رواية نوح الفصل السابع عشر 17 - بقلم اماني سيد

مر اليوم بدون أحداث جديدة. في اليوم التالي، ارتدى كل من شمس ونوح ملابسهما، تحت معاكسة نوح لشمس. شمس: اللي يشوفك دلوقتي ما يشوفكش في الشركة.

نوح: الشركة حاجة تانية خالص، واعرفي إني هفضل زي ما أنا هناك. أنا كده معاكي أنتِ بس. الشغل شغل، واعملي حسابك لو غلطتي في الشغل مش هرحمك. أنا بفصل بين حياتي الشخصية والشغل، والناس أنتِ وماما وأميرة حاجة، والباقي حاجة تانية خالص. عشان كده عايزك أنتِ كمان تتعلمي كده. صداقتك وعلاقاتك بره الشركة حاجة، وجوه الشركة حاجة تانية. فهماني يا شمس؟

أي حاجة بتعمليها هتكون في وشي، فلازم تاخدي بالك من تصرفاتك كويس أوي. واحدة واحدة هتتعلمي وهتتعودي.

شمس حضنته: حاضر يا حبيبي، ما تقلقش. صدقني أنا هخليك تكون فخور بيا. أنا حاسة إني بقيت شمس جديدة واثقة في نفسها. الفترة اللي فاتت راجعت نفسي وراجعت الماضي، لقيت إني أنا اللي ظلمت نفسي بسلبيتي وخوفي. دايماً كنت بفكر أرضي الكل على حسابي، حتى لو ما يستاهلوش. إنما دلوقتي أنا بقيت أحب نفسي وأحبك وأحب ماما وأميرة. وأتمنى ربنا يسامحني على ضعفي وهواني في حق نفسي. نوح: أيوه كده، دي شمس حبيبتي الجريئة.

ذهبت شمس للفرع القديم تتابع الأعمال. وفي منتصف يوم العمل، خرجت من الشركة لكي تذهب إلى نوح. وصلت شمس ومعها الحراس، ودلفت لمكتب السكرتارية ووجدت المتقدمين جالسين. لم تنظر شمس لأي شخص منهم، ودخلت مباشرة إلى غرفة نوح. نوح: جيتي بدري. شمس: قولت أبدأ الإنترفيو من أوله، وأقولك إن عادل كلمني وعايز يقابلني عشان يحدد معاد وصول البضاعة.

نوح: بصي يا شمس، عايزك تسأليه إذا كان لوحده ولا معاه حد. ولو معاه حد شريك، أصرّي إنك تقابليه. طلع نوح التليفون وفتح لها صورة شخص، بص يا شمس، ده هيثم شريك عادل، وهو اللي زقه عليكِ أصلاً. وده الشخص اللي أنا عايز أوصله، لأن عادل ده عبارة عن ديكور. خدي بالك يا شمس، لازم تماطليه لحد ما تقابلي هيثم، غير كده كأننا ما عملناش حاجة. شمس: ما تقلقش عليا، هعرف أخليه يظهر. ثق فيا يا نونو. نوح: مين يا اختي؟ شمس: بدلعك يا نونو.

نوح: شمس، إحنا في الشركة وداخل ناس يعملوا إنترفيو، وأنتِ بتقوللي نونو؟ افرضي حد سمعك يبقى شك إيه بقى؟ نوح بيه يتقاله نونو. شمس بدلع: ما هو أنت اللي مش واثق في قدراتي يا نونو. نوح: شمس، حرام عليكي. إحنا في الشركة، بس لما نروح افتكري إنك أنتِ اللي جبتيه لنفسك. شمس بضحك: حاضر، يلا نبدأ بقى. جلست شمس بجانب نوح، وبدأ المتقدمين بالدخول، وبدأوا بعض الأسئلة عليهم. منهم من...

لكن الغريب بالنسبة لشمس إنها وجدت أغلبية المتقدمين يعتمدون على إمكانياتهم الجسدية وليس خبراتهم في العمل، مما جعلها ترفضهم، ونوح لا يجادلها لأنه يريد سكرتيرة تعمل بجد وتتحمل ضغط العمل وليس عارضة أزياء. شمس لنوح: نوح، هو أنت كاتب إنك عايز سكرتيرة ولا عارضة أزياء؟ إيه ده؟ في إيه؟ أومال لو رايحين فرح هيلبسوا إيه؟

نوح: هما فاكرين إنهم بكده هيغروني ويشغلوني. لو كانت عندي شركة أزياء كنت قبلتهم، إنما للأسف أنا بدور على واحدة تكون جادة في العمل، مش واحدة بترسم على صاحب العمل. رن نوح للسكرتيرة كي تدخل المتقدم. دخلت مها للغرفة، ونظرت لشمس ونوح. ونظرت لها شمس وتعرفت عليها. مها: شمس، إزيك عاملة إيه؟ مش فاكراني؟ أنا مها صاحبتك. شمس بجدية: اتفضلي يا آنسة مها عشان نبدأ الإنترفيو.

برود شمس مع مها جعل مها تشعر بغل أكبر تجاه شمس، وقررت تحديها. بدأت الأسئلة، واستطاعت مها الإجابة عليها بسهولة، نظراً لخبرتها السابقة في عمل أكتر من إنترفيو. وساعدها عملها الحالي في الرد على جميع الأسئلة. شمس: في السي في بتاعك بيقول إنك مازلتي إلى الآن بتشتغلي في شركة... إيه سبب إنك عايزة تسيبيها؟

مها: ما فيش مقارنة بين سلسلة شركات الرفاعي والشركة اللي بشتغل فيها. وأنا دايماً بسعى للأفضل. بلس إن شغلي هنا هيديني خبرة أكبر وهيكون مكانة أعلى ومرتب أكبر. شمس: تمام. نوح بيه، عندك أي أسئلة تانية؟ نوح: لا. المفروض إنك من بكرة هتدربي مع منى بره، لأنها من الأسبوع القادم مش هتكون موجودة. عايزك تتعلمي الشغل منها كويس، لأنني مش بقبل أي أخطاء. وبعدين، شاور بإيده تجاه الباب: اتفضلي.

خرجت مها، وزاد التحدي بداخلها. هي لم تقم بحساب للصداقة القديمة، من الواضح إنها بالفعل تغيرت. داخل المكتب. نوح: هي البنت دي صاحبتك فعلاً؟

شمس: كانت معرفة. مقدرش أقول صداقة عشان الأصدقاء ما بيعملوش كده. كانت بتحب تستغلني وتاخد مصروفي، ولو رفضت تخاصمني وتخلي زمايلي البنات كمان يخاصموني ومحدش يكلمني. ولما بابا عرف إني بدي مصروفي لأصحابي، ضربني جامد أوي وحرمني من المصروف نهائي بسببها. ومن بعدها محدش منهم في المدرسة بقى يكلمني بسببها. إلا ولد واحد كان أكبر مني اسمه فريد، ولما عرف اللي بابا عمله، كنت بصعب عليه وأوقات كان بيجيب لي حاجات حلوة.

نوح بغيره: وبعدين راح فين الولد ده؟ شمس: سافر يكمل تعليمه بره. من ساعة ما تخرجت من ثانوي معرفش عنه حاجة. كان آخر حاجة قالهالي إنه هيسافر. نوح: ماشي يا طيبة. عموماً حالياً للأسف مها دي هي أنسب واحدة بسبب خبرتها في مجال السكرتارية. يلا بينا بقى نروح لأن اليوم خلص من بدري. شمس: آه يلا، لحسن ضهري وجعني من كتر القاعدة. نوح: تحبي أعملك مساج؟ شمس: أنت مابتصدق؟ مجرد ما هتحرك هيخف.

ذهب كل من نوح وشمس للقصر. أعطى نوح لإحدى الخدم مفتاح السيارة كي يأخذوا الشنط منها ويضعوها داخل الجناح. دلف نوح وشمس إلى الداخل، وجدوا إلهام تجلس مع شذى وهيثم، الذي كان ينظر لشمس بنظرات وقحة. تجاهل نوح الجالسين، وأمسك شمس من خصرها كي يصعد بها لأعلى. قامت شذى بالركض عليه وحضنته، وقامت بإبعاد شمس، لكن شمس لم تبتعد، ووقفت حائل بينها وبين نوح. شذى: في إيه؟ يا اسمك إيه أنتِ؟ جوزي واحشني وبسلم عليه.

شمس: وجوزي أنا كمان، وإحنا لسه في شهر العسل. عن إذنك بقى نطلع نريح عشان كان عندنا شغل كتير. سابتهم وطلعت هي ونوح غرفتهم. نوح: شايفك مبقتيش تسكتي. محدش يعرف شمس الطيبة راحت فين؟ شمس: موجودة، بس أي حد هييجي عليا أو على حاجة تخصني مش هسكتله. وأنت تخصني يا نوح، أنت حبيبي وجوزي وكل اللي ليا في الدنيا. نوح: وأنا مش عايز غيرك في قلبي. ما تقلقيش، محدش يقدر يدخل جواه غيرك. عند ثلاثي الشر بالأسفل. إلهام: شفتي البت بتعمل إيه؟

وهو ساكلتها إزاي؟ شكله واقع لشوشته، وأنتِ اللي عاملة نفسك جامدة وفاكرة إنك وقعتيه. شذى بغيظ: اصبري عليا وشوفي أنا هعمل إيه. هيثم: هتعملي إيه؟ اللي رحتي لهم واديتيهم فلوس، واحدة اتق*تلت والتاني في السجن، ها؟ هتعملي إيه؟ شذى: هعمل له عمل. إلهام: أنتِ هبلة يابت؟ أنتِ بتصدقي في النصب ده؟ كان غيرك أشطر. هيثم: بص لها بتريقة وسكت، وقرر إنه يخلي عماد همزة وصل بينه وبينها. لاحظت شذى خروج الخادمة بصينية طعام متوجهة لأعلى.

شذى: استني هنا، الأكل ده رايح فين؟ الشغالة: نوح بيه طلب مني أحضر له الأكل والعصير. شذى: طيب، هاتي الصينية دي وروحي أنتِ، وأنا هطلعها بنفسي. أخدت شذى الصينية، ووضعتها على الطاولة، وأخرجت قرص برشام ودوبته ووضعته في العصير. إلهام: بتعملي إيه؟ شذى: مش هو مش عايزني أحمل منه؟ أنا كمان مش هخليها تحمل منه، ويبقى يوريني بقى جوز لاثنين. صعدت شذى لجناح نوح بالصينية، وفتح لها نوح. شذى: اتفضل. نوح: وأنتِ جايبة الصينية بنفسك ليه؟

شذى: أصلك وحشتني، وقلت أسألك ناوي تجيلي امتى؟ نوح: بعدين يا شذى، بعدين. وأخد منها الصينية وأغلق الباب. شمس: يا أنا هموت من الجوع. نوح: لأ، متاكليش. شمس: في إيه؟ اصبري. اتصل نوح بغرفة الخدم وطلب منهم أن يغيروا الطعام وأن لا يعطوه لأحد وأن يوصلوه بأنفسهم. نوح: ممكن تكون شذى حطالك حاجة. شمس: طيب ليه القلق ده؟ نوح: ناخد احتياطنا، مش هيحصل حاجة. عند مها وإيمان. مها: شوفتي شمس هانم عاملة نفسها مش عارفاني؟

حتى مرحمتنيش في الأسئلة، معملتش حساب للعشرة القديمة. إيمان: هي لو كانت هتعمل على العشرة القديمة يا مها، مكنتش هتشغلك. إنما ناسيه كنتِ بتعمليها إزاي؟ والإشاعات اللي بتطلعيها عليها عشان محدش يصاحبها. هي لحد دلوقتي معرفتش موضوع الإشاعات ده. مها: أنتِ معايا ولا معاها؟ إيمان: معاكي طبعاً. أنا بس بعرفك عشان تعرفي تتعاملي معاها إزاي.

مها: أنا عايزة أوصلها بأي طريقة، لأنها المفتاح لنوح. عايزة أعرف بيحب إيه، بيكره إيه، ولما يعرف إني صاحبته، مراته أكيد مش هيتعامل بحذاذيه زي اللي بيتعامل بيها مع الغريب. إيمان: وأنتِ ناوية على إيه؟ مها: هروح لها الشركة وأحاول أكلمها وأصالحها. إيمان: بس أنتِ بتقولي اتغيرت. مها: الطبع غلاب يا إيمان. إيمان: عندك حق. مها: أنا كده كده في فترة تدريب وبخلص بدري، هخرج من التدريب عليها وأشوف رد فعلها إيه. عند هيثم وعادل.

هيثم: أخبارك إيه مع شمس؟ أوعى تكون بتلعب عليك. عادل: لأ طبعاً، واضح إنها عايزة تعمل مصلحة. هيثم: وأنت إيه اللي عرفك إنها مش معرفة نوح؟ عادل: بص يا هيثم، البت دي مش سهلة ومش عايزة تكشف نفسها. أولاً، بتكلمني من خط غريب ومتسجل على تروكولر باسم وهمي. ثانياً، وهي بتكلمني بتكلمني في أوقات نوح استحالة يكون معاها فيها، وأنا اتأكدت من ده. ثالثاً، خوفها إن أكلمها وجوزها موجود ده يأكدلي إنها مخبية عليه.

هيثم: عندك حق. بص بقى يا كبير، أنت عايزك تقول لها إن شريكي عايز يتعرف عليكي، وتحاول تخليها تقابلني عشان نحدد معاد التسليم. عادل: هي فاهمة إننا بنتاجر في قطع غيار السيارات، مقولتلهاش على الحقيقة. هيثم: ومش لازم تعرف الحقيقة، طالما هتعدي تحت شعار شركات الرفاعي، محدش هيجي جمبها أصلاً، وهي تاخد مكسبها وحلال علينا إحنا بقى الباقي. عادل: دماغك دي إيه سم.