رواية و للنصيب رأي أخر الجزء الثاني الفصل السابع 7 - بقلم لوليتا محمد

ندي قعدت وهي بتبصله بزعل ومستنية إنه يفوق. فجأة عنيها وسعت وبرقت وقامت من مكانها وقربت منه أوي لما لاحظت أنه بيهمهم وبيتكلم كلام مش مفهوم ومش مترتب وبيعرق أوي وشكله بيخرف وبيقول شوية بالإنجليزي وشوية بالعربي: "ماتسبنيش وتمشي... لأ... استنى... ماتمشيش... خليكي معايا... خديني معاكي... خديني معاكي... مين... مين... طب فين... ماتسبنيش كده... ماتسبنيش لوحدي... ندي برقت واتصدمت ودموعها نزلت منها أكتر من الأول

وهي بتجري بسرعة على أمها: "مامي... مامي... ألحقي يوسف يا مامي! نهي بسرعة خرجت لها بخضة: "في إيه يا ندي... يوسف ماله؟ ندي وهي بتشدها على أوضته وهي منهارة: "بيخرف في الكلام يا مامي... مش عارفة أعمل إيه." نهي بسرعة دخلت لقت حرارته بتزيد. جريت بسرعة ع المطبخ تعمله كمادات، وندي مسكت إيده وبتضغط عليها وهي منهارة من العياط: "يوسف... خليك معايا... عشان خاطري... خليك جنبي... يوسف... قوم وكلمني... ندي

بزعيق وانهيار وصوتها عالي: "قوم بقي يا يوسف... حرام عليك... نهي جابت الحاجة وأدته خافض للحرارة وفي نفس الوقت بتعمله كمادات، وندي لسه زي ماهي ماسكة إيده وبتعيط. عدي الوقت عليهم وكانت حرارته بدأت تهدى وتستقر. نهي بتعب وتنهيدة: "الحمد لله رب العالمين... ربنا يقومه منها على خير." ندي وهي بتمسح دموعها: "اللهم آمين يارب العالمين." نهي بهدوء: "ندي... تابعي يوسف عقبال ما أدخل أخلص الغدا."

ندي هزت راسها بحاضر، ونهي خرجت ع المطبخ. ندي قربت الكرسي منه وفضلت ماسكة في إيده ماسابتهاش. عدي الوقت عليهم كانت ندي نامت وهي حاطة وشها جنب إيديها اللي ماسكة إيده. شوية وفازت من نومها لما حست بإيد محطوطة على خدها وحد بينادي باسمها. ندي بسرعة فاقت وهي بتبص على يوسف لقيته بيبصلها بابتسامة هادية بس بتعب. ندي ابتسمت أوي وهي بتمسك إيده بفرحة: "الحمد لله رب العالمين... الحمد لله رب العالمين... يوسف أنت كويس؟

يوسف بابتسامة هادية وعينه بتقفل وتفتح بتعب وإرهاق وبيتكلم بالعافية: "الحمد لله رب العالمين." ندي بصتله بخوف عليه: "يوسف أنت عارف أنا مين؟ يوسف ابتسامته زادت شوية وهو مش قادر يتكلم بس هز راسه بـ آه. ندي بلعت ريقها بتوتر وقلق: "طب أنا مين؟ يوسف بابتسامة وصوته مبحوح: "ندي." ندي ابتسمت وفرحت أوي بس غصب عنها دموعها لمعت في عيونها. يوسف كشر شوية لما شاف لمعت عيونها بدموعها، وبصوت مبحوح وهو بيحاول

يمسح دموعها قبل ما تنزل: "إحنا اتفقنا على إيه؟ ندي وهي بتمسح دموعها بسرعة وهي بتهز راسها: "حاضر... هبطل عياط." يوسف ابتسم بهدوء وندي بادلته الابتسامة وهي بصاله برضا. غصب عنها لما سألته إذا كان يعرفها ولا لأ، كانت عايزة تشوفه لسه بيخرف ولا بدأ يستوعب كلامه. يوسف بتعب: "عطشان... عايز أشرب." ندي بسرعة وهي بتقوم من مكانها: "حاضر... هجبلك مياه حالاً." ندي جريت ع المطبخ ونهي بتسألها لما لقتها بتجري ومتسرعة: "في حاجة حصلت؟

يوسف تعب تاني؟ ندي بابتسامة: "لأ يا مامي... الحمد لله رب العالمين... يوسف صحي وعايز يشرب." نهي بسرعة سابت اللي في إيديها وهي بتخرج جري ليوسف: "يوسف صحي... طب ماقولتليش ليه." ندي جابت المياه ودخلت في ضهر نهي. نهي باهتمام: "يوسف... أنت كويس يا حبيبي... عامل إيه دلوقتي؟ يوسف بتعب: "عطشان... عايز أشرب." نهي بسرعة سندت ظهره وندي قربت منه المياه يشرب. بعد ما شرب وارتوى، نهي قاست حرارته لقتها كويسة.

نهي بابتسامة هادية: "الحمد لله رب العالمين... أنت أحسن من الأول بكتير." يوسف بابتسامة هادية: "الحمد لله." يوسف بزعل وحزن ظهر في نبرة صوته وملامحه: "تعبتكم معايا يا ميس نهي." ندي كشرت أوي من كلامه. نهي بتكشيرة وزعل: "إيه اللي أنت بتقوله ده يا يوسف... تعب إيه بس." نهي بابتسامة هادية وحب: "ده أنا بعتبرك زي ندي." نهي بهزار: "ولا منفعش؟ يوسف بسرعة بس بحرج: "لأ طبعاً... إزاي حضرتك تقولي كده." يوسف

بابتسامة هادية وامتنان: "أنا مش عارف لو ماكنتوش موجودين في حياتي كانت حياتي بقت عاملة إزاي." يوسف بحب: "ساعات بحس إن ربنا بيحبني عشان إنتوا موجودين جنبي." ندي ابتسمت بهدوء ونهي بابتسامة هادية وحب: "ربنا يصلح حالك وحالنا ويفرح قلبك يارب." يوسف ابتسم بهدوء هو وندي وأمنوا على دعائها. نهي باهتمام: "أنا هقوم أحضرلك شوية شوربة عشان تقويك كده." يوسف هز دماغه بتمام، ونهي سابت يوسف وندي وخرجت ع المطبخ. ندي قعدت ع الكرسي،

ويوسف بجدية: "ندي هو إيه اللي حصل؟ ندي بحزن قالت ليوسف اللي حصل من ساعة ما راحت الشركة لحد ما وائل كلم نهي تجيلهم. ندي مكنش عندها خلفية عن الاجتماع اللي المفروض يوسف يحضره فما قالتهوش أي حاجة بخصوص الموضوع ده. ولا حتى هي عارفة أبوها سابهم وراح فين. يوسف غمض عينه بتعب وإرهاق. ندي بصوت مبحوح: "سوري يا يوسف... أنا السبب في اللي حصلك." يوسف فتح عينه وبصلها بسرعة لقي دموعها بتنزل منها غصب عنها.

فكشر شوية: "ليه بتقولي كده يا ندي... وليه بتعيطي دلوقتي؟ ندي مقدرتش تمسك نفسها وقالتله بعياط: "لو ماكنتش خدت منك الجاكت ماكنتش تعبت ولا حصلك اللي حصل." يوسف غصب عنه ضحك أوي وضحكته استفزتها جداً. ف قالتله بغيظ: "إنت بتضحك على إيه!!! ها؟؟؟ يوسف وهو لسه بيضحك وف نفس الوقت بيمسح دموعها بإيده: "هههه... على جنانك يا ندي." ندي بغيظ منه أكتر من الأول: "أنا مجنونة يا يوسف... تصدق!!! يوسف بابتسامة هادية: "طب أعمل إيه؟

ما إنتي المجنونة لوحدك." ندي بجدية: "على فكرة بقي أنت السبب في اللي حصلك." يوسف بعدم فهم: "إزاي!!! مش فاهم؟ ندي خدت نفس جامد وخرجته بالراحة وبجدية: "أنا مرضتش أديلك الجاكت بتاعك عشان سبق وقولتلي قبل كده إنك مش بتلبس حاجة مكان حد... عشان كده مرضتش أرجعهولك." يوسف بصلها أوي باستغراب وكأنه بيحاول يفتكر مناسبة الكلام اللي قالهولها. لحظات وافتكر كلامه ليها بخصوص لبسه لما أنقذها أول مرة. ف بصلها بحزن: "سوري يا ندي...

بس أنا ماكنتش أقصدك إنتي بالذات." ندي بعدم فهم: "تقصد إيه؟ يوسف بزعل وحزن: "وجعي من جاكلين خلاني أشوف كل البنات زيها... كدابين وخاينين... ومش بطيق أي حاجة فيها ريحتهم." ندي غمضت عينيها بحزن وحطت وشها في الأرض بزعل. يوسف حط إيده على ذقنها وبيرفع وشها ليه وبابتسامة هادية: "بس إنتي مش زيهم يا ندي... فيكي حاجة مختلفة... معرفش إيه هي." ندي ابتسمت أوي وفرحت من جواها لدرجة إن ابتسامتها ظهرت في عيونها.

يوسف كمان ابتسامته ظهرت في عيونه وهو بيقولها بغلاسة: "تفتكري عشان مجنونة شويتين... ولا إيه؟ ندي قلبت وشها وبصتله بتكشيرة وغيظ وهي بتبعد إيده عنها: "تصدق وتأمن بالله؟؟ يوسف بابتسامة: "لأ إله إلا الله محمد رسول الله." ندي بنفس غيظها: "أنت مستفز بجد يا يوسف... ورزل... ولو ماكنتش تعبان كان زماني خبطاك بحاجة في وشك." يوسف ضحك أوي من قلبه. ندي بغيظ أكتر من الأول: "ده أنت غتت بشكل." يوسف وهو لسه بيضحك: "هههه...

مش هتنازل عن الجاكت بتاعي على فكرة." ندي برخامة: "هتذلني على أم الجاكت بتاعك... بكرة هجيبهولك لغاية عندك... يا رخم... ارتحت؟ يوسف بضحك: "هههه... ماشي... هستناكي تجيبهولي." ندي ابتسمت بهدوء. لحظات ونهي دخلت لهم وهي في إيديها صينية الأكل. كانت عاملة شوربة خضار وفراخ مسلوقة وقعدت جنبه عشان تأكله. ندي بدأت تسنده على ظهر السرير عشان يعرف ياكل ونهي بدأت تأكله بإيديها: "يلا يا يوسف... بسم الله."

يوسف أول ما أخد منها أول معلقة، قالها بحب: "الله..... تسلم إيدك يا ميس نهي... أول مرة أدوق الأكل بالشكل ده." يوسف ظهر في عيونه لمعت دموع: "فكرتيني بـ mom." ندي حست بنغزة وجع وحطت إيدها على قلبها من كلامه. ونهي بصتله في سكوت وهي بتحط إيديها على قلبها لأنها حست بنفس النغزة اللي ندي حست بيها. مش كده وبس... افتكرت كلام وائل ليها عن يوسف. وافتكرت إحساس وائل كان عامل إزاي أول ما بدأت تتعرف عليه بشكل شخصي.

نهي بلعت ريقها بصعوبة، وابتسمت بهدوء وهي بتمد إيدها وبتأكله حتة فرخة في بوقه: "بألف هنا وشفا يا يوسف... ما طرح ما يسري يمري." يوسف ابتسم بهدوء وهو بيفتح بقه وبيأكل من إيديها. فجأة سمعوا صوت من وراهم: "حمد الله على سلامتك يا يوسف." يوسف ابتسم أوي. ونهي وندي بصوا وراهم كان وائل. ندي بابتسامة هادية: "حمد الله على السلامة يا بابي." وائل باسها في راسها بحنية: "الله يسلمك يا قلبي."

نهي بابتسامة هادية وحب: "حمد الله على السلامة يا وائل." وائل بصلها بغضب وشدة وبيتكلم بجمود: "الله يسلمك." نهي كشرت من شدته وطريقته في الكلام معاها وضيعت عينيها وهي بتبص في عينه. كأنها بتسأله بعنيها "مالك... بتكلمني كده ليه". وائل لسه زي ما هو بيبصلها بحدة وغضب. وفهم سؤال عينيها بس تجاهلها ووجه كلامه ليوسف بهدوء وهو بيقرب منه وبيقع جنبه ع السرير: "عامل إيه دلوقتي يا يوسف؟ ندي ويوسف ملاحظوش معاملة وائل لمراته. ف يوسف

بيتكلم بابتسامة هادية: "الحمد لله رب العالمين." وائل بابتسامة هادية: "الحمد لله رب العالمين... ربنا يطمنا عليك يا يوسف." وائل بيكمل كلامه: "المهم لازم تكمل أكلك كله عشان تتقوى كده." وائل بابتسامة هادية: "وهنبقى نتكلم بعدين... ماشي؟ يوسف بابتسامة هادية: "حاضر." وائل بابتسامة غلاسة وهو بيقوم من مكانه وخارج على بره: "وأعمل حسابك هنبات معاك كام يوم." يوسف وندي ونهي بصوا له بتنيحة.

وائل وهو بيغمزه برخامة: "قاعدين على قلبك يا باشا." وائل خرج ويوسف ضحك أوي من قلبه هو وندي ماعدا نهي. فضلت ساكتة ودماغها عمالة تودي وتجيب. خدت نفس جامد وخرجته بالراحة وهي مش فاهمة جوزها ماله بيتجاهلها ليه... وبياخد قرارات مع نفسه من غير ما يتكلم معاها ولا ياخد رأيها ولا حتى يستشيرها فيها. لحظات... ورسمت ابتسامة خفيفة مصطنعة وبصت لندي بهدوء: "ندي آكلي يوسف لغاية ما أحضر الأكل لوائل." ندي بابتسامة هادية: "حاضر يا مامي."

نهي خرجت لوائل. وندي بدأت تأكل يوسف. ويوسف بغلاسة: "واخدة الجاكت بتاعي وكمان هتبات في بيتي... مش فاهم أنا... إيه الرخامة دي." ندي بغيظ منه وهي بتحشر المعلقة في بوقه بغتاته: "الجاكت بتاعك هروح أجيبهولك النهارده... وبخصوص البيات... فده هيبقى غصب عنك مش بمزاجك يا غتيت." يوسف بابتسامة وهو بيتآوه من المعلقة: "آه... بالراحة." ندي بابتسامة غيظ: "هو إنت لسه شوفت حاجة... ده أنا هستغل اللي إنت فيه ده... بس اصبر عليا يا يوسف."

يوسف ضحك أوي وندي ابتسمت على ضحكته. في مصر... آسر بعد ما ساب أبوه ودخل أوضته وسند ظهره ع ظهر السرير وهو مغمض ودموعه بتنزل منه غصب عنه. لحظات وفتح عينه ومسك فونه وبيتصل بندي... بس زي كل مرة فونها مقفول. رمى فونه ع السرير بنرفزة وغضب وقام من مكانه وهو بيروح وبييجي وهو مش عارف يوصلها إزاي. شوية ومسك فونه وفتح الواتس يشوف آخر ظهور ليها كان إمتي... بس برضه معرفش يوصل لحاجة. فتح الفيس برضه معرفش يوصل لحاجة.

بعد ما فات شوية وقت... غمض عينه بتعب وإرهاق وهو حاسس بقهرة ووجع في قلبه. عند زياد... بعد ما فات ساعتين تلاته... ولاء دخلت لزياد أوضته وهي بتصحيه بهدوء: "زياد... زياد... اصحي يا زياد." زياد فتح عينه بتعب: "خير يا ماما." ولاء بجدية بهدوء: "قوم يلا عشان تاكل لقمة وتروح بيتك." زياد بصلها بتنيحة وهو بيعدل نفسه: "نعم... اروح بيتي؟ ولاء بجدية شوية: "آه... تروح بيتك...

هو أنت فاكر إني هسمحلك تبات هنا وتسيب مراتك بايته لوحدها في البيت؟ لأ طبعاً... أنا مش هسمحلك بده." زياد قام من مكانه بنرفزة وعصبية: "هو إيه ده يا ماما إنك مش هتسمحيلي إني أبات هنا... ده بيت أبويا... يعني أجي أنام فيه براحتي." أحمد دخل عليهم بعصبية: "ما تعليش صوتك على أمك... أنت سامع؟؟ ولا خلاص... ما عشان كبرت واتجوزت وبقالك بيت تعلي صوتك على أمك براحتك." أحمد بعصبية

ونرفزة أكتر من الأول: "ولا مابقاش حد يملي عينك يا زياد؟ زياد بلع ريقه بتوتر. ولاء قامت ناحيته بسرعة وهي بتحاول تهديه: "أهدى يا أحمد... هو مايقصدش." أحمد بصلها بحدة ونرفزة. وزياد بسرعة: "لأ عاش ولا كان يا بابا أعلى صوتي عليك أو على ماما." زياد بتنهيدة: "أنا بس اتنرفزت شوية لما حسيت إن ماما عايزاني أمشي." أحمد لسه هيتكلم، كانت ولاء سبقته: "أنا فعلاً مش عايزة أك تسيب مراتك وتبات هنا يا زياد." زياد بصلها بضيقة.

وأحمد بتأييد: "ولا أنا عايزك تبات هنا." زياد بص لأبوه بصدمة وذهول. مكنش متوقع إن أبوه هيأيد أمه في كلامه. ولاء بهدوء: "ياما بتحصل مشاكل بيني وبين أبوك... وخناق وزعل وخصام... ولاء بجدية: "عمرك شفت أبوك ساب البيت ومشّي؟ عمرك شفتني بايته لوحدي بيكم إنت وإخواتك؟ زياد سكت وبص في الأرض. وأحمد بحده: "ما ترد؟؟ سكت ليه؟ زياد بلع ريقه بالعافية، وبصوت واطي: "لأ." أحمد بنرفزة: "على صوتك." زياد بص له بعصبية: "لأ... ماحصلش."

ولاء ابتسمت بوجع وحزن على ابنها. وأحمد بجدية: "أيوه... عمرك ما شفت كده عشان عمره ما حصل." ولاء وهي بتقرب من زياد بهدوء: "مهما كان خلافك وزعلك من مراتك يا زياد... ف ده مايدلكش الحق إنك تسيبها تبات لوحدها في بيتك. مراتك ماسابتش أهلها ورضيت تتجوزك عشان تسيبها وتبات في حتة تانية." ولاء بجدية أكتر من الأول: "وخصوصاً إنها تعتبر في غربة... أهلها مش هنا عشان تقدر تسيب بيتك وتروحلهم."

أحمد بهدوء شوية: "يا بني أهلها أمنوك أمانة... مشيوا وسابوها معاك وهم متطمنين عليها إنها مع راجل هيحميها ويحافظ عليها... تقوم تخون الأمانة؟ زياد بص له بصدمة. ولاء بجدية: "ترضاه لأختك يا زياد؟؟ ترضاه لسدرة؟ زياد بعصبية: "طبعاً لأ." أحمد بجدية: "اللي ما ترضاهوش على نفسك ماترضاهوش لغيرك يا زياد... واللي ما تقبلهوش لأختك.... ما تقبلهوش لغيرها." ولاء بحزم: "روح لمراتك واتكلم معاها بالراحة يا زياد...

وافهم منها سبب رفضها للخلفة... مش يمكن تكون ماعندهاش استعداد إنها تربي طفل دلوقتي... مش يمكن تكون خايفة من الموضوع كله." زياد أخد نفس جامد وخرجه بالراحة. وأحمد بهدوء: "روح بيتك واتكلم معاها... عمر ما كان الهروب وسيبانك للبيت هيحل مشكلة... بالعكس... هتزيدها وهتخلق فجوة بينك وبين ليليان." زياد غمض عينه بحزن. لحظات وأخد نفس جامد وخرجه بالراحة وفتح عينه بهدوء وهو بياخد فونه ومفاتيح عربيته: "ماشي يا بابا... سلام."

زياد خد بعضه ونزل وهو كله هم وغم. أحمد بتنهيدة حزينة عليه: "ربنا يصلح حالك وحال إخواتك يا زياد." ولاء آمنت على كلامه بحزن وزعل على ابنها وهي بتدعي له بالهداية. فات ساعة وليليان سمعت باب شقتها بيتفتح... ف عرفت إن زياد رجع البيت. بسرعة غمضت عينيها وعملت نفسها نايمة عشان ما يتكلمش معاها في أي حاجة. زياد مكنش سامع صوت لمراته... ف دخل أوضته لقاها نايمة.

أخد نفس جامد وخرجه بالراحة وهو بيحمد ربنا إنه لقاها نايمة عشان معندوش استعداد إنه يتكلم معاها ولا يدخل معاها في أي مناقشة. خد شاور وبعد ما خلص نام جنبها بس كان مديها ظهره... وهو صاحي ودماغه عمالة تودي وتجيب وهو بيفكر في كلام أمه وأبوه. ليليان كمان كانت مدياله ظهرها... وهي بتفكر في كلام صاحبتها. 《فلاش باااااااك》 مارلين بجدية: "اسمعيني كويس يا لي لي... لازم زياد يفهم كويس إنه مش هيقدر يتحكم فيكي....

وللي إنتي عايزة تعمليه هتعمليه غصب عنه." ليليان بجدية: "بس ده هيخلق مشاكل يا ماري... وأنا أصلاً مش عايزة مشاكل مع زياد." مارلين بعصبية: "هو اللي عمل المشكلة مش إنتي يا لي لي... وبعدين إنتي لازم تعوديه على طبعك مش لازم يتحكم فيكي و لازم يفهم كويس إنك مش مجبرة تنفذي كلامه كله." مارلين بجدية: "إنتي ليكي شخصيتك المستقلة يا لي لي... يعني اللي إنتي عايزة تعمليه تعمليه.... وهو لازم يحترم رغبتك... سواء عايزة تخلفي أو لأ...

وهو مش لازم يجبرك على ده... والموضوع مش بيخص الخلفه بس... لأ.... ده في أي حاجة تخصك يا ليليان." ليليان بتردد: "بس... مارلين باهتمام: "من غير بس يا لي لي... ما تنسيش إنك متجوزة واحد مختلف في طباعه وتربيته عنك... ف شيء طبيعي إنه يحاول يغيرك ويخليكي تحت طوعه." مارلين بجدية: "مش لازم تديله الفرصة دي يا ليليان... حتى لو وصلت إنك تقوليله إنك هتسافري ألمانيا." ليليان بصدمة: "أسافر؟ مارلين بابتسامة تهكم: "آه...

تسافري تغيري جو عند أهلك." مارلين بحماس: "طب تصدقي طلعت فكرة تجنن... أراهنك إنك لو قولتي له كده هيخاف منك ومش هيقدر يجبرك على أي حاجة هو عاوزها." ليليان سكتت وبدأت تفكر في كلام صاحبتها. لحظات ومارلين بجدية: "أهم حاجة ما تضعفيش قدامه يا لي لي... وخليكي دايماً قوية.... ولازم تعرفي إنك تقدري تتحكمي فيه وفي أمور حياتك معاه." ليليان بهدوء: "ماشي يا ماري... هفكر في كل اللي قولتي لي عليه."

مارلين بابتسامة هادية: "ok لي لي... وابقي طمنيني عملتي إيه مع زياد." ليليان بابتسامة هادية: "ok ماري... aufwiedersehen (آشوفك بعدين) 《باااااااك》 ليليان بجدية وتحدي: "مارلين عندها حق... مش لازم أخضع ليك يا زياد... حتى لو رست إني أرجع ألمانيا." في بيت آدم... آدم واخد سدرة في حضنه وهما بيتفرجوا على فيلم. سدرة بصت لآدم مرة واحدة: "آدم." آدم وهو بيبوس راسها بحنية: "عيون آدم."

سدرة ابتسمت أوي وهي بتشد على حضنه وهي مغمضة عينيها. لحظات وفتحت عينيها وبتبص في عينه بابتسامة هادية وحب بس بغلاسة وهي بتعض شفايفها بدلع: "إنت بتثبتني يا آدم.... مش كده؟ آدم ضحك جامد أوي من قلبه وهو بيزيد في حضنه ليها: "هههه..... متجوز مخبر يا ناس..... سدرة قامت من حضنه ووقفت قصاده وهي بتحط إيدها في وسطها وإيدها التانية على حاجبها وهي بتعوج بوقها: "نعم يا دلعدي!!!! مخبر؟؟ مخبر إيه يا عنيا." آدم اتصدم من تصرفها...

بس غصب عنه انفجر من الضحك على شكلها ومنظرها وهي بتعمل كده: "ههه.... ينهار أزرق.... هي وصلت لكده." سدرة بغيظ منه: "آه.... وصلت لكده يا آدم... وأكتر من كده كمان." آدم وهو بيقوم من مكانه وبيقرّب منها وهو بيبصلها شرزا بس بابتسامة: "لأ بقي... مادام وصلت لكده... يبقى مفيش قدامي غير كده." سدرة خافت منه لما لقيته بيبصلها شرزا وهو بيقرب منها وهي بتحاول تبعد عنه: "آدم.... اتلم.... مش عايزة قلة أدب... مش عايزة حد يسمع صوتنا."

آدم بغيظ أكتر من الأول وهو بيقرب منها: "كمان اتلم وقلة أدب!!! لأ ده أنتي لازم تتعلمي الأدب من أول وجديد." سدرة بلعت ريقها بصعوبة... ويادوب لسه هتجري من هنا... كان آدم قفشها من قفاها عشان يعلمها الأدب. في أمريكا... نهي خرجت ورا وائل لقته بياخد شاور. فضلت قاعدة مستنياه وهي على آخرها منه... مش عارفة توصل لحاجة ولا قادرة تتوقع أو تخمن جوزها متغير من ناحيتها ليه.

فات شوية وقت لقيته خرج من الحمام وعدى من جنبها بس كان متجاهلها... ولا كأنها موجودة قدامه. نهي فضلت بصاله بنرفزة وغيظ لغاية ما قعد ع الكنبة وشغل التليفزيون. نهي مقدرتش تمسك نفسها أكتر من كده ف وقفت قصاد التليفزيون وبصاله بغيظ وبتقوله بحده بس بصوت واطي عشان يوسف وندي ما يسمعوش صوتها: "ممكن أفهم في إيه؟؟ بتعاملني كده ليه؟

وائل باصص لها بحدة وغضب من لحظة ما وقفت قصاد التليفزيون. فضل باصص لها بنفس الحده والغضب من غير ما يتكلم بنص كلمة. لحظات وبيبعدها بإيده من قدام التليفزيون وبيكمل فرجه. نهي بعصبية مكتومة: "وائل... ماتعصبنيش أكتر من كده.... إحنا مش في بيتنا.... عايزة أفهم.... أنا عملت إيه عشان تتعامل معاها بالشكل ده." وائل بحده وغضب وعصبية مكتومة وهو بيقوم من مكانه وبيمسكها من دراعها بقوة

ونرفزة وهو بيجرجرها معاه: "كويس يا هانم إنك عارفة إننا مش في بيتنا.... وائل وقفها قدام المرايا: "ممكن أعرف شعرك ده بيعمل إيه!!!! ها؟؟ وائل بعصبية مكتومة أكتر من الأول وهو بيضغط على دراعها جامد أوي: "ولا دراعك اللي سيادتك مبينة نصه.... وائل بغضب جامح وهو بيجز على سنانه بغيظ: "وكمان سيادتك بتأكليه في بوقه.... وائل بغل وغضب وغيظ وهو لسه بيجز على سنانه: "ده أنتي هتشوفي أيام سودة يا نهي.... أسود من قرن الخروب." نهي

بلعت ريقها بصعوبة وخوف: "يا نهار أزرق.... ده هيبقى مرار طافح." وائل وهو بيضغط على دراعها جامد أوي: "مرار طافح؟؟ اصبري عليا لما نرجع البيت.... هعيشك أيام... هتفضلي تحلفي بيها طول عمرك." نهي بلعت ريقها بصعوبة وهي بتحاول تلم الموضوع: "اصبر عليا شوية بس يا وائل.... والله ما كان قصدي." وائل ساب دراعها بحده وعينه لسه بتطق شرار وغيظ... وهي بتحاول تشرحله اللي حصل: "كنت واقفة في المطبخ بعمل الغدا... والجو كان حر جدا...

ف خلعت الحجاب وشمرت دراعي عشان فعلاً مكنتش طايقة الحر.... ولما يوسف بدأ يفوق حضرتله الأكل وأكلته عشان مكنش قادر يمسك المعلقة لوحده.... ومركزتش في حاجة خالص." وائل أخد نفس جامد وخرجه بالراحة بس بحده... لأن غصب عنها كلامها منطقي واتصرفت بحسن نية وتلقائية. وائل بص لبعيد. ونهي بابتسامة هادية وحب وهي بتقف قدامه وبتلف وشه ليها: "حقك عليا يا وائل.... أنا غلطت ومش هعمل كده تاني."

نهي بنظرة عتاب: "بس والله ماكنت أقصد ولا متعمدة أعمل ده." وائل بحده وغضب: "وهو فكرك يعني كنت هسكتلك لو كنتي قاصدة أو متعمدة إنك تعملي كده؟ نهي بغلاسة: "كنت هتعمل إيه يعني؟ وائل بغل وغيظ من سؤالها وهو بيمسك دراعها وبيلويه ورا ضهرها جامد: "ده أنا كنت كسرت دماغك دي... سامعة." نهي وهي بتتأوه بس بتحاول تاخد الأمور بهزار عشان ما يقلبش عليها: "آه... خلاص يا وائل حرمت.... والله ما هعمل كده تاني." نهي بهزار: "خلاص بقي...

إحنا آسفين يا صلاح." وائل ضحك جامد وهو بيسيب دراعها. ونهي وهي بتدعك دراعها: "ياساتر.... إيه ده.... ربنا ع الظالم والمفتري ياشيخ." وائل بحده وهو بيجز ع سنانه: "نهي." نهي بغيظ وهي بتحط إيديها على بوقها: "خلاص سكت أهو." وائل ابتسم بهدوء وهو بيحط إيده على كتفها وخدها قعدها جنبه ع الكنبة وبيدلك دراعها بهدوء وعينه في عينيها بحب: "سوري يا نهي.... بس بصراحة كنت متغاظ منك أوي." وائل بغل وغيظ: "كان نفسي أضربك أوي."

نهي بابتسامة هادية وحب: "لسه بتغير عليا يا وائل حتى بعد السنين دي كلها وبعد ما كبرت وعجزت؟ وائل وهو بيبوس راسها بحنية: "اللي بيحب من قلبه بجد عمره ما بيفرق معاه سن ولا شيب.... السن ده مجرد رقم في بطاقة... والشكل بيتغير للأحسن أو الأوحش... لكن اللي بيبقى محفور في القلب بصدق... مش بسهولة إنه يتغير." نهي ساندت راسها على كتف جوزها بحب واحتواء ورضا وهي ماسكة إيده...

ووائل سند راسه على راسها وهو بيضمها كلها على بعضها جوه حضنه. ندي كانت معدية من جنبهم وهي ماسكة صينية الأكل عشان تدخلها المطبخ... ولفت نظرها سؤال نهي لوائل عن غيرته ليها. هما ماخدوش بالهم إن ندي شايفاهم أو سامعاهم. ندي ما حضرتش كل اللي حصل بينهم... بس سؤال نهي ليه هو اللي لفت نظرها. ندي اتنهدت بالراحة بس بحزن شوية وغصب عنها افتكرت آسر وغيرته عليها. دخلت المطبخ وغسلت الأطباق...

بس كانت بتفكر في كلام وائل ومقدرتش تنكر من جواها إنها بدأت تفتقد غيرة واهتمام آسر بيها. بعد ما خلصت دخلت ليوسف لقته مغمض عينه ونايم بعد ما أداه الدوا. خرجت وقفلت الباب وراها بهدوء عشان يعرف ينام. وهي دخلت أوضة تانية... خلعت حجابها وفكت شعرها وهي بتبص لنفسها في المرايا. شوية وقعدت ع السرير ومسكت فونها وفتحت الفيس وبدأت تشوف الإشعارات اللي جتلها. اتصدمت وتنحت أوي أول ما لقت منشن ليها من آسر بقاله نص ساعة.

غصب عنها ابتسمت أوي وفرحت من جواها إنه لسه فاكرها مش ناسيها ولسه بيحاول يوصلها بأي شكل. بسرعة وبدون تردد ضغطت على الإشعار واتفاجئت إنه عاملها منشن على.......