رواية نصف جناني الاخر الفصل الحادي والعشرون 21 - بقلم ايزيس

أخيرًا ظهر خالد، الذي سمع كل شيء، لكنه انصدم من المشهد المرعب الذي رآه. أربعة معتز وأربعة هنا... خالد: انتوا مين بالظبط؟ الكل: احنا عصابة اللهو الخفي هههههههه. وشالوا كلهم الأقنعة. طبعًا الشباب كانوا أسر وشادي وزياد وأحمد. والبنات كانوا هنا وياسمين وندي وشيري. خالد بص لهم باستفهام ومش فاهم حاجة، بس انصدم لما شاف هنا. اتحرك ناحيتها ببطء، وبعدين حضنها وقال: خالد: هنا انتي عايشة وما انتحرتيش؟

هنا بخجل: أنا آسفة يا بابا خالد عشان خبينا عليك الحقيقة. خالد باس راسها: أهم حاجة إنك بخير. أسر شده هنا من حضن خالد: إيه يا عم خالد انت ما صدقت ولا إيه؟ خالد: دي بنتي يا غبي. أسر: كلهم بيقولوا كده. الكل فضل يضحك، وبعدين خالد قال: خالد: ممكن حد يفهمني إيه اللي أنا سمعته دا؟ أسر: يلا يا رجالة شيلوا معايا ريا وسكينة دول، وبعدها هافهمك كل حاجة يا بابا. وفعلاً شالوا جيجي وصافي وبدأوا يفوقوهم.

صافي فاقت وفضلت تصرخ: ابعدوا عني ابعدوا عني ما حدش يلمسني أنا مش عايزة أموت ههههههه أنا صافي هانم يا كلاب. وبعدين عيطت: أنا ما موتش حد، ابعدوا عني. أما جيجي فاقت وفضلت تعيط وما اتكلمتش ولا كلمة. خالد: شادي اتصل على مستشفى الأمراض العقلية، واضح إن صافي مش طبيعية. أسر: إحنا اتصلنا ع البوليس وهما اللي هيتصرفوا معاهم. جيجي جريت على خالد: أونكل خالد ابوس إيدك أنا ما قتلتش معتز، هو اللي وقف قدامي فجأة بالعربية.

خالد كان حزين، لأنه هو اللي ربي جيجي مع أولاده. خالد: أنا هابعت وراكي محامي يا جيجي، ولو الأدلة أثبتت إنك بريئة هتخرجي، وتأكدي إني مش هسيبك. الشرطة وصلت وأخدت جيجي، وصافي حولوها على المصحة العقلية. وبعدها قعد خالد حزين. أسر حكى لوالده كل اللي حصل. خالد بحزن: أنا آسف يا أسر يا ابني، لإني ما كنتش بصدقك زمان لما كنت بتقولي إن صافي بتعاملك وحش انت واختك. سامحني، بس هي بجد كانت راسمَة دور الطيبة. أنا بجد اتصدمت فيها.

أسر: خلاص يا بابا، أنا مش زعلان منك. الحمد لله إنك اكتشفتها على حقيقتها. ياسمين: بس أسر ما كانش يسكت يا بابا، كل المقالب والحوارات الغريبة اللي كانت بتحصل في البيت كان أسر هو المسؤول عنها. فاكر يا أسر لما ربطت الحبل في السلم ونت صافي وقعت كانت رقبتها هتتكسر؟ أسر وياسمين ضربوا كفوفهم في بعض وفضلوا يضحكوا. ندي وشيري وأحمد، زياد ضحكوا وقالوا: فعلاً هنا وأسر وجهان لعملة واحدة، انتوا زي بعض بالظبط.

أسر حضن هنا: لا، هنا هي النص الحلو اللي ف حياتي. هنا همست في ودن أسر: وانت نص جناني التاني. *** تاني يوم في الجامعة. الكل مندمج في التحضيرات لمشروع التخرج والتفاعلات. هنا همست: بت يا ندي نفسي الكاكا. ندي: يادي أم الكاكا اللي انتي بتحبيها يا بنتي، متهيألي أنتي الوحيدة اللي الكاكا فاكهتك المفضلة. هنا: يا بنتي بتوحم، نفسي فيها. انتي ماعندكيش دم؟ ندي بخبث: بقلك إيه، شايفة مشهد العشق المفقوع دا؟ روحي بوظي اللحظة عليه.

هنا بصت لقيت شيري بتشرح الخطوات لزياد وهي بتبتسم، وهو مركز جداً في الخطوات ومش واخد باله. شيري بابتسامة: ها فهمت يا زياد؟ زياد: اممم يعني فهمت. ماكنتش عارف إنك شاطرة كده. شيري: شكراً 😊. هنا: زياد زياد، نفسي في الكاكا. زياد: نعم؟ كاكا؟ وأنا أجيبها منين دي؟ على العموم نخلص بس المشروع وأجيبلك. بعد ربع ساعة. هنا: زياد، نفسي في التين الشوكي. وانت رايح تجيب الكاكا هات لي معاك.

زياد: يا بنتي هو أنا الخدامة الفلبينية اللي جوزك جابها لك؟ يا ريتني ما قلت له، أنا تحت أمرها. هنا: بقلك إيه، جوزي بياخد باله من شركتك وبيخلصلك شغلك، فانت بقي لازم تشوف طلبات مراته صح. زياد: تمام. بس اطلبي حاجات معقولة، مش تين شوكي وحاجات غريبة. هنا: تمام. أنا عطشانة، روح هات لي ميه. شيري بغيظ: تصدقي انتي باردة. هنا: من بعض ما عندكم. وضحكت هي وندي وغمزوا لبعض. بعد فترة وصل أسر عشان ياخد هنا. أسر: حبيبي أخبارك إيه؟

خلصتي مشروعك؟ هنا بزعل: اممم. أسر: زعلانة ليه يا روحي؟ حد زعلك؟ هنا: العيال الرخمين دول رخموا عليا وبيقولولي يا مفجوعة (شاورت على ندي وشيري وزياد) أسر مسك خدها: هما بيغيروا منك. زياد: اسألها إحنا قلنا كده ليه. الست هانم أكلت ٦ سندوتشات ماك. هنا: احم، كنت جعانة أنا والبيبي. أسر ابتسم: بالهنا والشفا يا قلبي. فكك منهم، ركزي معايا. أخدها وطلعوا ع الشركة.

بعد فترة هنا وصلت الشركة، وأول ما دخلت المعمل بتاعها حست إنها مضايقة لما افتكرت الحاجات اللي مرت بيها من آخر مرة راحت فيها الشركة. فضلت تبص في كل مكان بضيق وتوتر، وفجأة لقيت إزازة البرفيوم اللي كانت هتعملها مفاجأة لأسر واقعة على الأرض. مسكتها وبصت فيها شوية، ولمست كلمة "بيبي" بصوابعها، وبعدين قررت ترميها. بصت من الشباك، رفعت إيدها ولسه هترمي، حد جه من ورا مسك إيدها ووقفها. هنا اتخضت و لفت بسرعة وقالت: أسر.

أسر مسك البرفيوم وابتسم: ليه كنتي هترميها؟ هنا: بتفكرني بحاجة وحشة. أسر باس إيدها: إن شاء الله ما فيش حاجة وحشة هتحصل تاني. بس مش عايز أشوف نظرة الخوف دي في عينيكي. ودي أنا هاحتفظ بيها عشان هتكون أول هدية للبيبي بتاعنا. هنا حطت راسها على صدر أسر: أسر، أنا كنت مستهترة أوي وما كنتش بخاف، بس بجد دلوقتي أنا بقيت أخاف لآني عرفت إن مش كل الناس طيبة.

أسر مسد على ضهرها: حتى لو فيه ناس شريرة يا هنا، بس عمره الشر ما هينتصر على الخير. ولازم تعرفي إنه اللي بيتقي ربنا، ربنا بيحفظه وبيطلعه من كل ضيقة. هنا: بجد أنا محظوظة إني مراتك. أسر ابتسم لها: يعني خلاص ما فيش زين الجارحي تاني؟ هنا: تؤ تؤ، في أسر المسيري وبس. *** شادي: عمي، أنا طالب إيد ياسمين.

خالد: والله يا شادي، انت عارف إنك زي أسر ابني، لآني أنا اللي مربيك بعد ما والدتك ووالدك الله يرحمهم ما ماتوا. بس طبعاً لازم آخد رأيها. شادي بكل ثقة: وماله يا عمي، ناخد رأيها. خالد: إيه ده؟ أخد رأيها قدامك كده عادي؟ افرض هترفض؟ شكلك هيبقي عامل إزاي؟ شادي بنفس الثقة: ناديها انت بس ومالكش دعوة بشكلي. خالد نادي ياسمين اللي كانت مكسوفة. خالد: ياسمين، شادي ابن عمك متقدم لك وعايز يعرف رأيك. ياسمين

بابتسامة مخلوطة بكسوف: اللي تشوفه يا بابا. خالد حس إن الناس دي متفقة مع بعضها وبتحب بعض. ابتسم: خالد: قولوا كده، دانتوا متفقين بقي. شادي: اومال يا عمي، هو انت من سنة كام يعني؟ معقول نكون عايشين في بيت واحد وتتفاجئ هي إني هاخطبها؟ ما أكيد أخدت رأيها. خالد ضحك: شباب آخر زمن. شادي: المهم بقي يا عمي، إحنا مش محتاجين ندرس بعض ولا خطوبة ولا الكلام ده. هي بس تخلص امتحانات ونتجوز على طول، تمام؟

خالد: تمام يا ابني، خير البر عاجله. مبروك يا أولاد. أسر وهنا وصلوا الفيلا: مبروك على إيه بقي؟ مش تفرحونا معاكم؟ شادي: أخيرًا هتفرح بيا. أسر بص لياسمين: موافقة ع الواد دا ولا بابا غصبك على ابن أخوه؟ شادي: ليه يا ابني؟ هو أنا قلة؟ دا أنا أشرف أي حد، والبنات هتموت وترتبط بيا. هنا: اللهم يزيدك تواضع يا شوشو. شادي: بت انتي إيه شوشو دي؟ شايفاني رقاصة قدامك؟ هنا: أنا الحق عليا اللي بدلعك.

ياسمين: نفسي مرة انتوا الاتنين تقعدوا عاقلين وما تتخانقوش. أسر: أنا هأحلك المشكلة. مسك إيد هنا وجرها وراه وطلع فوق على جناحهم. مرت الأيام، وهنا انهمكت في امتحاناتها، وأسر بيدير شغله وشغل زياد. وشادي بيجهز لفرحه هو وياسمين وبيحط اللمسات الأخيرة على شقته. أحمد كمان بيجهز لفرحه هو وندي. شيري كل يوم بتحب زياد أكتر من اليوم اللي قبله، لأنها حبت جداً شخصيته الطيبة الجديدة عليها. وفي يوم.

أسر وهنا وخالد وشادي وياسمين قاعدين بالليل بيدردشوا ويضحكوا، وكل واحد بيقول موقف مضحك حصل معاه. وفجأة. كلهم بصوا ناحية الباب. خالد: جيجي. كانت داخلة مكسوفة ووشها في الأرض. أسر وقف وقال بحدة: انتي ليكي عين تيجي هنا تاني؟ بابا طلق اختك وهي اتجننت، عايزة مننا إيه تاني؟ جيجي عيطت وكانت هاتمشي.

خالد: استني يا بنتي. أولاً مبروك ع البراءة. ثانياً، انتي صحيح غلطتي، بس أنا مش هقدر أنسى إني ربيتك زي أولادي بالظبط. بس أنا آسف إني أقولك إني فقدت الثقة فيكي وفي صافي، عشان كده أنا مش هاقدر أستأمنك في بيتي. ففكرت إني هاديكي شقة وهأصرف عليكي، بس اقبليها. عايزك في كلمتين في المكتب. دخل خالد وجيجي المكتب. خالد: ممكن أعرف انتي حامل إزاي ومين أبو الطفل دا؟ جيجي عيطت: أنا هاحكيلك كل حاجة يا أونكل. وحكت جيجي كل حاجة لخالد.

خالد بص لها بحزن على حالها وقال في نفسه: يعني أبو الطفل مات وما فيش أي ارتباط رسمي؟ أنا لازم أتصرف. خالد: ما تقلقيش يا جيجي، أنا هاتصرف. خدي مفاتيح الشقة اهي، وأنا مش هأسيبك. جيجي انهارت: أنا بجد ندمانة على اللي عملته، بس صدقني يا أونكل كل اللي عملته دا بس لآني بحب أسر وكان نفسي هو كمان يحبني.

خالد: اللي حصل حصل بقي. بس على فكرة، أسر ما فكرش فيكي لأنك كنتي بتعرضي نفسك عليه طول الوقت. صدقيني، الراجل بيحب البنت المحترمة اللي بتصون نفسها، مش اللي بتعرض نفسها سلعة للي يسوى واللي ما يسواش. ياريت تتعلمي من تجربتك دي وتبدأي حياتك من جديد وتقربي من ربنا، يمكن ربنا يغفر لك ويسامحك. جيجي كانت بتعيط وما كانتش بترد، لأنها متأكدة إن كل كلمة قالها خالد كانت صح. خرجت بعد شوية ومشيت على طول.

الكل كان مستغرب، بس احترموا خصوصية خالد وجيجي وما حدش سأله. جيجي راحت شقتها الجديدة وفضلت تفكر تنزل البيبي ولا تخليه، لغاية ما نامت. *** أسر الفضول كان هيقتله عشان يعرف إيه اللي حصل بين جيجي وخالد وقالوا إيه. ساب هنا نايمة وراح عند بابا. خالد حكى لأسر كل حاجة، وأسر انصدم وحمد ربنا إنه حفظ مراته. راح أوضته وحضن هنا جامد لدرجة خلتها تصحيه. هنا: أسر، انت لسة صاحي؟ أسر كان باصص لهنا وساكت لدرجة قلقتها.

هنا: أسر، مالك ساكت ليه؟ في حاجة حصلت؟ أسر ضمها وغمض عينيه: ربنا يحفظك ليا ديما. تقلقيش، ما فيش حاجة، أنا كويس. يلا بقي كملي نومك. *** مر حوالي شهر. الامتحانات خلصت. وجيجي بتحاول تأقلم نفسها على حياتها الجديدة. وفي يوم كانت نايمة، وفجأة واحد يدخل أوضة نومها رافع عليها المسدس، وهي لسة خارجة م الشاور. جيجي اتخضت و...