رواية رغبة الانتقام الفصل الحادي عشر 11 - بقلم اية عبدالسلام

بعد شوية وقت. إيهاب بإبتسامة ساحرة: يبقى كدا احنا اتفقنا على كل حاجة صح؟ ميرنا برقه: صح. إيهاب فضل باصصلها، وهى اتصنعت الاحراج وقالت وهى بتقوم: عن اذنك، هامشي انا بقى. إيهاب: استنى. ميرنا بإستغراب: إيه؟ إيهاب: احنا لسه ماتفقناش على الميعاد اللى هنمضي فيه العقود مع بعض. ميرنا: اه صح نسيت.. معلش اصل دي اول مرة اشتغل فيها و أعتمد على نفسي، لسه مش متعودة. إيهاب بإبتسامة جانبية: هاتى رقمك علشان ابعتلك الميعاد.

ميرنا بمكر: اه طبعا. إيهاب ادلها موبايله، وهى كتبت رقمها ورجعتهوله تاني. إيهاب: هكلمك اول ما أظبط المواعيد. ميرنا بدلع: حضرتك ترن في أي وقت عادي. ولفت ضهرها وخرجت بخبث. ميرنا وهى بتكلم نفسها: وانا اللي فكرته تقيل ومش هعرف اوقعه. ضحكت بخبث وكملت: دا شكله هايقع قريب من غير ما اعمل أي مجهود. بس دلوقتي في حاجة مهمة، ازاي أقنع خالد اني أشتغل؟ دا احتمال كبير يرفض. والأهم من دا كله، ازاي أطلق منه بعد ما آخد منه فلوس كتير؟

من ناحية الشغل فابسيطة، هاعمل نفسي زعلانة وأفضل أعيط، وهو علشان سازج قلبه هايحن ويوافق. بس أنا لازم أخطط كويس علشان أوصل لكل اللي أنا عايزاه. ميرنا روحت بعد ما اشترت هدوم كتير وميكب علشان يساعدها في أنها تقدر توقع إيهاب وتبقى مرات المدير. دخلت الأوضة لقت خالد لسه نايم.. كانت لسه هاتروح المطبخ بس وقفها جرس الباب. فتحت الباب لقت فتحية حماتها واقفة على الباب و بتبص عليها بغضب. ميرنا نفخت بزهق وفتحتية دخلت على طول

وقالت بعصبية وصوت عالي: خير؟ من ساعة لما اتجوزتوا والبیه مسألش عليا ليه؟ يكونش نسى إن ليه أم؟ وانتي إزاي متسأليش عليا انتي كمان؟ نسيتي إن حماتك ولازم تعملي كل حاجة علشان أرضى عليكِ؟ ميرنا بعدم فهم: ترضي عليا؟ إزاي يعني مش فاهمة؟ فتحيّة بغضب: مش المفروض تجيلي البيت كل يوم وتساعديني في شغلي؟ مش دا واجبك يا حبيبتي؟ ميرنا بسخرية: أساعدك في شغلي اللي هو إيه يعني؟ فتحيّة بعصبية: مالك بتتريقي كدا ليه؟

دا واجب عليكي يا حبيبتي تيجى تطبخيلى وتغسليلي المواعين والهدوم وتنضفي البيت كمان. ميرنا ضحكت بسخرية وقالت: تحبي أغسلك رجلك بالمرة؟ فتحيّة: لو دا يخليني أرضى عنك فإيه المشكلة؟ ميرنا فضلت تضحك وبعدين قربت منها وقالت بجمود: ليه هو أنا خدامة عند اللي جابك؟ فتحيّة بصدمة: اللي جابني؟ انتي بتقولي إيه؟ ميرنا بخبث: فيه إيه يا حماتي؟ دا زمن الجواري انتهى خلاص.

قربت منها وقالت بمكر: دا حتى رنيم السازجة وقفت في وشك واتحدتك ومقدرتيش تمشي كلامك عليها.. بالعقل كدا هاتقدري تمشي كلامك عليا أنا؟ فتحيّة بغضب: بس كنت بقدر أقلب جوزها عليها.. مش خايفة لأعمل كدا معاكي؟ ميرنا بمكر: تؤتؤ. خالد كان بيتقلب عليها علشان ماكنش بيحبها. انما أنا بقى فابيموت فيا.. دا أنا الحب كله برضو.. فاتقي انتي ياحماتي شرّي علشان ماقلبهوش عليكي انتي. فتحيّة

بصدمة: شكلي غلطت غلطة عمري لما وقفت جنبك علشان أجوزك له. ميرنا ضحكت بسخرية وقالت: وقفتي جنبي إيه؟ لا فوقي دا انتي سرقتي ابنك معايا وأخدتي نص الفلوس.. فا لما تبقي أم عدلة الأول ابقي تعالي اعملي حما عليا. ميرنا وهى بتتكلم لمحت ظل جاي عليها. ابتسمت بخبث وفجأة صرخت وفضلت تعيط وتتشحتف بتمثيل. فتحيّة بصتلها بعدم فهم بس اتصدمت لما لقت خالد جاي جرى عليها. خالد بقلق: مالك يا حبيبتي بتعيطي ليه؟ ميرنا شاورت على فتحية

وقالت بخبث وهى بتشهق: مامتك اتهمتني اني سرقتك منها علشان ماعدتش بروح لها، وكمان عايزاني أروح كل يوم أطبخلها وأنضف البيت. شهقت شهقة كبيرة وكملت: دي حتى قالتلي إني أغسل رجليها علشان ترضى عني وماتوقعش بيني وبينك زي ما كانت بتعمل مع مراتك الأولى. خالد بص لأمه بحدة وقال بغضب: الكلام دا صح يا ماما؟ فتحيّة بصدمة وتوتر وارتباك: ا ا ا. خالد بعصبية: أنا مراتى مش خدامة يا ماما. وبعدين إيه سرقتيني منك دي؟ هو أنا عيل صغير؟

أنا اللي ماكنتش بجيلك علشان عندي ضغط شغل مش هي اللي مانعاني. فتحيّة بصدمة ودموع: انت أول مرة تعلي صوتك عليا يا خالد. مسحت دموعها وقالت: لأ واضح جدا إن حب ميرنا عاميك لدرجة إنها قستك عليا. ميرنا كانت لسه هاتتكلم بس سكتت بفرح وخبث لما لقت خالد بيقول بغضب وعصبية: مش هاسمحلك يا ماما توقعي بيني وبينها. ولو سمحتي مالكيش دعوة بيها نهائي. فتحيّة بصت على ميرنا لقتها بتبصلها بخبث وشماتة. رجعت

بصت على خالد وقالت ببكاء: خلاص اللي يريحك يا خالد. طالما انت مبسوط. واسفة لو زيارتي كانت تقيلة عليك. لفت وشها ومشت بقهر وندم، وعرفِت إن ربنا بياخد حق رنيم منها. أول لما فتحية مشت ميرنا اتمسكنت وقالت وهى منزلة راسها بحزن: أنا مش عارفة ليه مامتك بتكرهني، أنا معملتش ليها حاجة خالص علشان تعاملني كدا.. بس يمكن لو أنا عملت اللي هي عايزاه تحبني. خالد رفع راسها وهو

بيمسح دموعها وقال بحنية: أنا عارف إنك مش غلطانة. لإنّي صحيت على صوت زعقها. وكمان حتى لو انتي غلطانة دا مايديهاش الحق إنها تزعقلك كدا. كان المفروض تجيلي أنا وتشتكي. ميرنا ابتسمت وقالت: يدوبك بقى هاروح أحضرلك الغدا علشان تاكل وتلحق ميعادك. خالد باس راسها وقال: ادعيلي نتفق احنا وهو.. عارفة يا ميرنا لو اتفقنا وتمت الصفقة أنا هاجبلك طقم دهب عيار ٢٤ غير الشبكة اللي معاكي. ميرنا

ابتسمت بطمع وقالت في سرها: دا انت بتسهل عليا اللي أنا عايزاه من غير حتى ما أخطط. قعدوا وكلوا، وخالد نزل وراح على الشركة. وميرنا موبايلها رن. مسكته بلهفة علشان تشوف مين لقت الرقم غريب. ابتسمت بخبث وفتحت المكالمة.