رواية نصف جناني الاخر الفصل الرابع 4 - بقلم ايزيس

أسر ... الكلام دا كدب وأنا بحب واحدة وهاتجوزها قريب جدا. صافي كانت بتتابع البث المباشر ومبسوطة عشان خطتها ماشية كويس ومتحمسة عشان أسر يقول العروسة جيجي. الصحفي: ممكن اسم العروسة عشان المصداقية؟ أسر: العروسة ا... ا... بص لقي ملف هنا في إيده، وقعت عينه على اسمها وقال: العروسة اسمها ... هنا محمد فكري الأمين. زينب: في البيت ... أييييه هنا بنتي إزاي؟ عند أسر:

الصحفيين كلهم باركوله ومشوا بعد ما أخدوا المعلومات اللي هما عاوزينها عشان كل واحد ينشرها بطريقته. أسر وشادي طلعوا الشركة تاني. شادي: انت اتجننت؟ ما قولتش ليه العروسة جيجي؟ أسر: أعمل إيه؟ ارتبكت، مش عارف إيه اللي خلاني أقول الاسم دا. وبعدين جيجي دي إيه؟ أنا مستحيل أتجوزها. طلعوا الشركة ودخلوا مكتب أسر، لقوا خالد والده قاعد وشكله غضبان. خالد: إيه اللي انت قولته دا ومين هنا دي؟ أسر: ما أعرف... ولسة هيقول ما أعرفش،

قام قاطعه شادي وقال: شادي: هنا دي حبيبة أسر يا عمي، هو بيحبها من فترة بس كان مخبي. خالد: بجد؟ طب بنت مين؟ مش لازم أعرف أصلها وفصلها، وبعدين أنا كنت هاجوزك جيجي. شادي: انت ابن حلال يا عمي، أنا مجهزلك السي ڤي بتاعها أهو. خالد: نعم؟!!! سي ڤي إيه دا؟ هي مقدمة على وظيفة؟ اللي أنا عايز أعرفه هي بنت ناس يعني. شادي: أومال بنت حيوانات؟ أكيد بنت ناس وناس كويسين كمان. اسمع يا سيدي.

كل دا وأسر قاعد بيبص لهم وحاسس أنه بيتدبس في جوازة من واحدة ما يعرفهاش أبدًا، وبيشاهد في صمت. ومسك شادي الملف بتاع هنا وبدأ يقوله معلومات عنها. شادي: هنا محمد فكري الأمين، طالبة في كلية العلوم، والدها مدير بنك وأخوها بيشتغل محاسب في نفس البنك و..... خالد: بس بس، انت إيه بكابورت انفتح؟ المهم يا أسر، انت بتحبها بجد يا ابني؟ أنا كل اللي يهمني سعادتك. أسر: آه بحبها، صح يا شادي؟ شادي: صح جدًا.

خالد: على بركة الله، النهارده نروح نتقدم عشان نوقف الإشاعات دي خالص عشان شغلنا ما يتأثرش. أسر: إيه؟ نتقدم النهارده إزاي؟ قول حاجة يا شادي، الحقني. شادي: جرا إيه يا عمي، خليها بكرة. أسر: إيه بكرة؟ انت مجنون؟ شادي غمزله: خلاص بكرة يا عمي، تمام. خالد: وقف. تمام، ربنا يقدم اللي فيه الخير. خرج خالد. أسر: انت مجنون يا ابني؟ إزاي أروح أتقدم لواحدة من غير ما نعرف بعض ولا حتى أعرف أنها مرتبطة ولا لأ؟

شادي: سيب حوار التعارف دا عليا، استنى انت بس مني تليفون وكون جاهز. انت مش واثق فيا؟ أسر: لا مش واثق. شادي: هي دي أول خطوة في طريق النجاح، يبقى على بركة الله. أطير أنا بقي، الحق أنظم لقاء الأحبة. خرج شادي، وبعد ساعتين كلم أسر عشان يروحله. أسر وصل الجامعة وانصدم من اللي شافه. أسر: إيه فرح العمدة اللي انت عامله دا؟ أنا مستحيل أتصرف زي المراهقين كده.

شادي: دا الحل الوحيد اللي قدامنا، البنات بتحب الحاجات دي. اهدي انت بس ونفذ اللي هاقولك عليه من غير غلطة. وبعد صراع طويل بين أسر وشادي. أسر استسلم للأمر الواقع. داخل الجامعة. البنات طالعة بتجري والوضع بيقول أنه فيه حاجة غريبة برا الجامعة بتحصل. هنا وشيري وندي ماسكين أيس كريم ومستغربين، وهنا موقعة الأيس كريم على حجابها وفيه شوية جنب بؤها وحالتها حالة. ندي: هو فيه إيه يا بنات؟ الناس اتجننت ولا إيه؟

شيري: يلا نخرج نشوف فيه إيه. هنا: يلا، يمكن خناقة. وهما ماشيين سامعين تعليقات البنات. واحدة بتقول: يا جزمة يا هنا، يا ريتني كنت أنا. وواحدة تاني: أنا هاخرج وأقول أنا هنا محمد فكري. هنا سمعت الكلمة دي وقالت: أكيد دا زياد عامل حركة من بتوعه عشان يضغط عليا. أجروا نشوف فيه إيه. بمجرد ما خرجوا وهنا بصت، وقفت زي الصنم ووقعت الأيس كريم من إيدها. هنا: انتوا شايفين اللي أنا شايفاه ولا أنا بحلم؟ ندي: لا، أظاهر إننا كلنا بنحلم.

كان المشهد عبارة عن لافتة كبيرة من القماش الأبيض مكتوب عليها: بحبك يا هنا محمد فكري، تتجوزيني؟ و أسر واقف قدام عربيته ومعاه ورد أحمر. شيري: مين المز دا يا هنا؟ طلعتي بتحبي من ورانا يا كلب البحر. هنا: وربنا ما أعرفه. شادي ضرب أسر في كتفه، يعني بيقوله اتحرك. أسر اتقدم ناحية هنا، وعلى وشه ابتسامة صفرة مش عارف يداريها. أسر اتكلم كأنه بيسمع نشيد حافظه من غير إحساس: احم، أنا بحبك يا هنا، تتجوزيني؟ هنا ببلاهة: ها؟ آه فعلاً؟

نفس الكلام المكتوب؟ أسر جز على أسنانه وحاول يداري غضبه، وطلع من جيبه منديل معقم ومسح بيه بؤها، ومسك إيدها حط لها المنديل عشان تمسح بقايا الأيس كريم من على إيدها وقال: تتجوزيني يا هنا؟ أنا بحبك من زمان. هنا بتوهان قالت في نفسها: الله دا قمور وكمان بيهتم بالنضافة اللي أنا ما أعرفش عنها غير اسمها. وبعدين قالتله: انت بجد بتحبني؟ يا اسمك إيه؟ ولا دي نمرة؟ أسر: نمرة؟ لا بحبك وعايز أتوزجك.

هنا بصت لصحباتها وقالت: بنات، أحضنه وأقوله موافقة ولا أضربه بالقلم؟ دا عدى كل الروايات الرومانسية. دا رومانسي أكتر من زين الجارحي. أهبب إيه بسرعة؟ البنات: قولي له هافكر. هنا بصتله وقالت بهبل: هاصلي استخارة. أسر ضحك على طريقتها وقال: استنيني بكرة هاجي أخطبك. وداها الورد وسابها في حالة زهول، وركب العربية وهو بيلعن الظروف ومشي ومعاه شادي. زياد بص بحقد كبير لأسر ولهنا وقال: ماشي يا هنا، الأيام بينا.

هنا: أنا افتكرته دا سوبر هيرو اللي أنقذني من زياد وصاحبه. أنا خلاص موافقة عليه. شيري وندي بصوا لها بمفاجأة وفرحوا: وقالوا أخيرًا هنلبس فساتين سواريه. &&&&&&&&&&&& في شركة AM. صافي اقتحمت مكتب خالد وغضب العالم كله على وشها. صافي: إيه اللي ابنك قاله دا؟ تطلع مين ست زفتة دي؟ إحنا مش متفقين إن أسر لجيجي. خالد:

بهدوء وجمود: صافي، أسر اختار شريكة حياته ودي حاجة أنا ما أقدرش أتدخل فيها. انتي عارفة إني طول عمري باديله حرية في اختياراته وهو بيتحمل نتيجتها في الآخر، ودا اللي عمل منه راجل ناجح بجد. صافي فضلت تهز في رجلها بعصبية وهي قاعدة على الكرسي. خالد تابع: جهزي نفسك، بكرة خطوبة أسر. صافي مشيت بغضب أكبر وقالت: على فكرة جيجي ما استحملتش الصدمة، وخدت هدومها وسافرت تهدي أعصابها. خالد: بجمود: عملت خير.

صافي كانت هتتجنن وسابته ومشيت. &&&&&&&&&& هنا صحباتها وصلوها لغاية بيتها لأنها كانت في حالة توهان. خبطت على الشقة، فتح سليم، بصت لقيت العيلة كلها واقفة ومربعة أيديها وبيبصولها بصة غريبة. هنا: إيه اليوم الغريب دا؟ هو في حاجة؟ انتوا مالكم واقفين كده ليه؟ أحمد مد لها الفيديو اللي بيعلن فيه أسر أنه هيتجوزها. هنا بصدمة: ابن المجانين؟ على السوشيال ميديا؟ وبعدين ابتسمت وقالت: لا لا، دا طلع أجن مني. أنا أوافق، وش بقي؟

وبعدين قالت لأهلها: طبعًا أنا لو حلفتلكم من هنا ليوم القيامة إني اتفاجئت زيكم بالظبط، مش هتصدقوني صح؟ والدتها حضنتها وقالت بحماس: مش مهم، المهم عريس لقطة وعايزك. مش عارفة على إيه بس شكله أمه دعت عليه في لحظة غضب. الحمد لله، كنت فاقدة الأمل إنه حد يتجوزك بهبلك وجنانك دا. هنا بصدمة: للدرجة دي يا زوزة؟ انتي شايلة مني؟ أحمد قرب بحماس: وافقي عشان خاطري يا هنا، خلينا نعرف نقعد مرتاحين في البيت.

هنا بصدمة أكبر: ياااااه، وانت يا أبو أحمد؟ مش هتضيف التاتش بتاعك؟ دانا طلع لي أعداء كتير وأنا ما أعرفش. محمد حضنها بحب: أنا أكتر واحد هازعل لو اتجوزتي. حضنته وباسته: عارفة إني ماليش غيرك في أم العيلة دي. سليم: هنا هنا، هو العريس اسمه إيه؟ هنا: اسمه.... والنبي ما أعرف. أحمد بصدمة: إيييه؟ انتي عبيطة؟ أنا دلوقتي اتأكدت إنك هبلة. دا غني عن التعريف يا بنتي، دا أسر المسيري صاحب شركة AM الكيميائية، أكبر شركة في مصر.

هنا: بجد؟!!! إيه الهبل دا؟ بقي خطيبي وما أعرفش اسمه؟ أنا متفائل. عدى اليوم بسرعة وتاني يوم كانت زينب مشغولة جدًا بترتيبات الخطوبة، وقلبت الشقة وعملت أكل وعصاير وفاكهة، وهنا نايمة. صحت هنا وصحباتها جم يوقفوا جنبها، وأسر وأهله وصلوا وخطبوا هنا واتفقوا أنه الفرح يكون بعد أسبوع بحجة أنهم يمحوا الإشاعة اللي طلعت على أسر. عدى الأسبوع بسرعة وأسر مشغول ما بين الشغل وترتيبات الفرح. وجه يوم الفرح.

دخلت هنا زي الأميرات بفستان أبيض هادي وحجاب جميل. أسر بجد لما شافها انبهر بجمالها، بس بسرعة افتكر اللي عملته وقال: لازم أنتقم. وهو كمان ما كانش أقل منها في الوسامة والشياكة والتألق. أسر مسك إيد هنا. هنا: استني، يلا هنرقص الفريست دانص عشان أغيظ البنات دول. وشاورت على صحباتها. أسر التفت وقال بغرور: نعم؟ أرقص؟ أنا مش برقص.

هنا بمجرد ما سمعت الكلمة دي وقامت ساحبة إيدها من إيده، وراحت للدي جي وطلبت مهرجان، وشاورت لصحباتها وركنوا أسر على جنب، وقاموا ولعوا الفرح على مهرجان: (قمر التيكتوكاية، انتي يا مزمزيلاية، حلوة بجينز وبادي وبرضو حلوة في العباية، وحش الكون بحاله من يجي ف جماله، دا حبيبي براحته يعمل كل اللي ف خياله) أسر كان واقف مصدوم، بقي دي مدام أسر المسيري؟ والصحافة والتلفزيون بيصوروا. وأخيرًا خلص الفرح ما بين جنان هنا وصدمة أسر.

مشيوا بالعربية وصلوا فيلا خالد المسيري، نزلوا من العربية. أسر: إحنا هنقعد في الفيلا مؤقتًا لغاية ما الشقة بتاعتنا تتشطب. هنا: بصت بخجل وقالت: زي ما تحب. دخلوا الفيلا، كان فيه أكل على السفرة. أسر: تاكلي؟ هنا: باحراج: لا شكرًا. أسر: تمام، يلا نطلع الأوضة. هنا: قالت في نفسها: إيه دا؟ كان المفروض يصر عليا آكل؟ أنا واقعة من الجوع. شكله بخيل. أسر بص لقي صافي بتبصله بغضب، قام ابتسم لها ومسك إيد هنا وطلعوا. في الأوضة.

بمجرد ما دخلوا أسر ساب إيد هنا، وهي كانت بتبص للأوضة بانبهار، كانت جميلة وواسعة جدًا. أسر بصلها بسخرية وابتسم بخبث وبدأ يقرب منها بطريقة مرعبة ونظرات مخيفة. هنا بصت واتوترت منه وقالت: ....... إيه؟ في إيه يابني؟ انت هتتحول لزومبي ولا إيه؟ لسة بيقرب لها. بنفس النظرة المخيفة، تابعت هي: صلي على النبي واهدي، اهدي، مالك؟ الله يخرب بيتك. وفجأة تخبط في الحيطة فتبقى محبوسة بينها وبين إيديه وهو محاوطها. قرب منها فغمضت عينيها.

همس لها: استعدي لعقابك يا هنا. هنا: فتحت عينيها بدهشة وسألته: عقاب؟ عقاب إيه؟ آه قصدك عشان ما رضيتش أتعشى تحت من شوية؟ ابتسمت وتابعت: انت بقى هتعمل زي زين الجارحي لما ليليان كانت ترفض تشرب اللبن فيعاقبها ببوسة؟ صح؟ تمام، عادي، أنا موافقة، يلا بوس😚 بس بلاش نظرة الرعب دي. رد بدهشة: مين زين الجارحي وليليان دول يا هنا؟ هنا: إيه دا؟ انت ما تعرفش رواية عشق الزين؟ أسر: قال بتعجب: رواية؟

أه، دانتي هبلة بقى. طب قوليلي، انتي شايفاني زين الجارحي؟ هنا: لا طبعًا، زين دا ما فيش منه اتنين أصلًا، دا أسطورة. أسر: تمام، وشايفة نفسك ليليان؟ هنا: بص، هو الكدب حرام، بس تقدر تقول كده. أنا ليليان إلا ربع، يعني فاضلي ربعاية كده وأبقى ليليان. أسر بغضب: ولما انتي مش ليليان ولا أنا زين، عايزة تتعاقبي زيها بالبوس ليه؟ انتي تتعاقبي بالعض، بالقتل، بالحرق، إنما البوس دا خيال علمي بالنسبة لك.

بصت له بحيرة وهي مش مستوعبة سبب غضبه. أسر قرب منها أكتر وهمس في ودنها: استعدي يا هنا. وتابع بسخرية: (هنا) من دلوقتي الحاجة الوحيدة اللي هتربطك بالهنا هو اسمك وبس. وشالها ورماها على السرير فصرخت بصوت هز أركان الفيلا. في الأوضة اللي جنبهم. خالد قاعد على الكنبة بيقرأ كتاب، وصافي بتمسح (الميك اب) بتاعه. بصت صافي بعصبية لجوزها لما سمعت صرخة هنا وقالت: إيه الوقاحة وقلة الأدب دي؟ مش كنت تحجز لهم في فندق بدل الفضايح دي؟

رد خالد بجمود: صافي، هو هيقضي ليلة ولا اتنين هنا وهيسافر شهر عسل، ولما يرجع هتكون شقته جاهزة. وانتِ عارفة إنه ابني مسموح له يعمل اللي هو عايزه في بيته. نرجع لأسر وهنا. رمىها على السرير وربط إيديها ورجليها. فصرخت مرة تانية.