رواية رواسي الدهر الفصل الحادي عشر 11 - بقلم روح الدليمي

شسوووويت اني شسوووويت، بقيت حايرة شلون اخذه للغرفة ما اكدر اسحبه اني وحدي. بقيت اروح واجي بمكاني افكر بطريقة، اجت ببالي فكرة رأساً. طلعت تلفوني من الجنطة واتصلت على ادم. جاوبني بعد مدة. "ادووم محتاجة مساعدتك." "خير صاير وياج شي؟ "خَطفت رسيم." صار يضحك وكال: "صدك تحجين؟ "والله شبيك، واريدك تساعدني اريد اربطه. اطّيح حظ حظه اليوم، جيب وياك حبال قوية وتيب." "رواسي لتصيرين غبية! "تجي لو اشوف غيرك؟ "وين انتو؟

جاي امري لله." انطيته العنوان وسديته من عنده. كعدت يم راس رسيم وحجيت بصوت خافت. "اسفة حبيبي بس تستاهل، كل شي سويته بيه راح اعيده عليك. اتمنى تسامحني مثل ما سامحتك على كل شي سويته." كعدت على القنفة ونظراتي متركزة على رسيم وافكاري شيطانية، بس ميجي من كلبي اسوي بي كلشي يدور براسي. دك تلفوني، ادم جاوبته كَال: "وصلت اني، فتحيلي الباب." "يلا ثواني." رحت ركض فتحتله الباب. دخل سيارته ونزل. باوعلي واشر بإصبعه

على راسي وكال بنفاذ صبر: "شنوو هنااا؟ بس فهميني؟؟؟ "قندرة لو براسي دماغ چان ما حبيته." "مو بس قندرة قنادر والله، وينه؟ "نايم بالگاع." مشيت كدامه ودخلت، اشرتله عليه. تقرب منه، رفعه وكال: "وين اودي؟ "هنا لهاي الغرفة." اشرتله على نفس الغرفة اللي حطني بيها لما خطفني. سحبه من ايده ودخله للغرفة، حطه على الجرباية وكال: "شنو ناويه تسوين؟ "جبت الحبال؟ "اي بالسيارة." حجيت باستعجال:

"بسرعة جيبهن واربطه بطريقة ميكدر يفتح روحه ابد." هز راسه معاجبه وطلع من الغرفة. شوي ورجع بيده كيس بي حبال وتيب. طلع الحبال من الكيس وراح عليه. ربط ايده وره ظهره ورجله وكال: "لهنا واعفيني بعد ما اتورط وياه." "اخر طلب." "شنو انوب؟ "جيب كم شغله للبيت فارغه." هز راسه وطلع بدون ما يحجي. رحت كعدت يم رسيم وصرت امشي اصابعي بخفة ارسم ملامحه. نزلت راسي عليه وطبعت بوسة على شفته.

اخذني الواهس صرت اوزع بوساتي على كامل وجهه. فتحت اول كم دكمة من قميصه وطبعت بوسة على مكان الطلقة، الاثر بعده واضح كلش. مرت ساعة كاملة واني على نفس قربي منه. دك عليه ادم، طلعتله اخذت منه الاغراض وتشكرته. راح هوَ واني دخلت للبيت. حطيت الاغراض بالمطبخ ورحت اخذت گيتر من جنطتي. لميت شعري، صفكت ايد بايد وگلت بحماس: "صار وقت تنفيذ الخطه... بقيت انتظر تقريباً ٤ ساعات لحتى بلش يصحى رسيم.

كمت من مكاني وطلعت من الغرفة. متوترة كلش، اختفت كل قوتي مجرد ما رجع يستعيد وعيه. بعد عشر دقايق صار يصيح بصوت عالي: "رواسيييي وينهاااا؟ ليششش رابطينيييي يااا **** وينكمممم؟ دك تلفوني وفضحني. جاوبت بسرعة وحجيت بهمس: "نعممم بابا." "وينج بنتي؟ ابتعدت عن الغرفة بسبب صوت رسيم وحجيته. "ويه رسيم." "اعرف بس تأخرتي! "راح ابقى هنا بعدين ارجع ليظل بالكم." عاط بيه. ابعدت التلفون عن اذني انتظرته يخلص عياط وغلط ورجعت حجيت:

"بس اهدأ ريلاكس دادي." "خلي يرجعج بسرعة يلا مو تكولين ما اريده؟ شمعندج وياه؟ "ميكدر يرجعني هسه بعدين عود. ليظل بالكم حبيبي انتَ." غلط عليه وسد التلفون بوجهي. حقه خبلتهم ويايه كل ساعة برأي. صوت رسيم صار اعلى وهوَ يسب ويغلط على الشخص اللي مربطه بهاي الطريقة. ضبطت نفسي وانتظرت دكات گلبي تستقر. مشيت بكل ثقة ودخلت للغرفة. صارت عيني بعينه. باوعلي بصدمة وكال: "انتِ هيج سويتي مو؟ ابتسمت وتقدمت عليه وحجيت:

"لان احبك، اريد اعذبك شوي." عاط بيه بصوت عالي وكال بأمر: "تعاااايي فتحيييي ايدييييي بسرررررعة! كعدت على الكرسي اللي چان يكعد عليه، حطيت رجل على رجل وحجيت بهدوء: "تؤتؤ، بعد مو هسه." قدمت جسمي عليه واردفت: "بشنو حرگتني حبيبي؟ "اني اعلمج رواسي، يصير خير." نزلت روحي اكثر عليه وطبعت بوسة على شفته وحجيت: "كل خير راح يصير وداعِتك." "سوالفي لتبيعيهن عليه روسيه، تندمين." نمت من مكاني وحجيت بقهر:

"ندمانه لان حبيتك رسيم، اكبر ندم بحياتي هوَ حبي الك." طلعت من الغرفة وعفته. بگينه اسبوع كامل. اكعد انطي ريوك، بعدها اطلع اروح لدوامي بسيارته. ومن ارجع امر لبنتي اشوفها بالمستشفى وارجع للبيت انطي اكل واعوفه بالغرفة بنفس حالته. يصيح ويسب ويشتم ما اهتميت اله ابد. گاعدة مثل عادتي اگلّب بتلفوني. صار يصيح باسمي بصوت مسموع. كمت من مكاني ودخلت عليه. گال: "شنو تردين من الاخير؟

"ولا شي، عاجبني الوضع ومستمتعة واني اشوفك هيج متعذب كدامي ومتكدر تسويلي شي." "صدگيني رواسي و حك الي زرع حبج بگَلبي، اخليج تبجين وتعضين اصابعج ندم على سوايتج هاي! مشيت وكعدت يمه على الجرباية. مديت ايدي على الحبل اريد افتحه بس ما گدرت. گمت جبت سكينة ورجعت كصيت الحبل. فتحت رجله وبعدها فتحت ايده. صار يفرك بيده متألم ومكان الحبل صاير احمر على زراك. اخذت ايده بيدي حطيت السكينة بيده وحجيت بثقة:

"ما اندم على السويته بيك ابد، بس اذا تريد تبرد گلّبك ف اذبحني موتني وخليني ارتاح واريحك مني." شمر السكينة بالگاع ومد ايده بكل هدوء على شفتي. غمضت عيوني متوترة. صار يمشي اصابعه عليها وعلى غفلة بيده الثانية سحبني من شعري بكل قوته وحجه بتهديد وصياح: "انننييييي تلعبيييين عليه ولجججج؟؟؟ عطت بالم وحجيت: "دتأذينيييي عوفنييييي." ضربني بقوة على وجهي ورجع گال:

"خاف جنت ناوي أطلك هيا هالفترة، بس هسه تحلمين حلم يا رواسي اطلكها وترجعين للبيت غصب عنج وعن اهلج! مديت ايدي عليه وحجيت متصنعة القوة: "لتطلكهااا ميهمني ما اريدك ولا اريد شوفة وجهك بعد. سويت هيج حتى تكرهني واتوقع نجحت بهذا الشي." قرب راسي عليه صارت كصته بكصتي وكال بهدوء: "غلطانة روسيه، قوتج هاي وعدم خوفج تخليني أهيم بيج اكثر." بعدت روحي عنه وحجيت بصياح: "بعدددد شنووو اسوييي حتى تكرهنييي وتعوفني بحالي؟؟؟

"حتى لو كرهتج ابقيج يمي وما اسمحلج تبتعدين ابد." كمت من مكاني وحجيت: "ميفيد بيك بس الخيانة راح اخونك حتى تطلكني." طفر من الجرباية اجه يمي وفر وجهي براشدي وعاط بيه: "لوو شمااا تسوييين ما اطلكججج، اذبحج بيدي ولا اسمحلج تنفصلين عني وتروحين لغيري." جرني من خصري وطبع بوسة عميقة. ابتعد عني. رفعت ايدي وضربته وحجيت بتهديد: "اذا بعد تمد ايدك عليه اكطع القندرة عليك خاف متعرف." عصرني من فكي بكل قوته وحجه بنتر:

"ولجججج تأدبييييي وتاليييي وياججج؟ لزمت ايده اريد أوخرها عني بس چان يزيد بالضغط. "عوفننييي." نزل ايده وكال بهدوء: "تعلمي الاحترام روسيه، اني مو جاهل تغلطين عليه! "تعامل ويايه عدل وشوف الاحترام، مو مشبعني ضرب وقهر وتريدني احترمك؟ فتح ايده وكال: "تعالي بحضني." درت وجهي عنه ردت اطلع من الغرفة. اردف: "اذا أطلك هيا ترجعين؟ "مراح تطلكها اني اعرف تكذب عليه مثل المرة القبلها." اجه باتجاهي سحبني لحضنه

ومسح على راسي بهدوء وكال: "البنية جانت بمشكلة هيَ كرايبي تصير، وحبيت اساعدها تزوجتها صار سنة." حطيت ايدي على صدره ابعد بروحي بس چان عاصرني عصر بحضنه. اردف: "من ردت أطلگها أهلها حلفوا عليها بس تتطلك يذبحوها ما عدهم بنية تتطلك وترجع لبيت أهلها." ركزت عيوني بعيونه وحجيت بنبرة حزن: "ليش تساعد الكل وتخاف عليهم بس اني لا؟ "اخاف عليج اكثر من روحي روسيه." ضربته على صدره وحجيت بنفس النبرة:

"جذااااب أنتَ اكبر جذاااب بالعالم كله، تحب تأذيني وتحس روحك متملگني. رسيم اني بشر وعندي احساس ومشاعر مو جمااااد اني وما احسسس." "رجعي وخلّينا نبلش صفحة جديدة وكل شي تريديه يجرالج." ابتعدت عن حضنه وگلت: "امشي رجعني للبيت ابويه معصب كلش." "ما جاوبتيني." "اثبتلي حبك الي واسعدني واذا بوقتها ما رجعت الك، شتريد تسوي بيه سوي. اهم شي عندي تغير روحك علمودي. بذاك الوكت لو العالم كلها تصير ضدي اني اصير وياك وارجعلك."

عفته وطلعت من الغرفة. اخذت اغراضي وطلعت انتظره بره يم السيارة. شوي وطلع بس وجهه تعبان كلش وواضح عليه حيله مهدود. فتحت السيارة وصعدت بجهة السايق وگلت: "يلا اصعد." رفع حاجبه يباوعلي وكال متسائل: "تسوقين؟ "اي يلا." صعد بالسيارة حركت وطلعنه. طول الطريق ساكتين ما حجينه حرف واحد. وصلت بيتنه التفتت عليه وحجيت: "انزل ويايه." "ما اتحمل اكعد ويا ابوج بمكان واحد يكفي مرتين كعدت وياه." "كلنه نتغير رسيم!

تأفف بضجر ونزل من السيارة. دخلنا ودگيت الباب. سمعت صوت امي من وره الباب: "منوو؟ "اني ماما رسيم ويايه." "ثواني." راح صوتها شوي ورجعت فتحت الباب. اخذتني بحضنها وكالت بخوف: "ويننن جنتييي ولجج خوفتينه عليج! "ويه رسيم امي خلي ندخل راح يوكع بعد شوي." سلم على امي من وره خشمه ودخل للصالة. رحت للمطبخ اشوف امي شمسوية اكل. اجت يمي وكالت: "ابوج مزعوج منج هوايه روسيه." فتحت الجدر وحجيت: "ماكو داعي ينزعج ترا رسيم زوجي مو غريب."

سحبتني من ايدي وحجت بنتر: "اكوو وحدة عاقلة تسوي سوايتج؟؟؟ تردي يذبحج يعني! طلعت مواعين من الكاونتر وگلت: "شسويت ليش؟ نترت بيه بصوت خافت: "شنووو تخطفييين زوجج مخبلة أنتِ ؟؟؟ لو انعديتي منه وصرتي نسخة عن اطباعه؟؟؟ درت روحي عليها بستها من راسها وحجيت: "امي حبيبتي أنتِ چان لازم اسوي هيج، وبعدين المفروض اتكيفين رجعتها اله مثل ما خطفني خطفته! صبيت الاكل بالمواعين مسوية باميه وتمن. حطيتهم بصينية ورتبت صحن

خضار و صبيت لبن واردفت: "اذا رسيم ميتغير اني مستحيل ارجعله. ثبتتله انو اني ما اخاف من عنده واذا يأذيني أأذي." "الله يهديج بنتي، خطفة الج غيرج هوايه مو بنتي الاعرفها. ابوج اذا يعرف يطيح حظج مناقصنه مشاكل من زوجج." شلت الصينية اريد اطلع وحجيت: "اي والله اتفق وياج اني بنفسي مو عارفة نفسي." طلعت من المطبخ ودخلت للصالة حطيت الصينية بالكاع وگلت: "يلا تعال ناكل." رفع عيونه يباوعلي وكال: "ابوس ايدج فهميني شنو يدور بعقلج؟؟

ما جنتييي هيج أنتِ شنو الي غيرج؟ كعدت بالكاع تربعت وگلت: "مو ممكن تكون أنتَ السبب؟ كام من مكانه كعد يمي وكال: "شنو تريدين فهميني شلون ترجعين نفس ما جنتي؟ "من اعيش حياتي مرتاحة بدون خوف انو انضرب او اتأذى، من يصير كلشي مثل ما جنت احلم بي. و هسه اكل شوي صار كم يوم تاكل بس جبن وخبز." لزم ايدي نترتها من عنده وحجيت: "تحلممم اخلييكك تطخني بعد اذا متغير من روحك و تترك العنف."

مديت ايدي اخذت خاشوكة وصرت اكل ما اهتميت اله. استسلم من الجوع وصار ياكل وياي. انفتح باب البيت ودخل ابويه صار يخزر برسيم وعاط بيه: "ويننننن اخذتهااااا صارلها اسبوووع! اخذ كلاص اللبن شربه كله بمرة وحدة وكال: "لازم تغير صيغة السؤال عمي ال.. الغالي." "وين جنتي بنتي هم رجع سوالج شي؟ كام رسيم من مكانه باوع لامي وكال: "عاشت ايدج." اندار على ابويه واردف: "گتلك غير صيغة السؤال، لازم تسئلها سويتيله شي؟ رفع حاجبه

مستغرب من كلام رسيم وكال: "شمسويه؟ عفت الاكل وشلت الصينية من الكاع وحجيت: "خطفته." عفتهم ودخلت للمطبخ غسلت المواعين. سويت گهوه لرسيم وترستها ملح. صارت عبارة عن ملح. ابتسمت بخبث واخذتها حطيتها يمه على الطبله وهوَ مستمر يسولف ويه ابويه وينتاكرون سوه. اخذ الفنجان بيده راد يشرب. انبنى ضميري خاف يصير بي شي. عطت بي: "لاااا لتشرررببب عوفهااا." گال مستغرب: "ليش حاطتلي سم بيها؟ عادي هم اشربها." كمت عليه

اخذت الفنجان من ايده وگلت: "هسه اسويلك غيرها ختولي هاي مو طيبة." اشر ابويه بيده وكال: "جيبيها اني اشربها وسويله غيرها متعود على كهوتج المحروكة." توترت كلش وحجيت: "لا مو طيبة ابد ما انصحك بيها." گام رسيم من مكانه اخذ الفنجان وشرب منها شوي. غص وصار يكح بقوة مختنك. "گتلك لتشربها ما سمعت مني تستاهل." "شحاطتلههه ولججج؟ "شوية گهوه وطَن من الملح." جابتله امي گلاص مي اخذه شربه كله مرة وحدة. وباوعلي بنظرات غضب حجيت:

"كلنه نتغير رسيم دير بالك تعيط." عدل ملامح وجهه وكال: "لا تخبل، وين اكو مثل كهوتج اصلاً." "هسه اني اسويلكم رواسي متعرف تسوي شي." باوعتلي خزرتني واردفت بتهديد: "موو بنتي؟؟ هزيت راسي ما ايدتها وگلت: "اي اي صحيح." "عوفي الگهوه وتعالي كعدي خلي نحجي مثل البشر." "صار ساعة تكول نحجي ونحجي وكضيتها تنتر بيه." "رواسي خلي ابوج يسكت." "انجب أنتَ مو ابويه الي يسكت." كام من مكانه تقرب عليه. ابويه عاط بيه:

"اذا تخطي خطوة وحدة بعد تجاها اكطع القندرة عليك واطردك." "گتلج عائلة متوارثة قنادر ما صدگتيني." رجع كعد مكانه واني كعدت مقابيله بصف ابويه. ركز بعيوني وكال: "ترجعين ويايه وهسه." "گتلك ما ارجع اذا متتغير، اذا تبقى هيج اني هم ابقى ببيت اهلي." "روسيه عُمري، كافي لتكبريها! "أنتَ تعرف بروحك شسويت لو لا؟؟؟ "شسويتلج هذا كله لان ما طلكت هياااا! عطت بي وحجيت بعصبية:

"اخر همي هياا وگتلك قبل، أنتَ اذيتني وتغيرت عليه وفوقها دفعتني وبسببك بنتي لحد هسه ما اخذتها بحضني ولا گدرت ابوسها فوگها تريد تسميها على اسم مرتك." فرك وجهه بقوه وكال بهدوء عكس ملامحه: "بالغلط والله مو قصدي ادفعج، والاسم بس حتى أقهرج." باوعت على امي وابويه ساكتين يستمعون النه بكل تركيز وحجيت: "و خطفك الي هم بدون قصد؟؟ والحرك اللي بزندي هم بدون قصد؟؟ والحثالة الي عفتهم يضربوني ويكهربوني هم بدون قصد رسيييممممم!

نزل راسه وبقه ساكت ما نطق حرف. اردفت: "جاوبنييييي رسيييممم جاوب! اذا حبيتك اني مو معناها نسيت الي سويته بيه، صح رجعتلك بس رجعت حتى أقهر ابويه مثل ما قهرني بالحقيقيه! ابويه حط ايده على رجلي وكال بحزن: "اذا تردين تطلكين من عنده." قاطعته وگلت بقهر: "شلووون أتطلك منه وهوَ يهددني بيك وببنتي؟؟

"بنتج ماله حق يحرمج منها ابد، واذا عليه اني ف بنفسي اروح واحجي كلشي وخلي انسجن بالنهاية مو بقصدي صار هالشي. و ندمان كلش على الساعة اللي سكتت بيها وما رحت من البداية واعترفت على روحي." رفع راسه رسيم وكال بنتر: "اذا أنتَ ابن امك وابوك ف روح سلم روحك احسن حتى فوتك للسجن متصير بسببي." باوعت لرسيم وحجيت بتهديد: "والله اذا ابويه ينسجن تحلم حلم اخليك تشوفني بعد."

رسيم صار يصيح من جهة وابويه يصيح من جهة. امي صارت تبجي وتحاول تهديهم ثنينهم. كمت على رسيم لزمت ايده وگلت: "اذا تريد ايدي تبقى بين ايدك، موضوع ابويه تنساه." نتر ايدي من عنده وعاط بيه: "ولجججج ابوووج موتتت امييي شتحجييين أنتِ." "موتني اني واخذ ثارك من عنده يلا، مو خطفتني أنتَ حتى تجبره يعترف على روحه؟ حتى ينسد هذا الموضوع اذبحنييي رسيم موتني و خلينا كلنا نخلص."

اخذت مفتاح السيارة مالته من الطبله، طلعت بدون اي كلمة زايدة. فتحتها واخذت مسدسه اللي بالجكمجة. رجعت للبيت وبيدي المسدس. ابويه عاط بيه بخوف: "روااااسيي عوفي السلاح." امي تبجي وتصيح باسمي. ابتسمت بوجهه وحجيت بهدوء: "راح ينتهي كلشي بابا ورسيم الي راح ينهي بيده." "بلا خباااال جيبي المسدسس رواسيييي." "موتني رسيم اخذ بثارك يلا." "ولججج بنتي عوفييي، فكري ببنتج وبيننه احنه."

تقدمت على رسيم لزمت ايده بقوه وخليتها على المسدس وضغطت على صدري. نزلت دموعي وحجيت: "مراح تخليني ارتاح ابد، موتني وخلينا نرتاح كلنا." يخاف يسحب ايده وبالغلط تنضرب طلقة. نزل راسه عليه وباسني من راسي وكال بخوف: "حَبيبتي أنتِ عوفي يلا وعد انسى كلشي بس عوفي المسدس من ايدج." عطت بي بصوت عالي: "كتلككككك اضرربنيييي يلا! اذا متضربني بالسلاح أنتَ اني اضرب روحي." حاول يسحبه مني وبلحظة وحدة طلعت طلقة من مسدسه. يتبع...