رواية وعد الفصل الحادي والعشرون 21 - بقلم عزة العربي

رحيل: يا وعد فكري بسرعة. وعد: عاوزين حاجة جديدة. اممم، قلتلك نحجز أي قاعة أو كافتيريا ونفاجئها. رحيل: انتي عارفة أن قمر مش هتوافق تخرج بكرة بالذات. هي عارفة أن بكرة عيد الأم وهي حالفة ما تحتفل بيه من بعد موت أيه. وعد: الله يرحمها. خلاص، عندي فكرة. رحيل: هااا؟ قولي، يا رب تقولي حاجة مفيدة بقى. وعد: رخمة... بصي، انتوا طول اليوم اعملوا نفسكم مش فاكرين أو مش واخدين بالكم، وبالليل تكونوا محضرين التورت والهدايا وتفاجئوها.

رحيل: اممم، فكرة برضه. طب انتي هتيجي امتى؟ وعد: أنا؟ لا استحالة، انتي عارفة مش هينفع، بس هحتفل بيها بعدين. رحيل: وعد بليز، قمر هتزعل لو عملنا حاجة وانتي ما جيتيش. انتي عارفة هي بتحبك إزاي. وعد: صدقيني مش هينفع، صعب أشوفه تاني، أنا مصدقت اتأقلمت عالوضع الجديد. رحيل: قلتلك أبية يحيي مسافر، والله ومش هييجي دلوقتي خالص. وعد: انتي عارفة أنا فقر ومش عاوزة أحرج نفسي ولا أحرج ياسين برضه. انتي عارفة أنه بيضايق لو روحت عندك.

رحيل: وعد بليز، قمر هتفرح لو شافتك. انتي عارفة. ويا ستي عشان سي ياسين بتاعك ميزعلش، بلاش تقوليله. وعد: ربنا يسهل، سيبها للظروف. تاني يوم. وعد بدموع: طب اقعد كمان يومين. أحمد بحنان: ممكن متعيطيش؟ والله مش بإيدي. كلموني في الجهاز ولازم أتحرك دلوقتي. وعد: طيب، هترجع امتى؟ أحمد: دا بقى يتوقف عليكِ. وعد: عليا أنا؟ إزاي؟ أحمد: انتي تدعيلي أرجع لكِ بسرعة وربنا يستجيب وأخلص المهمة بسرعة وأرجع لكِ.

وعد: أحمد، أوعدني تحضر حفلة التخرج بتاعتي. أنا مش هيكون معايا حد. أحمد: إن شاء الله هحضرها. ادعيلي انتي بس. واوعديني إنك تجيب امتياز مع مرتبة الشرف والأولى عالدفعة. انتي مش أي حد. وعد بدموع أكتر: أنا مليش غيرك. ارجعلي بالسلامة. أحمد: إن شاء الله يا حبيبتي. وبعدين متنسيش معاكي خطيبك ومعاكي صحابك الحلوين القمرات. وعد بابتسامة وغمزة: اه، قلتلي صحابي الحلوين قصدك رحيل يعني؟

أحمد بهيام: رحيل. الله اسمها حلو أوي. بقولك إيه، متتصلي بيها كده أقوللها على حاجة قبل ما أمشي. وعد: لا لا لا لا، محبكش وأنت كده. أنا مبحبش أبقى كيس جوافة. أحمد: أحلى وأطعم جوافاية يا ناس. اتصلي بقى. وعد: تدفع كام؟ أحمد: اتصلي يا بت يلا بدل ما أقوم لك. وعد: ماشي، أنت تؤمر. وعد اتصلت وسابت التليفون لأحمد ودخلت أوضته. رحيل: صباح الخير يا مزة. أحمد: صباح الفل والورد على أجمل صوت وأجمل عيون في الدنيا. رحيل

بتوتر اتعدلت من نومتها: احم. أحمد: أحلى أحمد سمعتها في حياتي. رحيل بإحراج: هي وعد فينا؟ أحمد: عاوزاها؟ رحيل: طبعاً. أحمد: ماشي، هجيبهالك. أنا كنت عاوز أسمع صوتك قبل ما أسافر. رحيل بدموع: مسافر؟ أحمد: أيوه مسافر كمان ساعة. رحيل: ليه كده؟ وهتسيبنا؟ أقصد يعني هتسيب وعد؟ أحمد: مش بإيدي حاجة مهمة سريعة كده، وإن شاء الله تعدي على خير. خلي بالك من نفسك. رحيل: خلي انت بالك من نفسك، وارجع بالسلامة عشان وعد. أحمد: عشان وعد بس؟

رحيل: لا، أه، أقصد يعني عشاننا كلنا. أحمد: رحيل، أنا بحبك. رحيل ووشها جمرة نار معرفتش ترد. أحمد: بحبك من أول يوم شفتك فيه. قلبي اتخطف. مش عاوز منك غير أعرف ردك بس. أنا مش عارف هرجع من المهمة دي ولا لأ، بس عاوز كل حاجة تبقى في الحلال. لو اتكتب لي عمر ورجعت أتقدملك ونتجوز وكل حاجة تبقى قدام ربنا. عاوز رد واحد بس منك، لو موافقة نكمل، لو مش موافقة ي... رحيل بتسرع: لا، موافقة.

وبعدين حطت أيدها على بوقها وضربت نفسها قلم خفيف. أحمد: قولتي إيه؟ أنا مسمعتش. رحيل: مقولتش حاجة. أحمد بمكر: يا خسارة، يلا مفيش نصيب. رحيل: لا لا، أنا قلت موافقة. أحمد ضحك من قلبه: يعني عندك أحاسيس ومشاعر وكده؟ رحيل بضحك: يعني شوية. اتكلموا شوية وأحمد سافر. بالليل وعد جابت هدية وراحت الڤيلا، وكانت لابسة فستان تحت الركبة زهري وسايبة شعرها.

قدمت الهدية لقمر واحتفلوا، وقمر كالعادة حضرت العشاء وقعدت تأكل وعد بنفسها، وكان يوم جميل جداً. يوسف: تعالوا بقى نشم هوا شوية في الجنينة برا. وعد: يا ريت يا بابا، الجو النهاردة حلو. قمر: يلا روحوا انتوا، وأنا هعملكم عصير وجاية. يوسف: وأنا كمان هساعد القمر بتاعي. زين: اه يا قلبي يا غلبان، مش لاقي حد يونسك. تليفونه رن. رحيل: أهو، لاقيت اللي يونسك. زين ابتسم وأخد التليفون وراح يرد. وعد ورحيل راحوا الجنينة واتكلموا شوية.

رحيل: وعد، تعالي ندخل جوا شوية أجيب موبايلي عشان نسيته. وعد: لا، روحي هاتيه وأنا هستناكي هنا. رحيل: ماشي. يحيى دخل بعربيته وركنها وشال شنطته وبوكس في إيده. لمح حد واقف في الجنينة بس مش واضح مين. قرب ومع كل خطوة قلبه صوته بيعلي. ساب الشنطة وحط البوكس على الترابيزة وقرب من وعد. وعد بتكذب نفسها، ريحة يحيى مالية المكان برفانه مميز جداً، يمكن عشان في بيته بيتهيألها. حست بنفسه حواليها، لفت لقيته واقف وعيونه عليها ومبتسم.

عيونهم اتقابلت في نظرة عتاب طويلة جداً. نظرة كلها حزن. كل واحد فيهم جواه كلام كتير للتاني، بس يا ترى ينفع كل واحد يطلع اللي في قلبه للتاني، ولا خلاص كل واحد أخد قرار البعد يستحمله؟ كسر الصمت يحيى: أهلاً يا وعد. اتنهدت وعد بصوت عالي، ودا وجع قلب يحيى جداً، واتكلمت: حمد الله على سلامتك يا ديبو. يحيى: تعرفي أن محدش غيرك بيقولي يا ديبو؟ وعد: أنا آسفة لو بتزعلك، مش هقولها تاني. يحيى: أحلى كلمة بتسمعها ودني.

وعد اكتفت بالسكوت وهزت رأسها. يحيى: اتغيرتي كتير وكلامك قل أوي. فين وعد اللي مبتفصلش؟ وعد ابتسمت بكسرة: البركة فيكي. يحيى بحزم: أنتي اللي اخترتي يا وعد، أنتي اللي اخترتي الفراق. سبتيني أول ما اتعلقت بيكي وكنت ههد الدنيا عشانك، أول لما أبوكي وأخوكي أجة بعتي كل حاجة ومشيتي.

وعد بنرفزة وصوت عالي: لو كنت اديتلي فرصة أفهمك، مكنش دا بقى حالي. أخدت قرارك من دماغك وخلاص، قررت تبعد وسيبتني لوحدي. لو أنك عارف إني مليش حد، كنت هبيع الدنيا عشانك. مشيت وخلصت حكايتنا اللي لسه مكنتش بدأت. وخطبت وعشت حياتك في أيام بسيطة. يا أخي، دانتا حتى مزعلتش عليا؟ طب كنت حسسني إني إنسانة، وخاف على مشاعري. أنا حتى لو كنت مراتك عالورق، بس اسمي مراتك. تعال حتي عاتبني.

يحيى قاطعها: في مواقف مينفعش فيها العتاب، لازم تاخد فيها القرار وتبعد وتفارق. وعد بدموع: وبعدت يا ديبو، فارقت؟ ارتحت دلوقتي؟ حاسس إنك أحسن؟

أنا كان نفسي فعلاً نبدأ صح، كان نفسي نبعد شوية ونبدأ حياتنا صح. خطوبة وحب وجواز وفرح وفستان أبيض. كان نفسي يبقى لي عيلة، أو بالأخص كان نفسي تكون عيلتك هي عيلتي. أنت جرحتني أوي يا يحيى، بجد كسرتني، كسرة عمري مهتعالج منها أبداً. خليتني أظلم نفسي وأظلم إنسان تاني معايا. أنا بجد، على قد ما حبيتك، كرهتك. بجد يا يحيى، أنا كرهتك.

يحيى مقدرش يمسك نفسه أكتر من كده. وعد كانت بتتكلم بعصبية وزعل وبتخرج كل اللي في قلبها، ويحيى بيسمعها وقلبه بيتقطع عليها. قرب منها وهي من انفعالها بتزقه بإيدها الاتنين. مسك إيدها جامد وشدها لحضنه، ووعد بتبعد وهو بيزيد في ضمته أكتر، بيزيد كمان. أخدها كلها في حضنه بحب، عوض عن كل الأذى اللي سببهولها. الاتنين نسوا نفسهم وكل دنيتهم في حضن بعض، ودا الحضن اللي بيكون بعد عذاب الفراق.