رواية رماني حظي العاثر عليه قلت ما أبيه و أتاريني ميته فيه الفصل السادس 6 - بقلم Misoo

.. صباح يوم جديد ..

طلعت مثل كل يوم في هالوقت رايحة للنادي تسوي رياضة وتسبح .. وأبد ما هما لاا سامي ولاا كلامه .. وحتى إنها نست شعور الخوف والرعب إلي دب فيها .. بمجرد ما أبتعدت عنه .. وبعد ما خلصت رجعت وهي تغني وحدها ريلااكس .. نهى: هذا أنا في وحديتي بعدك على الله العوض لاا شفتني بمرايتـ....
ضاع الكلاام منها فجأة وهي تجوفه واقف جدامها وهو بقمــة عصبيــته .. سامي من غير مقدمات ..
مسكها من يدها بقوة ودخلها الميلس (المجلس) وسكر بابه وهي مازالت بين يدينه .. لف لها وهو يحاول يضبط نفسه .. سامي وهو يرص على أسنانه: ممكن أفهم شنو معنى إلي سويتيه ..!! هااا ردي يعني على بالج إني ثور جدامج تستغفليني وتطلعين .. وانصدم فيج رايحه الابراج ولاا بعد يوم الثاني طالعه .. ولاا حتى فكرتي تطرشين لي مسج .. مع إني حذرتج من قبل!!
من الخوف ما قدرت ترد أكتفت تناظره برعب .. نهى:.............
نفضها من يده بقوه لدرجة طاحت على الكنبة .. سامي: والله لو أنا مو في بيت أبوج كان حصل لج شي عمرج ما جفتيه
زاد الخوف في قلبها .. بس حاولت كثر ما تقدر إنها ما تبين له .. نهى بتردد وقهر: شنو يعني بـ.ـطقـ.ـني
ابتسم بسخرية وهو وده يعطيها بدل الكف كفوف .. بس مسك نفسه .. سامي :لو بيدي مو أطقج بس لااا أكسر راسج بعد ..
نهى:.................
خذ نفس عميق وهو يحاول يهدي من نفسه .. سامي: سمعيني يا نهى لاا تتوقعين إن هالموضوع بيعدي جذي والسلاام لااا غلطانه .. بس كل شي و بوقته حلو .. والحركة الغبية والعناد إلي ما بيوديج غير في ستين داهيه راح تتعاقبين عليه .. بس الوعد بعد الشهرين .. مع إن ودي أقدمه .. بس أنا مو فاضي لج حالياً وعندي شغل أهم منج .. بس هي كلمه وما راح أعيدها .. قسم بالله يا نهى والله إن رجعتي وسويتيها وطلعتي من دون شوري والله ما راح يحصل لج طيب .. ساااامعه
هزت راسها بإي والدموع بدت تتجمع في عيونها .. نهى بهمس: سامعه !
طالعها بنظره ما فهمت معناها .. وبعدها طلع من دون حتى ما يقول لها "مع السلاامه"

.. بعد مرور اسبوعيـــن ..

في لندن

.. خلصت الامتحانات النهائية للفصل وكانت متعبه وكئيبة لكل الطلبه .. وأولهم "ريــــما" إلي عانت وشدت حيلها كثر ما تقدر علشان تنجح والحمد الله تعبها ما راح هباءاً منثورا درست واجتهدت وقدمت أوكيــه بس تنتظر النتيجة على إنها متأكده 100% إنها ناجحة ..
.."الشلــــه" تعبوا وعانوا وفي منهم من قدر وقدم أحسن ما يكون .. وفي منهم من عفس الدنيا فوق تحت .. لأن بسهوله كل شي تبخر وطبعاً هذا الشي كانوا يعانون منه الأغلبيه ..
.. في هالفترة كلٍ كان لااهي بدراسته ومحد معطي أحد أهتمام وهالشي ريح "ريـــما" وايد ..

.. كانت ترتب شنطتها للسفر وهي ميته رعب من عمها إلي مو عارفه هل راح يستقبلها وله لاا .. وهي عارفة انه زعلاان منها وطالب من بنته و زوجته إنهم ما يكلمونها .. ريما بهمس: ياربي شنو راح أسوي إذا طردني وما رضى يسامحني .. يا رب حنن قلب عمي علي
.. رفعت تلفونها ودقت على طلال .. وكلها لحظات و وصل لها صوته .. طلال:هلاا والله
ريما: هلاا بيك .. وينك؟
طلال وهو يتنهد: توني طالع من البيت
ريما بحزن: أهاا طيب أنا جاهزة
طلال: خلااص كلها دقايق وأكون عندج
ريما:أوكي باي
طلال: باي
.. سكرت منه وهي تحس بحزن عميــق إنها ما راح تجوفه لـمدة 3 شهور وهي إلي تعودت كل يوم تجوفه وتطلع معاه ..

..كانوا قاعدين بمكانهم المعتاد مجتمعين .. نواف وهو يبتسم:آآه واخيراً بنرجع للأهل
خالد وهو يتنهد:إي والله وحشتني البحرين وأهلها
فاتي بحزن:آه الله يعين
الكل طالعها بإستغراب من حزنها .. وليد بـ لقافته المعتادة:خير ليش الحزن .. كله علشان بترجعين؟
ابتسمت من ورا قلبها .."آآه وراكم ما تدرون" .. فاتي: بتوحشوني تعودت عليكم وما أتخيل يمر يوم ما أجوفكم
سنا وشوي بتصيح: لااا بليز إسكتي ما بدي أبكي بليز
جاسم : ههههههههه وقسم إنكم نكته يا البنات على أقل شي تصيحون
.. طالع بساعته وعلى طول قام .. جاسم: يلااا شباب صبايا مطر أمشي
خالد:أفاا وين تو الناس
جاسم وهو يرفع حاجب: وين تو الناس والرحلة بعد ساعة .. لاا يكون منت بمسافر؟؟
خالد وهو يعدل قعدته: لاا ما بسافر اليوم .. أنا حجزت رحله حق بكره ..
وليد وهو يبتسم:أنا بعد
سنا بمرح:أما أنا بعد بكره
نواف بمرح: لاا أنا الليلة على الساعة 11 ونص طيارتي
هز راسه وهو يبتسم لهم ولف جهة فاتي ..جاسم: وانتي؟
فاتي توتر: أنا بعد اسبوعين
الكل بصدمة:اسبوعيــن!!
خالد: ليش عاد شنو بتسوين في هـ الاسبوعين بروحج وكلنا بنسافر .. لهدرجه ما اشتاقيتي حق اهلج
فاتي وهي تحاول تخفي حزنها وبكذب: لاا بس خواتي راح يكونون معاي وبعدها برجع معاهم
الكل:أهاا
جاسم وهو يسلم عليهم واحد واحد: يلااا أجوفكم على خير إن شاء الله .. بس هاا يا ويلكم أي واحد يعرس وما يقول لي ولاا يعزمني
الكل:ههههههههههه
خالد وهو يضربه بمزح: في أحد يتزوج بـ 3 شهور بس أقول روح ألحق على طيارتك لاا تطير وأنت قاعد توصي فينا
جاسم:هههههههه طيب يلااا مع السلاامة
الكل:مع السلامه
.. طلع من عندهم وعلى طول توجه للشقة وخذ شنطته إلي كان مجهزها وعلى طول توجه للمطار ..

في البحرين

.. في بيت أبو سلمى .. مندمجه في الفلم وداخله جو .. بس خرب عليها الجو صوت رنين التلفون .. وقفت الفلم وقامت بـ كسل ورفع التلفون .. سلمى: آلووو
.....:آلوو السلاام عليكم
سلمى بإستغراب: وعليكم السلاام .. نعم أختي آمري من بغيتي
......:أفاا ماعرفتيني .. لهدرجة صدمتيني بصراحة
سلمى وهي تحاول تعرف صاحبة الصوت:مسامحة يا الأخت بس شكلج غلطانة بالرقمه
......:لااا مو غلطانه مو إنتي سلمى ؟؟
سلمى بإستغراب:إي بلااا أنا سلمى بس منو إنتي والله ما عرفتج
.......:زعلتيني من قلب وهذا أنا أقول يمكن البنت تستهبل بس شكلج صج ما عرفتيني
سلمى بنفاذ صبر: بتقولين منو انتي ولاا شلون
........:أعصابج بس .. أحم أحم معاج وضحى بنت عدوان أووه قصدي عجوان أووه قصدي عدنان أووه قصدي أ...
قاطعتها بصراخ .. سلمى: وضووووح يا الدبــــــــة وحشتيني
وضحى بسخريه: إي إي بلااا واااضح والدليل تذكرتيني
سلمى بوناسة: وأحد ينساج والله على البال و الخاطر بس قسم بالله صوتج صاير غير .. وااايد صاير ناعم بزيادة
وضحى بعصبية: ناعم بعينج
سلمى بإستغراب: يه!! شفيج إنتي الحين معصبة؟؟
وضحى بقهر: ولاا شي بس إنتي تعرفيني أتحسس من هالأمور
سلمى بصدمــة:وضووح من صجج إنتي للحين على وضعج
وضحى وهي تحاول تغير الموضوع: وللأبد .. إلاا ما قلتي لي شخبارج شمسوية بعد غيبتي الطويلة
سلمى بتنهيده: بخير الحمد الله بس الملل صدقي الصدوق في الآونه الأخيرة
وضحى بطناز: أمحق باللغة الفصحى ههههه .. إلاا وين ريموو الكريها عطيني إياها وحشتني
سلمى بحزن: سافرت لندن
وضحى بصدمـة: شنوووو .. هذي مينونه وله شنووو
سلمى: والله كلنا حاولنا فيها بس هي راكبة راسها وسافرت وأبوي زعلاان عليها .. مخلينا نقاطعها علشان يمكن يطيح إلي براسها
وضحى: يا ربي من هـ الريموو طول عمرها متهورة وعنيده
سلمى: جفتي شلون .. طيب قولي لي عن أخبارج
وضحى بتنهيده: الحمد الله على كل حال .. هذا أنا مافي شي جديد في حياتي غير الشقا
سلمى بمزح: والله محد ياب الشقى لج غير إلي ما يتسمى وله أنا غلطانه
وضحى بسخرية: إي والله مالت عليه من أخوو
سلمى بضحكة: صحكتيني بصراحة عايشة الدور وبقوة بعد .. قالت أخوو ههههه لاا يسمعج بس يحذفج من الدريشة
وضحى: هههههههه إي وإنتي الصاجة .. طيب يا الدبة عطيني رقمج .. لأني الحين بطلع أهيت
سلمى: هههه طيب يا الهياته (يعني تطلع وتفلها) .. سجلي عندج 33000000
وضحى: أوكي الحين بسوي لج مس كول .. و وقت ما أفضى برجع اتصل عليج سي ياا
سلمى: هههه أوكي سي يوو
.. بعد ما سكرت رجعت للفلم وشغلته ورجعت ودخلت جو ونست كل شي من الاندماج ..

.. في المطار ..

ضمته بقوة وهي تصيح .. ريما: بتوحشني يا الدب
طلال بحنان: وإنتي أكثر وربي
بعدها عنه وصار يمسح دموعها .. طلال : الحين أبي أعرف ليش تصيحين؟؟ إلي يجوفج يقول ما راح تجوفيني مرة ثانية ولاا تسمعين صوتي
ريما وهي تبوز: لاا أصلاا كل يوم راح أتصل عليك
طلال: هههه طيب يلاا يا قلبي تحملي بروحج وسلمي لي عليهم كلهم .. يلااا هذا النداء الأخير يلاا مع السلاامة
ريما وهو تبوس خده: مع السلاامة
.. تركته ومشت عنه وهي تمسح دموعها .. وقبل لاا تدخل البوابه لطياره لفت جهته وأشرت له بيدها "باي" وهي راسمه أحلى ابتسامه .. در لها بالمثل وفي قلبه يدعي لها إن الله يرجعها سالمه

.. قاعد في الطيارة وهو حده طفشان ويناظر بالركاب وهم يدخلون .. لف لجهة النافذه وصار يطالع إلي بره .. وما حس إلا بـ شخص يقعد يمه .. ومن الريحه إلي داعبت أنفه استنتج إنها بنت .. لف وهو يبتسم .. بس أول ما وقعت عينه على الجالسه يمه تلااشت ابتسامته وحل محلها العبوس .. جاسم: بل !

نهـــــــــــاية الــــــــبارت