رواية وجعلکِ سبباً في توبة الفصل الثالث 3 - بقلم آلاء فايز

صحيت ملك على صوت المنبه وبدأت يومها بصلاة ركعتين لله وتلاوة آية الكرسي وأذكار الصباح. أمينة (والدتها) : يلا يا كوكي الفطار جاهز. ملك: حاضر يا ماما، جاية أهو. صباح الخير يا ست الكل، صباح الخير يا أحلى بابا. (قَبَّلت أيديهم) مروان وأمينة: صباح النور يا ست البنات. ثم أكملت أمينة (والدتها) : أنا صحيت حضرت الفطار من بدري أهو عشان تلحقي تاكلي لقمة. ملك: متحرمش منك أبداً. أستأذن أنا بقى. أستودعكم الله. *** في منزل سارة:

فاطمة (والدتها) : يابنتي قومي الساعة بقت عشرة. سارة بفزع: إيه؟! عشرة؟! حرام عليكي ياماما وسيباني نايمة دا كله. دنا فاتني أول محاضرة كدا. (تلف حول نفسها) البس إيه؟! طب هحلق البس دا؟ لا لا أنا أروح بالعباية السمرا أحسن. فاطمة بضحك: لا حول ولا قوة إلا بالله. عباية سمرا إيه اللي تروحي بيها ياهبلة يابنت الهبلة. مش كفاية بتكلمي في نفسك. الساعة لسة ٨ وأخلصي. ملك زمانها جاية. سارة: ولما هي ٨ مبتقوليش ليه؟

لازم تصحيني مخضوضة يعني. (أكملت بهزار) أنتي مش أمي صح؟ كنت حاسة على فكرة. قولي إنكم لقيتوني عند جامع. مفيش أم تعمل كدا. قلبي أها. فاطمة: أنا مش عارفة إنتي جايبة البرود دا منين. أخلصي في يومك دا ولا أستعين بالشبشب. سارة: خلاص يابطوط مالك على الصبح. دنا بفرفشك ياجميل. فاطمة: الجرس بيرن دي أكيد ملك. سارة: ماما قوليلها بلبس ماشي.

فاطمة: أهلاً يا ملك. اتفضلي يا حبيبتي. سارة قالتلي أقولك إنها بتلبس وهي لسة مغسلتش وشها أصلاً. ملك: كالعادة يا طنط. أنا مشوفتش في برودها الصراحة. وبعد ساعة كانت سارة جاهزة. ملك: دا إيه السرعة اللي إنتي فيها دي؟ يخربيتك فاتتنا أول محاضرة. سارة: نعيش وناخد غيرها يا أوختشي. سلام ياماما. (بصوت عالٍ) ملك: بت محسن أخوكي مش هنا صح؟ سارة: أكيد. بتسألي ليه؟ الصنارة غمزت ولا إيه؟ ملك: إيه الهبل اللي بتقوليه دا؟

أنا بس استغربت من صوتك العالي. *** في الجامعة: ملك وسارة ماشيين بيتكلموا وفجأة شخص خبط في كتف ملك. سارة بتدخل: مش تحاسب يا أستاذ أنت؟ محمود باستظراف: الحساب مع الجرسون. وبعدين وإنتي مالك؟ سارة: أبو تقيل دمك. محمود قرب من ملك وهمس: هتبقي بتاعتي برضو. ملك وقتها اتنرفزت ورفعت أيديها ضربته بالقلم. محمود بنرفزة: إنتي اتجننتي؟! والله لأندمك. (رفع أيده يضربها بس شخص مسكها) يوسف: مش أحنا اللي نمد أيدينا على حريم يا صاحبي.

(وجه كلامه لملك) مانتي بتعرفي تخربشي أهو يا قطة؟ ولا أقولك يا ستنا الشيخة؟ سارة مسكت أيد ملك وشدتها عشان يمشوا وبالفعل مشيوا. محمود: يابنت **. يوسف: ما خلاص يا عم. دي عيلة متستاهلش تحرق دمك. محمود: والله لأندمها. بس إنت إيه جابك؟ وقدرت تصحى إزاي وإحنا سهرانين للصبح أصلاً؟ يوسف: زي ما إنت قدرت. نمت ساعتين وقولت أجي أقطع رزقي وأشوف بنتين تلاتة كدا.

محمود: لسة منمتش أصلاً ولو عليا مش عايز أجي الزفتة دي بس دي آخر سنة ليا ولازم أحضر عشان أعديها. يوسف: بلاش نلف وندور على بعض. والقطة اللي بتيجي عشانها قدرت تعلم عليك وسط الجامعة. محمود: أنا مش عارف إنت إزاي كنت في أميركا!! أصلهم بتبقى ناس نضيفة كدا وعندها ذوق في الكلام. ولو على القطة متهمنيش أصلاً. يوسف: طب يلا يا عم النضيف. *** سارة: ملك متشغليش نفسك باللي حصل. هو أخد جزاته خلاص.

ملك بتحاول تفتكر شافت الشخص دا فين قبل كدا. سارة: ملك إنتي كويسة؟ طب بلاش المحاضرات ونمشي؟ أخدتي علاجك طيب؟ ملك بتعب: متقلقيش يا حبيبتي أنا كويسة وكمان ميعادي عند الدكتور النهاردة بعد الجامعة. *** في جانب تاني: سها: مالها ستنا الشيخة دي؟ منار: معرفش بس شكلها بيأكد إنها تعبانة. سها: تتحرق. يلا عشان منتأخرش على المحاضرة والدكتور يرضى علينا. *** في قاعة المحاضرات: بعد ما المحاضرة خلصت والطلاب بدأوا يطلعوا.

دكتور وليد: بشمهندسة ملك إنتي كويسة؟ أنا آسف على تدخلي بس ملاحظ إنك طول المحاضرة مش مركزة حتى بشمهندسة سارة. سارة: إحنا آسفين جداً يا دكتور. بس ملك تعبانة شوية وأنا مقدرتش أركز وأسيبها. (سارة كبرت في نظر دكتور وليد أكتر على حبها لصديقتها وإخلاصها. وفرح أنه اختار صح. ومستني الفرصة اللي يصارحها بمشاعره.) دكتور وليد: أحم طب لو مفيش مانع ممكن أوصلكوا لأقرب دكتور. ملك: لا. قصدي حضرتك أنا كويسة. ملهاش لازمة.

وبعد إصرار من الدكتور وسارة، ملك وافقت يوصلها للدكتور. عند الدكتور: ملك كانت قاعدة مستنية دورها وبعد ما الممرضة نادت على اسمها. ست كبيرة: بعد إذنك يابنتي ممكن تدخلينا قبلك. أنا تعبانة ومش هقدر أقعد أستنى دوري. سارة كانت هتتكلم بس ملك قطعتها. ملك: اتفضلي يا أمي. دخلت الست وبعد ما طلعت من عند الدكتور حبت تشكرها بس اتفاجأت!!! ياترى ملك هيحصلها إيه؟ وياترى مين الست دي؟