر نام وارتاح. وتعالى معايا يا مازن. عمر مسك في مازن: لا أنا عايزه. مازن بضحكة على طفولية أخوه: خلاص يا عادل سيبه. بعد شوية الممرضة وصلت وغيرت لعمر على الجرح وأدت له علاجه ونام. ومازن كمان غير على الجرح وأخد علاجه وارتاح. وعادل نزل راح الشركة.

بعد مرور عدة أيام كان عمر اتحسن شوية. وكانت متابعة الدكتور. وكشف على عمر واطمن عليه. ودخل ل مازن بعد شوية. عمر دخل فتح باب أوضة مازن. وبص بصدمة واستغراب: مازن.