رواية نصف جناني الاخر الفصل السادس 6 - بقلم ايزيس

هنا كانت قاعدة وفجأة صحباتها ندي وشيري يجوا عندها عشان يباركوا لها. هنا استقبلتهم واتفرجوا ع الفيلا، كانت قمة ف الروعة. أخيراً أخذتهم أوضتها عشان يكونوا على راحتهم. ندي وشيري قالوا في صوت واحد: "احكي لنا كل اللي حصل بالتفصيل." هنا حكتلهم كل اللي حصل من ساعة ما سابوا الفرح لغاية اللحظة دي. ندي وشيري انصدموا ومش فاهمين ليه أسر اتصرف كده. ندي: "مافيش غير تفسير واحد للي بيحصل دا يا هنا." هنا: "ايه هو؟

قولي يا أبو العريف." ندي: "أسر عنده مرض نفسي اسمه (شيزوفرينيا) يعني انفصام ف الشخصية." هنا: "يعني ايه دا كمان؟ ندي: "يعني عايش بشخصيتين، واحدة طيبة وواحدة شريرة." هنا بتركيز: "بجد؟ *** أسر وصل الشركة ولسة هينزل من عربيته، لقي الصحافة مستنين تحت الشركة عشان يعرفوا تفاصيل أكتر عن سرعة جوازه. ماقدرش ينزل لانهم هيشكوا ازاي عريس ينزل الشغل تاني يوم من جوازه. لف ورجع تاني ع الفيلا. وصل الفيلا وطلع أوضته على طول.

فتح من غير ما يخبط، البنات كانوا واخدين راحتهم و قالعين حجابهم. اتخضوا لما أسر دخل فجأة، وهو اتحرج وحط وشه ف الأرض. هنا: "انت ايه اللي رجعك؟ مش قلت رايح الشركة؟ أسر بص لها بابتسامة جذابة وقال: "ما اقدرتش ابعد عنك يا مراتي يا حبيبتي." هنا بصت بدهشة لصحباتها وبعدين بصت لأسر. شيري همست لها: "نسيبك احنا بقي مع الشخصية الطيبة قبل ما يقلب." وسابوها ومشيوا. أسر قال ف نفسه: "مدام أنا فاضي كده مافيش مانع نتسلى شوية." وقال لـ

هنا: "قربي." هنا بتوتر: "ن نعم." وقربت. أسر: "خدي امسحيلي الجزمة." هنا بغضب: "نعممم يا عنيا! جزمة إيه اللي امسحهالك؟ دا مستحيل." قرب عليها وقال: "ماتتحدنيش يا هنا واسمعي الكلام." هنا: "لا هاتحداك! انت اكيد مجنون وهارب م المصحة العقلية ووقعت فيك.. يا بركة دعاكي يا زينب.. لا نشنتي صح طول عمرك تدعيلي بعريس مجنون اهو عز الطلب." ضحك على كلامها وهي قامت وقالت: "أنا هادخل اخد شاور، تسمح تطلع عشان ابقى على راحتي؟

أسر بابتسامة خبيثة: "أسمح جدااا." هنا في نفسها: "والله مجنون.. من شوية كان متعصب عليا ودلوقتي بيضحكلي.. ربنا يعيني ع المصيبة دي." ودخلت تاخد شاور، وهو عمل حاجة ونزل تحت. بعد شوية وقت خرجت هنا بالبرنص، ما لقيتش هدومها. ابتسمت بمكر وقالت: "هو فاكرني هاتضايق لما يخبي هدومي؟ عبيط.. مانا عندي غيرهم." راحت تفتح الدولاب لقيته مقفول بالمفتاح والمفتاح مش موجود. هنا: "يا ابن الشياطين.. ماشي يا أسر."

بعد كام دقيقة فتح أسر الاوضة لقاها بالبرنص، ضحك وقال: "يا قليلة الأدب قاعدة بالبرنص ليه؟ بصتله بغل وجزت على أسنانها وقالت: "هات هدومي أو المفتاح." أسر: "وايه المقابل؟ هنا بتمسك ف البرنص كويس: "عايز إيه؟ أسر قرب عليها جدا وقال: "تمسحي الجزمة." هنا بعصبية: "لاااا.. قلت لاااا يعني لا." أسر طويل، رفع المفتاح وقالها: "طب لو مسكتي المفتاح خديه." هنا وقفت على طراطيف صوابعها وفضلت تحاول تمسك المفتاح وركزت جدا عليه.

قام أسر فك حزام البرنص ووقع ف الأرض وضحك بانتصار. وهي انكسفت وجريت لبست البرنص مرة تانية وقالت بغيظ: "انت قليل الأدب على فكرة." وقعدت ع السرير عيطت. أسر رمالها المفتاح و بيبتسم بطريقة تغيظها: "أنا نازل لغاية ما تخلصي فقرة البكا دي." وقرب عليها: "بس طلعتي جامدة." مسكت المخدة ضربته وقالت: "سافل." أسر وهو بيخرج: "ابقي جهزي نفسك.. بالليل هنسافر شهر قرف." هنا وهي بتعيط: "قرف على دماغك يا بعيد." *** في كوفي شوب.

قاعدة ولابسة نضارة سودة عشان خايفة حد يتعرف عليها. مسكت أيده وقالت: "لأمتي هنفضل نتقابل كده زي الحرامية يا معتز؟ أنا بجد زهقت." معتز: "ياسمين حبيبتي، مانتي عارفة باباكي قد إيه صعب وهيرفضني لو اتقدمت لك.. عشان كده مضطرين الفترة دي نخبي وحبنا." ياسمين: "طب كلم أسر." معتز: "لا جبتي التايهة.. انتي عارفة أنه اخوكي شايف الناس كلها تحت جزمته ومش عاجبه حد." ياسمين: "أنا آسفة يا معتز، انت بتتحمل دا كله بسببي."

معتز باس أيدها وقال: "أنا اتحمل أي حاجة عشانك يا روح قلبي." واحد كان مراقب ياسمين وكلم شادي. "ايوا قاعدة معاه." شادي: "خليك مراقبهم واوعي يغيبوا عن عينك لحظة.. انت فاهم." الشاب: "ما تقلقش.. أنا صاحي." *** أسر وهنا جهزوا شنطهم عشان هيسافروا شهر عسل. أسر: "هتروحي تودعي اهلك قبل ما تسافري؟ يا عالم يمكن ماترجعيش تاني." هنا بخوف: "ليه؟ انت هتقتلني ولا إيه؟ أسر: "ممكن." هنا: "لا أنا مش رايحة خلاص." أسر ضحك: "اجمد يا وحش."

هنا بصت له بخوف ودهشة وسكتت. أسر: "خدي اشربي العصير دا." هنا: "حطتلي سم؟ أسر: "ممكن." هنا: "يخرب بيت ممكن.. انت عايز تجنني ولا إيه يا راجل انت؟ أسر: "خدي اشربي.. ماتبقيش جبانة." هنا شربت العصير وركبوا العربية وهما ف طريقهم لبيت والد هنا. هنا نامت لان أسر حطلها منوم خفيف في العصير. أسر بص لها بخبث ومسك قلم اسود وعمل حاجة في وش هنا. وبعد فترة وصلوا بيت اهلها وهنا بدأت تفوق. أسر بص لها وضحك.

هنا بتفتح عينيها قالت: "بتضحك على ايه يا مجنون؟ انت حجابي.. حجابي مش مظبوط ولا إيه؟ وبدأت تعدل في حجابها. أسر بيحاول يخفي ضحكته: "لا حجابك مظبوط اوي.. اطلعي يلا." دخلوا العمارة وولد صغير شاف هنا وسخسخ ضحك على شكلها. هنا بدأت تتسغرب وقالت: "ماله دا كمان؟ الولد: "هنا العبيطة هههههه." أسر ضحك أكتر: "دا اكيد مجنون." هنا بشك: "يمكن." ركبوا الاسانسير وخبطوا على باب الشقة. فتح احمد

ومات ضحك على هنا وقال: "هو الجواز بيعلي هرمون الذكورة ولا إيه؟ ههههههه." هنا: "احمد انت اتجننت ولا إيه؟ في الفترة اللي سبتك فيها." زينب: "يا اهلا يا اهلا يا وقعة سودة 😲.. إيه اللي انتي مهبباه دا؟ هنا بصت لأسر وجريت ع المراية، لقيت نفسها بشنب ودقن. أسر بضحك: "غُلُبت يا تنت.. افهمها واقولها يا هنا يا حبيبتي كده مايصحش.. اهلك يقولوا إيه؟ قالتله: "مالكش دعوة.. أنا عايزة افجئهم."

محمد ضحك بصوت عالي وقال: "طول عمرها بتحب المقالب.. بس ماكنتش فاكر أنها هتعمل مقلب في نفسها كمان." هنا واقفة هتتجنن وهي مش قادرة تدافع عن نفسها. زينب: "يادي الكسوف.. احنا مش عارفين نقولك إيه يا ابني.. والله أكيد بتقول عليها مجنونة وهبلة دلوقتي." أسر حاوط هنا بدراعه وقال: "بس بحبها كده." هنا ابتسمت ابتسامة صفرة وقالت: "ربنا يخليك يا حبيبي." زينب شدتها من ايديها ع التواليت عشان تغسلها وشها.

زينب: "امسحي يا أخرة صبري.. امسحي الهبل اللي انتي عملاه في نفسك دا." هنا بعصبية: "عندك حق.. أنا استاهل كل اللي يجرالي.. بس خليكي فاكرة الدعا اللي كنتي بتدعيه عليا.. منك لله يا زوزة." زينب ضربتها في كتفها: "كمان بتدعي عليا يا هبلة يا بنت الهبلة.. كتر خيره جوزك.. واحد غيره كان طلقك ورماكي على جنانك دا." وبعد ما زينب مسكت اللخبطة اللي ف وش هنا قعدوا شوية وسلموا عليهم ومشوا تاني عشان يلحقوا معاد الطيارة. في العربية.

هنا هتطق م الغيظ. أسر بيضحك: "مالك يا قطة؟ هنا: "انت تخرس خالص.. اصلك مش عارف احساس انك تكون المعلم في حاجة وحد يجي يعلم عليك.. أنا هنا مقالب يتعمل فيا كده." أسر: "مش فاهم." هنا: "ولا عمرك هتفهم." أسر: "بس مجرب اوي احساس انك تكون متفوق ف حاجة وواحد يجي يبوظلك كل اللي بنيته." هنا: "مش فاهمة." أسر بص قدامه وركز ف الطريق: "ولا عمرك هتفهمي." وصلوا المطار وانطلقوا إلي شرم الشيخ.

وبعدها وصلوا الفندق وحطوا الشنط وناموا م التعب. وتاني يوم هنا صحيت بدري ونزلت عند البحر قبل اسر. أسر صحي بعدها وبيبص م الڤراندا وانصدم من المشهد الي شافه.