رواية رغبة الانتقام الفصل السادس عشر 16 - بقلم اية عبدالسلام

بتستغفلينى؟ طلعتى متجوزة وبتلعبي على أميرنا. وسعت عيونها بصدمة وبصتله بخوف وقالت بتوتر: انت عرفت منين؟ إيهاب بغضب وهو بيحدف الكوباية: هو دا اللي هامك؟ اللي هامك إني خبيتي عليا حاجة زي دي. للدرجادي أنا مشاعري عندك ملهاش ولا أي قيمة؟ ليه سبتيني أتقرب منك من الأول؟ كمل بزعيق: ما تردي! ساكتة ليه؟ ميرنا من كتر خوفها من منظره فضلت تفكر لحد ما قالت وهي بتتصنع البكاء: محدش فيكم كويس.. كلكم وحشين.

إيهاب بصدمة وغضب: انتي بتقولي إيه؟ ميرنا وهي بتتشحتف: مش كفاية عليا جوزي الظالم؟ هتيجي انت كمان وتكمل عليا؟ إيهاب ضم حواجبه بعدم فهم وقال بعصبية: وضحي. ميرنا أخدت نفسها وقالت وهي بتبكي: أنا متجوزتوش بإرادتي.. أنا اتجوزته غصب عني.. هو اللي هددني عشان أتجوزه.. أنا مبكرهش في حياتي قدها. إيهاب بصدمة: إيه؟ ميرنا بتمثيل الحزن: أنا شفت معاه أسود أيام حياتي.. من ضرب لذل لإهانة لحد ما خلاص معنتش قادرة أستحمل أكتر من كده.

مثلت البراءة وهي بتبص له: أنا كنت خلاص عايشة من غير روح.. بس بعد ما قابلتك وأنا حسيت نفسي عايشة.. بعد ما حبيتك حزنت أكتر لأني أدركت إني ضيعت سنين كتير من حياتي مع اللي ميستحقنيش. إيهاب فضل باصصلها بشفقة وبعدين قال: وانتي ليه ماقولتيش من الأول؟ ميرنا بحزن وهي بتنزل راسها: خفت لتسبني وتمشي. قامت وقفت قدامه وحضنته وقالت بدموع: متتخليش عني يا إيهاب.. أنت أملي الوحيد في الدنيا دي.

بعدها عن حضنه ببرود وقال: بس انتي ست متجوزة وحرام اللي إحنا بنعمله ده. ميرنا قالت بسرعة: هطلق منه. إيهاب بجمود: للأسف مش هينفع عشان انتي كدبتي عليا وماقولتيش من الأول. ميرنا بصدمة: يعني إيه؟ إيهاب ببرود: يعني اللي سمعتيه.. واتفضلي اخرجي بره. ميرنا فضلت واقفة متجمدة مكانها وهو قال بزعيق: أنا مش قولت بره؟ ميرنا خرجت بصدمة وهي بتقول: يعني إيه.. يعني كل حاجة باظت؟

قالت بحقد وغل: لأ.. مستحيل دا يحصل.. مش بعد كل اللي أنا عملته ده وفي الآخر أطلع من المولد بلا حمص.. أنا لازم أعمل حاجة. روحت البيت وهي متعكننة ولقيت فتحية بتقول بإستغراب: فين الحاجة اللي انتي جبتيها؟ ميرنا بصت عليها بغل ودخلت ورزعت باب أوضتها في وشها. فتحية بإستغراب: مالها دي؟ عند خالد. كان قاعد مش قادر وعمال يعرق وحاسس نفسه عايز ينام. دخل عليه محمود وقال بصدمة: خالد إنت مالك؟ خالد بتعب: مفيش.

محمود بإعتراض: لأ طبعاً.. انت بتقول إيه دا؟ انت بتاخد نفسك بالعافية.. انت لازم تروح ترتاح. خالد بضيق: أنا مش مروح في حتة.. وبعدين انت كنت جاي ليه؟ محمود: جاي عشان أقولك إن منصور بيه قدم ميعاد توقيع الصفقة وهيتبقى النهاردة بدل بكرة عشان هيسافر بكرة ضروري. خالد بتعب وصداع: هو هييجي إمتى؟ محمود: جاي في الطريق خلاص. خالد: ماشي.. اخرج انت بس عشان هظبط الورق بتاع الصفقة.

محمد هز راسه بقلة حيلة وخرج وخالد مسك الأوراق وفضل يظبط فيهم. بعد شوية. كانوا كلهم في الاجتماع وكل واحد راجع ورق التاني لحد ما تمت الصفقة. منصور بيه بعد ما مضى قال لخالد بإستغراب: انت مالك كدا؟ خالد بتعب: مافيش.. أنا تعبان شوية بس. منصور ببرود: روح اكشف عشان حالتك متطمنش. خالد هز راسه وقام خرج من الشركة عشان يريح شوية. بعد شوية وقت. عند رنيم ومحمد. محمد بضحك وخبث: كده تقريبا كل حاجة تم.

رنيم بخبث وشماتة: يستاهلوا كل اللي هيجرالهم.. وهما اللي ابتدوا. محمد ورنيم في نفس واحد: 123 وضغطوا على زر الإرسال في الواتساب. خالد كان قاعد على سريره وفجأة جاله على الواتساب: اتفرج على الحاجات دي واعرف انت متأثر قد إيه. ضم حواجبه بعدم فهم وفجأة وسعت عيونه بصدمة وغضب لما لقى صور ميرنا وهي حاضنة واحد. خالد بصدمة وعدم استيعاب: مستحيل.

وقبل ما ياخد أي ردة فعل لقى نفس الرقم باعتله فيديو.. فتحه وإيده بتترعش وقال بغضب وغل وهو سامعها بتقول إنها متجوزاه بالغصب وعايزة تطلق منه: يابنت الكلب يا خاينة. رمى موبايله جامد على الأرض لدرجة إنه اتكسر وخرج برا وجاب ميرنا من شعرها وفضل يضرب فيها من غير رحمة وهو بيقول بقهر: عملتي كده ليه؟ دا أنا بعت الدنيا عشانك وفي الآخر تعملي فيا كده؟ ميرنا فضلت تصوت بوجع وهي بتقول بصريخ: انت بتعمل إيه؟ انت اتجننت؟

خالد بغضب: اخرسي. فتحتية قامت بخضة من صوت الزعيق وخرجت بره واتصدمت لما لقت خالد بيموت ميرنا ضرب وهي تحت إيده ومش قادرة تاخد نفسها. فتحتية جرت عليه وقالت بفزع وهي بتحاول تبعده عنها: انت بتعمل إيه؟ انت اتجننت؟ ابعد كدا البت هتموت في إيدك. خالد زقها وهو مش في وعيه وكمل ضرب في ميرنا: ليه تعملي كده.. أنا حرمتك من إيه.. أنا حبيتك من كل قلبي. ميرنا وهي بتفقد وعيها: ابعد عني.

جرس الباب رن وفتحتية قامت تفتحه بسرعة عشان تستنجد باللي بيخبط بس اتصدمت لما لقت البوليس. الظابط بصدمة: انت بتعمل إيه يا حيوان انت؟ وزقه جامد. خالد كان لسه هيزقه عشان يكمل ضرب بس العساكر مسكته. الظابط: خدوه على البوكس بسرعة واطلبوا الإسعاف.. انتوا مستنين إيه؟ خدوا خالد وهو عمال يقاوم ويرفس وعمال يقول: هقتلك يابنت الكلب هقتلك.