رواية ولو بعد حين الفصل السادس عشر 16 - بقلم خلود احمد

يوسف.. متعمليش فيها غبية، انتي عارفة أنا بتكلم على مين. ليال خافت من نبرة صوته وسكتت. يوسف.. بسألك مرة تانية، مين ده؟ ليال بصتله وبعدين بصت من الشباك.. كان حبيبي القديم. يوسف حرك راسه.. اممم، حبيبك القديم! ليال فضلت باصة برا ومردتش عليه، وهو كان سايق بعصبية وبسرعة. وصلوا البيت وهو مكلمهاش تاني خالص، فضل تحت وهي طلعت. ... عمر.. الصبح معرفتش أتكلم معاك، بس فهمني بقى اللي حصل ده. يوسف.. محصلش حاجة.

عمر.. اتكلم عدل يا يوسف، أنت غلطان وبتعاند. راجع بليل سكران من عند واحدة وسايب مراتك؟ أنت مكنتش كده خالص. هو سفرك أمريكا نساك كل حاجة وبقيت زيهم هناك كده؟ حرام وغلط. يوسف.. تمام. عمر.. هو إيه اللي تمام؟ أنت فييي إيه يا بني آدم أنت! يوسف بعصبية.. خلاص بقى، سيبني في حالي يا عم. أنت مش معاك مراتك ومبسوط، عايز مني إيه؟ عمر.. وأنت برضو معاك مراتك ومبسوط، ليه بتعمل كده؟ يوسف.. مبسوط آه.

عمر.. كلامك مش عاجبني، بس خليك فاكر بنات الناس مش لعبة. لو كان لينا أخت ما كنتش هترضى يحصل معاها كده. يوسف.. لو بقى. عمر.. ولما أنت مش بتحبها وبتزفت تحب اللي اسمها مي، متجوزتهاش ليه؟ يوسف بصوت عالي.. ولا بحب دي ولا دي. ارحمني بقى وحل عن دماغي دلوقتي، أنا مش طايق نفسي يا عمر. عمر.. تمام. وسابه ومشي. يوسف حط إيده على وشه ونفخ بضيق، وبعدين قام طلع.

ليال كانت قاعدة على السرير وماسكة التليفون. هو دخل وهبد الباب جامد، هي اتخضت. يوسف.. كملي، كملي. ليال.. أكمل إيه؟ يوسف.. اللي كنتي بتكلميه. ليال.. مكنتش بكلم حد على فكرة. إيه الأسلوب ده؟ يوسف.. ماله الأسلوب؟ مش عاجبك صح؟ ليال.. أيوا مش عاجبني يا يوسف. مبحبش الطريقة دي ولهجة الكلام دي. يوسف.. ماشي، ما أنا عرفت ذوقك أصلاً. طلع وحش قوي. ليال.. أوووف، ابتدينا بقى. أنا غلطانة إني صارحتك.

يوسف.. امم، وأنتي بقى كنتي راحة التويلت ولا راحة تشوفيه؟ شكله كان وحشك. وأنا أقول من ساعة ما دخلنا متوترة، إيه وشكلك اتغير؟ طلع كده بقى. طلعتي بتستغفليني وواخداني معاكي المكان اللي حبيبك فيه. كان بيتكلم بصوت عالي.

ليال.. وطّي صوتك ده عشان أنا مش مستعدة إن حد يسمعك ويفكر فيا حاجة وحشة أنا معملتهاش. وقولتلك مكنتش أعرف إنه موجود وكاااان يعني ماضي. خلاص بقى، ارتاح. وبعدين مانت راجع في نص الليل سكران وحالتك زي الزفت وبكل بجاحة بتقولي إنك عندها وبتخليها ترد على التليفون كمان. يوسف خبط الكرسي بعصبية.. متقارنيش نفسك بيااا، فاااهمه.

ليال خافت من صوت الكرسي وصوته العالي، وافتكرت سامح وهو بيعمل كده وبيضربها على طول. رجعت لورا، وبعدين قعدت على الأرض وسندت على السرير. هو كان مديها ضهره، استغرب لما مسمعش صوتها تاني وإنها مردتش عليه. لف وشه وهو حاطط إيده على رقبته، لقاها قاعدة كده. يوسف.. انتي كويسة! ليال كانت بتدمع وساكتة. قرب منها شوية.. ليال، في إيه؟ انتي كويسة؟ ليال هزت راسها. يوسف قعد جمبها على الأرض، رفع وشها لقاها بتعيط.

مسح دموعها.. خلاص اهدى، انتي اللي عصبتيني بكلامك. ليال.. قولتلك الموضوع خلص في الماضي، أنت مش مصدقني. مبحبش حد يكذبني يا يوسف. بتضايق، بتخنقققق. يوسف.. ماشي خلاص، خلاص. متزعليش، اهدي. أنا مصدقك. قال كده لما لاقها بتعيط جامد وحالتها وحشة. ليال حضنته مرة واحدة، هو اتفاجأ منها وايده فضلت بعيدة عنها. ليال بصوت متقطع من العياط.. أنا معملتش حاجة. كانت ماسكة في القميص بتاعه وبتعيط. افتكرت موقف من كام سنة. ...

سامح.. مين اللي شال الأوراق من مكانها؟ منى.. هو حد بيدخل مكتبك يا سامح؟ سامح شد ليال من إيدها.. أنا شايفك خارجة من المكتب. وديتي الورق فين؟ انطقي. ليال حطت إيدها على وشها بخوف.. والله ما شوفته، صدقني. سامح.. عيلة بنت شوارع زيك متعودة على السرقة. أكيد. انطقي يابت انتي. منى.. سيب البنت يا سامح، حرام عليك بقى. سامح شدها من شعرها دخلها الأوضة وقعد يضربها. فيها وهي تصرخ وتقول معملتش حاجة، والله ما شوفته. أنااا مش كدابة.

... فاقت على إيد يوسف على ضهرها وهو بيهديها. أول ما قربت منه وحضنته، افتكر موقفه مع ملك لما عمر زعلها ويوسف دخلها وحكتله وهي بتعيط، وبعدين حضنته. كان أول حضن ليهم وده أول حضن ليه مع ليال اللي هي ملك، بس هو ميعرفش. حس بشعور غريب ناحيتها وتلقائي حاوطها بإيده وفضل يهدى فيها. يوسف بصوت هادي.. حقك عليا، متزعليش. ليال بعدت عنه ومسحت دموعها.. أنا آسفة. يوسف.. محصلش حاجة خلاص. انتي بقيتي أحسن. ليال هزت راسها بنعم.

يوسف بص في عينها.. أكيد. ليال.. أيوه. يوسف قام وقف، خلع جاكيت البدلة وفتح زراير القميص عشان يغير. خد هدومه ودخل الحمام. خرج لقاها لسه قاعدة. مد لها إيده.. انتي لسه قاعدة ليه، قومي. مسكت إيده وقامت راحت عند السرير تاخد مخدة عشان تنام على الكنبة. يوسف.. لا، خليكي على السرير. زمانك تعبانة. مردتش عليه لأنها كانت تعبانة فعلاً، وطلعت نامت. يوسف طلع على السرير هو كمان. ليال.. أنت بتعمل إيه؟ يوسف.. هنام. ليال.. لا والله.

يوسف.. هي ليلة مش معدية خلاص يا حبيبي. بقى هنام. مانتي لسه باساني من شوية. ليال حدفته بالمخدة.. متقوليش حبيبي دي تاني. يوسف وطى خد المخدة من ع الأرض.. انتي تطولي. وراح نام على الكنبة هو. ... تانى يوم. نزلوا كلهم على الفطار وكانوا متجمعين وبياكلوا. سعاد دخلت.. في واحدة برا اسمها مي، بتقول عايزة يوسف. عمر بص ليوسف وليال كمان. يوسف اتصدم.