رواية و للنصيب رأي أخر الجزء الثاني الفصل الرابع 4 - بقلم لوليتا محمد

محمد قعد على الكنبة بتعب وحزن وهو بيفتكر مكالمته مع وائل من يومين. 《فلاش باااااااك》 محمد كان ف مكتبه ف الشركة بس كان مخنوق ومتضايق من كل حاجة حصلت حواليه، بداية من العلاقة الزوجية إللي انتهت بين آسر وندي، مرورا بـ قضية الخلع، لـ غاية سفر وائل، وابنه إللي مابقاش يروح الشركة ولا قادر يقوله على مكان ندي. شويه ولقى وائل بيتصل بيه. محمد رد بإبتسامة حب وود: "الووو.... إزيك يا وائل...

محمد بإهتمام: "طمني عليك وعلى ندي ونهي... وائل بحب وود هو كمان: "كلنا كويسين يا محمد... الحمد لله رب العالمين... أنت أخبارك إيه؟ ونادية والأولاد... محمد بتنهيدة حزينة معرفش يداريها ولا يخبيها، لأنه عارف كويس إن وائل مش قادر ينطق اسم آسر منفردًا، ومش هيقدر يقول اسم واحد من ولاده والتاني لأ. محمد بتنهيدة حزينة: "الحمد لله... كلنا بخير... وائل بإستغراب: "مالك يا محمد؟ حاسس إنك مش مظبوط... في إيه؟

محمد بتنهيدة حزينة: "ولا حاجة يا وائل... مفيش حاجة... وائل بإهتمام: "هو أنت متخيل لما تقولي كده، هقولك تمام وخلاص... أتكلم يا محمد... إيه إللي بيحصل معاك... محمد بحزن ظهر فـ نبرة صوته: "مخنوق أوي يا وائل... ومش قادر أتحمل كل إللي بيحصل قدام عيني... وائل غمض عينه بزعل وحزن، ومحمد بيكمل كلامه بضيقة و خنقة ودموعه خانته وبدأت تنزل منه غصب عنه: "حاسس إني لوحدي يا وائل...

أول مرة أحس إني لوحدي وعاجز إني أحل المشاكل إللي بتحصل حواليا... محمد بوجع الأب على ابنه ظهر فـ نبرة صوته، ومقدرش يخبيه: "آسر بيتدمر قدام عيني يا وائل ومش قادر أعمله حاجة... مش قادر أتكلم ولا قادر أقوله على مكان ندي... وائل فتح عينه بغضب وحدة وهو ساكت وبيسمعه بإهتمام. ومحمد وهو بـ يمسح دموعه إللي لسه بتنزل منه: "أنا مش بلومك ولا بعاتبك يا وائل... صدقني والله عارف إنه غصب عنك وعن ندي... وبقولهالك وهفضل أقولها...

لو إللي حصل ده كان حصل لبنتي كنت عملت إللي أنت عملته... بس... محمد سكت للحظات. ورجع كمل كلامه بقهر ودموع: "بس برضه غصب عني يا وائل... قلبي وجعني أوي... مقهور عليه ومنه... وائل غصب عنه قلبه وجعه وزعل واتضايق أوي على صاحبه وإحساسه أنه مقهور ومتكتف وقلبه مقسوم لنصين... نص لـ ندي لأن ابنه ظلمها ووجعها وخانها... ونص التاني قهرة الأب على ابنه إللي مش عارف يعمله إيه. وائل بهدوء وحزن: "هو بيروح الشركة ولا لأ يا محمد؟

محمد وهو بـ يمسح دموعه: "لأ طبعاً يا وائل... هيروح إزاي... وائل بتكشيرة وحدة: "يعني إيه يروح إزاي؟ هو ما بيروحش ليه؟ ها... مش ده شغله وآكل عيشه؟ محمد بحزن وزعل شرح لـ وائل وجهة نظره فـ عدم مرور آسر للشركة وإللي كانت برضه وجهة نظره هو كمان قبل ما يسمعها من آسر. وائل بحزن: "بص يا محمد... مش هقدر أكذب عليك لو قولتلك إني مش متضايق ولا موجوع من آسر... ومكنتش عايز ولا حابب كل إللي حصل بينه وبين ندي...

بس زي ما أنت أب ليه ويهمك مصلحته، أنا كمان أب لبنتي ويهمني مصلحتها وراحتها... محمد بيسمعه بهدوء وإهتمام. ووائل بيكمل كلامه بهدوء: "وأنت عارفني يا محمد... عمري ما هخلط مستقبله وشغله بجوازته ببنتي... محمد ابتسم ابتسامة خفيفة بتنهيدة: "أنا عارف ومتأكد من كده... وائل بإبتسامة هادية: "خليه يرجع لشغله يا محمد... ومين عالم... محدش عارف بكرة في إيه... محمد بإستغراب وبإهتمام: "قصدك إيه يا وائل بالكلام ده؟

وائل بتنهيدة: "بص يا محمد... كتير بنسمع وبنشوف إن اتنين انتهت علاقتهم بالانفصال، وممكن يقعدوا سنة اتنين تلاتة وبعد كده ممكن يرجعوا لبعض... محمد بإبتسامة وفرح: "وائل... هو في أمل إنهم يرجعوا لبعض؟ وائل بإبتسامة هادية: "ليه لأ يا محمد... محدش عارف بكرة مخبيلنا إيه.... وائل بجدية شوية: "بس ده برضه مش أكيد... مش شرط ولا التزام إن ندي ترجع لآسر يا محمد... الموضوع في الأول والآخر نصيب...

محدش عارف إيه إللي هيحصل بكرة ولا في الأيام الجاية... وممكن كل واحد فيهم نصيبه يبقى مع حد تاني... محمد بفرحة وسعادة ظهرت فـ نبرة صوته: "المهم إن في أمل ولو واحد فـ المية إنهم يرجعوا لبعض.... وائل بإبتسامة هادية: "خليه يرجع شغله يا محمد... الله أعلم هيبقى في فرصة تانية ولا لأ... ولو هتبقى فيه.... محدش عارف هتيجي إزاي ولا منين... محمد بفرح وإرتياح: "ماشي يا وائل... هخليه يرجع شغله...

يمكن ربنا يبعتله الفرصة دي عن طريقها... وائل بإبتسامة هادية: "ربنا يقدم إللي فيه الخير ليهم هما الاتنين... وائل بإبتسامة هادية وحب: "ولا تزعل نفسك ولا تضايق يا صاحبي.... كل حاجة هتتحل وهتبقى أحسن من الأول بإذن الله تعالى.... محمد بسعادة: "بإذن الله يا وائل.... بإذن الله يا صاحبي.... 《باااااااك》 محمد بتنهيدة: "يارب.... حلها وافرجها من عندك يارب.... فـ أمريكا...

ندي كانت قاعدة جنب يوسف فـ عربيته وبتبص من الشباك فـ سكوت تام وهي متعرفش هما رايحين على فين. يوسف من الوقت للتاني بيبص عليها بـ هدوء بيلاقيها سرحانة وحزينة وبين لحظة والتانية تمسح دموعها إللي بتنزل منها غصب عنها. فضل ساكت وهو حزين عليها. فات شوية وقت، وندي مافاقتش غير لما يوسف قالها بهدوء: "ندي... يلا بينا... ندي مكنتش مركزة طول الطريق. وأول ما يوسف قالها كده، انتبهت وبصت قدامها لقت البحر قصادها. بصتله بهدوء.

وهو بإبتسامة هادية: "خايفة؟ ندي مسحت دموعها بإيديها وهي بتهز راسها بنفي. ويوسف ابتسم بهدوء ونزلوا من العربية وبدأوا يمشوا مع بعض فـ هدوء من غير ما حد فيهم يتكلم فـ حاجة لغاية ما قربوا ناحية البحر. يوسف بهدوء وهو باصص للبحر وحاطط إيده فـ جيب بنطلونه: "أنا باجي هنا كل ما أبقى مخنوق ومتضايق وعايز أخرج كل حاجة وجعاني... ندي بصاله فـ سكوت. ويوسف بيكمل بهدوء: "بصرخ وبعيط لغاية ما أخرج كل حاجة جوايا... يوسف بحزن ظهر فـ

نبرة صوته: "بس دايماً ببقى لوحدي.... محدش بيبقى موجود معايا... يوسف بصلها بإبتسامة هادية: "إنتي أول شخص أجيبه هنا وأعرفه بـ مخبأي السري إللي بهرب ليه من الناس والدنيا بحالها.... ندي بصت ناحية البحر فـ هدوء وقعدت على الشط. ويوسف قعد جنبها وهو باصص للبحر: "وقت ما تلاقي نفسك مستعدة إنك تخرجي كل إللي جواكي... خرجيه... بأي شكل وأي صورة... أنا مش مستعجل... ندي غمضت عينيها. وخدت نفس جامد وخرجته بالراحة. لحظات. وسألته بهدوء

وهي لسه مغمضة عينيها: "ليه الواحد بيحن لحد خانه وأذاه ووجعه وهد بيته وأمانه وأحلامه ودمره نفسياً؟ يوسف بصلها بصدمة وذهول. وندي فتحت عينيها وبصتله بهدوء، بس عيونها بتدمع وبدأت تنزل منها غصب عنها: "ليه يا يوسف؟ قوللي ليه؟ يوسف لسه بيبصلها بصدمة وهو بيبلع ريقه بالعافية وفضل ساكت. وندي بتمسح دموعها بإيديها: "ليه بحن ليه ومش عارفة أكرهه رغم كل حاجة وحشة وأذى عملها فيا؟ ندي بنبرة وجع: "أنا أعرف آسر من وأنا عندي ٦ سنين....

ندي بدأت تتكلم وتحكي لـ يوسف عن حياتها وحياة أمها وأبوها. وحكتله عن جوازها وحياتها مع آسر وخلافاتهم وتصرفها معاه قبل ما تكتشف خيانته ليها وجوازه من واحدة تانية. حكتله على تأخر حملها، وبعد ما حصل حمل وإجهاضها. حكتله عن عصام وإللي حصل معاه ومواجهتها ليه بدل ما تواجه آسر وإحساسها بالذنب عشان أمها. وموضوع طلاقها وإحساسها لما انهارت.

يوسف كان بيسمعلها الأول بمنتهى الهدوء والإهتمام، بالرغم إنه كان مصدوم فـ حاجات كتير أول مرة يعرفها سواء عنها أو عن وائل... زي إنها مش بنته بالنسب... بس مكنش متضايق بالعكس... كل مرة بيعرف حاجة عن وائل بيحس إن ربنا بيحبه عشان بعتله واحد زيه يكون ليه سند وظهر... ويطلعه من الظلمة إللي كان عايش فيها للنور. لكن بعد ما بدأت تحكي عن معاملة آسر ليها وخيانته وإجهاضها كانت ملامحه بدأت تتغير للحدة والغضب والنرفزة.

كان نفسه آسر يكون قدامه ويفش غله فيه ويطلع فيه وجعها منه ووجعه من چاكلين. ندي كانت بتحكي بوجع وقهر ودموع وانهيار. شويه تسكت وشويه تتكلم بسخرية. وشويه بتعب. حالها لا يسر عدو ولا حبيب. يوسف سايبها تتكلم وتحكي بالشكل إللي يناسبها. كان كل إللي يهمه إنها تفضفض وتخرج كل إللي جواها. وطبعاً عرف السبب إللي خلى وائل يسافر أمريكا. بعد ما ندي خلصت وطلعت كل إللي جواها، يوسف من كتر ضيقته وخنقته من إللي عرفه عن آسر...

مقدرش يمسك نفسه. قام من جنبها ومشي خطوتين للبحر. غمض عينه وهو بياخد كذا نفس ورا بعض وبيخرجهم بعصبية وهو بيحاول يسيطر على أعصابه. شويه وبدأ نفسه يهدي وينتظم. فتح عينه وبص وراه لـ ندي وقالها بهدوء بس بحزن وزعل: "للأسف... لسه جواكي مشاعر ليه يا ندي.... ندي ابتسمت أوي بتهكم. لحظات وابتسامتها قلبت لابتسامة وجع وحزن وقهر ودموعها نزلت منها غصب عنها. يوسف كان بيبصلها بحزن ووجع على وجعها وشكلها وتصرفاتها.

هو عارف وفاهم هي فـ المرحلة دي بتمر بإيه. وللأسف محدش يقدر يعملها حاجة. لو مكنتش تتغير من نفسها وتصمم على خروج آسر من قلبها وعقلها بمحض إرادتها... فـ محدش هيقدر يخرجه من جواها غصب عنها. ندي بدموع وقهر: "تفتكر إني مش عارفة بإللي أنا فيه يا يوسف... ندي قامت من مكانها وهي بتقرب منه وبزعيق وصوتها عالي: "أنا عايزاه يخرج من قلبي وعقلي يا يوسف... مش عايزة أفتكره ولا عايزة أفكر فيه.... عايزة أمحي كل السنين إللي عشتها معاه...

كل لحظة وكل ساعة وكل دقيقة كان هو موجود فيها فـ حياتي... عايزة أنسي كل حاجة مريت بيها وحصلت معاه.... من ساعة ما عرفته لغاية اللحظة إللي أنا واقفة فيها قدامك دلوقتي... يوسف بحزن: "أنا عارف وحاسس بيكي يا ندي... ندي بزعيق وانهيار: "أنت ماتعرفش حاجة يا يوسف.... ماتعرفش حاجة.... ولا عمرك هتحس بيا ولا باللي جوايا.... يوسف قرب منها أوي بوجع وبص فـ عينيها بدموع لمعت فـ

عيونه: "محدش هيحس بيكي غير إللي مر بنفس التجربة إللي إنتي مريتي وبتمرى بيها دلوقتي... محدش هيفهمك ولا هيحس بيكي يا ندي غيري أنا وبس.... ندي تنحت وهي بتبصله بصدمة وذهول. ويوسف بيهز راسه بـ آه ودموعه خانته وبدأت تنزل منه غصب عنه وهو بيقولها بوجع وقهر بس بهدوء: "ده حقيقي يا ندي.... صدقيني.... ندي بلعت ريقها بصعوبة ونفسها بيطلع وينزل بسرعة وهي بتمسح دموعها.

لحظات وغمضت عينيها بوجع وغصة فـ قلبها أتملكت منها وإفتكرت كلامه مع چاكلين. لحظات وفتحت عينيها على صوته وهو بيقولها بصوت مخنوق مختلط بدموعه وهو قاعد ع الشط وباصص للبحر: "چاكلين.... إللي شوفناها أنا وإنتي من فترة قدام الشركة... ندي بلعت ريقها بتوتر وهي بتقرب منه بهدوء وقعدت جنبه على الشط وهو بدأ يحكي حكايته مع چاكلين. يوسف حكى بدموع وقهر ووجع كل إللي حصله بخصوص چاكلين. وحكالها محاولة انتحاره وإنقاذ وائل ليه.

وقالها سبب خوفه وقلقه عليها لما قفلت على نفسها باب مكتبها وإنه كان خايف عليها لـ توصل لنفس المرحلة إللي هو وصلها بسبب چاكلين. يوسف كان أول مرة يتكلم فـ الموضوع ده مع حد تاني غير وائل. والغريب إن مع كل كلمة ودمعة بتنزل وبتخرج منه كان بيحس براحة وهدوء وسكون. كل ما بيفضفض أكتر وبيخرج إللي جواه... كل ما بيزيد راحة وهدوء واطمئنان. وكأن جبل الهم والحزن والغضب وضيق الصدر بدأوا يتلاشوا ويخرجوا من ضلوعه.

أول مرة يحس إنه بقى خفيف وهادي من جواه... من غير الكتمة والخنقة ما يطبقوا على نفسه. ندي كانت بتسمعه بمنتهى الحزن والوجع والزعل. دلوقتي بس عرفت ليه هو اتعامل معاها أول يوم ما أنقذها فيه بحدة وغضب وسوء ظن فيها. عرفت إن اتملكته سوء الظن فـ البنات كلها بسبب خيانة چاكلين ليه. وكأن الخيانة هي العامل المشترك بين كل البنات. وبدأت غصب عنها تعذره على تصرفه معاها ساعتها.

واتأكدت إن فعلاً هما الاتنين بيشتركوا فـ نفس الوجع والألم والجروح. ندي وهي باصة للبحر وبدون ما تشعر، سندت راسها على كتفه بتعب وإرهاق. ويوسف هو كمان سند راسه على راسها بتعب وكأنه ماصدق إنها عملت كده عشان يرتاح ويهدى. وبالرغم إن هما الاتنين جواهم جروح وألم ووجع.... بس كأن كل واحد فيهم لقى سند يرمي عليه حمله ووجعه وجرحه من غير خوف. من غير قلق. من غير تردد من الطرف التاني.

لعلهم يلاقوا الراحة لقلوبهم والهدوء لروحهم المجروحة. لما يوسف سند راسه على راس ندي، ندي خدت نفس جامد وخرجته بالراحة وغمضت عينيها فـ هدوء وسكون وراحة وأمان. يوسف هو كمان غمض عينه فـ هدوء وإستكانة كأنه ماصدق لقا الراحة والهدوء إللي قعد سنين مفتقدها وكان فاقد الأمل إنه يلاقيها فـ يوم من الأيام. نهى بعد ما عرفت حكاية يوسف من أولها لآخرها. قامت من جنب وائل وهي ماسكة قلبها من كتر الوجع والحزن ودموعها مش قادرة توقفها.

وائل بلع ريقه بتوتر وقرب منها بقلق وخوف عليها من شكلها: "نهي.... نهي بصتله بدموع ووجع: "قلبي وجعني أوي عليهم يا وائل.... وائل بصلها بحزن، وهي بتكمل كلامها بقهره: "يوسف وندي مايستاهلوش كل إللي بيحصلهم ده.... كل واحد فيهم حب وأخلص فـ حبه بجد... وملاقوش غير الوجع والغدر وال خيانة. حرام إللي بيحصلهم ده.... والله العظيم حرام.... وائل خدها فـ حضنه جامد أوي وهو بيحاول يخفف عنها: "أهدي يا نهي... عشان خاطري...

نهي بدموع: "مش قادرة يا وائل... والله ما قادرة... نهي بعدت عن حضنه وبصتله بدموع: "وجع يوسف جوايا ما يقلش عن وجع ندي عندي... لولا إن ربنا سبحانه وتعالى بعتك ليه... الله أعلم إيه إللي كان هيحصل له.... وائل وهو بـ يمسح دموعها بإيده: "الحمد لله رب العالمين إنه بعتني ليه فـ الوقت المناسب... نهي بهدوء شوية: "الحمد لله رب العالمين.... وائل بهدوء: "عشان كده قولتلك إن ندي محتاجة لـ يوسف دلوقتي مش إحنا....

حد عاش نفس التجربة... هو أكتر واحد هيفهم حالتها ووضعها... نهي بصت لـ بعيد خدت نفس جامد وخرجته بالراحة. لحظات وقالتله بهدوء: "طب أتصل بيه... خليهم يرجعوا البيت... هما بقالهم كتير بره... وائل بإبتسامة هادية: "حاضر يا نهي.... هكلمه... يوسف وندي كانوا زي ما هما على وضعهم ومحدش فيهم بيتكلم ولا حاجة بتقطع عليهم هدوئهم وسكونهم. مجرد سكوت تام مع هدوء الليل ونسيم البحر بيطل عليهم وهما فـ عالم غير العالم.

يوسف وندي فتحوا عنيهم مرة واحدة على صوت تليفونه واتعدلوا فـ قعدتهم. يوسف طلع تليفونه لقاه وائل. بص لـ ندي بهدوء: "ده مستر وائل.... ندي بصتله بزعل ونظرة رجاء: "مش عايزة أروح دلوقتي يا يوسف.... معنديش استعداد إني أرجع البيت وأتكلم معاهم فـ حاجة.... يوسف بصلها بنظرة حنونة وهو بـ يبتسم بهدوء ونفسه يقولها إنه هو إللي مش عايزها تسيبه ولا عايزها تروح دلوقتي. بالرغم إن الوقت اتأخر وداخلين على ٩ بليل

(وده طبعاً بالنسبة لأبوها وأمها متأخر وخصوصاً إنهم مش فـ مصر) إلا أنه عايزها تفضل موجودة معاه وجنبه... حتى لو هيقضوها سكوت فـ سكوت... ومحدش منهم هيتكلم فـ حاجة... بس مجرد وجودها جنبه وقعدتها معاه وكل واحد فيهم ساند راسه ع التاني وخصوصاً فـ المكان ده بالذات.... ده فـ حد ذاته حاسسه بالراحة والهدوء والأمان. يوسف بصلها بإبتسامة هادية: "حاضر يا ندي... مش هروحك دلوقتي...

ندي ابتسمت أوي وهي عينيها بتلمع بدموع الامتنان والشكر وبتحاول على قد ما تقدر إنها تخبيها بس معرفتش تداريها قدامه. فـ يوسف بهدوء وهو لسه محتفظ بإبتسامته... مسح دموعها بإيده قبل ما تنزل من عيونها وهو بيقولها بإبتسامة هادية: "من غير دموع وعياط... اتفقنا؟ ندي ابتسمت أوي ورجعت سندت راسها على كتفه بأمان وغمضت عينيها فـ هدوء وراحة. يوسف رد بهدوء على وائل: "الوو.... yes mr wael.... نهي واقفة جنب وائل وهي متوترة.

خايفة وقلقانة على ندي. ووائل بهدوء: "أيوه يا يوسف.... طمني على ندي؟ ندي ساندة بتقل راسها كله على كتفه وهي لسه مغمضة عينيها زي الأطفال الصغيرة. ويوسف مكنش متضايق... بالعكس كان مبسوط ومبتسم أوي من تصرفها. قال لـ وائل بإبتسامة هادية: "الحمد لله رب العالمين.... هي أحسن من الأول بكتير... وائل ملامحه اتغيرت لـ حيرة وقلق: "أحسن إزاي يا يوسف؟ يوسف لف راسه حتة صغيرة ناحيتها عشان يشوف شكلها وهي مغمضة عينيها.

وابتسم بهدوء وحنية: "بطلت عياط وبقت أهدى من الأول... ندي ابتسامتها زادت عن الأول وهي بتزيد فـ تقل راسها على كتفه برخامة. ويوسف ابتسم أوي أكتر من الأول لما هي عملت كده وحس إنها قاصدة ومتعمدة إنها تزيد بتقلها على كتفه كنوع من الغلاسة والرخامة، أو كأنها بتقوله بطريقة غير مباشرة مش أنت قولتلي إرمي حمولك عليا.... أنت إللي جبته لنفسك.... استحمل بقى... نهي جنب وائل بتوتر: "وائل.... خليهم يجوا هنا...

وائل هو كمان بتوتر: "طب تعالوا ع البيت يا يوسف... أنا ونهي مستنينك.... يوسف بص قدامه بسرعة وضربات قلبه دقت جامد من الخضة والخوف لما قاله كده. وكأن الخوف من إنها تسيبه أو تبعد عنه سيطر عليه مرة واحدة.

فـ بلع ريقه بتوتر وهو مش عارف يقوله إزاي أنه مش عايزها تسيبه دلوقتي أو معندوش استعداد أنه يبعدها عنه دلوقتي عشان ملحقش يشبع من الراحة والأمان إللي حس بيهم وهي معاه ومعندوش استعداد أنه يتخلى عن الإحساس ده إللي ماصدق ولقاه مرة واحدة وإللي مكنش على باله ولا خاطره... وفـ نفس الوقت مش عايز يخبي عليه حاجة ولا يخون ثقته فيه. لحظات بلع ريقه وهو بيقوله بتوتر: "ا... ب... بصراحة يا مستر وائل.... ندي...

ندي معندهاش استعداد إنها تروح دلوقتي... ندي فتحت عينيها بصدمة من إللي سمعته من يوسف بس ماشالتش راسها من على كتفه. هي ما تخيلتش إنه هيقول كده لـ أبوها. وائل كشر ونهي لاحظت تكشيرته فـ سألته بسرعة وبخوف وتوتر: "إيه إللي حصل لـ ندي... اتكلم يا وائل... وائل بتكشيرة وحدة شوية: "يعني إيه الكلام ده يا يوسف؟ أنتو فين كده؟ يوسف أخد نفس جامد وخرجه بالراحة: "قاعدين ع البحر...

يوسف بإبتسامة هادية: "ويظهر إن المكان عاجبها ومش عايزة تسيبه وتروح... وائل بص لـ نهي بتنهيدة وهو مذهول. وهي بعصبية: "ما ترد عليا... مالها ندي؟ وائل قالها وهو مذهول: "قاعدين ع البحر وندي عاجبها المكان ومش عايزة تروح دلوقتي... نهي بتنهيدة هي كمان: "نعم؟؟؟ مش عايزة تروح؟؟؟ ندي تنحت من كلام يوسف لـ أبوها. لحظات وابتسمت أوي وشالت راسها من على كتفه وهي مبتسمة وبتقوله بهمس أو نقدر نقول بتكلمه بـ شفايفها

من غير ما تطلع صوت: "يا رخمة... يوسف ابتسم أوي وهو عينه بتروح وبتيجي ما بين عينيها وشفايفها. هو فهم إللي هي بتقوله لما بص على شفايفها. ورد عليها بنفس طريقتها بـ شفايفه من غير ما يطلع صوت: "طب أعمل إيه.... مش عارف أقوله إيه.... ندي هي كمان كانت بتبص ما بين عينه وشفايفه عشان تفهم هو بيقول إيه. ابتسمت بهدوء ورجعت سندت راسها على كتفه برخامة أكتر من الأول.

وهو خد نفس جامد وخرجه بالراحة وهو بيسند راسه على راسها وغمض عينه بـ راحة إنها جنبه. نهي بقلق وخوف: "هات أكلمها يا وائل.... عايزة أسمع صوتها.... عايزة أطمن عليها... وائل بهدوء: "يوسف أديني ندي.... يوسف فتح عينه بحزن وهو حاسس إن وائل مش مديله فرصة إنه يتهنى وينعم بشوية هدوء وراحة أو إنه بيقطع عليه خلوته بالراحة إللي بدأ يحس بيها مع ندي. فقاله بحزن: "حاضر مستر وائل.... ندي مع حضرتك.... يوسف مد إيده لـ ندي بالتليفون.

وندي خدته منه بهدوء وهي بتكلم أبوها: "الوو... أيوه يا بابي.... وائل ضربات قلبه زادت بخوف عليها: "أيوه يا ندي... إنتي كويسة يا حبيبتي؟ ندي بإبتسامة هادية: "الحمد لله رب العالمين... أنا كويسة يا بابي... ما تخافش عليا... وائل بحب: "لو مكنتش أخاف عليكي يا حبيبتي إنتي ومامي... هخاف على مين... ندي حست بقلقه وخوفه عليها أوي. قالتله بهدوء: "صدقني يا بابي... أنا والله كويسة... ندي بإبتسامة: "الجو قدام البحر تحفة....

حلو أوي يا بابي..... وحاسة براحة ومش عايزة أروح دلوقتي... يوسف غمض عينه وهو مبتسم بسعادة وفرح من كلامها. ووائل بص لـ نهي وقالها بهدوء: "طب خدي مامي معاكي... دي هتتجنن عليكي يا ندي... نهي خدت التليفون منه بلهفة وخوف: "أيوه يا ندي... طمنيني عليكي يا قلبي... إنتي كويسة؟ ندي طمنت نهي عليها. وقالتلها برجاء: "مامي مش عايزة أروح دلوقتي... سبيني قاعدة هنا شوية.... عشان خاطري...

نهي حطت إيديها على قلبها وهي بتحاول تهدي وتتنفس بالراحة. لحظات عدت فـ سكوت. ورجعت ابتسمت بهدوء وهي بتبص لـ وائل: "ماشي يا حبيبتي.... لو بابي موافق أنا معنديش مانع... ندي ابتسمت أوي وهي بتقولها: "طب أديني بابي أكلمه.... نهي أدت الفون لـ وائل. ووائل بإبتسامة هادية وهو بيضم نهي ليه بإرتياح: "أيوه يا ندي.... وائل بإبتسامة: "ماشي يا حبيبتي... مفيش مشكلة.... أديني يوسف... ندي أدت الفون لـ يوسف.

ويوسف بهدوء: "yes mr wael.... وائل بهدوء بس بجدية وحزم شوية: "يوسف... ساعة بالكتير وتتحرك من عندك.... مش عايزها تتأخر أكتر من كده... ماشي؟ يوسف بتنهيدة حزينة حاول يداريها عن ندي: "حاضر مستر وائل.... ما تقلقش عليها.... مع السلامة... يوسف قفل مع وائل وهو زعلان إنه مضطر يروحها بعد ساعة. كان حاسس إنه ملحقش يشبع من وجودها معاه و جنبه. ندي سألته بهدوء: "بابي قالك إيه؟

يوسف داري زعله بإبتسامة هادية وهو بيقلع الچاكت بتاعه وبيحطه على كتفها بهدوء عشان ما تبردش: "قالي قول لـ ندي تاخد بالها منك.... وأوعى تزعلك ولا ترخم عليك..... ندي بصتله أوي بتنهيدة. ومرة واحدة انفجروا هما الاتنين من الضحك وهما بيسندوا على راس بعض. يوسف مرضيش يقولها إللي أبوها قاله عشان متضايقش ولا تزعل وكمان الوقت الحلو إللي هما هيقضوه مع بعض ما يتقلبش لـ زعل وحزن. بعد ما وائل قفل مع يوسف. بص لـ نهي

بهدوء وهو بيضمها أوي ليه: "اطمنتي يا قلبي؟ نهي بتنهيدة وهي بتسند راسها عليه: "الحمد لله رب العالمين.... نهي بإبتسامة هادية: "ندي فكرتني بنفسي.... وائل ابتسم بهدوء: "هي مش هتجيبه من بره يا نهي... الفرق ما بينا إنها قاعدة دلوقتي قدام البحر.... وإحنا كنا بنروح فلوكة.... نهي ابتسمت أوي. ووائل بإبتسامة غلاسة: "إلا صحيح يا نهي... ليه مخطفناش رجلينا ولا مرة وروحنا إسكندرية ولا العين السخنة وقعدنا ع البحر بدل الفلوكة؟

نهي بصتله بتنهيدة: "إيه ده!!! تصدق عمر الفكرة دي ما خطرت على بالي... ليه فعلاً معملناش كده؟ وائل ضحك أوي من قلبه هو ونهي وهما بيتريقوا على نفسهم إنهم ماعملوش زي ندي ويوسف. بعد ما فات شوية وقت. يوسف قال لـ ندي بجدية: "ندي... لازم نشوف حل.... ندي اتعدلت فـ مكانها وبصتله بعدم فهم: "حل لإيه يا يوسف؟ يوسف بصلها بجدية أكتر من الأول: "لازم ن....